Saantayo a Pulos nga Agmaymaysa

1-2. (a) Apay a maibagatayo a ditay pulos agmaymaysa a mangsango kadagiti pakarigatantayo? (b) Ania ti pagsasaritaantayo iti daytoy nga artikulo?

NO MAIPASANGOTAYO kadagiti nakaro a pakarigatan, mabalin a mariknatayo a kaslatayo agmaymaysa iti bassit a bangka iti nakadawdawel a baybay. Ngem saantayo nga agmaymaysa a mangsango kadagiti pakarigatantayo. Saan la a makitkita ti naayat a nailangitan nga Amatayo dagiti rigat a mapaspasarantayo, no di ket ikarkarina pay a tulongannatayo tapno mapagballigiantayo dagita. Ipaspasigurado ni Jehova iti tunggal matalek nga adipenna: “Tulongankanto.”—Isa. 41:10.

² Pagsasaritaantayo iti daytoy nga artikulo no kasano a tultulongannatayo ni Jehova babaen ti (1) panangidalanna kadatayo, (2) panangipaayna kadagiti kasapulantayo, (3) panangprotektarna kadatayo, ken (4) panangliwliwana kadatayo. Ipaspasigurado kadatayo ni Jehova nga aniaman a pakasuotan ti maipasango kadatayo, saannatayo a pulos lipaten. Dinatay pulos baybay-an, isu a ditay pulos agmaymaysa.

IDALDALANNATAYO NI JEHOVA

3-4. Kasanonatayo nga idaldalan ni Jehova? (Salmo 48:14)

³ Basaen ti Salmo 48:14. Ammo ni Jehova a saantayo a maidalan ti biagtayo isu a kasapulantayo ti panangidalanna. Kasanona nga idaldalan dagiti matalek nga agdaydayaw kenkuana ita? Ti maysa a pamay-an ket babaen ti Biblia. (Sal. 119:105) Us-usarenna ti Saona tapno tulongannatayo nga agaramid kadagiti nasayaat a desision ken tapno matuladtayo ti ar-aramid ken panagpampanunotna. No surotentayo ti isursurona iti Biblia, naragragsak ti biagtayo ita ken maaddaantayo iti namnama nga agbiag nga agnanayon.a Kas pagarigan, isursurona a saantayo nga agipempen iti sakit ti nakem, agbalintayo a napudno iti amin nga ar-aramidentayo, ken naimpusuan nga ayatentayo ti dadduma. (Sal. 37:8; Heb. 13:18; 1 Ped. 1:22) No ipakpakitatayo dagita a kualidad, agbalintayo a nasaysayaat a nagannak, asawa, ken gayyem.

⁴ Kasta met, impaisurat ni Jehova iti Saona ti kapadasan dagiti pudpudno a tattao a nakapasar kadagiti pakasuotan ken addaan iti rikrikna a kas kadatayo. (1 Cor. 10:13; Sant. 5:17) No basaentayo dagita a kapadasan ken iyaplikartayo dagiti masursurotayo, magunggonaantayo iti dua a pamay-an. Umuna, maawatantayo a saan la a datayo ti makapaspasar iti rigat. Maipaspasango met ti dadduma kadagita a situasion ken naibturanda dagita iti tulong ni Jehova. (1 Ped. 5:9) Ken maikadua, maammuantayo dagiti makatulong kadatayo tapno maibturantayo dagiti pakarigatantayo ken tapno agtultuloytayo latta a naragsak.—Roma 15:4.

