Dakayo nga Agtutubo a Brother—Tuladenyo da Marcos ken Timoteo

1-2. Ania koma dagiti posible a nakalapped kada Marcos ken Timoteo nga ad-adda pay a makapagserbi iti sabsabali?

DAKAYO nga agtutubo a brother, kayatyo kadi ti ad-adda pay nga agpausar ken Jehova ken tumulong kadagiti kakabsat iti kongregasion? Sigurado a kayatyo. Talaga a makaparagsak a makita ti adu nga agtutubo a lallaki a situtulok nga agserbi iti dadduma! (Sal. 110:3) Ngem mabalin nga adda dagiti manglaplapped kadakayo. Adda kadi panagduaduam a mangpalawa iti ministeriom gapu ta saanmo nga ammo no anianto ti biagmo wenno sadino ti pangipananto kenka ni Jehova? Saanmo kadi nga inawat ti maysa nga asaynment gapu ta panagkunam ket saanka a kualipikado? No wen, saan la a siksika ti nakarikna iti dayta.

² Kasta met laeng ti narikna da Marcos ken Timoteo. Ngem uray no saanda nga ammo no anianto ti biagda ken uray no nariknada a saanda a kualipikado, pinilida latta ti ad-adda nga agserbi iti sabsabali. Posible a ni Marcos ket adda pay la idi iti poder ni nanangna ken agnanaedda iti napintas a balayda idi inawis isuna ni apostol Pablo ken ni Bernabe iti umuna a panagmisioneroda. (Ara. 12:​12, 13, 25) Ngem pinanawan ni Marcos ti nanam-ay a biagna tapno mapalawana ti ministeriona. Umuna, napan idiay Antioquia sa nakikadua kada Pablo ken Bernabe kadagiti adayo a luglugar. (Ara. 13:​1-5) Kasta met, posible nga adda pay laeng ni Timoteo iti poder dagiti nagannakna idi inawis ni Pablo a makikadua kenkuana iti trabaho a panangasaba. Agtutubo pay la idi ni Timoteo ken kurang pay ti kapadasanna isu a posible a nariknana a saan a kualipikado a sumurot ken Pablo. (Idilig ti 1 Corinto 16:​10, 11 ken 1 Timoteo 4:12.) Ngem inawatna ti awis ni Pablo isu nga adu a bendision ti natagiragsakna.—Ara. 16:​3-5.

3. (a) Kasanotayo nga ammo nga inapresiar unay ni Pablo da Marcos ken Timoteo? (2 Timoteo 4:​6, 9, 11) (Kitaen met dagiti ladawan.) (b) Ania dagiti saludsod nga usigentayo iti daytoy nga artikulo?

³ Uray agtutubo pay la idi da Marcos ken Timoteo, adun ti naurnongda a kapadasan ken nasursurodan nga ibaklay dagiti nadagsen a responsabilidad iti kongregasion. Inapresiar unay ni Pablo dagitoy nga agtutubo a lallaki nga uray la kayatna nga addada iti sibayna idi ammonan nga asidegen ti ipapatayna. (Basaen ti 2 Timoteo 4:​6, 9, 11.) Ania dagiti kualidad da Marcos ken Timoteo nga impateg unay ni Pablo? Kasano a matulad dagiti agtutubo a brother dagita a kualidadda? Ken kasano a makatulong kadagiti agtutubo a brother ita ti naayat a balakad ni Pablo?

TULADENYO NI MARCOS—SITUTULOKKAYO KOMA NGA AGSERBI

4-5. Kasano nga impakita ni Marcos a situtulok nga agserbi?

⁴ Sigun iti maysa a reperensia, ti panagserbi wenno panagministro kaipapananna ti “sisasaet ken sipipinget” a panangtulong iti dadduma. Nagsayaat nga ulidan ni Marcos iti daytoy a banag. Idi saan a kayat nga ikuyog ni Pablo iti maikadua a panagmisionerona, posible a nasaktan ken naupay ni Marcos. (Ara. 15:​37, 38) Ngem saan nga impalubos ni Marcos a dagita ti manglapped kenkuana nga agserbi kadagiti kakabsat.

