Sipapasnek nga Agiinnayatkayo

1. Ania ti espesipiko a bilin ni Jesus kadagiti adalanna? (Kitaen ti ladawan iti akkub.)

ITI rabii sakbay ti ipapatay ni Jesus, nangted iti espesipiko a bilin kadagiti adalanna. Imbagana: “No kasano ti panangayatko kadakayo, kasta met ti panagiinnayatyo.” Sa innayonna: “Maammuanto ti amin a dakayo dagiti adalak—no agiinnayatkayo.”—Juan 13:34, 35.

2. Apay a napateg nga ipakita ti ayat iti maysa ken maysa?

² Imbaga ni Jesus a silalawagto a mailasin ida dagiti tattao kas pudno nga ad-adalanna no ipakitada ti isu met laeng nga ayat nga impakitana. Pudno dayta idi umuna a siglo, ket pudno met dayta ita. Nakapatpateg ngarud nga agiinnayattayo uray no narigat dayta!

3. Ania ti usigentayo iti daytoy nga artikulo?

³ Gapu ta imperpektotayo, marigatantayo a mangipakita iti napasnek nga ayat iti maysa ken maysa. Ngem masapul latta nga ikagumaantayo a tuladen ni Kristo. Iti daytoy nga artikulo, usigentayo no kasano a matulongannatayo ti ayat nga agbalin a mannakikappia, di manangidumduma, ken managpadagus. Bayat nga ad-adalem daytoy a material, isaludsodmo iti bagim: ‘Ania ti masursurok kadagiti kakabsat a nagtultuloy a nangipakita iti ayat iti maysa ken maysa uray no narigat?’

AGBALIN A MANNAKIKAPPIA

4. Sigun iti Mateo 5:23, 24, apay a masapul a makikappiatayo iti kabsat nga adda gurana kadatayo?

⁴ Insuro ni Jesus ti kinapateg ti pannakikappia iti kabsat nga adda gurana kadatayo. (Basaen ti Mateo 5:23, 24.) Impaganetgetna a masapul a pagtalinaedentayo ti nasayaat a relasiontayo iti sabsabali tapno maay-ayotayo ti Dios. Naragsak ni Jehova no ikagumaantayo ti makikappia kadagiti kakabsattayo. Saanna nga awaten ti panagdayawtayo no adda ing-ingpentayo a sakit ti nakem ken saantay man laeng a padasen ti makikappia.—1 Juan 4:20.

5. Apay a narigatan a makikappia ti maysa a kabsat?

⁵ Mabalin a marigatantayo a makikappia. Apay? Kitaentayo ti napasamak ken Mark.b Nasaktan idi krinitikar ti maysa a kabsat ken dakes ti imbagbagana maipapan kenkuana iti kongregasion. Ania ti reaksion ni Mark? “Diak nakapagteppel ket nakapungtotak,” malagipna. Ngem idi agangay, nagbabawyan ni Mark ti inaramidna ket pinadasna ti agpadispensar iti kabsat tapno agkappiada. Ngem saan a kayat ti kabsat ti makikappia. Idi damo, pinanunot ni Mark, ‘Apay pay laeng nga ikagumaak ti makikappia no dina met kayat?’ Ngem pinaregta ti manangaywan iti sirkito a saan a sumuksuko. Ania ti inaramid ni Mark?

6. (a) Kasano nga intultuloy ni Mark nga ikagumaan ti makikappia? (b) Kasano nga inyaplikar ni Mark ti Colosas 3:13, 14?

