Dagiti Masursurotayo Kadagiti Impadto ni Jacob—Paset 2

1. Ania ti pagsasaritaantayo iti daytoy nga artikulo?

NAGUUMMONG dagiti annak a lallaki ni Jacob bayat a dengdenggenda a naimbag ti ibaga ti lakayen nga amada para iti tunggal maysa kadakuada. Kas naammuantayon iti napalabas nga artikulo, nasdaaw ken nalabit nakigtot pay ketdi da Ruben, Simeon, Levi, ken Juda kadagiti imbaga ni Jacob. Isu a posible a pampanunotenda no ania met ti ibaga ni amada iti walo pay nga annakna a lallaki. Kitaentayo dagiti masursurotayo kadagiti imbaga ni Jacob kada Zabulon, Isacar, Dan, Gad, Aser, Neftali, Jose, ken Benjamin.a

ZABULON

2. Ania ti imbaga ni Jacob ken Zabulon, ken kasano a natungpal dayta? (Genesis 49:13) (Kitaen met ti kahon.)

² Basaen ti Genesis 49:13. Imbaga ni Jacob a dagiti kaputotan ni Zabulon ket agnaed iti igid ti baybay, iti amianan ti Naikari a Daga. Nasurok a 200 a tawen kalpasanna, naawat dagiti Zabulonita ti tawidda a teritoria. Masarakan dayta iti nagbaetan ti Baybay ti Galilea ken ti Mediteraneo. Impadto ni Moises: “Agragsakka iti iruruarmo, O Zabulon.” (Deut. 33:18) Posible a nalaka laeng a makapagdaliasat ti tribu ni Zabulon iti dua a baybay isu a nalakada la a makinegosio iti dadduma a lugar. Aniaman ti kasasaad, naragsak la ketdi idi dagiti kaputotan ni Zabulon.

3. Ania ti makatulong kadatayo nga agbalin a kontento?

³ Ania ti masursurotayo? Adu ti panggapuantayo nga agbalin a naragsak, sadinoman ti pagnanaedantayo wenno aniaman ti kasasaadtayo. Tapno kanayon a naragsaktayo, masapul a kontentotayo kadagiti adda kadatayo. (Sal. 16:6; 24:5) No dadduma, ti ngamin pampanunotentayo ket dagiti awan kadatayo imbes a dagiti nagsasayaat a bambanag nga addan kadatayo. Isu nga ikagumaam koma ti agpokus kadagiti positibo a bambanag iti biagmo.—Gal. 6:4.

ISACAR

4. Ania ti imbaga ni Jacob ken Isacar ken kasano a natungpal dayta? (Genesis 49:​14, 15) (Kitaen met ti kahon.)

⁴ Basaen ti Genesis 49:​14, 15. Kinomendaran ni Jacob ni Isacar gapu iti kinagagetna. Inkomparana isuna iti maysa nga asno a natibker ti tulangna a makaawit iti nadadagsen. Imbaga pay ni Jacob a maaddaan ni Isacar iti napintas a daga. Pimmayso ti imbaga ni Jacob ta nakaawat dagiti kaputotan ni Isacar iti nabunga ken nadam-eg a daga iti abay ti Karayan Jordan. (Jos. 19:22) Sigurado a nagtrabahoda iti nadagsen tapno makultibarda ti dagada. Ngem nagtrabahoda met a naimbag para iti pagimbagan ti dadduma. (1 Ar. 4:​7, 17) Kas pagarigan, nakasagana idi ti tribu ni Isacar a tumulong iti pannakigubat ti nasionda kas iti inaramidda idi tiempo da Ukom Barak ken propeta Debora.—Uk. 5:15

5. Apay a masapul nga ikagumaantayo ti agbalin a nagaget?

⁵ Ania ti masursurotayo? Apresiaren ni Jehova ti kinagagettayo nga agserbi kenkuana no kasano nga inapresiarna idi ti kinagaget ti tribu ni Isacar. (Ecl. 2:24) Alaentayo a pagarigan dagiti kakabsat nga agbambannog a mangaywan iti kongregasion. (1 Tim. 3:1) Saan a kasapulan a makipaset dagita a kakabsat iti literal a gubat. Imbes ketdi, ar-aramidenda ti amin a kabaelanda tapno maprotektaranda dagiti kakabsat iti aniaman a mangdadael iti relasionda ken Jehova. (1 Cor. 5:​1, 5; Jud. 17-23) Ikagkagumaanda met ti mangisagana ken mangiparang kadagiti makaparegta a palawag a mangpabileg iti kongregasion.—1 Tim. 5:17.

