Itedyo ti Dayag ken Jehova

1. Ania ti ipangpangruna ti adu a tattao ita?

NADLAWYO kadi nga ipangpangruna ti adu a tattao ita ti bagida? Kas pagarigan, us-usaren ti dadduma ti social media tapno ipangasda ti bagida ken dagiti maar-aramidanda. Nupay kasta, manmano itan ti mangipapaay iti dayag ken Jehova a Dios. Iti daytoy nga artikulo, ammuentayo no ania ti kaipapanan ti panangited ken Jehova iti dayag ken no ania ti masapul a mangtignay kadatayo a mangaramid iti dayta. Ammuentayo met no kasanotayo a maited iti Dios ti dayag a maikari kenkuana ken no kasano nga ipadayagna ti naganna iti asidegen a masanguanan.

ANIA TI KAIPAPANAN TI PANANGITED ITI DAYAG KEN JEHOVA?

2. Kasano nga impakita ni Jehova ti dayagna idiay Bantay Sinai? (Kitaen met ti ladawan.)

² Ania ti kaipapanan ti dayag? Iti Biblia, ti sao a “dayag” ket mabalin a tumukoy iti aniaman a mamagbalin iti maysa a persona a nakaskasdaaw. Impakita ni Jehova ti naisangsangayan a dayagna di nagbayag kalpasan nga insalakanna dagiti Israelita manipud iti pannakaadipenda idiay Egipto. Imadyinem daydi nga eksena: Minilion nga Israelita ti nagtataripnong iti sakaanan ti Bantay Sinai tapno sumangoda iti Diosda. Adda nangisit nga ulep a nangabbungot iti bantay. Pagammuan ta nagginggined iti napigsa, nagkimat, naggurruod, ken immaweng ti makatitileng nga uni ti tangguyob. (Ex. 19:​16-18; 24:17; Sal. 68:8) Permi la ketdi ti siddaaw dagidi nga Israelita idi impakita ni Jehova ti dayagna.

3. Ania ti kaipapanan ti panangited ken Jehova iti dayag?

³ Datayo ngay met? Mabalintayo met kadi a maipadayag ni Jehova? Wen. Ti maysa a pamay-an a maipadayagtayo ni Jehova ket ti panangipakaammotayo maipapan iti nakaskasdaaw a pannakabalinna ken kadagiti nagsayaat a kualidadna. Maipadayagtayo met ti Dios no iturongtayo kenkuana ti dayaw kadagiti maar-aramidantayo gapu iti tulongna. (Isa. 26:12) Maysa ni Ari David a nagsayaat nga ulidan maipapan iti panangipadayag ken Jehova. Imbaga ni David iti Dios idi indauluanna iti kararag dagiti naguummong nga Israelita: “Kukuam, O Jehova, ti kinanaindaklan, pannakabalin, kinangayed, ken kinadayag, ta kukuam ti amin nga adda iti langit ken daga.” Kalpasan ti panagkararag ni David, “indaydayaw dagiti tattao ni Jehova.”—1 Cron. 29:​11, 20.

4. Kasano nga inted ni Jesus ti dayag ken Jehova?

⁴ Idi adda ni Jesus ditoy daga, impadayagna ti Amana. Kasano? Binigbigna a ti Amana ti nangted kenkuana iti pannakabalin a mangaramid kadagiti milagro. (Mar. 5:​18-20) Impadayag met ni Jesus ni Jehova iti pamay-an ti panangtratona iti sabsabali ken iti panangipakaammona maipapan iti Amana. Naminsan, mangisursuro idi ni Jesus iti maysa a sinagoga. Karaman kadagiti dumdumngeg ti maysa a babai a linuganan ti demonio iti 18 a tawen. Gapu iti dayta, nakaro ti kinakubbona ken saan a makatakder iti diretso. Nagrigat la ketdi ti kasasaadna! Ngem naasian ni Jesus isu nga inasitganna ti babai ken sisisingpet nga imbagana: “Babai, umimbagkan.” Imparabawna ti imana kenkuana ket dagus a nakapagtakder iti diretso ket “indaydayawna ti Dios.” Permi ti yamanna ken Jehova ta nagsubli ti dati a kinasalun-atna! (Luc. 13:​10-13) Adda panggapuan dayta a babai a mangipadayag ken Jehova. Adda met panggapuantayo a mangaramid iti kasta.

ANIA TI MANGTIGNAY KADATAYO A MANGITED ITI DAYAG KEN JEHOVA?

