Itultuloymo ti Magna Babaen ti Pammati

1. Apay a naragsak ni apostol Pablo no lagipenna dagiti napasamak iti biagna?

AMMO idi ni apostol Pablo nga asidegen a mapapatay. Ngem naragsak no sublianna dagiti napasamak iti biagna. Imbagana: “Nagtarayak agingga iti pagpatinggaan ti lumba, nagtalinaedak iti pammati.” (2 Tim. 4:​6-8) Nainsiriban ti desision nga inaramid ni Pablo nga usarenna ti biagna nga agserbi ken Jehova, ket nasiguradona a naragsakan kenkuana ni Jehova. Kayattayo met ti mangaramid kadagiti nasayaat a desision ken maparagsak ti Dios. Kasanotayo a maaramid dayta?

2. Ania ti kayat a sawen ti pannagna babaen ti pammati?

² Imbaga ni Pablo maipapan iti bagina ken iti dadduma pay a matalek a Kristiano: “Magmagnatayo babaen ti pammati, saan a babaen ti panagkita.” (2 Cor. 5:7) Ania ti kayat a sawen ni Pablo? Iti Biblia, ti ‘pannagna’ ket tumukoy no dadduma iti desision ti maysa a tao no ania ti aramidenna iti biagna. No ti maysa a tao ket magmagna laeng babaen ti panagkita, ti panagdesdesisionna ket naibatay laeng kadagiti literal a makitkita, mangmangngeg, ken marikriknana. Ngem no ti maysa a tao ket magmagna babaen ti pammati, mangaramid kadagiti desision a naibatay kadagiti kayat ni Jehova a Dios. Ipakita dagiti aramidenna a kombinsido a gunggonaanto isuna ti Dios, ken pagsayaatanna ti panangsurotna iti balakad ni Jehova nga adda iti Biblia.—Sal. 119:66; Heb. 11:6.

3. Ania dagiti magunggonatayo no magnatayo babaen ti pammati? (2 Corinto 4:18)

³ Siempre, adda dagiti gundaway a masapul nga agdesisiontayo sigun kadagiti literal a mangmangngeg, makitkita, ken marikriknatayo. Ngem sigurado nga agproblematayo no dagita laeng ti pangibatayantayo kadagiti desision maipapan kadagiti napateg a banag. Apay? Mabalin ngamin nga allilawennatayo dagiti literal a sentidotayo. Ngem uray no saan, no magmagnatayo laeng babaen ti panagkita, baka makaaramidtayonto kadagiti maikontra iti pagayatan wenno pammagbaga ti Dios. (Ecl. 11:9; Mat. 24:​37-39) Ngem no magmagnatayo babaen ti pammati, makaaramidtayonto kadagiti desision a “makaay-ayo iti Apo.” (Efe. 5:10) No surotentayo dagiti pammagbaga ti Dios, natalna ti puso ken isiptayo ken agbalintayo a pudpudno a naragsak. (Sal. 16:​8, 9; Isa. 48:​17, 18) Ket no itultuloytayo ti magna babaen ti pammati, maaddaantayonto iti biag nga agnanayon.—Basaen ti 2 Corinto 4:18.

4. Kasano a maammuan ti maysa a tao no isu ket magmagna babaen ti pammati wenno babaen ti panagkita?

⁴ Kasanotayo a maibaga no magmagnatayo babaen ti pammati wenno babaen ti panagkita? Masapul nga isaludsodtayo iti bagitayo: Ania ti pagpapaiwanwanak no agdesdesisionak? Kadagiti laeng kadi makitkitak? Wenno agpapaiwanwanak kadagiti pammagbaga ni Jehova? Usigentayo no kasanotayo nga agtultuloy a magna babaen ti pammati iti tallo a napateg a situasion: no agpilpilitayo iti trabaho, no agpilpilitayo iti pakiasawaan, ken no makaawattayo kadagiti instruksion manipud iti organisasion. Iti tunggal situasion, pagsasaritaantayo dagiti masapul nga ikabilangantayo tapno makaaramidtayo kadagiti nasayaat a desision.

NO AGPILPILITAYO ITI TRABAHO

5. Ania ti masapul a panunotentayo no agpilpilitayo iti trabaho?

⁵ Kayattayo amin a masuportaran dagiti kasapulantayo ken ti pamiliatayo. (Ecl. 7:12; 1 Tim. 5:8) Dakkel ti sueldo iti dadduma a trabaho. Mabalin nga umanay dayta a mangsuporta kadagiti kasapulan ti maysa nga empleado ken baka adda pay maurnongna para iti masanguananna. Iti dadduma a trabaho, nalabit bassit laeng ti sueldo ti empleado ken eksakto laeng para kadagiti kangrunaan a kasapulan ti pamiliana. No agpilpilitayo iti trabaho, natural laeng a panunotentayo no manonto ti sueldotayo. Ngem no dayta laeng ti pampanunotentayo, baka magmagnatayon babaen ti panagkita.