DAN

6. Ania nga annongen ti naitalek iti tribu ni Dan? (Genesis 49:​17, 18) (Kitaen met ti kahon.)

⁶ Basaen ti Genesis 49:​17, 18. Ni Jacob impadana ni Dan iti maysa nga uleg a mangkagat iti daddadakkel nga animal, kas iti pakigubat a kabalio tapno matnag ti nakasakay iti dayta. Talaga a nakaturtured ti tribu ni Dan ta nakasagana a mangraut kadagiti kabusor ti nasion ti Israel. Bayat ti panagdaliasatda nga agturong iti Naikari a Daga, sinalakniban ti tribu ni Dan dagiti padada nga Israelita. Kasano? Nagbalinda a “guardia iti likudan.” (Num. 10:25) Nakapatpateg dayta nga annongen, nupay saan a makitkita ti kaaduan nga Israelita dayta nga ar-aramiden ti tribu ni Dan.

7. Ania ti masapul a laglagipentayo no maipapan kadagiti maaw-awattayo nga asaynment manipud iti organisasion?

⁷ Ania ti masursurotayo? Adda kadi naited kenka nga asaynment nga iti panagriknam ket saan a nakita ti dadduma? Baka timmulongka a nagdalus ken nangmantener iti Kingdom Hall, nagboluntarioka para iti asamblea wenno kombension, wenno iti dadduma pay a trabaho. No wen, nagsayaat dayta nga inaramidmo! Kanayon a laglagipem a makitkita ken ap-apresiaren ni Jehova ti amin nga ar-aramidem para kenkuana. Nangnangruna nga ap-apresiarenna no agserserbika kenkuana, saan a gapu ta kayatmo ti mapadayawan, no di ket kayatmo nga ipakita nga ay-ayatem unay isuna.—Mat. 6:​1-4.

GAD

8. Apay a nalaka a rauten dagiti kabusor ti Israel ti tribu ni Gad? (Genesis 49:19) (Kitaen met ti kahon.)

⁸ Basaen ti Genesis 49:19. Impakpakauna ni Jacob a ti tribu ni Gad ket rauten ti maysa a grupo dagiti tulisan. Nasurok a 200 a tawen kalpasanna, nasakup ti tribu ni Gad ti daga iti daya ti Karayan Jordan—a kaarruba dagiti kalabanda a nasion, isu a nalakada laeng a maraut. Ngem kayat latta dagiti Gadita ti agnaed sadiay gapu ta nagsayaat dayta a pangipastoranda kadagiti tarakenda nga animal. (Num. 32:​1, 5) Nalawag a natured dagiti Gadita. Kangrunaan iti amin, agtalekda a tulongan ida ni Jehova a mangidepensa iti daga nga impatawid kadakuada ti Dios maibusor iti asinoman a mangraut kadakuada. Iti adu a tawen, imbaonda pay ketdi dagiti soldadoda a tumulong iti dadduma a tribu tapno masakup ti dadduma pay a paset ti Naikari a Daga iti laud ti Jordan. (Num. 32:​16-19) Bayat ti kaawanda, nagtalekda a salakniban ni Jehova dagiti assawa ken annakda. Binendisionan ida ni Jehova gapu iti kinatured ken kinamanagsakripisioda.—Jos. 22:​1-4.

9. Ania dagiti desision nga aramidentayo gapu ta agtaltalektayo ken Jehova?

⁹ Ania ti masursurotayo? Tapno maitultuloytayo ti agserbi ken Jehova kadagiti narigat a kasasaad, masapul nga itultuloytayo ti agtalek kenkuana. (Sal. 37:3) Kasta ti ar-aramiden ti adu a kakabsat ita. Nupay saan a kanayon a nalaka, adu ti tumultulong nga agibangon kadagiti Kingdom Hall ken dadduma pay a pasilidad ti organisasion, mangaskasaba kadagiti lugar a dakdakkel ti panagkasapulan, wenno tumultulong iti dadduma pay a pamay-an. Ar-aramidenda dayta ta agtaltalekda a kanayon nga aywanan ida ni Jehova.—Sal. 23:1.