5. Siasino dagiti us-usaren ni Jehova a mangidalan kadatayo?

⁵ Us-usaren met ni Jehova dagiti kapammatiantayo tapno idalannatayo.b Kas pagarigan, regular a bisbisitaen dagiti manangaywan iti sirkito dagiti kongregasion tapno paregtaendatayo. Makatultulong dagiti palawagda tapno bumileg ti pammatitayo ken mataginayon ti panagkaykaysatayo. (Ara. 15:40–16:5) Tultulongan met dagiti panglakayen iti kongregasion ti tunggal maysa kadatayo tapno agtalinaedtayo a nasinged ken Jehova. (1 Ped. 5:​2, 3) Isursuro dagiti nagannak kadagiti annakda nga ayatenda ni Jehova. Isursuroda met no kasano a maaddaanda iti nasayaat a kababalin, nasayaat a rutina iti naespirituan, ken no kasano a makaaramidda kadagiti nasayaat a desision. (Prov. 22:6) Tultulongan met dagiti nataengan iti naespirituan a Kristiano a babbai dagiti agtutubo a sister babaen iti nasayaat nga ulidanda, panangipaayda iti makatulong a balakad, ken panangparegtada kadakuada.—Tito 2:​3-5.

6. Ania ti masapul nga aramidentayo tapno magunggonaantayo iti panangidalan ni Jehova?

⁶ Impaay ni Jehova ti amin a kasapulantayo tapno makaaramidtayo kadagiti nasayaat a desision ken agbalin a naragsak ti biagtayo. Kasanotayo a maipakita nga ap-apresiarentayo ti inaramidna? Kuna ti Proverbio 3:​5, 6: “Agtalekka ken Jehova iti amin a pusom, ket dika agtalek iti bukodmo a pannakaawat.” No aramidentayo dayta, “palintegennanto dagiti dana[tayo],” kayatna a sawen, tulongannatayo tapno maliklikantayo ti adu a problema ken agbalin a naragragsak ti biagtayo. Anian a yamantayo ta ipapaay ni Jehova ti naayat a balakad a makatulong iti tunggal maysa kadatayo!—Sal. 32:8.

IPAPAAY NI JEHOVA DAGITI KASAPULANTAYO

7. Kadagiti ania a pamay-an nga ipapaay ni Jehova dagiti kasapulantayo? (Filipos 4:19)

⁷ Basaen ti Filipos 4:19. Saannatayo la nga idaldalan ni Jehova iti naespirituan. Bembendisionanna met dagiti panagreggettayo tapno maaddaantayo iti makan, bado, ken pagyanan. (Mat. 6:33; 2 Tes. 3:12) Natural laeng a maseknantayo kadagiti pisikal a kasapulantayo. Ngem parparegtaennatayo ni Jehova a ditay koma unay madanagan kadagita. (Kitaen ti study note ti Matthew 6:25.) Apay? Gapu ta saan a pulos a baybay-an ti Amatayo dagiti matalek nga agdaydayaw kenkuana kadagiti tiempo nga agkasapulanda. (Mat. 6:8; Heb. 13:5) Masiguradotayo a no kuna ni Jehova nga ipaayna dagiti kasapulantayo, aramidenna dayta.

8. Ania ti inaramid ni Jehova para ken David?

⁸ Panunotentayo no kasano a tinulongan ni Jehova ni David. Adu a tawen a nagrigat ni David gapu iti kinapugantena. Ngem impaay ni Jehova dagiti kasapulanna ken dagiti tattaona tapno agbiagda. Idi inut-utob ni David ti panangaywan kenkuana ni Jehova bayat ti panaglabas dagiti tiempo, insuratna: “Sipud idi ubingak agingga ita a lakayakon, diak pay nakakita iti asinoman a nalinteg a nabaybay-an, wenno uray dagiti annakna nga agsapsapul iti tinapay.” (Sal. 37:25) Kas ken David, mabalin a nakitamon ti naayat a panangipaay ni Jehova kadagiti kasapulam ken dagiti kakabsattayo kadagiti narigat a tiempo.