⁶ Idi nagpanunot a naimbag ni Mark, nabigbigna a kurang ti kinapakumbabana ken managinlilinteg. Napanunotna a masapul a balbaliwanna ti kababalinna. (Col. 3:8, 9, 12) Sipapakumbaba nga immasideg manen iti kabsat sa nagpadispensar iti inaramidna. Sinursuratanna met ti kabsat, ket imbagana a pagbabbabawyanna ti inaramidna ken kayatna a maisubli ti panaggayyemda. Inikkanna pay ketdi iti babassit a regalo nga ammona a magustuanna. Makapaladingit ta adda latta sakit ti nakem ti kabsat. Ngem intultuloy ni Mark nga ayaten ken pakawanen ti kabsatna kas panagtulnog iti bilin ni Jesus. (Basaen ti Colosas 3:13, 14.) Uray no saan nga agtignay ti sabsabali iti panangikagumaantayo a makikappia, matulongannatayo ti pudpudno a Nakristianuan nga ayat nga agtultuloy a mangpakawan kadakuada ken mangikararag a sumayaatto met laeng ti bambanag.—Mat. 18:21, 22; Gal. 6:9.

7. (a) Ania ti imparegta ni Jesus nga aramidentayo? (b) Ania a narigat a situasion ti nakaipasanguan ti maysa a kabsat?

⁷ Imparegta ni Jesus nga itultuloytayo a tratuen ti sabsabali iti kayattayo a pannakatratotayo. Imbagana pay a saan laeng a dagiti mangay-ayat kadatayo ti ayatentayo. (Luc. 6:31-33) Nupay saan a gagangay a mapaspasamak, kasanon no adda kabsat iti kongregasion a manglikliklik kenka ken saannaka a kabkablaawan? Kasta ti kapadasan ni Lara. Inlawlawagna: “Saannak a pampansinen ti maysa a kabsat a babai, ket diak ammo no apay. Mais-stress-ak ket saanak a naragsak iti gimong.” Idi damo, inrason ni Lara: ‘Awan ti dakes nga inaramidko. Ken madmadlaw met ti dadduma iti kongregasion a sabsabali ti ugalina.’

8. Ania ti inaramid ni Lara tapno makikappia, ken ania ti masursurotayo iti kapadasanna?

⁸ Inkagumaan ni Lara ti makikappia. Nagkararag ken Jehova ket kinasaritana ti kabsat. Nagsaritaanda ti problema, naginnarakupda, ken nagkappiada. Kasla mayaten ti bambanag. Kinuna ni Lara: “Ngem idi kuan, inaramidna manen ti dati nga inaramidna kaniak. Kasta unay ti pannakaupayko.” Idi damo, narikna ni Lara nga agbalin laeng a naragsak no baliwan ti kabsat ti kababalinna. Ngem idi agangay, nabigbig ni Lara a ti kasayaatan a maaramidanna ket itultuloyna a siaayat a tratuen ken ‘situtulok a pakawanen’ ti kabsat. (Efe. 4:32–5:2) Nalagip ni Lara a ti pudpudno a Nakristianuan nga ayat ket “saan nga agbilbilang iti pannakadangran. Anusanna ti amin a banag, patienna ti amin a banag, namnamaenna ti amin a banag, ibturanna ti amin a banag.” (1 Cor. 13:5, 7) Nagbalin a natalna manen ti panunot ni Lara. Idi agangay, nasaysayaaten ti panangtrato kenkuana ti kabsat. No ikagumaam ti makikappia kadagiti kakabsat ken itultuloymo nga ayaten ida, masiguradom nga “addanto [kenka] ti Dios ti ayat ken ti talna.”—2 Cor. 13:11.

AGBALIN A DI MANANGIDUMDUMA

9. Sigun iti Aramid 10:34, 35, apay a masapul a ditay mangidumduma?

⁹ Saan a mangidumduma ni Jehova. (Basaen ti Aramid 10:34, 35.) No ditay mangidumduma, pampaneknekantayo nga annaknatayo ti Dios. Sursurotentayo ti bilin a panangayat iti kaarruba a kas iti bagitayo, ket mapagtalinaedtayo ti kappia iti naespirituan a pamiliatayo.—Roma 12:9, 10; Sant. 2:8, 9.

10-11. Kasano a nalabanan ti maysa a kabsat ti negatibo a rikriknana?