6. Kasanotayo a magna babaen ti pammati no agpilpilitayo iti trabaho? (Hebreo 13:5)

⁶ No magmagnatayo babaen ti pammati, masapul met nga ikabilangantayo ti posible nga epekto dayta a trabaho iti relasiontayo ken Jehova. Isaludsodtayo iti bagitayo: ‘Ti kadi trabaho nga awatek ramanenna ti panangaramidko kadagiti kagura ni Jehova?’ (Prov. 6:​16-19) ‘Saanakto kadi a makagimong, makapangasaba, makapagadal iti Biblia, ken addanto kadi dagiti gundaway a masapul a panawak ti pamiliak iti napaut a tiempo?’ (Fil. 1:10) No wen ti sungbatmo kadagita a saludsod, nainsiriban a saanmo nga awaten dayta a trabaho, uray no narigat ti agbirok iti trabaho. Magmagnatayo babaen ti pammati, isu a mangaramidtayo kadagiti desision a mangipakita a kombinsidotayo nga ipaayto ni Jehova dagiti kasapulantayo.—Mat. 6:33; basaen ti Hebreo 13:5.

7-8. Kasano nga impakita ti maysa a brother idiay South America a magmagna babaen ti pammati? (Kitaen met ti ladawan.)

⁷ Ammo ti brother a ni Javiera a taga-South America ti kinapateg ti pannagna babaen ti pammati. Imbagana: “Nagaplayak iti nangatngato a posision a doble ti sueldo ngem iti agdama idi a posisionko ta magusgustuak dayta a trabaho.” Ngem kayat met la unay ni Javier ti agpayunir. Intuloyna: “Nayeskediul a ti national manager ti manginterbiu kaniak. Ngem sakbay ti interbiu, nagkararagak tapno agpatulongak ken Jehova, ta kombinsidoak nga ammona ti kasayaatan para kaniak. Kayatko met ti umasenso iti propesionko. Ngem diak awaten dayta a trabaho no daytanton ti makalapped iti panangragpatko kadagiti naespirituan a kalatko.”

⁸ Inyestoria ni Javier: “Bayat ti interbiu, imbaga ti manager a masapulto a kanayonak nga ag-overtime. Siaalumamay nga inlawlawagko a diak makapag-overtime gapu iti ministeriok.” Nagdesision ni Javier a saanna nga akseptaren dayta nga offer. Dua lawas kalpasanna, nangrugin nga agpayunir. Kalpasan ti sumagmamano a bulan, nakasarak iti part-time a trabaho. Imbagana: “Dinengngeg ni Jehova dagiti kararagko. Tinulongannak a makabirok iti trabaho a maibagay iti eskediulko kas payunir. Permi ti ragsakko ta addan trabahok a mangipalubos nga ad-adu ti orasko nga agserbi ken Jehova ken kadagiti kakabsat.”

9. Ania ti masursurom iti kapadasan ni Trésor?

⁹ Kasanon no maamiristayo a saantayon a magmagna babaen ti pammati gapu iti trabahotayo? Kitaentayo ti kapadasan ni Trésor a taga-Congo. Imbagana: “Manmano ti makabirok iti kas iti baro a trabahok. Triple ti kangato ti sueldok ngem iti dati a trabahok. Nagdakkel met ti panagraem kaniak dagiti tattao.” Ngem kanayon a saan a makagimong ni Trésor gapu iti kao-overtime-na. Pilpiliten met dagiti katrabahuanna nga agulbod tapno makaluban ti panagkusit nga ar-aramidenda. Kayat idin ni Trésor ti umikkat iti trabahona, ngem madanagan no awanton ti trabahona. Ania ti nakatulong kenkuana? Imbagana: “Impaawat kaniak ti Habakuk 3:​17-19 nga uray no mapukawko ti trabahok, sigurado nga aywanannak ni Jehova. Isu a nag-resign-ak.” Kastoy ti konklusionna: “Ipagarup ti adu a boss wenno amo a kaya nga isakripisio ti maysa nga empleado ti amin—agraman ti orasna para iti pamiliana ken iti Diosna—tapno laeng saanna a mapukaw ti nagpintas a trabahona. Naragsakak ta nagtalinaed a nasinged ti relasionko ken Jehova ken kadagiti kapamiliak. Makatawen kalpasanna, tinulongannak ni Jehova a makabirok iti napintas a trabaho nga umdas a mangsuporta kadagiti kasapulak ken ad-adu pay ti orasko nga agserbi kenkuana. Gapu ta iyun-unatayo ni Jehova, posible a no dadduma, saanen a kas iti dati ti kaadu ti kuartatayo. Ngem masiguradotayo nga aywanannatayo ni Jehova.” Wen, no agtalektayo kadagiti balakad ken kari ni Jehova, makapagtultuloytayo a magna babaen ti pammati ket bendisionannatayo.