9. Kasano nga ipapaay ni Jehova dagiti kasapulan ti ilina ita no adda didigra? (Kitaen met dagiti ladawan.)

⁹ Ipapaay met ni Jehova dagiti kasapulan ti ilina no adda didigra. Kas pagarigan, idi adda bisin idiay Jerusalem idi umuna a siglo, dagiti kapammatianda iti nagduduma a lugar ket nagipatulod kadagiti kasapulanda. (Ara. 11:​27-30; Roma 15:​25, 26) Ipakpakita met ti ili ti Dios ita ti kasta a kinaparabur. No adda didigra, siaayat a tignayen ni Jehova ti ilina a mangipaay iti makan, danum, bado, ken agas kadagiti naapektaran a kapammatianda. Tumultulong met dagiti boluntario iti konstruksion a mangtarimaan kadagiti nadadael a balay ken Kingdom Hall. Ken dagus a mangipaay dagiti adipen ni Jehova iti emosional ken naespirituan a tulong kadagiti napukawan iti sanikua ken ipatpateg iti biag.c

10-11. Ania ti masursurom iti kapadasan ni Borys?

¹⁰ Sipaparabur met nga ipapaay ni Jehova ti kasapulan uray dagiti saan pay nga agserserbi kenkuana. Kasta met, agsapsapultayo kadagiti oportunidad a mangipakita iti kinaimbag kadagiti saan pay nga agserserbi ken Jehova. (Gal. 6:10) Masansan nga agresulta dayta iti nasayaat a panangsaksi. Kitaentayo ti kapadasan ni Borys a taga-Ukraine a maysa a prinsipal iti eskuelaan. Nupay saan a Saksi ni Jehova ni Borys, kanayon a nasayaat ti panangtratona kadagiti Saksi nga estudiantena ken resrespetuenna dagiti patpatienda. Gapu iti gubat, nagdesision ni Borys a pumanaw iti pagnanaedanna tapno mapan iti nataltalged a lugar iti pagilianda. Dagiti kakabsat ti timmulong kenkuana. Idi agangay, immatender ni Borys iti Memorial iti ipapatay ni Kristo. No panunoten ni Borys ti inaramid dagiti kakabsat para kenkuana, imbagana: “Nakasingsingpet kaniak dagiti Saksi ken inaywanandak a naimbag. Agyamyamanak unay kadagiti Saksi ni Jehova.”

¹¹ Matuladtayo met ti naasi a nailangitan nga Amatayo no ipakitatayo ti ayat kadagiti agkasapulan, kapammatiantayo man ida wenno saan. (Luc. 6:​31, 36) Sapay koma ta ti ipakpakitatayo nga ayat kadagiti tattao ti mangtignay kadakuada nga agbalin nga adalan ni Kristo. (1 Ped. 2:12) Ngem pilienda man ti agserbi ken Jehova wenno saan, naragsaktayo latta ta naragragsak ti mangted ngem ti umawat.—Ara. 20:35.

PROTEKTARANNATAYO NI JEHOVA

12. Ania a proteksion ti ikarkari ni Jehova nga ipaayna iti ilina kas grupo? (Salmo 91:​1, 2, 14)

¹² Basaen ti Salmo 91:​1, 2, 14. Ikarkari ni Jehova a protektaranna ti ilina ita manipud iti aniaman a posible a mangdadael iti pannakigayyemda kenkuana. Dina pulos ipalubos a pasardengen ni Satanas ti panagdaydayawda Kenkuana. (Juan 17:15) Ket bayat ti “dakkel a rigat,” makapagtalektayo a tungpalento ni Jehova ti karina a protektaranna ti ilina iti naespirituan ken uray iti pisikal.—Apoc. 7:​9, 14.

13. Kadagiti ania a pamay-an a protprotektarannatayo ni Jehova kas indibidual?

¹³ Kasanonatayo a protprotektaran ni Jehova kas indibidual? Tultulongannatayo ni Jehova babaen ti Kasuratan tapno mailasintayo ti umiso ken di umiso. (Heb. 5:14) No surotentayo dagiti prinsipio iti Sao ti Dios, protprotektarantayo ti pannakigayyemtayo kenkuana ken makaaramidtayo kadagiti nasayaat a desision a makatulong tapno agbalintayo a naragragsak ken nasalsalun-at. (Sal. 91:4) Us-usaren met ni Jehova ti kongregasion a mangprotektar kadatayo. (Isa. 32:​1, 2) Dagiti kakabsat iti kongregasion ay-ayatenda ni Jehova ken agtultulnogda kenkuana. Isu a no makikaduatayo kadakuada kadagiti gimong, ministerio, ken uray kadagiti gathering wenno panaglinglingay, mapabileg ken matulongandatayo a mangliklik kadagiti dakes nga impluensia.—Prov. 13:20.

