No Kasano a Matulad ti Kongregasion ti Panangmatmat ni Jehova Kadagiti Nakabasol

1. Ania ti kayat ni Jehova nga aramiden ti amin a tattao?

PINARSUA ni Jehova dagiti tattao nga addaan iti wayawaya nga agpili. Inaldaw a maus-usarmo dayta a regalona no agar-aramidka kadagiti desision. Ti kapatgan a desision nga aramiden ti maysa a tao ket ti panangidedikarna iti bagina ken Jehova ken ti panagbalinna a paset ti pamilia dagiti agdaydayaw kenkuana. Dayta ti kayat ni Jehova nga aramiden ti amin. Apay? Ay-ayatenna ngamin dagiti tattao ken kayatna a naragsakda. Kayatna nga agbalinda a gagayyemna ken agbiagda iti agnanayon.—Deut. 30:​19, 20; Gal. 6:​7, 8.

2. Ania ti kayat ni Jehova nga aramiden dagiti saan nga agbabbabawi a nakabasol? (1 Juan 2:1)

² Nupay kasta, saan a piliten ni Jehova ti asinoman nga agserbi kenkuana. Ik-ikkanna ti tunggal indibidual iti wayawaya nga agdesision no ania ti aramidenna. Ania ti mapasamak iti maysa a bautisado a Kristiano no suksukirenna ti linteg ti Dios ken agar-aramid iti nadagsen a basol? No saan nga agbabawi, masapul a maikkat iti kongregasion. (1 Cor. 5:13) Ngem mangnamnama latta ni Jehova nga agsublinto Kenkuana ti nakabasol. Kinapudnona, dayta ti napateg a rason nga intedna ti subbot—tapno mapakawan dagiti agbabbabawi a nakabasol. (Basaen ti 1 Juan 2:1.) Nakadungdungngo a Dios ni Jehova, ken ipakpakaasina kadagiti nakabasol nga agbabawida.—Zac. 1:3; Roma 2:4; Sant. 4:8.

3. Ania ti pagsasaritaantayo iti daytoy nga artikulo?

³ Kayat ni Jehova a tuladentayo ti panangmatmatna iti basol ken kadagiti nakaaramid iti nadagsen a basol. Makatulong daytoy nga artikulo tapno maaramidtayo dayta. Bayat a basbasaem ti artikulo, kitaem ti (1) no kasano a nataming ti kaso ti maysa a nakaaramid iti nadagsen a basol iti kongregasion idiay Corinto idi umuna a siglo, (2) no ania nga instruksion ti inted ni apostol Pablo idi nagbabawi ti nakabasol, ken (3) no ania ti ipakita daytoy a salaysay ti Biblia maipapan iti panangmatmat ni Jehova kadagiti Kristiano a nakaaramid iti nadagsen a basol.

NO KASANO A NATAMING TI KASO TI NAKAARAMID ITI NADAGSEN A BASOL IDI UMUNA A SIGLO

4. Ania a situasion ti timmaud iti kongregasion ti Corinto idi umuna a siglo? (1 Corinto 5:​1, 2)

⁴ Basaen ti 1 Corinto 5:​1, 2. Bayat ti maikatlo a panagmisionero ni Pablo, adda nangngegna a nakadakdakes a damag maipapan iti kabuangbuangay idi a kongregasion ti Corinto. Adda kabsat a lalaki iti dayta a kongregasion a makidendenna iti asawa ni amana. Nakababain dayta nga aramid ken ‘dakdakes pay ngem iti ar-aramiden dagiti nasion’! Ti rigatna, saan la a pinanuynoyan ti kongregasion ti ar-aramidenna no di ket mabalin nga ipagpannakkelda pay ketdi dayta. Nalabit pampanunotenda a tultuladenda ti asi ken pannakaawat ti Dios kadagiti imperpekto a tattao. Ngem saan a konsintiren ni Jehova dagiti agar-aramid iti nadagsen a basol iti ilina. Gapu iti dayta a nakaal-alas nga ar-aramiden ti lalaki, sigurado a nadadael ti nasayaat a reputasion ti kongregasion. Mabalin pay ketdi a maim-impluensiaannan ti dadduma a Kristiano a makilanglangen kenkuana. Ania ngarud ti imbaga ni Pablo nga aramiden ti kongregasion?

