Agbalinka a Nasinged iti Naespirituan a Pamiliam

1. Ania ti mabalin nga iyawag dagiti matalek a tattao ken Jehova?

TI PAMILIA dagiti agdaydayaw ken Jehova ramanenna ni Jesus, “ti inauna iti amin a parsua,” ken ti nakaad-adu nga anghel. (Col. 1:15; Sal. 103:20) Idi adda ni Jesus ditoy daga, imbagana a dagiti matalek a tattao mabalinda nga awagan ni Jehova kas Amada. Idi nakisarita ni Jesus kadagiti adalanna, tinukoyna ni Jehova kas “Amak ken Amayo.” (Juan 20:17) Ken no agdedikartayo ken Jehova ken agpabautisartayo, agbalintayo a paset ti naayat a pamilia a buklen dagiti kakabsat a lallaki ken babbai.​—Mar. 10:29, 30.

2. Ania ti usigentayo iti daytoy nga artikulo?

² Marigatan ti dadduma a mangibilang ken Jehova kas nadungngo nga Ama. Mabalin a saan nga ammo ti dadduma no kasanoda nga ipakita ti ayatda kadagiti kakabsat. Iti daytoy nga artikulo, usigentayo no kasano a tultulongannatayo ni Jesus tapno ibilangtayo ni Jehova kas nadungngo nga Ama, a mabalintayo ti suminged kenkuana. Maammuantayo met dagiti pamay-an a matuladtayo ni Jehova iti panangtratotayo kadagiti kakabsat.

KAYAT NI JEHOVA A SUMINGEDKA KENKUANA

3. Kasano a ti pagtuladan a kararag pasingedennatayo ken Jehova?

³ Ni Jehova ket nadungngo nga Ama. Kayat ni Jesus a tuladentayo ti panangmatmatna ken Jehova​—maysa a nasingpet ken nadungngo a nagannak a nalaka a maas-asitgan, imbes a nauyong ken diktador. Nalawag dayta iti insuro ni Jesus nga ikararag dagiti adalanna. Inrugina ti pagtuladan a kararag babaen ti sao nga: “Amami.” (Mat. 6:9) Mabalin koma nga imbaga ni Jesus nga awagantayo ni Jehova iti “Mannakabalin-amin,” “Namarsua,” wenno “Ari iti agnanayon”​—nga amin dagita ket umiso ken Nainkasuratan a titulona. (Gen. 49:25; Isa. 40:28; 1 Tim. 1:17) Ngem imbaga ni Jesus nga awagantayo ni Jehova kas ‘Ama.’

4. Kasanotayo nga ammo a kayat ni Jehova a sumingedtayo kenkuana?

⁴ Marigatanka kadi a mangibilang ken Jehova kas nadungngo nga Ama? Kasta ti dadduma kadatayo. No saan a nasingpet ti amatayo, mabalin a marigatantayo a mangpanunot nga adda ama a mangdungdungngo kadatayo. Talaga a makaliwliwa a maammuan a maawatan ni Jehova ti eksakto a marikriknatayo! Kayatna ti suminged kadatayo, isu nga iparparegta ti Saona: “Umasidegkayo iti Dios, ket umasidegto kadatayo.” (Sant. 4:8) Ipatpategnatayo ni Jehova, ken ibagbagana nga isu ti kasayaatan pay laeng nga Amatayo.

5. Sigun iti Lucas 10:22, kasano a matulongannatayo ni Jesus a suminged ken Jehova?

⁵ Matulongannatayo ni Jesus a suminged ken Jehova. Am-ammo la unay ni Jesus ni Jehova ken tultuladenna dagiti kualidad ni Amana iti perpekto a pamay-an isu nga imbagana: “Ti nakakita kaniak nakitana metten ti Ama.” (Juan 14:9) Kas inauna a kabsat, sursuruannatayo ni Jesus no kasanotayo a raemen ken pagtulnogan ti Amatayo, no kasanotayo a maliklikan ti mangpagura Kenkuana, ken no kasanotayo a maparagsak ti pusona. Ngem ti panagbiag idi ni Jesus ditoy daga ti nangnangruna a mangipakita a nakaim-imbag ken nakadungdungngo ni Jehova. (Basaen ti Lucas 10:22.) Kitaentayo ti sumagmamano a pagarigan.