5. Ania dagiti panggapuantayo a mangraem ken Jehova?

⁵ Ipadayagtayo ni Jehova gapu iti nauneg a panagraemtayo kenkuana. Adu ti panggapuantayo a mangraem kenkuana. Ni Jehova ti mannakabalin-amin; awan ti limitasion ti pannakabalinna. (Sal. 96:​4-7) Ti kasta unay a siribna ket nalawag a makita kadagiti bambanag nga inaramidna. Isu ti Gubuayan ti biagtayo ken ti Mangtagtaginayon iti dayta. (Apoc. 4:11) Isu ket napudno. (Apoc. 15:4) Agballigi ti amin nga aramidenna ken kanayon a tungpalenna ti amin a karina. (Jos. 23:14) Isu met la gayam nga imbaga ni propeta Jeremias maipapan ken Jehova: “Iti amin a masirib a tattao kadagiti nasion ken pagarianda, awan a pulos ti kas kenka”! (Jer. 10:​6, 7) Wen, adu ti panggapuantayo a mangraem iti nailangitan nga Amatayo. Ngem saan laeng a maikari ni Jehova iti panagraemtayo. Maikari met isuna iti ayattayo.

6. Apay nga ay-ayatentayo ni Jehova?

⁶ Ipadayagtayo ni Jehova gapu ta ay-ayatentayo unay isuna. Ay-ayatentayo ni Jehova gapu iti adu a nagsayaat a kualidadna. Isu ket naasi ken mannakipagrikna. (Sal. 103:13; Isa. 49:15) Addaan iti empatia; no masaktantayo, masaktan met ti riknana. (Zac. 2:8) Tultulongannatayo nga umasideg kenkuana tapno agbalintayo a gagayyemna. (Sal. 25:14; Ara. 17:27) Napakumbaba met; “agdumog tapno kitaenna ti langit ken ti daga, bangonenna ti nanumo manipud iti tapok.” (Sal. 113:​6, 7) Gapu kadagita a rason, kayattayo la ketdi nga ipadayag ti naindaklan a Diostayo!—Sal. 86:12.

7. Ania ti naisangsangayan a pribilehiotayo?

⁷ Ipadayagtayo ni Jehova gapu ta kayattayo a maam-ammo isuna dagiti tattao. Adu ti saan a makaammo iti kinapudno maipapan ken Jehova. Apay? Binulsek ngamin ni Satanas ti panunotda babaen ti panangiwarasna kadagiti nakaro a kinaulbod maipapan ken Jehova. (2 Cor. 4:4) Ipappapati ni Satanas kadagiti tattao a ni Jehova ket managibales, saan a maseknan kadatayo, ken isu ti makinggapuanan iti adu a panagrigat dagiti tattao. Ngem ammotayo ti kinapudno maipapan iti Diostayo! Pribilehiotayo nga ipakaammo ti kinasiasino ni Jehova tapno maipadayagtayo isuna. (Isa. 43:10) Nakasentro ti Salmo 96 iti panangted iti dayag ken Jehova. Maammuantayo iti daytoy a salmo no kasanotayo a maited ken Jehova ti dayag a maikari unay kenkuana.

KASANOTAYO A MAITED KEN JEHOVA TI DAYAG A MAIKARI UNAY KENKUANA?

8. Ania ti maysa a pamay-an a maipadayagtayo ni Jehova? (Salmo 96:​1-3)

⁸ Basaen ti Salmo 96:​1-3. Maipadayagtayo ni Jehova babaen kadagiti ibagbagatayo maipapan kenkuana. Kadagita a bersikulo, mayaw-awis kadagiti adipen ni Jehova: “Kantaanyo ni Jehova,” “idaydayawyo ti naganna,” “iwaragawagyo ti naimbag a damag ti panangisalakanna,” ken “ipakaammoyo ti dayagna kadagiti nasion.” Pamay-an amin dagita a maipadayagtayo ti nailangitan nga Amatayo. Magagaran idi dagiti matalek a Judio ken dagiti Kristiano idi umuna a siglo a mangidepensa iti reputasion ni Jehova ken mangipakaammo iti amin a nagsayaat nga inaramidna para kadakuada. (Dan. 3:​16-18; Ara. 4:29) Kasanotayo a maaramid met ti kasta?

9-10. Ania ti masursurom iti kapadasan ni Angelena? (Kitaen met ti ladawan.)

⁹ Usigentayo ti kapadasan ti maysa a sister a taga-United States a ni Angelena.a Situtured nga indepensana ti reputasion ni Jehova iti pagtrabtrabahuanna. Kas baro nga empleado, naawis ni Angelena iti maysa a miting a kadua met laeng dagiti kabbaro nga empleado. Iti dayta a miting, iyam-ammo ti tunggal maysa kadakuada ti maipapan iti biagda. Nangisagana ni Angelena iti slide show a mangipakita iti ragsakna kas maysa kadagiti Saksi ni Jehova. Ngem sakbay pay ti batangna nga agsao, adda katrabahuanna a nangyam-ammo iti bagina kas pinadakkel dagiti nagannakna a Saksi ni Jehova. Idi kuan, rinugianna metten ti agsao iti agkakadakes maipapan kadagiti Saksi ni Jehova ken kadagiti patpatienda. Imbaga ni Angelena: “Agkebbakebba ti barukongko. Ngem imbagak iti bagik: ‘Palubosak kadi daytoy a lalaki nga agsao iti kinaulbod maipapan ken Jehova? Wenno idepensak ni Jehova?’”