5. Ania ti imbaga ni Pablo nga aramiden ti kongregasion, ken ania ti kayatna a sawen? (1 Corinto 5:13) (Kitaen met ti ladawan.)

⁵ Basaen ti 1 Corinto 5:13. Tinignay ni Jehova ni Pablo a mangaramid iti surat a mangbilbilin a masapul a maikkat iti kongregasion ti saan nga agbabbabawi a nakabasol. Ania ti masapul a panangtrato dagiti matalek a Kristiano iti nakabasol? Imbaga ni Pablo nga ‘isardengda ti makikadua’ kenkuana. Ania ti kayatna a sawen? Inlawlawag ni Pablo a karaman iti daytoy a bilin ti saan man la a ‘pannakipangan iti kasta a tao.’ (1 Cor. 5:11) No ngamin makipangpanganka iti maysa a tao, natural laeng a makikadua ken makisaritaka kenkuana. Nalawag ngarud nga ibagbaga ni Pablo iti kongregasion a masapul a saanda a makilangen iti dayta a tao. Proteksion dayta iti kongregasion tapno saanda a maimpluensiaan iti dakes nga aramidna. (1 Cor. 5:​5-7) Kasta met, no liklikanda ti makilangen iti dayta a tao, mabalin a maamirisna a nakadakdakes ti inaramidna a nakasaktan ni Jehova, ken mariknana ti agbain isu a matignay nga agbabawi.

6. Ania ti epekto ti surat ni Pablo iti kongregasion ken iti nakabasol?

⁶ Kalpasan nga impatulod ni Pablo ti suratna kadagiti Kristiano idiay Corinto, pampanunotenna no ania ngata ti reaksion ti kongregasion iti dayta. Idi agangay, adda impadamag ni Tito kenkuana a nakaragsakanna unay. Nasayaat ti reaksion ti kongregasion iti surat ni Pablo. (2 Cor. 7:​6, 7) Sinurotda dagiti instruksionna. Kasta met, iti panaglabas ti sumagmamano a bulan kalpasan nga impatulod ni Pablo ti suratna, pinagbabawyan ti nakabasol ti dakes nga aramidna! Nagbalbaliw ken sinurotnan dagiti nalinteg a pagalagadan ni Jehova. (2 Cor. 7:​8-11) Ania ti simmaruno nga imbaga ni Pablo nga aramiden ti kongregasion?

NO KASANO TI MASAPUL A PANANGTRATO TI KONGREGASION ITI AGBABBABAWI A NAKABASOL

7. Ania ti nasayaat a resulta ti pannakaikkat ti nakabasol iti kongregasion? (2 Corinto 2:​5-8)

⁷ Basaen ti 2 Corinto 2:​5-8. Imbaga ni Pablo nga “umdasen kenkuana ti pannubngar ti kaaduan.” Kayatna a sawen, naibanag ti panggep ti pannakadisiplina ti lalaki. Ania a panggep? Tapno matulongan nga agbabawi.—Heb. 12:11.

8. Ania ti simmaruno nga imbaga ni Pablo nga aramiden ti kongregasion?

⁸ Gapu ta nagbabawi ti lalaki, imbaga ni Pablo kadagiti panglakayen nga awatenda manen iti kongregasion. Ngem saan la a dayta! Imbilinna met a ‘siaasi a pakawanen ken liwliwaenda’ ti nakabasol a kabsat, ken ‘ipasiguradoda kenkuana ti ayatda.’ Kayat ni Pablo nga ipasiguradoda iti dayta a lalaki, babaen iti sao ken aramidda, a talaga a pinakawandan isuna ken ay-ayatenda. No aramidenda dayta, marikna ti lalaki a talaga a maragragsakan ti kongregasion iti panagsublina.