⁵ Inawat ni Marcos ti awis ti kasinsinna a ni Bernabe nga agserbi iti sabali a lugar. Kalpasan ti agarup 11 a tawen, maysa ni Marcos kadagiti timmulong ken Pablo bayat ti immuna a pannakaibaludna idiay Roma. (Flm. 23, 24) Kinapudnona, inapresiar unay ni Pablo ti tulongna nga uray la imbagana a ni Marcos ket “mangmangted [kenkuana] iti kasta unay a liwliwa.”—Col. 4:​10, 11.

6. Ania dagiti naitulong ken Marcos ti pannakikaduana kadagiti Kristiano a nataengan iti naespirituan? (Kitaen ti footnote.)

⁶ Adu ti naitulong ken Marcos ti nasinged a pannakikaduana kadagiti Kristiano a nataengan iti naespirituan. Nakikadua iti sumagmamano a tiempo ken Pablo idiay Roma. Kalpasanna, nakikadua met ken apostol Pedro idiay Babilonia. Nagbalinda a nasinged nga aggayyem isu nga inawaganna “ni Marcos nga anakko.” (1 Ped. 5:13) Bayat ti panagkaduada, posible nga inyestoria ni Pedro iti agtutubo a gayyemna a ni Marcos ti adu a makapainteres a detalye maipapan iti biag ken ministerio ni Jesus nga isu met ti insurat ni Marcos idi agangay iti Ebanghelio a naipanagan kenkuana.a

7. Kasano a tinulad ti agtutubo a brother a ni Seung-Woo ti ulidan ni Marcos? (Kitaen met ti ladawan.)

⁷ Intultuloy ni Marcos ti matalek a panagserbina ken ti kinasingedna kadagiti kakabsat a nataengan iti naespirituan. Kasanom a matulad ni Marcos? Baka kayatmo nga ad-adu pay ti maaramidam iti panagserbim ken Jehova, kas iti panagbalin a ministerial nga adipen wenno panglakayen. Ngem saanka pay a kualipikado. Agan-anuska ken itultuloymo ti mangpanunot iti dadduma pay a pamay-an a makapagserbika ken Jehova ken kadagiti kakabsat. Kitaem ti kapadasan ni Seung-Woo a maysa itan a panglakayen. Idi agtutubo pay, ikomkomparana ti bagina iti dadduma pay nga agtutubo a brother. Addan pribilehio ti dadduma ngem isuna ket awan pay. Nasaktan ken naupay idi ni Seung-Woo ket imbagana ti rikriknana kadagiti panglakayen. Maysa a panglakayen ti nangibaga nga itultuloy latta ni Seung-Woo ti agaramid iti naimbag uray no dadduma, saan a makitkita dayta ti sabsabali. Inyaplikar ni Seung-Woo dayta a balakad. Rinugianna a tulongan dagiti nataengan ken dagiti makigimong nga awan paglugananda. No lagipenna ti napalabas, imbagana: “Nasursurok no ania a talaga ti kaipapanan ti panagserbi iti dadduma. Nakaragragsakak ta adda maitultulongko iti sabsabali.”

TULADENYO NI TIMOTEO—IPAKITAYO TI NAAYAT A PANANGASIKASO ITI SABSABALI

8. Apay a pinili ni Pablo ni Timoteo a makikadua iti panagdaliasatna? (Filipos 2:​19-22)

⁸ Kasapulan idi ni Pablo dagiti natutured a kakabsat a makikadua kenkuana iti panagsublina kadagiti siudad nga ayan dagiti nangidadanes idi kenkuana. Ti immuna a pinilina ket ni Silas, maysa a Kristiano nga aduanen iti kapadasan. (Ara. 15:​22, 40) Idi agangay, pinilina met ni Timoteo. Apay? Ti maysa a rason ket nasayaat ngamin ti reputasion ni Timoteo. (Ara. 16:​1, 2) Napaypayso met ti panangasikasona kadagiti pakaseknan dagiti tattao.—Basaen ti Filipos 2:​19-22.