ASER

10. Ania ti saan a naaramidan ti tribu ni Aser? (Genesis 49:20) (Kitaen met ti kahon.)

¹⁰ Basaen ti Genesis 49:20. Impadto ni Jacob a bumaknang ti tribu ni Aser, ket eksakto a kasta ti napasamak. Ti daga a natawid ti tribu ni Aser ket karaman kadagiti kadam-egan a daga iti intero nga Israel. (Deut. 33:24) Asideg dayta iti Baybay Mediteraneo ken karaman met iti dayta ti narang-ay a sangladan ti Sidon iti Fenicia. Ngem saan a pinapanaw ti tribu ni Aser dagiti Canaanita nga agnanaed iti daga. (Uk. 1:​31, 32) Ti dakes nga impluensia dagiti Canaanita ken ti kinabaknang ti tribu ni Aser ti mabalin a rason a bimmaaw ti regtada para iti nadalus a panagdaydayaw. Idi nagayab ni Ukom Barak kadagiti boluntario a tumulong a makilaban kadagiti Canaanita, saan a timmulong ti tribu ni Aser. Gapu iti dayta, saan a nakita ti tribu ni Aser dagiti nakaskasdaaw nga inaramid ni Jehova tapno mangabak dagiti Israelita “iti asideg dagiti danum ti Megiddo.” (Uk. 5:​19-21) Iti dayta a panagballigi, dagitoy a sasao ti karaman kadagiti inkanta da Ukom Barak ken Debora: “Nakatugaw lattan ti Aser iti igid ti baybay.” (Uk. 5:17) Permi la ketdi ti bain ti tribu ni Aser idi nangngegda dayta.

11. Apay a saan koma a dagiti material a bambanag ti kapatgan iti biagtayo?

¹¹ Ania ti masursurotayo? Kayattayo nga ipaay ken Jehova ti kasayaatantayo. Maaramidtayo dayta no ditay tultuladen ti panangmatmat ti lubong a ti material a bambanag ti kapatgan iti biag. (Prov. 18:11) Kasapulantayo ti kuarta. Ngem ditay ipalubos nga agbalin a napatpateg dayta ngem iti panagserbitayo ken Jehova. (Ecl. 7:12; Heb. 13:5) Ditay sayangen ti tiempo ken pigsatayo a maaddaan kadagiti bambanag a saantayo met a talaga a kasapulan. Imbes ketdi, aramidentayo ti amin a kabaelantayo para ken Jehova. Ammotayo a no agtalinaedtayo a matalek, bendisionannatayto ni Jehova iti naragsak a biag iti baro a lubong.—Sal. 4:8.

NEFTALI

12. Ania ti posible a kaitungpalan ti impadto ni Jacob maipapan ken Neftali? (Genesis 49:21) (Kitaen met ti kahon.)

¹² Basaen ti Genesis 49:21. Imbaga ni Jacob a “makaay-ayo ti panagsao” ni Neftali. Mabalin a tumukoy dayta iti pamay-an ni Jesus nga agsao bayat ti ministeriona. Pagaammo idi ni Jesus gapu iti epektibo a panangisurona, ket nagnaed idiay Capernaum iti teritoria ti Neftali isu nga imbilangna dayta kas “siudadna.” (Mat. 4:13; 9:1; Juan 7:46) Impadto met ni Isaias maipapan ken Jesus nga agbalin a kas “naraniag a lawag” para kadagiti umili ti Zabulon ken Neftali. (Isa. 9:​1, 2) Talaga a ni Jesus “ti pudno a silaw a manglawag iti tunggal kita ti tao” gapu iti pannursurona.—Juan 1:9.

13. Kasanotayo a masigurado a makaay-ayo ken Jehova ti panagsasaotayo?

¹³ Ania ti masursurotayo? Napateg ken Jehova ti ibagbagatayo ken ti pamay-antayo a mangibaga iti dayta. Kasano nga agbalin a “makaay-ayo ti panagsao[tayo]” a mangparagsak ken Jehova? Umuna, agsaotayo iti pudno. (Sal. 15:​1, 2) Kasta met, agsaotayo iti makapabileg iti dadduma. Kas pagarigan, alistotayo koma a mangkomendar ken saantayo a dagus a mangkritikar wenno agreklamo. (Efe. 4:29) Pagbalinentayo met a kalat ti agbalin a nalalaing a mangirugi iti saritaan tapno makapangasabatayo.

JOSE

14. Kasano a natungpal ti padto maipapan ken Jose? (Genesis 49:​22, 26) (Kitaen met ti kahon.)

¹⁴ Basaen ti Genesis 49:​22, 26. Ipagpannakkel la ketdi ni Jacob ti anakna a ni Jose. Isu ti pinili ni Jehova “manipud kadagiti kakabsatna.” Inawagan ni Jacob isuna kas ti “sanga ti nabunga a kayo.” Ni Jacob ti kayo, ket ni Jose ti sanga. Ni Jose ti inauna nga anak ni Jacob iti ipatpategna nga asawa a ni Raquel. Impadto ni Jacob a maalanto ni Jose ti doble a tawid a para koma ken Ruben, ti inauna nga anak ni Jacob iti asawana a ni Lea. (Gen. 48:​5, 6; 1 Cron. 5:​1, 2) Kas kaitungpalan dayta a padto, ti kaputotan dagiti annak ni Jose a da Efraim ken Manases ket nagbalin a dua a tribu ken naaddaanda iti bukod a tawid.—Gen. 49:25; Jos. 14:4.