9. Apay a mabalin a marigatan ti dadduma a mangpakawan iti agbabbabawi a nakabasol?

⁹ Idi damo a naammuan ti dadduma a makasublin ti lalaki iti kongregasion, mabalin a saanda a naragsakan. Apay a maikunatayo a kasta? Ngamin, posible a makaunget pay laeng ti dadduma gapu iti problema a pinataudna iti kongregasion. Mabalin met a masursuron pay laeng ti dadduma ta nasaktanna a mismo ti riknada. Inkagkagumaan dagiti kakabsat iti kongregasion ti agtulnog kadagiti bilin ni Jehova, isu a mabalin a mariknada a saan a nainkalintegan a mapalubosan nga agsubli iti kongregasion ti lalaki a nakaaramid iti nadagsen a basol. (Idilig ti Lucas 15:​28-30.) Ngem apay a nagpateg nga ipakita ti kongregasion ti napudno nga ayatda iti agbabbabawi a kabsat?

10-11. Ania ti posible a mapasamak no saan a kayat dagiti panglakayen a pakawanen ti agbabbabawi a nakabasol?

¹⁰ Panunotem ti posible koma a napasamak no saan a pinalubosan dagiti panglakayen ti talaga nga agbabbabawi a lalaki a makasubli iti kongregasion; wenno kalpasan a nakasubli, saan nga impakita dagiti kakabsat ti ayatda kenkuana. Mabalin koma ‘a nalapunos iti nakaro a ladingit.’ Posible koma met a nariknana a saanen a maikari nga agbalin manen a paset ti kongregasion. Mabalin koma met nga impagarupna a saanen a mapakawan ni Jehova isu nga awanen ti panggapuanna nga agbalbaliw.

¹¹ Nakarkaro pay, no saan koma a pinakawan dagiti kakabsat iti kongregasion ti agbabbabawi a nakabasol, mabalin a pagpegpeggadenda ti mismo a relasionda ken Jehova. Apay? Gapu ta ti ipakpakitada ket kinaulpit ken awanan asi a kababalin ni Satanas, imbes a ti kinamanangpakawan ni Jehova kadagiti agbabbabawi a nakabasol. Kas man la agpapausarda iti Diablo, a mangdadael iti espiritualidad ti lalaki a nakabasol.—2 Cor. 2:​10, 11; Efe. 4:27.

12. Kasano a dagiti kakabsat matuladda ni Jehova?

¹² Kasano ngarud a dagiti kakabsat iti Corinto matuladda ni Jehova, saan a ni Satanas? No surotenda ti panangtrato ni Jehova kadagiti agbabbabawi a nakabasol. Kastoy ti imbaga ti dadduma a mannurat ti Biblia maipapan ken Jehova. “Naimbagka ken sisasaganaka a mangpakawan,” imbaga ni David. (Sal. 86:5) Insurat ni Mikias: “Asino ti Dios a kas kenka, a mangpakpakawan ken mangpalpalabas iti basol?” (Mik. 7:18) Imbaga met ni Isaias: “Panawan koma ti dakes a tao ti dalanna ken ti dakes a pampanunotna; agsubli koma ken Jehova, a mangngaasinto kenkuana, iti Diostayo, a naan-anayto a mangpakawan kenkuana.”—Isa. 55:7.

13. Apay a nainkalintegan laeng a ti agbabbabawi a nakabasol ket maisubli iti kongregasion? (Kitaen ti kahon a “Kaano a Naisubli ti Lalaki a Taga-Corinto?”)