¹⁰ Idi nalpasen nga agsao ti katrabahuanna, nagkararag apagbiit ni Angelena iti un-unegna. Sisisingpet nga imbagana iti lalaki: “Ammom, agpadata. Saksi ni Jehova met dagiti nagannakko. Ken uray siak, maysaak met a Saksi.” Uray no makapa-stress ti situasion, kalmado latta ni Angelena. Impakitana kadagiti katrabahuanna dagiti piktiurna ken dagiti kakabsat a siraragsak nga agserserbi ken Jehova. Sitataktika met nga indepensana dagiti patpatienna. (1 Ped. 3:15) Ania ti resultana? Idi nalpasen ni Angelena nga agsao, kimmalma ti lalaki. Inaminna pay ketdi nga adda met dagiti nagsayaat a kapadasanna idi ubing pay ken idi adda pay laeng iti poder dagiti nagannakna a Saksi ni Jehova. Imbaga ni Angelena: “Maikari ni Jehova a maidepensa. Maysa a pribilehio ti mangipakaammo maipapan kenkuana.” Pribilehiotayo met ti mangidaydayaw ken mangipadayag ken Jehova uray no adda dagiti saan a mangraraem kenkuana.

11. Kasano nga intultuloy dagiti pudno nga agdaydayaw iti Dios a sinurot ti prinsipio ti Salmo 96:8?

¹¹ Basaen ti Salmo 96:8. Maipadayagtayo ni Jehova babaen kadagiti napateg a bambanagtayo. Kanayon nga ar-aramiden dayta dagiti pudno nga agdaydayaw iti Dios tapno maipadayagda ni Jehova. (Prov. 3:9) Kas pagarigan, timmulong dagiti Israelita iti panagibangon ken panangmantener iti templo. (2 Ar. 12:​4, 5; 1 Cron. 29:​3-9) Dadduma nga adalan ni Kristo ti ‘nangusar kadagiti sanikuada’ iti panagserbida kenkuana ken kadagiti apostolna. (Luc. 8:​1-3) Timmulong met dagiti Kristiano idi umuna a siglo iti panangipaay iti ayuda kadagiti kapammatianda. (Ara. 11:​27-29) Ita, maipadayagtayo met ni Jehova babaen kadagiti boluntario a donasiontayo.

12. Kasano a maipadayag ni Jehova babaen kadagiti donasiontayo? (Kitaen met ti ladawan.)

¹² Usigentayo ti maysa pay a kapadasan a mangipakita a maipadayag ni Jehova babaen kadagiti donasiontayo. Idi 2020, napasaran ti Zimbabwe ti nakaro ken napaut a tikag. Minilion ti dandani natay gapu iti bisin a pakairamanan ti sister a ni Prisca. Ngem nupay adda tikag, intultuloy latta ni Prisca ti nangasaba kada Mierkoles ken Biernes, uray bayat ti tiempo ti panagaarado. Inuy-uyaw dagiti kaarrubana gapu ta mapan latta mangaskasaba imbes koma a mapan agtalon. Imbagada: “Agbisinkanto!” Sikokompiansa nga insungbat ni Prisca, “Kanayon a tultulongan ni Jehova dagiti adipenna.” Di nagbayag kalpasan dayta, nakaawat ni Prisca iti ayuda manipud iti organisasiontayo. Nakaawat iti makan ken dadduma pay a kasapulanna gapu iti donasion nga ipapaay ti tunggal maysa kadatayo. Bimmilib dagiti kaarruba ni Prisca, isu nga imbagada kenkuana, “Kanayon a tultulongannaka ti Dios! Kayatmi man met a maam-ammo pay isuna.” Pito kadagiti kaarrubana ti makigimgimongen.

