Adda Pay Kadi Maadalmo Kadagiti Kangrunaan a Pannursuro ti Biblia?

1. Kasano a nabalbaliwan ti biagmo idi naammuam dagiti kangrunaan a pannursuro ti Biblia?

NABALBALIWAN ti biagmo idi naammuam dagiti kangrunaan a pannursuro ti Biblia. Kas koma idi naammuam a Jehova ti nagan ti Dios, ania ti inaramidmo? Inkagumaam ti makigayyem kenkuana. (Isa. 42:8) Idi naammuam ti pudno a kasasaad dagiti natay, saankan a madanagan a baka agrigrigatda pay. (Ecl. 9:10) Idi met naammuam nga ikarkari ti Dios a pagbalinennanto ti daga a Paraiso, saankan a madanagan no anianto ti mapasamak iti masanguanan. Kombinsidoka a saanto laengen nga agpaut iti 70 wenno 80 ti tawentayo. Ngamin, agbiagtayton iti agnanayon!—Sal. 37:29; 90:10.

2. Apay a pinalagipan ni Pedro uray dagiti nabayagen a Kristiano nga itultuloyda a panunoten dagiti kangrunaan a pannursuro ti Biblia? (2 Pedro 1:​12, 13)

² Ditay koma pulos liplipatan no kasano kapateg dagiti kangrunaan a pannursuro ti Biblia. Iti maikadua a surat ni apostol Pedro, pinalagipanna dagiti Kristiano a ‘sititibker a naipasdek iti kinapudno.’ (Basaen ti 2 Pedro 1:​12, 13.) Apay? Ngamin, iti dayta a tiempo, adda dagiti ulbod a mannursuro ken dakes a tattao a mayat a mangyadayo kadagiti Kristiano iti kinapudno. (2 Ped. 2:​1-3) Isu a kayat a paregtaen ni Pedro dagiti kakabsat tapno saanda a basta mamati lattan kadagiti kinaulbod a mangmangngegda. Impalagipna ngarud kadakuada ti dadduma kadagiti naammuandan a pannursuro. Makatulong dagita tapno agtalinaedda a matalek ken Jehova.

3. Apay a masapul nga itultuloy nga utoben ti amin a Kristiano dagiti kangrunaan a pannursuro ti Biblia? Mangted iti pagarigan.

³ Uray no nabayagtayon a Kristiano, mabalin nga adda pay dagiti baro a masursurotayo kadagiti kangrunaan a pannursuro ti Biblia. Kas pagarigan, no agluto ti eksperiensiado a kosinero ken ti agdadamo nga agluto iti maysa a putahe, mabalin nga agpada dagiti rekado nga usarenda. Ngem asino ngata kadakuada ti makaluto iti baro a putahe nga usarenna dagiti isu met laeng a rekado? Posible a ti eksperiensiado a kosinero gapu ta ad-adun ti kapadasanna. Kasla kasta met laeng dagiti nabayagen nga agserserbi ken Jehova ken dagiti kabbaro. No ikompara kadagiti kabbaro, mabalin nga adda pay sabali a punto a maawatan dagiti nabayagen nga agserserbi ken Jehova kadagiti isu met laeng a pannursuro ti Biblia. Sipud ngamin idi nagbautisartayo, posible a nagbaliwen ti kasasaad wenno dagiti pribilehiotayo. Ket no panunotentayo dagiti naammuantayo idi a kangrunaan a pannursuro, mabalin nga adda dagiti baro a masursurotayo a makatulong iti situasiontayo ita. Kitaentayo ti masursuro dagiti nabayagen a Kristiano iti tallo kadagiti kangrunaan a pannursuro ti Biblia.

NI JEHOVA TI NAMARSUA

4. Ania ti epekto kadatayo idi naammuantayo a ni Jehova ti Namarsua?

⁴ Ammotayo a ti daga ken ti amin nga adda iti dayta ket inaramid ti masirib ken mannakabalin-amin a Namarsua. Ibaga ti Biblia: “Ti nangibangon iti amin a banag ket ti Dios.” (Heb. 3:4) Ngem ad-adu pay ti masursurotayo iti daytoy a kinapudno. Gapu ta inaramidnatayo ni Jehova, ammona ti amin maipapan kadatayo. Maseknan met kadatayo ken ammona ti kasayaatan para kadatayo. Isu nga idi naammuantayo a ni Jehova ti Namarsua, nagdakkel ti nagbalbaliwantayo, rimmagsaktayo, ken naaddaan iti direksion ti biagtayo.

