No Kasanoka a Makapagbiag iti Baro a Lubong

Impakita dagiti immuna nga artikulo nga asidegen a pagpatinggaen ti Dios daytoy dakes a lubong ken ti amin a problema ti tao. Makapagtalektayo a mapasamak daytoy. Apay? Gapu ta inkari ti Sao ti Dios, ti Biblia:

“Ti lubong ket aglabas.”—1 JUAN 2:17.

Masiguradotayo nga addanto dagiti makalasat ta ikarkari met laeng dayta a teksto iti Biblia:

“Daydiay agaramid iti pagayatan ti Dios ket agtalinaed iti agnanayon.”

Ti ngarud tulbek ti pannakaisalakan ket ti panangaramid iti pagayatan ti Dios. Masapul nga am-ammuentayo nga umuna ti Dios tapno maammuantayo ti pagayatanna.

‘AM-AMMUEM’ TI DIOS TAPNO MAKALASATKA ITI PANUNGPALAN

Dagiti ladawan: 1. Nabambannog ken napaksuyan a nars a nakatugaw iti suelo ti ospital. 2. Agmermerienda iti cafeteria ket nakitana ti katrabahuanna a naragsak a mangbasbasa iti magasin. 3. Ibasbasa ti katrabahuanna ti maysa a teksto iti Biblia ken inikkanna iti jw.org contact card.

Imbaga ni Jesus: “Maaddaanto iti biag nga agnanayon dagidiay mangam-ammo kenka, ti maymaysa a pudno a Dios.” (Juan 17:3) Masapul nga ‘am-ammuentayo’ ti Dios tapno makalasattayo iti panungpalan ket agbiagtayo iti agnanayon. Saan laeng a panangbigbig nga adda ti Dios wenno panangammo iti sumagmamano a kinapudno maipapan kenkuana ti ramanen dayta. Masapul a makigayyemtayo kenkuana. No kayattayo a tumibker ti relasiontayo iti maysa a gayyem, masapul a mangiwayatayo iti tiempo para kenkuana. Kasta met laeng iti pannakigayyemtayo iti Dios. Usigentayo ti sumagmamano a napateg a kinapudno a masursurotayo iti Biblia a tumulong kadatayo a makigayyem iti Dios ken mangtaginayon iti dayta.

Dagiti Kinapudno a Masursurotayo iti Biblia

Maammuantayo a pinanggep ti Dios nga agbiagtayo iti Paraiso.

Pinarsuana ti umuna a tao a da Adan ken Eva ken inkabilna ida iti napintas a lugar a maawagan iti hardin ti Eden. Perpektoda idi ken inted ti Dios ti amin a kasapulanda tapno naragsak ti biagda. Agbiagda koma nga agnanayon. Saanda koma a natay no nagtalinaedda a gayyem ti Dios. Ngem pinilida ti agsukir iti simple a bilin nga inted ti Dios kadakuada.

Maammuantayo no apay nga agrigrigattayo ita.

Idi nagsukir iti Dios ti umuna a tao a ni Adan, napukawna ti gundawayna ken ti gundawaytayo nga agbiag nga agnanayon. Kuna ti Biblia: “Babaen ti maysa a tao, simrek ti basol iti lubong ken ti ipapatay babaen ti basol, isu a matay ti amin a tao.” (Roma 5:12) No kasano a mabalin a matawid ti maysa a tao ti depekto dagiti nagannakna, natawid ti amin nga annak ni Adan ti kinaimperpekto kenkuana. Kas resultana, lumakay ken mataytayo.

Maammuantayo dagiti inaramiden ti Dios para kadatayo.

Kuna ti Biblia: “Kasta unay ti panagayat ti Dios iti lubong nga uray la intedna ti bugbugtong nga Anakna, tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.” (Juan 3:16) Imbaon ti Dios ni Jesus ditoy daga tapno itedna ti biagna para kadatayo. Maipapan iti dayta a panangipakita iti ayat, imbaga ti 86 ti tawenna a taga-India a ni Prabhakar: “Ipakita dayta a nagdakkel ti ayat ni Jehovaa para kaniak. Ti ayatna ti nangted kaniak iti namnama a biag nga agnanayon.”

Maammuantayo no kasanotayo a maipakita ti panagyaman kadagiti inaramid ti Dios.

Ibaga ti Biblia a maipakitatayo ti panagyamantayo kadagiti inaramid ti Dios para kadatayo babaen ti ‘panangtungpal kadagiti bilinna.’ (1 Juan 2:3) Siaayat nga ipakpakita ni Jehova a Dios no ania ti mabalintayo nga aramiden tapno matagiragsaktayo ti biag ita. (Isaias 48:17, 18, footnote) Saan a kayat ti Dios nga agrigattayo. Inkarina a no surotentayo dagiti bilinna, matagiragsaktayo ti biag ita ken maaddaantayo iti gundaway nga agbiag nga agnanayon.

INALDAW A BASAEM TI SAO TI DIOS, TI BIBLIA

Ti nars a tumangtangad iti langit kalpasan a nabasana ti Biblia bayat ti pangngaldaw. — Malasatam ti panungpalan ti lubong no agpatulongka iti Dios babaen ti panagkararag ken panangaramid iti pagayatanna

Regular a mangmangantayo tapno agbiagtayo. Ngem imbaga ni Jesus: “Saan laeng a tinapay ti pagbiag ti tao, no di ket ti tunggal sao nga aggapu ken Jehova.”—Mateo 4:4.

Ita, masarakantayo dagiti sasao ni Jehova iti Biblia. Bayat nga ad-adalem dayta a sagrado a libro, maammuam dagiti napateg a kinapudno maipapan iti inaramid ti Dios iti napalabas, iti agdama, ken iti masanguanan para kadagiti tattao.

AGPATULONGKA ITI DIOS BABAEN TI KARARAG

Ania ti mabalinmo nga aramiden no kayatmo ti agtulnog iti Dios ngem marigatanka nga agsardeng a mangaramid kadagiti bambanag nga imbagana a dakes? No kasta, makatulong unay ti panangam-ammom iti Dios.

Usigem ti kapadasan ti maysa a babai nga awagantayo iti Sakura, nga immoral idi ti panagbiagna. Idi inrugina ti agadal iti Biblia, naammuanna ti bilin ti Dios nga “adaywanyo ti seksual nga immoralidad.” (1 Corinto 6:18) Nagkararag ni Sakura iti Dios tapno dumawat iti bileg ket naisardengna ti dakes nga aramidna. Ngem masapul a labananna latta dagiti sulisog. Imbagana: “No mapanunotko dagiti immoral a bambanag, ibagak dayta ken Jehova babaen ti kararag ta ammok a saanko a kabaelan a labanan dayta a bukbukodko. Ad-adda a simmingedak ken Jehova babaen ti kararag.” Kas ken Sakura, minilion ti mangikagkagumaan a mangam-ammo iti Dios. Ik-ikkanna ida iti bileg a kasapulanda tapno agbalbaliw ken agbiagda iti wagas a makaay-ayo kenkuana.—Filipos 4:13.

No ad-adda nga am-ammom ti Dios, ad-adda met nga ‘am-ammonaka ti Dios’ kas napateg a gayyem. (Galacia 4:9; Salmo 25:14) Iti kasta, makadanonkanto iti baro a lubong ti Dios. Ngem anianto ti kasasaad iti baro a lubong? Ilawlawag dayta ti sumaruno nga artikulo.

a Jehova ti nagan ti Dios sigun iti Biblia.