14. (a) Apay a saannatayo a protektaran ti Dios iti amin a pakasuotan? (b) Ania ti ipanamnama kadatayo ti Salmo 9:10? (Kitaen met ti footnote.)

¹⁴ Iti napalabas, adda met idi dagiti tiempo a prinotektaran ni Jehova dagiti agdaydayaw kenkuana manipud kadagiti mabalin koma a nakadangran wenno nakatayanda. Ngem saan a kanayon a kasta ti aramidenna. No dadduma, mabalin a maipasangotayo kadagiti “di ninamnama a pasamak.” (Ecl. 9:11) Ipalpalubos met ni Jehova a maidadanes ken mapapatay pay ketdi ti dadduma nga adipenna tapno mapaneknekan nga ulbod ni Satanas. (Job 2:​4-6; Mat. 23:34) Kasta met la ita. Uray no saan nga ikkaten ni Jehova dagiti pakasuotantayo, masiguradotayo a dina pulos baybay-an dagiti mangay-ayat kenkuana.d—Sal. 9:10.

LIWLIWAENNATAYO NI JEHOVA

15. Kasano a maliwliwatayo babaen ti kararag, Sao ti Dios, ken kadagiti kapammatiantayo? (2 Corinto 1:​3, 4)

¹⁵ Basaen ti 2 Corinto 1:​3, 4. No dadduma, malidayan, madanagan, wenno mariribukantayo. Marikriknam kadi nga agmaymaysaka ita gapu ta maipaspasangoka iti nakarigrigat a situasion? Panagriknam kadi ket awan a pulos ti makaawat iti marikriknam? Maawatannaka ni Jehova. Ngem saannaka la a basta maawatan. ‘Liwliwaennatayo met iti amin a pakasuotantayo.’ Kasano? No agpakaasitayo ken Jehova iti kararag, ipaayannatayo iti “talna ti Dios a mangartap iti amin a pannakaawat.” (Fil. 4:​6, 7) Maliwliwatayo met no basaentayo dagiti sasao ni Jehova iti Biblia. Iti Biblia, ibagbaga kadatayo ni Jehova nga ay-ayatennatayo la unay. Isursuronatayo nga agbalin a masirib ken ipapaayannatayo iti namnama. Maliwliwatayo met no mapantayo makigimong ta adu ti makaparegta a mangngegantayo ken makaduatayo dagiti kakabsat a mangay-ayat kadatayo.

16. Ania ti masursurom iti kapadasan da Nathan ken Priscilla?

¹⁶ Kitaentayo no kasano a mangipapaay ni Jehova iti liwliwa ken pammabileg babaen ti Saona. Usigentayo ti kapadasan da Nathan ken Priscilla a taga-United States. Sumagmamano a tawenen ti napalabas, nagdesisionda nga umakar iti lugar a dakdakkel ti panagkasapulan kadagiti agibumbunannag. “Ninamnamami a bendisionan ni Jehova dagiti sakripisiomi,” imbaga ni Nathan. Ngem idi nakasangpetdan iti baro nga asaynmentda, dida ninamnama nga agsakitda ken maipasangoda iti problema iti pinansial. Idi agangay, nagsublida iti lugarda ngem nagtultuloyda latta nga agproblema iti pinansial. “Pinampanunotmi idi no apay a saannakami a tinulongan ti Dios a kas iti namnamaenmi,” nalagip ni Nathan. “Pinampanunotko pay ketdi no adda naaramidak a dakes.” Ngem idi agangay, naamiris da Nathan ken Priscilla a saan ida a binaybay-an ti Dios iti tiempo a nagkasapulanda. “Kadagita a narigat a tiempo, nagbalin ti Biblia a kasla masirib a gayyem a mangpabpabileg ken mangidaldalan kadakami,” inyestoria ni Nathan. “Ti panagpokusmi iti panangtulong ni Jehova kadakami iti dayta a pakarigatan imbes nga iti mismo a problemami, ti nangipasigurado kadakami a kanayon a tulongannakami ni Jehova iti masanguanan.”

