Ti Inaramid ni Jehova Tapno Maisalakan Dagiti Managbasol a Tattao

1-2. (a) Ania ti basol, ken kasanotayo a maparmek dayta? (Kitaen met ti “Kaipapanan ti Termino.”) (b) Ania ti pagsasaritaantayo iti daytoy nga artikulo ken kadagiti sumaruno nga artikulo iti daytoy a ruar Ti Pagwanawanan? (Kitaen met ti “Para Kadagiti Agbasbasa” iti daytoy a ruar.)

KAYATMO kadi a maammuan no kasano kadakkel ken kauneg ti panagayat kenka ni Jehova a Dios? Ti maysa a pamay-an tapno maammuam ti sungbat ket no ammuem ti inaramidnan tapno maisalakanka iti basol ken ipapatay. Ti basola ket naulpit a kabusor a saanmo a kabaelan a parmeken no bukbukodmo laeng. Inaldaw nga agbasbasoltayo, ken mataytayo gapu iti basol. (Roma 5:12) Ngem adda naimbag a damag. Iti tulong ni Jehova, maparmektayo ti basol. Sigurado dayta!

² Agarup 6,000 a tawenen a tultulongan ni Jehova a Dios dagiti tattao tapno maparmekda ti basol. Apay? Gapu ta ay-ayatennatayo. Ay-ayatennan dagiti tattao sipud pay idi pinarsuana ida, isu a nagadun ti inaramidna tapno tulonganna ida a mangparmek iti basol. Ammo ti Dios a gapu iti basol, mataytayo. Ngem saanna a kayat a mataytayo. Kayatna nga agbiagtayo iti agnanayon. (Roma 6:23) Dayta ti kayatna para kenka. Iti daytoy nga artikulo, pagsasaritaantayo ti tallo a saludsod: (1) Ania a namnama ti impaay ni Jehova kadagiti managbasol? (2) Ania ti inaramid dagiti managbasol a tattao idi tiempo ti Biblia tapno maparagsakda ni Jehova? (3) Ania ti inaramid ni Jesus tapno maisalakan dagiti tattao manipud iti basol ken ipapatay?

ANIA A NAMNAMA TI IMPAAY NI JEHOVA KADAGITI MANAGBASOL?

3. Apay a nagbasol ti umuna a nagannaktayo a da Adan ken Eva?

³ Idi pinarsua ni Jehova ti umuna a lalaki ken babai, kayatna nga agbalinda a naragsak. Inikkanna ida iti nagpintas a pagtaengan, sagut a panagasawa, ken makapnek a trabaho. Punnuenda ti daga kadagiti annakda, ket pagbalinenda a paraiso a kas iti hardin ti Eden ti intero a daga. Ngem adda laeng maysa ken simple a bilin a masapul a surotenda. Pinakdaaranna ida a no igagarada a sukiren dayta a bilin, sigurado a mataydanto. Ammotayo ti napasamak. Simrek iti eksena ti maysa nga espiritu a parsua a saan a mangay-ayat iti Dios wenno kadakuada. Sinulisogna da Adan ken Eva tapno agsukirda iti Dios. Sinurotda ti kayat dayta a dakes nga espiritu a parsua, ni Satanas. Saanda a nagtalek iti naayat nga Amada isu a nagbasolda. Kas ammotayon, husto ti imbaga ni Jehova. Sipud iti dayta nga aldaw, masapul a sagabaendan dagiti resulta ti inaramidda: limmakay ken bimmaketda, ken kamaudiananna, natayda.—Gen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Apay a kagura ni Jehova ti basol ken apay a tultulongannatayo a mangparmek iti dayta? (Roma 8:​20, 21)

