Mapilim ti Masakbayam

Agarup 3,500 a tawenen ti napalabas, imbaga ni Jehova a Dios kadagiti agdaydayaw kenkuana ti masapul nga aramidenda tapno maaddaanda iti nasayaat a masakbayan: “Inkabilko ti biag ken ipapatay iti sanguananyo, ti bendision ken ti lunod; ket masapul a pilienyo ti biag tapno agbiagkayo, dakayo ken dagiti annakyo.”​—Deuteronomio 30:19.

Tapno maaddaanda iti nasayaat a masakbayan, masapul nga umiso ti pilienda. Adda met laeng pagpiliantayo ita. Ibagbaga ti Biblia no kasanotayo a maaddaan iti nasayaat a masakbayan: “Babaen ti panangayatyo ken Jehova a Diosyo [ken] panangipangagyo iti timekna.”​—Deuteronomio 30:20.

KASANOTAYO A MAAYAT NI JEHOVA KEN IPANGAG TI TIMEKNA?

AGSURSUROKA ITI BIBLIA: Tapno maayatmo ni Jehova, masapul nga am-ammuem isuna babaen ti Biblia. No aramidem dayta, makitamto nga isu ket naayat a Dios ken kayatna ti kasayaatan para kenka. Aw-awisennaka nga agkararag kenkuana ‘ta ipatpategnaka.’ (1 Pedro 5:7) Ikarkari ti Biblia a no aramidem ti amin a kabaelam nga umasideg kenkuana, ‘umasidegto [met] kenka.’​—Santiago 4:8.

IYAPLIKARMO TI MAAD-ADALMO: Ti panangipangag wenno panagdengngeg iti Dios kaipapananna ti panangsurot kadagiti makatulong nga instruksionna a mabasa iti Biblia. No aramidem dayta, “agballigika ken makapagtignayka a nainsiriban.”​—Josue 1:8.