17. Kasano a naliwliwa ti sister a ni Helga? (Kitaen met ti ladawan.)

¹⁷ Maliwliwadatayo met dagiti kakabsat. Kasano? Kitaentayo ti kapadasan ni Helga a taga-Hungary. Adu a tawen a naipasango iti nagduduma a problema isu a nais-stress ken nariknana nga awan serserbina. Ngem no sublianna dagidiay a napasaranna, maamirisna no kasano nga inusar ni Jehova dagiti kakabsat iti kongregasion a mangliwliwa kenkuana. Insuratna: “Kanayon a tinulongannak ni Jehova idi nakitana a mapakpaksuyanak iti sekular a trabahok, bayat nga ay-aywanak ti agsaksakit nga anakko, ken idi naipasangoak iti dadduma pay a pakasuotan. Awan pay a pulos uray maysa nga aldaw iti napalabas a 30 a tawen a saan a tinungpal ni Jehova ti karina a liwliwaennak. Kanayon a pabpabilgennak babaen iti pammaregta dagiti kakabsat ken makatukay-rikna a sasaoda. Masansan a makaawatak iti teks, kard, wenno komendasion iti tiempo a kasapulak unay dagita.”

18. Kasanotayo a maliwliwa ti sabsabali?

¹⁸ Addaantayo iti pribilehio a mangtulad iti Diostayo babaen ti panangliwliwatayo iti sabsabali. Kasanotayo a maaramid dayta? Siaanus a denggentayo ida, agsaotayo iti makaliwliwa kadakuada, ken tulongantayo ida kadagiti praktikal a pamay-an. (Prov. 3:27) Ikagumaantayo a liwliwaen dagiti agrigrigat, agraman dagidiay saan pay nga agserserbi iti Dios. No adda dagiti agladladingit, agsakit, wenno madandanagan, bisitaentayo ida, denggentayo ida, ken mangiranudtayo kadagiti makaparegta a teksto iti Biblia. No tuladentayo ni Jehova, ti “Dios ti amin a liwliwa,” saantayo laeng a tultulongan dagiti kapammatiantayo a mangibtur kadagiti pakarigatan no di ket palpaluknengentayo met ti puso dagiti saan pay nga agdaydayaw iti Dios.—Mat. 5:16.

KANAYON A TULONGANNATAYO NI JEHOVA

19. Ania ti ar-aramiden ni Jehova para kadatayo, ken kasanotayo a matulad?

¹⁹ Maseknan unay ni Jehova kadagiti amin a mangay-ayat kenkuana. Saannatayo a baybay-an no agrigrigattayo. Kas iti maysa a naayat a nagannak a mangay-aywan iti anakna, ay-aywanan met ni Jehova dagiti matalek nga agdaydayaw kenkuana. Idaldalannatayo, ipapaayna dagiti kasapulantayo, protprotektarannatayo, ken liwliwaennatayo. Matuladtayo ti nailangitan nga Amatayo no tulongan ken pabilgentayo ti dadduma no adda pakarigatanda. Nupay maipasangotayo kadagiti pannubok ken masaktan ti pusotayo no dadduma, masiguradotayo a tulongannatayo ni Jehova. Inkarina kadatayo: “Dika agbuteng, ta addaak kenka.” (Isa. 41:10) Anian a nagsayaat dayta a pammasiguro! Talaga a saantayo a pulos nga agmaymaysa.