⁴ Impaisurat ni Jehova daytoy a makapaladingit a salaysay iti Biblia tapno maawatantayo ti maysa a napateg a banag: no apay a kagurgurana unay ti basol. Ti basol dadaelenna ti relasiontayo iti Amatayo ken agturong dayta iti ipapatay. (Isa. 59:2) Ni Satanas kagurgurana ni Jehova ken dagiti tattao, isu a sinulisogna da Adan ken Eva nga agbasol ken itultuloyna a sulsulisogen dagiti tattao ita. Idi nagbasol da Adan ken Eva, mabalin nga impagarup ni Satanas a nadadaelnan ti panggep ni Jehova para kadagiti tattao. Ngem saanna a naawatan no kasano kadakkel ti panagayat ni Jehova. Saan a nagbalbaliw ti panggep ni Jehova para iti kaputotan da Adan ken Eva. Ay-ayatenna dagiti tattao isu a dagus a nangipaay iti namnama para iti amin. (Basaen ti Roma 8:​20, 21.) Ammo ni Jehova nga addanto kadagiti kaputotanda ti mangpili a mangayat ken agpatulong kenkuana tapno maparmekda ti basol. Ket kas Amada ken Namarsua kadakuada, pinagbalinna a posible a mawayawayaanda iti basol ken agbalinda a nasinged kenkuana. Ania ti aramiden ni Jehova tapno mapasamak dagita?

5. Kaano ti damo a panangipakaammo ni Jehova nga adda namnama ti amin a managbasol a tattao? Ilawlawag. (Genesis 3:15)

⁵ Basaen ti Genesis 3:15. Ti damo a panangipakaammo ni Jehova nga adda namnama dagiti managbasol a tattao ket idi sinentensiaanna ni Satanas. Impakpakauna ti Dios nga adda ‘kaputotan’ a mangisalakan kadagiti tattao. Dayta a kaputotan ti mangdadaelto ken Satanas, ken mangikkat iti amin nga epekto dagiti problema a pinataud ni Satanas idiay Eden. (1 Juan 3:8) Ngem bayat a maibambanag dagita, agsagaba ti kaputotan. Sugaten ni Satanas isu a matay. Nakasasaem la ketdi ti marikna ni Jehova gapu iti dayta. Ngem sidadaan nga inibturanna dayta tapno mawayawayaan ti adu a tattao manipud iti basol ken ipapatay.

ANIA TI INARAMID DAGITI MANAGBASOL A TATTAO IDI TIEMPO TI BIBLIA TAPNO MAPARAGSAKDA NI JEHOVA?

6. Ania ti inaramid ni Abel, Noe, ken ti dadduma pay a matalek a tattao tapno agbalinda a nasinged ken Jehova?

⁶ Iti panaglabas ti ginasut a tawen, in-inut nga impaawat ni Jehova no kasano nga agbalin a nasinged kenkuana dagiti managbasol a tattao. Ti maikadua kadagiti annak da Adan ken Eva a ni Abel ti kaunaan a nangipakita iti pammati ken Jehova kalpasan ti panagrebelde idiay Eden. Ay-ayaten ni Abel ni Jehova. Kayatna a paragsaken ken suminged Kenkuana, isu a nagdaton. Ni Abel ket maysa a pastor, isu a nangala iti sumagmamano nga urbon a karnero, pinartina dagita, sa indatonna ken Jehova. Ania ti narikna ni Jehova? ‘Naragsakan ken Abel ken iti datonna.’ (Gen. 4:4) Naragsakan met ni Jehova kadagiti indaton ti dadduma pay a tattao a mangay-ayat ken agtaltalek kenkuana a kas ken Noe. (Gen. 8:​20, 21) Ti panangawat ni Jehova kadagiti datonda ipakitana a posible a magun-odan dagiti managbasol a tattao ti paborna ken agbalinda a nasinged kenkuana.b

7. Ania ti masursurotayo iti kinatulok ni Abraham a mangidaton iti mismo nga anakna?

⁷ Nabileg ti pammati ni Abraham ken Jehova. Adda nakarigrigat a kiniddaw ni Jehova kenkuana. Imbagana ken Abraham nga idatonna ti mismo nga anakna a ni Isaac. Dayta la ketdi ti kasasaeman nga aramiden ni Abraham. Ngem nagtulnog ken Jehova. Idi patayen koman ni Abraham ti anakna, linapdan ti Dios. Ngem adda nagpateg nga isuro dayta a pasamak para iti amin a tattao nga addaan pammati. Situtulok nga indaton ni Jehova ti ipatpategna nga Anak. Talaga nga ay-ayaten unay ni Jehova dagiti tattao.—Gen. 22:​1-18.