6. Mangted kadagiti pagarigan no kasano a dimngeg ni Jehova ken Jesus.

⁶ Dengdenggen ni Jehova dagiti annakna. Usigentayo no kasano a dimngeg ni Jehova iti inauna nga Anakna. Sigurado a dinengngeg ni Jehova ti adu a kararag ti Anakna idi adda ditoy daga. (Luc. 5:16) Nangngegna ti kararag ni Jesus idi nagaramid kadagiti napateg a desision, kas idi nangpili iti 12 nga apostolna. (Luc. 6:12, 13) Dimngeg met ni Jehova iti kararag ni Jesus idi mariribukan unay. Sakbay la unay a natraidor ni Jesus, sipapasnek a nagkararag iti Amana maipapan iti narigat a pannubok nga asidegen a pakaipasanguanna. Saan laeng a dimngeg ni Jehova iti kararag ni Jesus no di ket nangibaon pay iti anghel a mangpabileg iti dungdungnguenna nga Anak.​—Luc. 22:41-44.

7. Ania koma ti mariknatayo ta ammotayo a dengdenggen ni Jehova dagiti kararagtayo?

⁷ Agingga ita, itultuloy ni Jehova a denggen dagiti kararag dagiti adipenna, ken sungsungbatanna dagita iti umiso a tiempo ken iti kasayaatan a pamay-an. (Sal. 116:1, 2) Usigentayo no kasano a nasungbatan dagiti kararag ti maysa a kabsat a babai idiay India. Nabayagen nga adda lablabananna a nakaro a panagdandanag, ken sipapasnek nga inkararagna dayta ken Jehova. Insuratna: “Talaga a para kaniak ti Mayo 2019 a JW Broadcasting^® a nangilawlawag no kasano a malabanan ti nakaro a panagdandanag. Dayta ti sungbat dagiti kararagko.”

8. Kadagiti ania a pamay-an nga impakita ni Jehova ti ayatna ken Jesus?

⁸ Ay-ayaten ken ay-aywanannatayo ni Jehova, kas iti panagayat ken panangaywanna ken Jesus iti unos ti panagbiagna ditoy daga. (Juan 5:20) Impaayna ti amin a naespirituan, emosional, ken pisikal a kasapulan ni Jesus. Saan a nagkedked ni Jehova a nangyebkas iti ayatna iti Anakna ket imbagana a maragsakan kenkuana. (Mat. 3:16, 17) Ammo ni Jesus a kanayon a kaduana ti nadungngo a nailangitan nga Amana, isu a dina pulos narikna nga isu ket agmaymaysa.​—Juan 8:16.

9. Ania ti ebidensia nga ay-ayatennatayo ni Jehova?

⁹ Kas ken Jesus, nariknatayon ti ayat ni Jehova iti adu a pamay-an. Panunotentayo daytoy: Inyasidegnatayo ni Jehova kenkuana ken inikkannatayo iti naayat ken agkaykaysa a naespirituan a pamilia tapno naragsaktayo ken mapennek dagiti emosional a kasapulantayo. (Juan 6:44) Mangipapaay met ni Jehova iti agtultuloy a suplay dagiti makapabileg a naespirituan a taraon. Tultulongannatayo pay ketdi a maaddaan iti inaldaw a material a kasapulantayo. (Mat. 6:31, 32) Bayat a pampanunotentayo ti ayat ni Jehova kadatayo, umuneg ti panagayattayo kenkuana.

TULADEM TI PANANGTRATO NI JEHOVA ITI NAESPIRITUAN A PAMILIATAYO

10. Ania ti masursurotayo iti panangtrato ni Jehova kadagiti kakabsattayo?

¹⁰ Ay-ayaten ni Jehova dagiti kakabsattayo. Ngem mabalin a saantayo a kanayon a marikna ken maipakita ti ayat kadagiti miembro ti naespirituan a pamiliatayo. Ngamin, agduduma ti kultura ken pannakapadakkeltayo. Agkamalitayo met amin ket mabalin a dayta ti pakasuronan ken pakaupayan ti dadduma. Ngem maitultuloytay latta nga ipakita ti ayat iti naespirituan a pamiliatayo. Kasano? No tuladentayo ti Amatayo a mangipakpakita iti ayat kadagiti kakabsattayo. (Efe. 5:1, 2; 1 Juan 4:19) Kitaentayo dagiti masursurotayo iti ulidan ni Jehova.