15. Ania ti inaramid ni Jose idi nakapasar iti kinaawan hustisia?

¹⁵ Dinakamat met ni Jacob a ni Jose ket ‘panaen dagiti pumapana ket guraenda.’ (Gen. 49:23) Dagiti pumapana ket tumukoy kadagiti kakabsatna a nagimon idi kenkuana ken ti makagapu iti adu a kinaawan hustisia a napasaranna. Ngem saan a ginura ni Jose dagiti kakabsatna ken saanna a pinabasol ni Jehova kadagiti napasamak kenkuana. Imbaga ni Jacob maipapan ken Jose: “Nakasagana a maibiat ti bai ti panana, ken nagtultuloy a napigsa ken alisto dagiti imana.” (Gen. 49:24) Pinarmekna ti gura dagiti kakabsatna babaen ti arigna panangibiatna iti ‘pana’ ti asi ken napudno nga ayatna kadakuada. Nagpannuray ni Jose ken Jehova bayat dagiti pakasuotanna. Ken saanna la a pinakawan dagiti kakabsatna, no di ket nasayaat pay ti panangtratona kadakuada. (Gen. 47:​11, 12) Impalubos ni Jose a dagiti pakasuotanna ti mangpasudi kenkuana. (Sal. 105:​17-19) Gapu iti dayta, inusar isuna ni Jehova iti naisangsangayan a pamay-an.

16. Kasanotayo a matulad ti ulidan ni Jose no maipasangotayo iti pakasuotan?

¹⁶ Ania ti masursurotayo? Ditay koma ipalubos a dagiti pakasuotantayo ti mangyadayo kadatayo ken Jehova ken kadagiti kapammatiantayo. Laglagipentayo a mabalin nga ipalubos ni Jehova a masubok ti pammatitayo kas paset ti pannakasanaytayo. (Heb. 12:​7, ftn.) Makatulong dayta a pannakasanay tapno ad-adda a matuladtayo dagiti nagsasayaat a kualidad ni Jehova, kas iti asi ken panangpakawan. (Heb. 12:11) Sigurado a gunggonaannatayo ni Jehova gapu iti panagibturtayo, kas iti inaramidna ken Jose.

BENJAMIN

17. Kasano a natungpal ti padto maipapan ken Benjamin? (Genesis 49:27) (Kitaen met ti kahon.)

¹⁷ Basaen ti Genesis 49:27. Impakpakauna ni Jacob a ti tribu ni Benjamin ket agbalinto a nalaing a makigubat a kas iti lobo. (Uk. 20:​15, 16; 1 Cron. 12:2) Iti “bigat,” kayatna a sawen, iti rugi ti pakasaritaan ti ar-ari ti Israel, ni Saul nga umuna nga ari ti Israel ket nagtaud iti tribu ni Benjamin. Situtured a nakigubat ni Saul kadagiti Filisteo. (1 Sam. 9:​15-17, 21) Iti met “rabii,” kayatna a sawen, iti ngudo ti pakasaritaan ti ar-ari ti Israel, ni Reyna Ester ken ti Primero Ministro a ni Mardokeo nga agpada a Benjaminita, insalakanda dagiti Israelita iti posible koma a pannakapapatayda bayat ti panagturay ti Imperio ti Persia.—Ester 2:​5-7; 8:3; 10:3.

18. Kasanotayo a matulad ti kinamatalek ti tribu ni Benjamin kadagiti urnos ni Jehova?

¹⁸ Ania ti masursurotayo? Sigurado a nakaragragsak dagiti Benjaminita idi a ni Saul a katribuanda ket nagbalin nga ari. Ngem ti kinaari ket inyakar ni Jehova ken David a nagtaud iti tribu ni Juda. Idi agangay, sinuportaran dagiti Benjaminita ni David. (2 Sam. 3:​17-19) Tawtawen kalpasanna, idi nagrebelde ti 10 a tribu, nagtalinaed a matalek dagiti Benjaminita iti tribu ni Juda ken iti ari a dinutokan ni Jehova. (1 Ar. 11:​31, 32; 12:​19, 21) Simamatalek met koma a suportarantayo dagiti pinili ni Jehova a mangidaulo iti ilina ita.—1 Tes. 5:12.

19. Ania ti maitulong kadatayo dagiti imbaga ni Jacob idi dandanin matay?

¹⁹ Makatulong kadatayo dagiti impadto ni Jacob idi dandanin matay. Dagiti nasursurotayo maipapan kadagiti impadtona ken no kasano a natungpal dagita ti ad-adda a mangpabileg iti pammatitayo a sigurado a matungpal ti dadduma pay nga impadto ni Jehova iti Saona. Ken no adalentayo no kasano a nabendisionan dagiti annak ni Jacob, ad-adda met a maawatantayo no kasanotayo a maparagsak ni Jehova.