¹⁰ Mabalin a marigatan ti dadduma nga agtalinaed a di manangidumduma. Alaentayo a pagarigan ti napasamak iti maysa a kabsat nga agnagan Ruth. Idi tin-edyer pay, adda saan a nasayaat a kapadasanna iti maysa a naggapu iti sabali a pagilian. Ania ti epekto dayta kenkuana? Inamin ni Ruth: “Kagurak ti amin maipapan iti dayta a pagilian. Impapanko nga agpapada ti amin a tattao iti dayta a lugar, uray dagiti kakabsat.” Kasano a nalabanan ni Ruth ti negatibo a rikriknana?

¹¹ Nabigbig ni Ruth a masapul a labananna ti negatibo a panagpampanunotna. Nagbasa kadagiti kapadasan ken report iti Tinawen a Libro maipapan iti dayta a pagilian. Kinunana: “Inkagumaak ti agpanunot iti positibo maipapan kadagiti tattao iti dayta a lugar. Nangrugi a makitak a naregta dagita a kakabsat nga agserserbi ken Jehova. Nabigbigko a pasetda met ti sangalubongan a panagkakabsattayo.” In-inut a nabigbig ni Ruth nga adda pay masapul nga aramidenna. Inlawlawagna: “No adda maam-ammok a kakabsat manipud iti dayta a pagilian, ikagumaak a gayyemen ida. Makisaritaak ken am-ammuek ida a naimbag.” Ania ti resultana? Kinuna ni Ruth: “Idi agangay, napukawen ti negatibo a rikriknak.”

12. Ania ti problema ti kabsat nga agnagan Sarah?

¹² Mabalin a saan a madmadlaw ti dadduma a manangidumdumada. Kas pagarigan, impagarup ni Sarah a di manangidumduma gapu ta saanna a kitkitaen ti puli, kasasaad ti biag, wenno pribilehio ti maysa a tao. Ngem inaminna: “Nabigbigko a mangidumdumaak gayam.” Apay? Naggapu ni Sarah iti de adal a pamilia ket mas kaykayatna ti makikadua kadagiti kapadana a de adal. Naminsan, naibagana pay ketdi iti maysa a gayyemna: “Kayatko a kakadua dagiti kakabsat a de adal, ngem likliklikak dagiti saan.” Nalawag a masapul a balbaliwan ni Sarah ti kababalinna. Kasano?

13. Ania ti masursurotayo iti inaramid ni Sarah tapno agbalbaliw ti panangmatmatna?

¹³ Maysa a manangaywan iti sirkito ti timmulong ken Sarah a mangsukimat iti kababalinna. Imbagana: “Kinomendaranna ti matalek a panagserbik, nasasayaat a komentok, ken ti pannakaammok iti Kasuratan. Sa inlawlawagna a bayat nga umad-adu ti pannakaammotayo, masapul met nga ipakitatayo dagiti Nakristianuan a kualidad a kas iti kinapakumbaba, kinaemma, ken asi.” Inyaplikar dayta ni Sarah. Kinunana: “Nakitak a ti kapatgan iti amin ket agbalintayo a naasi ken naayat.” Gapu iti dayta, nagbaliw ti panangmatmatna kadagiti kakabsat. Inlawlawagna: “Inkagumaak a tarusan no ania dagiti kualidadda a makagapu nga ipatpateg ida ni Jehova.” Datayo ngay? Ditay kayat a panunoten a nangatngatotayo ngem kadagiti kakabsat gapu iti adaltayo! No sipapasnek nga ‘ayatentayo ti amin a kakabsattayo,’ maliklikantayo ti agbalin a manangidumduma.—1 Ped. 2:17.

AGBALIN A MANAGPADAGUS

14. Sigun iti Hebreo 13:16, ania ti marikna ni Jehova no agbalintayo a managpadagus?

¹⁴ Maay-ayo ni Jehova no managpadagustayo. (Basaen ti Hebreo 13:16.) Ibilbilangna dayta a paset ti panagdaydayawtayo, nangnangruna no tulongantayo dagiti agkasapulan. (Sant. 1:27; 2:14-17) Gapuna, iparparegta ti Kasuratan nga “iyugali[tayo] ti agpadagus.” (Roma 12:13) No managpadagustayo, ipakpakitatayo a pudpudno a maseknantayo iti sabsabali, ay-ayatentayo ida, ken kayattayo ti agbalin a gayyemda. Maragsakan ni Jehova aniaman ti maipaaytayo iti dadduma, merienda man dayta, mainum, makan, wenno tiempo ken atensiontayo. (1 Ped. 4:8-10) Ngem mabalin nga adda dagiti lapped no apay a marigatantayo a mangipakita iti kinamanagpadagus.