NO AGPILPILITAYO ITI PAKIASAWAAN

10. Kasano a ti maysa a tao ket magmagna babaen ti panagkita no agpilpili iti pakiasawaanna?

¹⁰ Ti panagasawa ket regalo ni Jehova. Natural laeng a kayattayo ti makiasawa. No us-usigen ti maysa a sister ti maipapan iti nasayaat a pakiasawaanna, mabalin a pampanunotenna ti personalidad dayta a brother, ti itsurana, reputasionna, kasasaadna iti pinansial, responsabilidadna iti pamilia, ken no naragsakto ngata isuna iti denna dayta a brother.b Talaga a masapul a maikabilangan dagita a banag. Ngem no dagita laeng ti ikabkabilangan ti sister, magmagna isuna babaen ti panagkita.

11. Kasano a ti maysa a tao ket magmagna babaen ti pammati no agpilpili iti pakiasawaanna? (1 Corinto 7:39)

¹¹ Sigurado nga ipagpannakkel ni Jehova dagiti kakabsat a lallaki ken babbai a mangsursurot iti balakadna maipapan iti panagpili iti pakiasawaan! Kas pagarigan, ipappapusoda ti balakadna nga agurayda agingga a ‘limbesen ti kinaagtutuboda’ sakbay nga agarem ken makinobioda. (1 Cor. 7:36) No agbirbirokda iti nasayaat a pakiasawaan, sigsiguraduenda nga addaan dayta a tao kadagiti kualidad a kayat ni Jehova nga ipakita ti nasayaat nga asawa. (Prov. 31:​10-13, 26-28; Efe. 5:33; 1 Tim. 5:8) No adda saan a Saksi nga agkursonada kadakuada, agtulnogda iti balakad a makiasawada ‘laeng iti adalan ti Apo,’ a mabasa iti 1 Corinto 7:39. (Basaen.) Itultuloyda ti magna babaen ti pammati, nga agtalekda nga adayo a nasaysayaat ti maipaay ni Jehova nga emosional a tulong ngem ti maipaay ti asinoman.—Sal. 55:22.

12. Ania ti masursurom iti kapadasan ni Rosa?

¹² Kitaentayo ti kapadasan ni Rosa a maysa a payunir idiay Colombia. Mangisursuro iti online. Iti maysa a klasena, adda saan a Saksi a nagkursonada kenkuana. Kursonada met ni Rosa. Imbagana: “Nakasingsingpet met isuna iti panagkunak. Tumultulong kadagiti kalugaranna ken awan ti bisiona. Magustuak ti panangtratona kaniak. Adda kenkuana dagiti sapsapulek iti maysa nga asawa. Daydiay laeng ta saan a Saksi.” Intuloyna: “Nagrigat a basteden ta magustuak met isuna ken nalidayak idi ta kayatko metten ti makiasawa. Awan met ngarud ti Saksi a mabirokak idi.” Nupay kasta, saan laeng a nagpokus ni Rosa iti makitkitana. Pinanunotna no kasano a maapektaran ti relasionna ken Jehova no makinobio iti dayta a lalaki. Isu a binastedna ken pinutedna ti amin a komunikasionna iti dayta a lalaki ket nagtalinaed a busy kadagiti naespirituan nga aktibidad. Di nagbayag, naawis nga ageskuela iti School for Kingdom Evangelizers, ket ita, agserserbin kas special pioneer. Imbaga ni Rosa: “Nakaragragsak itan ti pusok gapu iti nagadu a bendision nga ipapaay ni Jehova.” Saan a kanayon a nalaka nga aramiden dagiti kayat ni Jehova, lallalo no magustuantayo unay ti maysa a banag. Ngem kanayon a pagsayaatantayo no magnatayo babaen ti pammati.

NO MAKAAWATTAYO KADAGITI INSTRUKSION MANIPUD ITI ORGANISASION

13. Ania ti reaksiontayo a mangipakita a magmagnatayo babaen ti panagkita no makaawattayo kadagiti instruksion manipud iti organisasion?

¹³ Masansan a makaawattayo kadagiti instruksion manipud kadagiti panglakayen iti kongregasiontayo, manangaywan iti sirkito, sanga nga opisina, wenno iti Bagi a Manarawidwid a mangigiya kadatayo iti panagdaydayawtayo ken Jehova. Ngem no dadduma, baka ditay maawatan ti rason a naited ti maysa nga instruksion. Mabalin ngamin a ti kitkitaentayo laeng ket dagiti ipagaruptayo a negatibo nga epekto kadatayo dayta nga instruksion. Baka agpokustayo pay ketdin kadagiti pagkamkamalian dagiti kakabsat a nangted iti instruksion.