¹³ Tapno dagiti kakabsat iti kongregasion ti Corinto matuladda ni Jehova, masapul a pakawanenda ti lalaki, ipakitada nga ay-ayatenda isuna ken maragsakanda ta nakasublin. Imbaga ni Pablo a no pakawanenda ti agbabbabawi a lalaki, ipakpakitada a ‘natulnogda iti amin a banag.’ (2 Cor. 2:9) Uray no sumagmamano laeng a bulan a naikkat ti lalaki iti kongregasion, ti pannakadisiplinana ti nangtignay kenkuana nga agbabawi. Isu a saan a kasapulan a pabayagen pay dagiti panglakayen ti pannakaisublina iti kongregasion.

NO KASANO A MATULADTAYO TI HUSTISIA KEN ASI NI JEHOVA

14-15. Ania ti masursurotayo iti pannakataming ti kaso iti nagkauna a Corinto? (2 Pedro 3:9) (Kitaen met ti ladawan.)

¹⁴ Ti salaysay maipapan iti pannakataming ti kaso iti nagkauna a Corinto ket naisurat iti Biblia “a pakasursuruantayo.” (Roma 15:4) Iti dayta a salaysay, masursurotayo a saan a panuynoyan ni Jehova iti ilina dagiti agar-aramid iti nadagsen a basol. Mabalin nga ipagarup ti dadduma a gapu ta “naasi” ni Jehova, ipalubosna lattan nga agtalinaed iti kongregasion dagiti saan nga agbabbabawi. Ngem saan a kasta ti panangipakita ni Jehova iti asina. Agpayso a naasi ni Jehova, ngem saan a napanuynoy; saanna met nga ibaba dagiti estandartena. (Jud. 4) No ipalubos ni Jehova nga agtalinaed iti kongregasion dagiti saan nga agbabbabawi, saan a panangipakita dayta iti asi. Ngamin, agpeggad laeng no kua ti intero a kongregasion.—Prov. 13:20; 1 Cor. 15:33.

¹⁵ Masursurotayo met a saan a kayat ni Jehova a madadael ti asinoman. Kayatna a maisalakan dagiti tattao agingga a posible. Ipakpakitana ti asina kadagiti agbalbaliw ken mayat a mangisubli iti nadadael a relasionda kenkuana. (Ezek. 33:11; basaen ti 2 Pedro 3:9.) Isu nga idi nagbalbaliw ken tinallikudanen ti lalaki a taga-Corinto ti dakes nga aramidna, inusar ni Jehova ni Pablo a mangilawlawag iti kongregasion a masapul a mapakawan ti lalaki ken maiparikna kenkuana a maragsakanda iti pannakaisublina.

16. Ania ti makunam iti pannakataming ti kaso iti Corinto?

¹⁶ Ti panangusigtayo iti pannakataming ti kaso iti Corinto isurona a kanayon nga ipakpakita ni Jehova ti ayatna, kinalintegna, ken kinahustisiana. (Sal. 33:5) Gapu iti dayta, ad-adda pay nga idaydayawtayo ni Jehova. Ngamin, managbasoltayo amin—tunggal maysa kadatayo—isu a kasapulantayo ti pammakawanna. Adda rason ti tunggal maysa kadatayo nga agyaman ken Jehova gapu iti subbot. Gapu iti dayta, posiblen a pakawanenna dagiti basoltayo. Anian a makaliwliwa ken makapabang-ar a maammuan a talaga nga ay-ayaten ni Jehova dagiti adipenna ken kayatna a naragsakda iti agnanayon!

17. Ania ti pagsasaritaantayo kadagiti sumaruno nga artikulo?

¹⁷ No makaaramid ita ti maysa iti nadagsen a basol, kasano a dagiti panglakayen matuladda ti ayat ni Jehova, ken matulonganda ti maysa nga agbabawi? Ania koma ti masapul a reaksion dagiti kakabsat no nagdesision dagiti panglakayen a maikkat wenno maisubli ti maysa a nakabasol? Dagita a saludsod ti mapagsasaritaan kadagiti sumaruno nga artikulo.