9. Kasano nga impakita ni Timoteo a napaypayso ti panangasikasona kadagiti kakabsat?

⁹ Sipud pay idi damo a pannakikadua ni Timoteo ken Pablo iti ministerio, ipakpakitanan nga iyun-unana nga asikasuen ti sabsabali ngem iti bagina. Gapu iti dayta, natalged ti rikna ni Pablo a mangibati kenkuana idiay Berea tapno pabilgenna dagiti kabbaro nga adalan sadiay. (Ara. 17:​13, 14) Iti dayta met la a gundaway, nakatulong la ketdi ken Timoteo ti nasayaat nga ulidan ni Silas a nagbati met laeng idiay Berea. Ngem idi agangay, imbaon ni Pablo ni Timoteo nga is-isuna idiay Tesalonica tapno pabilgenna dagiti Kristiano iti dayta a siudad. (1 Tes. 3:​2, ftn.) Iti simmaruno a 15 a tawen wenno nasursurok pay, nasursuro ni Timoteo ti ‘makipagsangit kadagidiay agsangsangit,’ ken impakitana ti empatia iti asinoman nga agrigrigat. (Roma 12:15; 2 Tim. 1:4) Kasano a matulad dagiti agtutubo a brother ti ulidan ni Timoteo?

10. Kasano a nasursuro ti brother a ni Woo Jae nga ad-adda nga ipakita ti pannakaseknanna iti dadduma?

¹⁰ Nasursuro ti brother a ni Woo Jae nga ad-adda pay nga ipakita ti pannakaseknanna iti dadduma. Idi agtutubo pay ni Woo Jae, marigatan a makisarita kadagiti lallakay ken babbaket isu a basta kablaawanna latta idan iti Kingdom Hall sa panawanna idan. Imbalakad ti maysa a panglakayen a padasen ni Woo Jae ti makiinnestoria kadagiti kakabsat ken ibagana dagiti maap-apresiarna kadakuada. Pinaregta met ti panglakayen a panunotenna ti posible a paginteresan ti kasarsaritana. Inaramid ni Woo Jae dayta a balakad iti pannakilangenna iti dadduma. Ita, maysan a panglakayen ni Woo Jae. Imbagana: “Nalaklakaak itan a makisarita kadagiti tattao, aniaman ti edadda. Nagmayat ti riknak ta ammok a mas maawatakon ti situasion ti dadduma. Nagdakkel ti maitultulong dayta kaniak iti panangasikasok kadagiti kasapulan dagiti kakabsat.”

11. Kasano a masursuro dagiti agtutubo a brother nga ad-adda nga ipakita ti pannakaseknanda kadagiti kakongregasionda? (Kitaen met ti ladawan.)

¹¹ Dakayo nga agtutubo a brother, mabalinyo met nga ipakita ti pannakaseknanyo iti sabsabali. Kadagiti gimong, makisaritakayo kadagiti kakongregasionyo, aniaman ti edad, kultura, wenno kasasaadda iti biag. Komustaenyo ida ken dumngegkayo kadakuada tapno maammuanyo no kasanoyo ida a matulongan. Baka maammuanyo a marigatan gayam ti maysa a nataenganen nga agassawa a mangusar iti app a JW Library^®. Wenno maammuanyo nga awan pay ti mangkadua kadakuada iti ministerio. Mabalinyo kadi a tulongan ida a mangusar iti selpon wenno tablet-da, wenno mabalinyo kadi a kaduaen ida a mangasaba? No agdisnudokayo a tumulong, agbalinkayto a pagtuladan ti amin.

MATULONGANNAKAYO TI NAAYAT A BALAKAD NI PABLO

12. Kasano a makatulong kadagiti agtutubo a lallaki ti balakad ni Pablo ken Timoteo?

¹² Nangted ni Pablo ken Timoteo iti praktikal a balakad a makatulong kenkuana nga agballigi iti biag ken ministeriona. (1 Tim. 1:18; 2 Tim. 4:5) Dakayo nga agtutubo a brother, makatulong met kadakayo ti naayat a balakad ni Pablo. Kasano? Basaenyo ti dua a surat ni Pablo ken Timoteo a kas man la naisurat dagita para kadakayo, ken kitaenyo no kasanoyo a mayaplikar dagita iti biagyo. Usigentayo ti sumagmamano a pagarigan.