8. Ania ti ipakita wenno ipatuldo ti adu a naidaton nga animal a naibilin iti Linteg? (Levitico 4:​27-29; 17:11)

⁸ Ginasut a tawen kalpasanna, nangted ni Jehova iti Linteg kadagiti Israelita. Imbilinna nga agdatonda kadagiti animal tapno mapakawan dagiti basolda. (Basaen ti Levitico 4:​27-29; 17:11.) Dagita a daton ti mangipakita wenno mangipatuldo a mangipaay ni Jehova iti nasaysayaat a daton, a naan-anay a mangisalakan iti amin a tattao manipud iti basol. Imbaga ti Dios kadagiti propetana nga isuratda ti maipapan iti naikari a kaputotan. Inlawlawagda a ti naikari a kaputotan, ti nagbalin nga espesial nga Anak ti Dios, ket agsagaba ken mapapatay. Kayariganna ti maysa a karnero a maparti tapno maidaton. (Isa. 53:​1-12) Panunotem daytoy: Inyurnos ni Jehova a ti mismo a dungdungnguenna nga Anak ket maidaton tapno ti amin a tattao a pakairamanam ket maisalakan manipud iti basol ken ipapatay!

ANIA TI INARAMID NI JESUS TAPNO MAISALAKAN DAGITI TATTAO?

9. Ania ti imbaga ni Juan a Mammautisar maipapan ken Jesus? (Hebreo 9:22; 10:​1-4, 12)

⁹ Idi umuna a siglo C.E., ni Juan a Mammautisar nga adipen ti Dios nakitana ni Jesus a taga-Nazaret ket imbagana: “Kitaenyo, ti Kordero ti Dios a mangikkat iti basol ti lubong!” (Juan 1:29) Ipakita dagita nga imbagana a ni Jesus ti nabayagen a naipadto a naisangsangayan a kaputotan nga inkari ti Dios. Ipaay ni Jesus ti biagna kas daton. Adda met laengen ti sigurado a namnama para iti managbasol a sangatauan tapno naan-anay a maparmek ti basol.—Basaen ti Hebreo 9:22; 10:​1-4, 12.

10. Kasano nga impakita ni Jesus nga “immay tapno ayabanna” dagiti managbasol?

¹⁰ Nagpokus ni Jesus iti panangtulongna kadagiti tattao a maup-upay gapu iti kinamanagbasolda. Inawisna ida nga agbalin a pasurotna. Ammo ni Jesus a ti basol ti ramut ti amin a problema ti amin a tattao. Gapu iti dayta, tinulonganna dagiti agdindinamag a managbasol. Nangusar iti ilustrasion, sa inlawlawagna: “Dagiti masakit ti agkasapulan iti doktor, saan a dagiti nasalun-at.” Imbagana pay: “Immayak tapno ayabak dagiti managbasol, saan a dagiti nalinteg.” (Mat. 9:​12, 13) Kasta ti inaramid ni Jesus. Adda idi babai a nagsangit. Uray la nabasa dagiti saka ni Jesus gapu kadagiti lua dayta a babai, ngem pinunasanna dagita babaen ti buokna. Siaalumamay a kinasarita ni Jesus ket pinakawanna dagiti basol dayta a babai. (Luc. 7:​37-50) Adda met dagiti napateg a kinapudno nga insuro ni Jesus iti maysa a Samaritana nga immay agsakdo iti bubon, uray no ammona nga immoral dayta a babai. (Juan 4:​7, 17-19, 25, 26) Ni Jesus ket inikkan pay ketdi ti Dios iti pannakabalin a mamagpatingga iti ipapatay nga isu ti resulta ti basol. Kasano? Pinagungar ni Jesus dagiti tattao—lallaki ken babbai, ubbing ken adulto.—Mat. 11:5.

11. Apay a dagiti managbasol a tattao ket nalag-an ti riknada ken Jesus?

¹¹ Di pakasdaawan nga uray dagiti agar-aramid idi iti dakes ket nalag-an ti riknada ken Jesus. Nakipagrikna ngamin kadakuada ken impakitaanna ida iti empatia. Saanda a mabuteng a makisarita kenkuana. (Luc. 15:​1, 2) Kinomendaran ida ni Jesus ken nasayaat ti pannakilangenna kadakuada gapu iti impakitada a pammati kenkuana. (Luc. 19:​1-10) Perpekto a tinulad ni Jesus ti kinaasi ni Amana. (Juan 14:9) Iti sao ken aramid, impakita ni Jesus a ti Amana ket mannakipagrikna, naasi, ay-ayatenna dagiti tattao, ken kayatna a tulongan ti tunggal maysa kadakuada a mangparmek iti basol. Tinulongan ni Jesus dagiti managbasol tapno matignayda nga agbalbaliw ken sumurot kenkuana.—Luc. 5:​27, 28.