11. Kasano a tinulad ni Jesus ti ‘ayat ken asi’ ni Jehova?

¹¹ Ipakpakita ni Jehova ti “ayat ken asina.” (Luc. 1:78) Ti naasi a tao ket maseknan no adda dagiti makitana nga agsagsagaba, ket mangbirok kadagiti pamay-an tapno matulongan ken maliwliwana ida. Iti panangtrato ni Jesus kadagiti tattao, tinuladna ti pannakaseknan kadakuada ni Jehova. (Juan 5:19) Naminsan, idi nakita ni Jesus ti adu a tattao, “naasian . . . ta nalalatan ken naiwarawarada a kasla karnero nga awanan pastor.” (Mat. 9:36) Saan la a naasian ni Jesus. Pinaimbagna dagiti masakit ken inyawisna kadagiti “nabannog ken madagdagsenan” a pagin-awaenna ida.​—Mat. 11:28-30; 14:14.

12. Mangted iti pagarigan no kasanotayo a maipakita ti asi.

¹² Sakbay a maipakitatayo ti naasi a pannakaseknan kadagiti kakabsat, masapul nga ammuentayo dagiti problemada. Kas pagarigan, mabalin a nakaro ti sakit ti maysa a kabsat a babai. Dina iyes-estoria dayta, ngem sigurado a maragsakan no adda tumulong kenkuana. Komusta ti panangasikasona kadagiti pisikal a kasapulan ti pamiliana? Mabalintayo kadi ti tumulong iti pannakaisagana ti taraonda wenno iti pannakadalus ti balayda? Mabalin a naikkat ti maysa a kabsat a lalaki iti trabahona. Mabalintay kadi a sagutan iti kuarta, a nalabit ditay ibagbaga a datayo ti naggapuanna, tapno matulongan agingga a makabirok iti sabali a trabaho?

13-14. Kasanotayo nga agbalin a naparabur kas ken Jehova?

¹³ Ni Jehova ket naparabur. (Mat. 5:45) Saantay koma nga urayen nga agpatulong dagiti kakabsattayo sakbay nga ipakitatayo ti asi. Kas ken Jehova, aramidentayo dayta uray no dida ibagbaga. Inaldaw a pagsilnagen ni Jehova ti init kadatayo uray ditay kidkiddawen dayta! Ken mabembenepisiaran ti amin iti bara ti init, saan laeng a dagiti managyaman. Ipakpakita ni Jehova ti ayatna kadatayo babaen ti panangipaayna kadagiti kasapulantayo. Ay-ayatentayo unay ni Jehova gapu ta nakaim-imbag ken nakaparparabur!

¹⁴ Kas panangtulad iti nailangitan nga Amatayo, adu a kakabsat ti mangipakpakita iti kinaparabur. Kas pagarigan, idi 2013, ti nakapigpigsa a bagyo a Yolanda (wenno Haiyan) ket nagresulta iti nakaro a pannakadadael iti Pilipinas. Adu a kakabsat ti naawanan iti balay ken sanikua. Ngem dagus a timmulong ti naespirituan a pamiliada iti intero a lubong. Adu ti nagdonar wenno nakiraman iti dakkel a trabaho a panagibangon. Gapu iti dayta, awan pay makatawen, dandani 750 a balay ti natarimaan wenno naibangon manen! Bayat ti COVID-19 pandemic, ikagkagumaan dagiti Saksi a tulongan dagiti kakabsatda. No alistotayo a tumulong iti naespirituan a pamiliatayo, ipakpakitatayo ti ayattayo kadakuada.

15-16. Sigun iti Lucas 6:36, ania ti maysa a napateg a pamay-an a matuladtayo ti nailangitan nga Amatayo?

¹⁵ Ni Jehova ket naasi ken manangpakawan. (Basaen ti Lucas 6:36.) Inaldaw nga ipakpakita ti nailangitan nga Amatayo ti asina kadatayo. (Sal. 103:10-14) Imperpekto dagiti pasurot ni Jesus, ngem kinaasian ken pinakawanna ida. Situtulok pay ketdi a nangisakripisio iti biagna tapno mapakawan dagiti basoltayo. (1 Juan 2:1, 2) Saan kadi nga ad-adda a sumingedka ken Jehova ken ni Jesus gapu ta naasi ken manangpakawanda?

¹⁶ Pabpabilgentayo ti ayattayo iti naespirituan a pamiliatayo no ‘situtulok nga agpipinnakawantayo.’ (Efe. 4:32) Siempre, nakarigrigat ti mangpakawan no dadduma, isu a kasapulantayo ti agregget. Narikna ti maysa a kabsat a babai a ti artikulo a “Sibubulos a Pakawanenyo ti Maysa ken Maysa” iti Pagwanawanan ti nakatulong kenkuana a mangaramid iti kasta.b Insuratna: “Idi inadalko daytoy nga artikulo, naawatak a no mangpakawanak, agbalin a positibo ti panangmatmatko iti bambanag. Nailawlawag iti dayta a ti sidadaan a panangpakawan saanna a kaipapanan nga anamongam ti madi nga inaramidda wenno tagtagilag-anem ti dakes nga epekto dayta. Imbes ketdi, kaipapananna nga iwaksim ti aniaman a sakit ti nakemmo iti daydiay nakabasol ken taginayonem ti talnam.” No situtulok a pakawanentayo dagiti kakabsattayo, ipakpakitatayo nga ay-ayatentayo ida ken tultuladentayo ti Amatayo, ni Jehova.