15-16. (a) Apay nga agkedked ti dadduma nga agpadagus? (b) Ania ti nakatulong ken Edit nga agbalin a managpadagus?

¹⁵ Baka agkedkedtayo nga agpadagus gapu iti agduduma a rason. Kitaentayo ti kapadasan ti maysa a balo nga agnagan Edit. Idi saan pay a Saksi, dina unay kayat ti makilanglangen iti sabsabali. Para ken Edit, mas kabaelan ti dadduma ti agpadagus ta nasaysayaat ti kasasaadda.

¹⁶ Idi nagbalinen a Saksi, binalbaliwan ni Edit ti panagpampanunotna. Inkagumaanna ti agbalin a managpadagus. Imbagana: “Idi maipatpatakder ti Kingdom Hall-mi, imbaga ti maysa a panglakayen nga adda sumangpet nga agassawa a tumulong iti panagibangon, ket dinamagna no kayatko ida a padagusen iti dua a lawas. Nalagipko no kasano a binendisionan ni Jehova ti balo a taga-Sarefat.” (1 Ar. 17:12-16) Pinadagus ni Edit ti agassawa iti balayna. Nabendisionan kadi? Inlawlawagna: “Ti dua a lawas ket nagbalin a dua a bulan. Isu a nagbalinkami a nasinged nga aggagayyem.” Nabendisionan pay ni Edit ta naaddaan kadagiti nasinged a gagayyem iti kongregasion. Maysa itan a payunir ken magusgustuanna nga awisen dagiti nakaduana iti ministerio a dumagas iti balayna tapno agmerienda. Kinunana: “Maragragsakanak no mangmangtedak! Ken ti agpayso, nakaad-adu ti maaw-awatko a bendision.”—Heb. 13:1, 2.

17. Ania ti nabigbig ni Luke ken ti asawana?

¹⁷ Mabalin a managpadagustayon, ngem mapasayaattayo kadi pay dayta? Kas pagarigan, managpadagusen ni Luke ken ti asawana. Kanayonda nga imbitaran iti balayda dagiti nagannakda, kakabagianda, nasinged a gagayyemda, ken ti manangaywan iti sirkito ken ti asawana. Ngem imbaga ni Luke, “Nabigbigmi a dagiti laeng nasinged kadakami ti aw-awisenmi.” Kasano a nagbalin a mas managpadagus ni Luke ken ti asawana?

18. Kasano a nagbalin a mas managpadagus ni Luke ken ti asawana?

¹⁸ Nagbalbaliw ti panangmatmat ni Luke ken ti asawana kalpasan a pinampanunotda ti imbaga ni Jesus: “No dagidiay laeng mangay-ayat kadakayo ti ayatenyo, ania ti magunggonayo?” (Mat. 5:45-47) Nabigbigda a masapul a tuladenda ni Jehova, a naparabur iti amin. Isu nga inkagumaanda nga imbitaran dagiti kakabsat a dida pay naim-imbitaran. Imbaga ni Luke: “Maragragsakankami amin kadagiti kastoy a gundaway. Maparparegta ken mapabpabilegkami amin.”

19. Kasano a mapaneknekantayo nga ad-adalannatayo ni Jesus, ken ania ti determinasionmo?

¹⁹ Naammuantayo no kasano a matulongannatayo ti napasnek nga ayat iti maysa ken maysa nga agbalin a mannakikappia, di manangidumduma, ken managpadagus. Masapul a labanantayo ti aniaman a negatibo a rikrikna ket naimpusuan nga ayatentayo dagiti kakabsat. No aramidentayo dayta, agbalintayo a naragsak ken mapaneknekantayo nga ad-adalannatayo ni Jesus.—Juan 13:17, 35.