12. Ania ti imbaga ni Jesus maipapan iti ipapatayna?

¹² Ammo idi ni Jesus nga idatonna ti biagna. Saan la a namnaminsan nga imbagana kadagiti pasurotna a matraidor ken mailansa iti kayo. (Mat. 17:22; 20:​18, 19) Ammona a gapu iti panangidatonna iti biagna, maikkat ti basol ti amin a tattao, kas iti impakaammo ni Juan ken impakpakauna dagiti propeta. Imbaga met ni Jesus a kalpasan ti ipapatayna, ‘iyasidegna kenkuana ti amin a kita ti tattao.’ (Juan 12:32) Dagiti managbasol mabalindan a maparagsak ni Jehova no awatenda ni Jesus kas Apoda ken no ikagumaanda a tuladen. Iti kasta, ‘mawayawayaanda met laengen iti basol.’ (Roma 6:​14, 18, 22; Juan 8:32) Gapu iti dayta, situtulok ken situtured a sinango ni Jesus ti nagkas-ang nga ipapatayna.—Juan 10:​17, 18.

13. Kasano a natay ni Jesus, ken ania ti isuro kadatayo ti ipapatayna maipapan ken Jehova a Dios? (Kitaen met ti ladawan.)

¹³ Ni Jesus ket natraidor, naaresto, napagsasawan, napadpadakes, nasentensiaan, ken naparparigat pay ketdi. Impan dagiti soldado iti pangpapatayanda kenkuana ket inlansada iti kayo. Simamatalek nga inibturan ni Jesus ti nakaro nga ut-ot ken panagsagaba. Ngem nakarkaro pay nga ut-ot ken saem ti narikna ni Amana bayat a makitkitana ti nakaro a panagrigat ti Anakna. Ay-ayaten ni Jehova ti Anakna. Ngem apay ngarud nga impalubosna nga agsagaba ken matay? Gapu ta ay-ayatennatayo. Imbaga ni Jesus: “Kasta unay ti panagayat ti Dios iti lubong nga uray la intedna ti bugbugtong nga Anakna, tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.”—Juan 3:16.

14. Ania ti isuro kenka ti panangidaton ni Jesus iti biagna?

¹⁴ Ti panangted ni Jesus iti biagna ti kadakkelan nga ebidensia nga ay-ayaten la unay ni Jehova dagiti annak da Adan ken Eva. Pammaneknek dayta a kasta la unay ti panagayat kenka ni Jehova. Intedna ti dungdungnguenna nga Anak, ken inibturanna ti nakasasaem a nariknana tapno alawennaka manipud iti basol ken ipapatay. (1 Juan 4:​9, 10) Wen, kayatna a tulongan ti tunggal maysa kadatayo a naan-anay a mangparmek iti basol!

15. Ania ti masapul nga aramidentayo tapno magunggonaantayo iti subbot ni Jesus a sagut ti Dios?

¹⁵ Gapu iti sagut ti Dios, ti subbot ti bugbugtong nga Anakna, posiblen a mapakawan dagiti basoltayo. Ngem tapno pakawanennatayo ti Dios, adda masapul nga aramidentayo. Ania dayta? Kastoy ti imbaga ni Juan a Mammautisar ken ni Jesu-Kristo idi agangay: “Agbabawikayo, ta asidegen ti Pagarian ti langit.” (Mat. 3:​1, 2; 4:17) Masapul ngarud nga agbabawitayo no kayattayo a parmeken ti basol ken agbalin a nasinged iti nadungngo nga Amatayo. Ngem ania ti karaman iti panagbabawi, ken kasano a matulongannatayo dayta a manglaban iti tendensiatayo nga agbasol? Masungbatan dayta iti sumaruno a maadal nga artikulo.