Tuladem ti Panagpampanunot da Jehova ken Jesus

1-2. Ania ti ramanen ti panagayattayo ken Jehova, ken kasano nga impakita ni Jesus nga ay-ayatenna ni Jehova iti amin a panunotna?

“MASAPUL nga ayatem ni Jehova a Diosmo iti amin a pusom ken amin a kararuam ken amin a pigsam ken amin a panunotmo.” (Luc. 10:27) Impaganetget ni Jesus a dayta ti kapatgan a bilin iti Mosaiko a Linteg. No ngarud ay-ayatentayo ni Jehova, karaman iti dayta ti pusotayo, ken uray dagiti tarigagay, rikna, ken emosiontayo. Karaman met iti dayta ti amin-kararua a debosiontayo ken ti pigsatayo. Ngem saan la a dayta. Ramanen met ti panagayattayo ken Jehova ti panunottayo, kayatna a sawen, ti panagpampanunottayo maipapan kadagiti bambanag. Siempre, ditay pulos naan-anay a maawatan ti panagpampanunot ni Jehova. Ngem ad-adda a maawatantayo dayta no adalentayo “ti panunot ni Kristo” gapu ta perpekto a tinulad ni Jesus ti panagpampanunot ni Amana.—1 Cor. 2:16 ken study note a “we do have the mind of Christ.”

² Inayat ni Jesus ni Jehova iti amin a panunotna. Ammona no ania ti kayat ti Dios nga aramidenna ken determinado a mangaramid iti dayta uray no agsagaba. Gapu ta nakasentro ti panunot ni Jesus iti panagaramid iti pagayatan ni Amana, saanna nga impalubos nga adda aniaman a mangsinga kenkuana iti panangitungpalna iti dayta.

3. Ania ti nasursuro ni apostol Pedro ken Jesus, ken ania ti imparegta ni Pedro nga aramiden dagiti padana a Kristiano? (1 Pedro 4:1)

³ Naaddaan ni Pedro ken dagiti kakaduana nga apostol iti nagsayaat a pribilehio a makikadua ken Jesus. Gapu iti dayta, nakasursuroda maipapan iti panagpampanunot ni Jesus. Isu nga iti umuna a surat ni Pedro, pinaregtana dagiti Kristiano a tuladenda ti panagpampanunot ni Kristo. (Basaen ti 1 Pedro 4:1.) Iti orihinal a lengguahe, idi insurat ni Pedro ti “tuladenyo,” nagusar iti termino a mangdeskribir kadagiti soldado a nangkabal iti bagida kadagiti armas a pakigubat. Isu a no tuladen dagiti Kristiano ti panagpampanunot ni Jesus, arigna mangikabalda iti nabileg nga armas nga usarenda a manglaban iti tendensiada nga agbasol ken mangparmek iti lubong nga iturturayan ni Satanas.—2 Cor. 10:​3-5; Efe. 6:12.

4. Kasano a matulongannatayo daytoy nga artikulo a mangsurot iti balakad ni Pedro?

⁴ Usigentayo ti panagpampanunot ni Jesus ken kitaentayo no kasanotayo a matulad dayta. Pagsasaritaantayo (1) no kasanotayo a tuladen ti panagpampanunot ni Jehova, a makatulong tapno agtutunos ti panagpampanunottayo, (2) no kasanotayo nga agbalin a napakumbaba, ken (3) no kasanotayo a maaddaan iti nasimbeng a panunot babaen ti panagpannuray ken Jehova iti kararag.

TULADEN TI PANAGPAMPANUNOT NI JEHOVA

5. Kaano a saan a natulad ni Pedro ti panagpampanunot ni Jehova?

⁵ Adda idi maysa a gundaway a saan a natulad ni Pedro ti panagpampanunot ni Jehova. Imbaga ni Jesus kadagiti apostolna a masapul a mapan idiay Jerusalem, a sadiay nga arestuen dagiti lider ti relihion, maparigat, ken mapapatay. (Mat. 16:21) Ammo ni Pedro a ni Jesus ti naikari a Mesias ken ti mangisalakan iti ili ti Dios, isu a mabalin a narigatan ni Pedro a mangakseptar nga ipalubos ni Jehova a mapapatay ni Jesus. (Mat. 16:16) Isu nga inyadayo bassit ni Pedro ni Jesus sa imbagana: “Kaasiam ta bagim, Apo; dinto pulos mapasamak kenka dayta.” (Mat. 16:22) Gapu ta saan a tinulad ni Pedro ti panagpampanunot ni Jehova, saanna a naitunos ti panunotna iti panagpampanunot ni Jesus.