13. Ania ti makatulong kenka nga agbalin nga ad-adda a napudno ken Jehova?

¹³ “Sanayem ti bagim a mangipakita iti debosionmo iti Dios kas panggepmo.” (1 Tim. 4:7b) Ania ti debosion iti Dios? Kaipapanan dayta a napudno ti maysa a tao ken Jehova ken ar-aramidenna ti mangparagsak ken Jehova. Saantayo a nayanak nga addan kadatayo dayta a kualidad, isu a masapul a patanorentayo dayta. Kasano? Ti Griego a sao a naipatarus kas “sanayem ti bagim” ket masansan a tumukoy iti napinget a panagsanay dagiti atleta, sakbay ti kompetisionda. Masapul a disiplinaen dagita nga atleta ti bagida. Kasapulantayo met a disiplinaen ti bagitayo tapno mairuamtayo kadagiti aramid a mangpasinged kadatayo ken Jehova.

14. Ania koma ti kalattayo no agbasbasatayo iti Biblia? Mangted iti pagarigan.

¹⁴ Napateg nga iruamtayo ti inaldaw nga agbasa iti Biblia. Napateg met a laglagipentayo a ti rasontayo nga agbasa iti Biblia ket tapno agbalintayo a nasingsinged ken Jehova. Kas pagarigan, ania ti masursurom iti pannakisarita ni Jesus iti agtutubo ken nabaknang nga agturay? (Mar. 10:​17-22) Patien ti agtutubo a lalaki a ni Jesus ti Mesias. Ngem kurang ti pammatina isu a saanna a sinurot ni Jesus. Nupay kasta, adda latta ‘panagayat’ ni Jesus kenkuana. Natukay kadi ti pusom iti naasi a pannakisarita ni Jesus iti dayta nga agtutubo? Nalawag a kayat ni Jesus a makaaramid dayta nga agtutubo iti nainsiriban a desision. Impakita met ni Jesus ti panagayat ni Jehova iti dayta nga agtutubo. (Juan 14:9) Bayat nga us-usigem dayta a salaysay ken ti kasasaadmo, isaludsodmo iti bagim, ‘Ania ti masapul nga aramidek tapno agbalinak a nasingsinged ken Jehova ken ad-adda pay a makapagserbi iti sabsabali?’

15. Apay a masapul nga agbalin a nasayaat nga ulidan ti maysa nga agtutubo a brother? Mangted iti pagarigan. (1 Timoteo 4:​12, 13)

¹⁵ “Agbalinka nga ulidan kadagidiay matalek.” (Basaen ti 1 Timoteo 4:​12, 13.) Pinaregta ni Pablo ni Timoteo a sursuruenna ti agbalin a nalaing nga agbasa ken mangisuro. Ngem saan la a dagita. Pinaregtana met a masapul nga agbalin nga ulidan iti dadduma no iti ayat, pammati, ken kinadalus. Apay? Nabilbileg ngamin ti nasayaat nga ulidan ngem iti sasao. Kas pagarigan, naikkanka iti paset nga agpalawag maipapan iti panagbalin a naregregta iti ministerio. Saankanto nga agbain a mangipalawag iti dayta a topiko no ar-aramidem ti amin a kabaelam iti ministerio. Denggen ken iyaplikardanto ti palawagmo ta makitkitada nga ar-aramidem ti ibagbagam.—1 Tim. 3:13.

16. (a) Ania ti lima a pamay-an nga agbalin a nasayaat nga ulidan dagiti agtutubo a Kristiano? (b) Ania ti aramiden ti maysa nga agtutubo a brother tapno agbalin nga ulidan “iti panagsao”?