IPATEGMO TI PASETMO ITI PAMILIA

17. Sigun iti Mateo 5:16, kasanotayo a mapadayawan ti nailangitan nga Amatayo?

¹⁷ Nagdakkel a pribilehio ti agbalin a paset ti naayat nga internasional a pamilia. Kayattayo nga adu a tattao ti makikadua kadatayo nga agdaydayaw iti Diostayo. Isu a saantay koma nga agar-aramid iti aniaman a pakaibabainan ti ili ni Jehova wenno ti nailangitan nga Amatayo. Ikagumaantayo nga ipakita dagiti nasayaat a kababalin tapno aginteres dagiti tattao iti naimbag a damag.​—Basaen ti Mateo 5:16.

18. Ania ti makatulong tapno situtured a makapangasabatayo?

¹⁸ No dadduma, adda dagiti mangtagibassit wenno mangidadanes pay ketdi kadatayo gapu ta agtultulnogtayo iti nailangitan nga Amatayo. Kasanon no agdanagtayo no ibagatayo iti dadduma dagiti patpatientayo? Manamnamatayo a tulongannatayo ni Jehova ken ti Anakna. Impasigurado ni Jesus kadagiti adalanna a saanda nga agdanag no kasanoda nga agsao wenno ania ti ibagada. Apay? “Maitedto kadakayo ti ibagayo iti dayta nga oras,” imbaga ni Jesus, “ta saan laeng a dakayo ti agsao, no di ket tulongannakayto ti espiritu ni Amayo.”​—Mat. 10:19, 20.

19. Ania ti kapadasan ti maysa a situtured a nakapangasaba?

¹⁹ Usigentayo ti kapadasan ni Robert. Idi baro pay laeng a mayad-adalan iti Biblia ken bassit pay ti ammona iti Biblia, masapul a mapan iti korte ti militar iti South Africa. Situtured nga inlawlawagna iti korte a kayatna ti agtalinaed a neutral gapu ta ay-ayatenna dagiti Kristiano a kakabsatna. Impategna ti pasetna iti naespirituan a pamiliatayo! “Siasino dagiti kakabsatmo?” bigla a dinamag ti hues. Saan a ninamnama ni Robert dayta a saludsod, ngem dagus a nalagipna ti teksto iti dayta nga aldaw​—ti Mateo 12:50: “Asinoman a mangaramid iti pagayatan ni Amak nga adda idiay langit, isu ti kabsatko a lalaki, kabsatko a babai, ken inak.” Uray no baro pay la idi ni Robert a mayad-adalan iti Biblia, tinulongan ti espiritu ni Jehova a nangsungbat iti dayta a saludsod ken iti dadduma pay a saludsod a dina ninamnama. Ipagpannakkel la ketdi ni Jehova ni Robert! Ken ipagpannakkelnatayo met ni Jehova no agtalektayo kenkuana tapno situtured a makapangasabatayo kadagiti narigat a situasion.

20. Ania koma ti determinasiontayo? (Juan 17:11, 15)

²⁰ Itultuloytayo koma nga ipateg ti bendision a miembrotayo iti naayat a naespirituan a pamilia. Addaantayo iti kasayaatan pay laeng nga Ama ken adu a kakabsat a mangay-ayat kadatayo. Ditay koma pulos tagtagilag-anen dagitoy. Ikagkagumaan ni Satanas ken dagiti mananggura a pasurotna a pagduaduaantayo ti ayat ti nailangitan nga Amatayo. Padpadasenda met a dadaelen ti panagkaykaysatayo. Nupay kasta, inkararagannatayo ni Jesus. Kiniddawna iti Amatayo nga aywanannatayo tapno agtalinaed nga agkaykaysa ti pamiliatayo. (Basaen ti Juan 17:11, 15.) Sungsungbatan ni Jehova dayta a kararag. Kas ken Jesus, ditay koma pulos pagduaduaan ti ayat ken tulong ti nailangitan nga Amatayo. Determinadotayo koma nga agtultuloy a suminged iti naespirituan a pamiliatayo.