13. Kasanotayo a maipadayag ni Jehova babaen iti konduktatayo? (Salmo 96:9)

¹³ Basaen ti Salmo 96:9. Maipadayagtayo ni Jehova babaen ti konduktatayo. Dagiti padi a nagserbi ken Jehova iti tabernakulo ken iti templona idi agangay ket masapul a nadalus iti pisikal. (Ex. 40:​30-32) Ngem napatpateg ti nadalus a kondukta ngem iti pisikal a kinadalus. (Sal. 24:​3, 4; 1 Ped. 1:​15, 16) Ibagbaga ti Biblia a masapul nga uksobentayo “ti daan a personalidad” ken isuottayo “ti baro a personalidad.” Kayatna a sawen, masapul nga aramidentayo ti amin a kabaelantayo a mangliklik iti dakes a panagpampanunot ken kababalin a kagura ni Jehova. Sursuruentayo ti agpanunot ken agtignay iti pamay-an a mangipakita a tultuladentayo ni Jehova ken dagiti nagsayaat a kualidadna. (Col. 3:​9, 10) Iti tulong ni Jehova, uray dagiti kararanggasan ken immoral unay a tattao ket makapagbalbaliw ken maisuotda ti baro a personalidad.

14. Ania ti masursurom iti kapadasan ni Jack? (Kitaen met ti ladawan.)

¹⁴ Usigentayo ti kapadasan ni Jack a maysa a naranggas ken bayolente a tao a nabirngasan iti Demonio. Gapu kadagiti krimen nga inaramid ni Jack, nasentensiaan a mapapatay. Nupay kasta, bayat nga ur-urayenna a maipatungpal ti sentensiana, immanamong a makipagadal iti Biblia iti maysa a kabsat a simmarungkar kenkuana iti pagbaludan. Nupay nagadu ti kinadakes nga inaramid ni Jack, inuksobna ti daan a personalidadna. Idi agangay, nakualipikar a mabautisaran. Nagdakkel ti nagbalbaliwan ni Jack. Idi aldaw a mapapatayen, uray la nagsangsangit ti dadduma a guardia iti dayta a pagbaludan bayat nga agpakpakadada kenkuana. Imbaga ti maysa a sergeant nga agtrabtrabaho iti dayta a pagbaludan: “Ni Jack idi ti kadadaksan a balud iti daytoy a pagbaludan. Ngem ita, maysa isunan kadagiti kasisingpetan.” Makalawas kalpasan ti pannakapapatay ni Jack, nagsubli dagiti kakabsat iti dayta a pagbaludan tapno ikonduktada ti linawas a gimong. Naam-ammoda ti maysa a balud a damona ti immatender. Apay nga immatender? Bimmilib iti panagbalbaliw ni Jack isu a kayatna met a maammuan dagiti masapul nga aramidenna tapno maidaydayawna ni Jehova. Nalawag a ti konduktatayo maipadayagna ti nailangitan nga Amatayo!—1 Ped. 2:12.

KASANO NGA IPADAYAG NI JEHOVA TI NAGANNA ITI ASIDEGEN A MASANGUANAN?

15. Kasano a naan-anay nga ipadayag ni Jehova ti naganna iti asidegen a masanguanan? (Salmo 96:​10-13)

¹⁵ Basaen ti Salmo 96:​10-13. Dagita a maudi a bersikulo ti Salmo 96 deskribirenda ni Jehova kas ti nalinteg nga Ukom ken Ari. Kasano nga ipadayag ni Jehova ti naganna iti asidegen a masanguanan? Babaen kadagiti panangukomna. Asidegen a dadaelenna ti Babilonia a Dakkel a mangibabain iti nasantuan a naganna. (Apoc. 17:​5, 16; 19:​1, 2) Dadduma a makasaksi iti pannakadadael ti Babilonia a Dakkel ket posible a makikaduanto kadatayo iti pudno a panagdaydayaw. Kamaudiananna, inton Armagedon, dadaelento ni Jehova ti intero a sistema ni Satanas. Ikkatennanto ti amin a mangbusbusor ken mangpadpadakes iti naganna. Ngem isalakannanto ti amin a mangay-ayat, mangipampannakkel, ken mangipadpadayag kenkuana. (Mar. 8:38; 2 Tes. 1:​6-10) Inton malpas ti maudi a pannubok kalpasan ti Sangaribu a Tawen a Panagturay ni Kristo, naan-anayton a nasantipikar ni Jehova ti naganna. (Apoc. 20:​7-10) Iti dayta a tiempo, “mapnonto ti daga iti pannakaammo iti dayag ni Jehova kas iti pannakapunno ti baybay iti danum.”—Hab. 2:14.

16. Ania ti determinasionmo? (Kitaen met ti ladawan.)

¹⁶ Makaparagsakto la ketdi inton ti amin a sibibiag iteddan ken Jehova ti dayag a maikari iti naganna! Ngem bayat nga ur-urayentayo dayta nga aldaw, aramidentayo ti amin a kabaelantayo a mangipadayag iti Diostayo iti amin a gundaway. Kas panangipaganetget iti dayta a nagpateg a responsabilidadtayo, pinili ti Bagi a Manarawidwid ti Salmo 96:8 kas ti tekstotayo iti tawen 2025: “Itedyo ken Jehova ti dayag a maikari iti naganna.”