6. Kasano nga impakita ni Jesus nga ituntunosna ti panagpampanunotna iti panagpampanunot ni Jehova?

⁶ Naan-anay a tinulad ni Jesus ti panagpampanunot ti nailangitan nga Amana. Imbaga ni Jesus ken Pedro: “Adaywannak, Satanas! Maysaka a pakaitibkolak, ta saan a ti pampanunot ti Dios ti pampanunotem no di ket ti pampanunot dagiti tattao.” (Mat. 16:23) Ammo ni Jesus a tapno maaramidna ti pagayatan ni Jehova, masapul nga agsagaba ken matay. Isu a tinubngar ni Jesus ni Pedro gapu iti imbagana, uray no kasla nasayaat met ti intensionna. Gapu iti dayta, nasursuro ni Pedro a masapul nga itunosna ti panagpampanunotna iti panagpampanunot ti Dios. Nagsayaat met a leksion dayta para kadatayo.

7. Kasano nga impakita ni Pedro idi agangay nga ituntunosnan ti panagpampanunotna iti panagpampanunot ni Jehova? (Kitaen ti ladawan.)

⁷ Idi agangay, impakita ni Pedro a kayatnan a tuladen ti panagpampanunot ni Jehova. Dimteng ti tiempo a naipalubosen nga agbalin a paset ti ili ti Dios dagiti di nakugit a Gentil. Naibaon ni Pedro a mangasaba iti Gentil a ni Cornelio, a maysa kadagiti kaunaan a Gentil a nagbalin a Kristiano. Gagangay idi a likliklikan dagiti Judio dagiti Gentil, isu a masapul a balbaliwan ni Pedro ti panagpampanunotna tapno makasabaanna dagiti Gentil. Idi naawatan ni Pedro ti pagayatan ti Dios para kadagiti Gentil, binalbaliwanna ti panagpampanunotna. Isu nga idi naibaon a mapan ken Cornelio, ‘saan a nagduadua.’ (Ara. 10:​28, 29) Kinasabaanna ni Cornelio ken ti sangakabbalayanna ket nabautisaranda.—Ara. 10:​21-23, 34, 35, 44-48.

8. Kasanotayo a maipakita a tultuladentayo ti panagpampanunot ni Jehova? (1 Pedro 3:8 ken footnote)

⁸ Tawtawen kalpasanna, pinaregta ni Pedro dagiti padana a Kristiano nga ‘agtutunos koma amin ti panunotda.’ (Basaen ti 1 Pedro 3:8 ken footnote.) Kas ili ni Jehova, makapagtutunos ti panunottayo no tuladentayo ti panagpampanunot ni Jehova kas mabasa iti Saona. Kas pagarigan, pinaregta ni Jesus dagiti pasurotna nga iyun-unada ti Pagarian iti biagda. (Mat. 6:33) Baka adda kakongregasionyo a kayatna ti agpayunir, wenno agserbi ken Jehova iti amin a tiempo iti dadduma pay a pamay-an. Imbes nga upayentayo ken ibagatayo a kaasianna ti bagina, komendarantayo ketdi iti dayta a nagsayaat a kalatna ken tulongantayo.

AGBALIN A NAPAKUMBABA

9-10. Kasano nga impakita ni Jesus ti naisangsangayan a kinapakumbaba?

⁹ Iti rabii sakbay a mapapatay ni Jesus, adda nagpateg nga insurona ken Pedro ken iti dadduma pay nga apostol maipapan iti kinapakumbaba. Sakbay dayta, imbaon ni Jesus da Pedro ken Juan nga isaganada ti maudi a pangrabii sakbay ti ipapatayna. Posible a karaman kadagiti isaganada ket ti palanggana ken dagiti tualia a mausar iti panangbuggo kadagiti sakada sakbay ti pannangan. Ngem asino ngata ti mangaramid iti dayta a nanumo a trabaho?