¹⁶ Iti 1 Timoteo 4:​12, dinakamat ni Pablo ti lima a pamay-an tapno agbalin a nasayaat nga ulidan ti maysa nga agtutubo a brother. Nasayaat no iwayaam nga adalen ti tunggal maysa kadagita. Kas pagarigan, kayatmo ti agbalin a nasayaat nga ulidan no “iti panagsao.” Panunotem ngarud dagiti pamay-an tapno agbalin a makapabileg ti panagsasaom. No addaka pay laeng iti poder dagiti nagannakmo, mabalin kadi a masansan nga iyebkasmo ti panangapresiarmo kadagiti ar-aramidenda para kenka? Kalpasan dagiti gimong, mabalinmo kadi nga ibaga kadagiti nagpaset dagiti nagustuam iti palawag wenno demostrasionda? Kadagiti gimong, baka kayatmo met ti agkomento iti bukodmo a sasao. Dagiti panagreggetmo nga agbalin a nasayaat nga ulidan iti panagsasao ipakitada a rumangrang-aykan iti naespirituan.—1 Tim. 4:15.

17. Ania ti makatulong iti maysa nga agtutubo a brother a mangragpat kadagiti naespirituan a kalatna? (2 Timoteo 2:22)

¹⁷ “Adaywam ti tarigagay dagiti agtutubo, ket ikagumaam nga ipakita ti kinalinteg.” (Basaen ti 2 Timoteo 2:22.) Pinaregta ni Pablo ni Timoteo a labananna dagiti tarigagay a manglapped iti panangragpatna kadagiti naespirituan a kalatna ken mangdadael iti relasionna ken Jehova. Mabalin a maamirismo nga adda dagiti aktibidad a saan met ketdi a dakes, ngem baka agawenda ti orasmo para kadagiti naespirituan nga aktibidad. Kas pagarigan, panunotem no kasano kaadu nga oras ti us-usarem para iti isports, panag-Internet, wenno video games. Mabalin kadi nga usarem ti dadduma kadagita nga orasmo para kadagiti naespirituan nga aktibidad? Baka kayatmo ti agboluntario a tumulong iti panangmantener iti Kingdom Hall-yo wenno makikadua iti cart witnessing dagiti kakongregasionmo. No makipasetka kadagita, mabalin a maaddaanka kadagiti baro a gagayyem a makatulong kenka a maaddaan ken mangragpat kadagiti naespirituan a kalatmo.

ADU A BENDISION TI MASAGRAPMO NO AGSERBIKA ITI SABSABALI

18. Apay a maibagatayo a naragsak ken makapnek ti biag da Marcos ken Timoteo?

¹⁸ Nagsakripisio da Marcos ken Timoteo tapno ad-adda a makapagserbida iti sabsabali. Gapu iti dayta, naragsak ken makapnek ti biagda. (Ara. 20:35) Napan ni Marcos iti nagduduma a paset ti lubong tapno makapagserbi kadagiti kapammatianna. Insuratna met ti makapagagar a salaysay maipapan iti biag ken ministerio ni Jesus. Tinulongan met ni Timoteo ni Pablo a mangipasdek kadagiti kongregasion ken mangpabileg kadagiti kakabsat. Nalawag a naragsakan ni Jehova iti kinamanagsakripisio da Marcos ken Timoteo.

19. Apay a masapul nga iyaplikar dagiti agtutubo a brother ti balakad ni Pablo ken Timoteo, ket no aramidenda dayta, anianto ti pagbalinan ti biagda?

¹⁹ Ti ayat ni Pablo ken Timoteo ket nalawag a makita kadagiti insuratna iti daytoy nga agtutubo a gayyemna. Ngem ni Jehova ti nangusar ken Pablo a mangaramid kadagita a surat tapno maammuantayo ti riknana kadakayo nga agtutubo a brother. Ay-ayatennakayo unay ni Jehova ken kayatna nga agballigikayo. Ipapuso ken iyaplikaryo ngarud koma ti naayat a balakad ni Pablo nga ad-adda nga agserbikayo iti sabsabali. No aramidenyo dayta, maaddaankayo iti makapnek a biag ita, ken ‘mapetpetanyo ti pudpudno a biag’ iti masanguanan.—1 Tim. 6:​18, 19.