14. Ania ti makatulong kadatayo a magna babaen ti pammati no makaawattayo kadagiti instruksion manipud iti organisasion? (Hebreo 13:17)

¹⁴ No magmagnatayo babaen ti pammati, agtalektayo a ni Jehova ti mangidaldalan iti organisasionna ken ammona ti kasayaatan para kadatayo. Gapu iti dayta, situtulok ken dagus nga agtulnogtayo. (Basaen ti Hebreo 13:17.) Ammotayo a ti panagtulnogtayo ket makatulong iti panagkaykaysa ti kongregasiontayo. (Efe. 4:​2, 3) Agtalektayo met ken Jehova ken ammotayo nga uray no imperpekto dagiti kakabsat a mangidadaulo kadatayo, bendisionannatayo amin no agtulnogtayo. (1 Sam. 15:22) Mamatitayo met a no masapul a mabaliwan ti maysa nga instruksion, siguraduenna a mabaliwanto dayta iti inkeddengna a tiempo.—Mik. 7:7.

15-16. Ania ti nakatulong iti maysa a brother a magna babaen ti pammati uray no medio pagduaduaanna ti instruksion a naawatna? (Kitaen met ti ladawan.)

¹⁵ Kitaentayo ti maysa a kapadasan a mangitampok iti pagsayaatan ti pannagna babaen ti pammati. Idiay Peru, Spanish ti kangrunaan a lengguahe a maus-usar. Ngem adu a bumalay ti agsasao kadagiti katutubo a lengguahe. Maysa kadagita ket ti Quechua. Adun a tawen nga agbirbirok dagiti kakabsat a makasao iti Quechua kadagiti agsasao met laeng iti dayta a lengguahe iti teritoriada. Ngem kas panangsurot kadagiti regulasion ti gobierno, nakaawatda iti baro nga instruksion no kasano ti agbirok kadagiti makasabaan. (Roma 13:1) Gapu iti dayta, madanagan ti dadduma a kakabsat amangan no narigrigaten ti agbirok kadagiti agsasao iti Quechua iti teritoriada. Ngem nagtulnog dagiti kakabsat iti instruksion ket binendisionan ni Jehova dagiti panagreggetda a mangbirok iti adu nga agsasao iti Quechua.

¹⁶ Ni Kevin ket panglakayen iti maysa a Quechua a kongregasion. Karaman isuna kadagiti madanagan idi. Inlawlawagna: “Idi nangngegko ti instruksion, napanunotko, ‘Kasanokami itan a makabirok kadagiti agsasao iti Quechua?’” Ania ti inaramid ni Kevin? Imbagana: “Nalagipko ti Proverbio 3:5 ken pinanunotko ti maipapan ken Moises. Indauluanna dagiti Israelita a pumanaw iti Egipto nga agturong iti Nalabaga a Baybay, isu a kasla saandan a maitarayan dagiti Egipcio a mangkamkamat kadakuada. Ngem nagtulnog latta ni Moises isu a binendisionan ni Jehova iti nakaskasdaaw a pamay-an.” (Ex. 14:​1, 2, 9-11, 21, 22) Situtulok ni Kevin a nagtulnog iti instruksion. Ania ti resultana? Imbagana: “Nasdaawak no kasano a binendisionannakami ni Jehova. Idi, nakaad-adayo ti pagpagnaenmi a mangasaba. Ngem no dadduma, maymaysa wenno dua laeng ti mabirokanmi nga agsasao iti Quechua. Ngem ita, ti pappapananmin ket dagiti teritoria nga adu ti agsasao iti Quechua. Gapu iti dayta, ad-adun ti makasarsaritami, masarsarungkaran, ken mayad-adalanmi iti Biblia. Immadu met dagiti makigimgimong.” Wen, no magnatayo babaen ti pammati, kanayon a bendisionannatayo ni Jehova.

17. Ania dagiti nasursurom iti daytoy nga artikulo?

¹⁷ Napagsasaritaantayo no kasanotayo nga itultuloy ti magna babaen ti pammati iti tallo a napateg a situasion. Ngem masapul nga itultuloytayo ti magna babaen ti pammati iti amin nga aspeto ti biagtayo, kas no agpilpilitayo iti paglinglingayan, agar-aramidtayo kadagiti desision maipapan iti edukasion wenno panangpadakkel kadagiti annak. Aniaman a desision ti aramidentayo, masapul nga agpaidalantayo saan laeng nga iti makitkitatayo no di ket uray iti relasiontayo ken Jehova, iti balakadna, ken iti karina nga aywanannatayo. No aramidentayo dagita, kabaelantayo ti ‘magna iti nagan ni Jehova a Diostayo iti agnanayon nga awan inggana.’—Mik. 4:5.