¹⁰ Saan a nagpangadua ni Jesus a nangaramid iti dayta a trabaho. Impakitana ti naisangsangayan a kinapakumbaba. Nasdaaw la ketdi dagiti apostol idi nakitada nga ar-aramiden ni Jesus ti gagangay nga ar-aramiden ti maysa nga adipen. Inikkat ni Jesus ti kagayna, nangala iti tualia sa inkabilna iti siketna, inikkanna iti danum ti maysa a palanggana, ket binugguanna dagiti saka dagiti adalanna. (Juan 13:​4, 5) Mabalin a nabayag met sakbay a nabugguan ni Jesus ti saka ti amin a 12 nga apostolna—agraman ni Judas a mangtraidor kenkuana. Ngem sipapakumbaba nga inaramid dayta ni Jesus. Kalpasanna, siaanus nga imbagana: “Matarusanyo kadi no apay nga inaramidko daytoy kadakayo? Awagandak iti ‘Mannursuro’ ken ‘Apo,’ ket umisokayo ta kastaak. Gapuna, no siak nga Apo ken Mannursuro ket binugguak dagiti sakayo, masapul met a bugguanyo dagiti saka ti maysa ken maysa.”—Juan 13:​12-14.

11. Kasano nga impakita ni Pedro a nasursuronan ti agbalin a napakumbaba? (1 Pedro 5:5) (Kitaen met ti ladawan.)

¹¹ Nakasursuro ni Pedro iti kinapakumbaba ni Jesus. Kalpasan a nagsubli idiay langit ni Jesus, simimilagro a pinaimbag ni Pedro ti maysa a lalaki a nayanak a pilay. (Ara. 1:​8, 9; 3:​2, 6-8) Adu a tattao ti nakakita iti dayta a milagro isu a napanda inaribungbongan ni Pedro. (Ara. 3:11) Ngem impalastog kadi ni Pedro dayta nga inaramidna? Saan. Agpayso a napadakkel ni Pedro iti kultura a pagaayat dagiti tattao ti kinaprominente wenno kinalatak. Nupay kasta, sipapakumbaba nga inturongna ti dayaw kada Jehova ken Jesus, saan ket nga iti bagina. Imbagana: ‘Babaen ti nagan ni Jesus ken ti pammatimi iti naganna, pimmigsa daytoy a lalaki a kitkitaen ken am-ammoyo.’ (Ara. 3:​12-16) Ti sasao nga inusar ni Pedro iti suratna kadagiti Kristiano maipapan iti kinapateg ti kinapakumbaba ti mabalin a mangipalagip kadatayo iti panangibarikes ni Jesus iti tualia ken panangbuggona iti saka dagiti apostolna.—Basaen ti 1 Pedro 5:5.

12. Kas ken Pedro, kasanotayo a maitultuloy ti agbalin a napakumbaba?

¹² Matuladtayo ti ulidan ni Pedro no itultuloytayo a sursuruen ti agbalin a napakumbaba. Laglagipentayo a ti pudpudno a kinapakumbaba ket saan laeng a makita iti panagsasaotayo. Ti termino nga inusar ni Pedro para iti kinapakumbaba ramanenna ti kaunggan a panunottayo, kayatna a sawen, ti ‘kinapakumbaba ti panagpampanunot.’ Agaramidtayo iti naimbag para iti dadduma gapu ta ay-ayatentayo ni Jehova ken dagiti tattao, saan a gapu ta kayattayo ti maidaydayaw. Maipakitatayo a talaga a napakumbabatayo no pagragsakantayo ti agserbi ken Jehova ken kadagiti kakabsat, uray no saan a makitkita ti dadduma ti ar-aramidentayo.—Mat. 6:​1-4.

“NASIMBENG KOMA TI PANUNOTYO”

13. Ania ti ramanen ti ‘kinasimbeng ti panunot’?

¹³ Ania ti ramanen ti ‘kinasimbeng ti panunot’? (1 Ped. 4:7) Ti maysa a Kristiano a nasimbeng ti panunotna ikagumaanna ti agdesision maitunos iti panagpampanunot ni Jehova. Ammo dayta a Kristiano nga awanen ti napatpateg iti biagna no di ti relasionna ken Jehova. Balanse ti panangmatmatna iti bagina ken bigbigenna a saanna nga ammo ti amin. Ipakpakitana met nga agpampannuray ken Jehova babaen ti masansan a panagkararagna a sipapakumbaba kenkuana.a

14. Kaano a saan a nagpannuray ni Pedro ken Jehova?

¹⁴ Iti maudi a rabii sakbay ti ipapatay ni Jesus, impakdaarna kadagiti adalanna: “Iti daytoy a rabii, maitibkolkayto amin.” Sikokompiansa nga insungbat ni Pedro: “Uray maitibkolda amin, saanakto a pulos a maitibkol!” Iti dayta a rabii, binalakadan ni Jesus ti dadduma kadagiti adalanna: “Itultuloyyo ti agbantay ken itultuloyyo ti agkararag.” (Mat. 26:​31, 33, 41) No la koma sinurot ni Pedro dayta a balakad, situtured koma a naibagana nga adalan isuna ni Jesus. Ngem inlibakna ti Apona, banag a permi a nagbabbabawyanna idi agangay.—Mat. 26:​69-75.

15. Kasano nga impakita ni Jesus a nasimbeng latta ti panunotna bayat ti maudi a rabiina kas tao?

¹⁵ Naan-anay a nagpannuray ni Jesus ken Jehova. Uray no perpekto ni Jesus, maulit-ulit a nagkararag. Dayta ti nangpatured kenkuana a mangaramid iti kayat ni Jehova nga aramidenna. (Mat. 26:​39, 42, 44; Juan 18:​4, 5) Sigurado a saan a pulos a nalipatan ni Pedro ti namin-adu a panagkararag ni Jesus bayat ti maudi a rabiina.

16. Kasano nga impakita ni Pedro a naaddaanen iti nasimbeng a panunot? (1 Pedro 4:7)

¹⁶ Iti panaglabas ti tiempo, nasursuro ni Pedro ti ad-adda pay nga agpannuray ken Jehova iti kararag. Ti napagungaren a ni Jesus impasiguradona ken Pedro ken iti dadduma pay nga apostol a makaawatda iti nasantuan nga espiritu tapno maitungpalda ti bilinna a mangasabada. Nupay kasta, imbilin ni Jesus nga urayenda isuna idiay Jerusalem agingga a mapasamak dayta. (Luc. 24:49; Ara. 1:​4, 5) Ania ti inaramid ni Pedro bayat nga agur-uray? ‘Nagtultuloy a nagkararag’ a kaduana dagiti kapammatianna. (Ara. 1:​13, 14) Idi agangay, iti umuna a surat ni Pedro, pinaregtana dagiti padana a Kristiano a maaddaanda iti nasimbeng a panunot ken agpannurayda ken Jehova iti kararag. (Basaen ti 1 Pedro 4:7.) Nasursuro ni Pedro ti agpannuray ken Jehova isu a naibilang met kas maysa nga adigi ti kongregasion.—Gal. 2:9.

17. Aniaman ti abilidadtayo, ania ti masapul nga itultuloytayo nga aramiden? (Kitaen met ti ladawan.)

¹⁷ Nasimbeng ti panunottayo no kanayon nga agkararagtayo ken Jehova. Bigbigentayo a masapul nga itultuloytayo ti agkararag ken Jehova aniaman ti abilidad wenno paglaingantayo. Masapul ngarud nga ikararagtayo ken Jehova ti panangidalanna, nangruna no agaramidtayo kadagiti napateg a desision. Agtalektayo nga ammona ti kasayaatan para kadatayo.

18. Kasanotayo nga ad-adda a matulad ti panagpampanunot ni Jehova?

¹⁸ Anian a yamantayo ta pinarsuanatayo ni Jehova nga addaan iti abilidad a mangipakita kadagiti kualidadna. (Gen. 1:26) Siempre, saantayo a naan-anay a matulad ni Jehova. (Isa. 55:9) Ngem kas ken Pedro, kabaelantayo a sursuruen a tuladen ti panagpampanunot ni Jehova. Sapay koma ta itultuloytayo a tuladen ti panagpampanunot ti Dios, agbalintayo a napakumbaba, ken nasimbeng koma ti panunottayo.