5. Ania a kinapudno ti makatulong kadatayo nga agbalin a napakumbaba? (Isaias 45:​9-12)

⁵ Gapu ta ammotayo a ni Jehova ti Namarsua, masursurotayo ti agbalin a napakumbaba. Kasano? Kitaentayo ti napasamak idi ken Job. Adda idi dagiti di umiso nga imbagana maipapan ken Jehova. Nalipatanna ti kapatgan gapu ta ti bagina laeng ti pinampanunotna ken kayatna a paneknekan nga isu ti husto. Impalagip kenkuana ni Jehova nga isu ti mannakabalin-amin a Namarsua. (Job 38:​1-4) Gapu iti dayta, nabigbig ni Job nga amin nga aramiden ni Jehova ket umiso. Kasta met laeng ti punto ti insurat ni propeta Isaias idi agangay: “Rumbeng kadi nga ibaga ti pila iti Agdamdamili: ‘Ania ti ar-aramidem?’”—Basaen ti Isaias 45:​9-12.

6. Kaano a mas kasapulan a panunotentayo a ni laeng Jehova ti kasisiriban ken mannakabalin-amin a Namarsua? (Kitaen met dagiti ladawan.)

⁶ Bayat a bumaybayag ti maysa a Kristiano iti kinapudno, baka sobran ti panagtalekna iti bagina imbes a ken Jehova ken iti Saona. (Job 37:​23, 24) Ngem ania ti pagsayaatanna no panunotenna a naimbag a ni laeng Jehova ti kasisiriban ken mannakabalin-amin a Namarsua? (Isa. 40:22; 55:​8, 9) Makatulong dayta kenkuana nga agtalinaed a napakumbaba. Ngamin, maamirisna a kanayon nga umiso dagiti pampanunot ni Jehova no ikompara iti pampanunotna.

7. Ania ti inaramid ni Rahela tapno maakseptarna ti maysa a baro nga instruksion?

⁷ Marigatan idi ti sister a ni Rahela a taga-Slovenia a mangakseptar iti maysa a baro nga instruksion ti organisasion. Ngem ania ti nakatulong kenkuana a mangakseptar iti dayta? Pinampanunotna ti maipapan iti Namarsua. Inaminna: “No dadduma, marigatanak a mangakseptar kadagiti baro nga instruksion dagiti mangidadaulo kadatayo. Kas pagarigan, nabuyakon ti 2023 Update Manipud iti Bagi a Manarawidwid #8. Ngem nakigtotak latta idi damok ti makakita iti barbasan a brother nga agpalpalawag. Isu nga inkararagko ken Jehova a tulongannak a mangakseptar iti dayta a panagbalbaliw.” Naamiris ni Rahela a gapu ta ni Jehova ti Namarsua iti langit ken daga, kanayon nga ammona ti kasayaatan a panangiwanwan iti organisasionna. Sika ngay? Adda kadi met gundaway a marigatanka a mangakseptar iti baro nga instruksion wenno nabalbaliwan a pannakaawat? No wen, sipapakumbaba nga utobem ti awan kapadana a kinasirib ken kinabileg ti Namarsua kenka.—Roma 11:​33-36.

NO APAY NGA IPALPALUBOS TI DIOS TI PANAGRIGRIGAT

8. Ania ti naitulongna kadatayo idi naammuantayo no apay nga ipalpalubos ti Dios ti panagrigrigat?

⁸ Apay nga ipalpalubos ti Dios ti panagrigrigat? Adda dagiti saan a makaammo iti sungbat dayta a saludsod. Isu a makapungtotda iti Dios wenno patienda pay ketdi nga awan ti Dios! (Prov. 19:3) Ngem ania ti naammuam a makagapu nga agrigrigattayo? Ti natawidtayo a basol ken kinaimperpekto, saan ketdi a ni Jehova. Naammuam met a gapu ta agan-anus ni Jehova ken saanna pay a pinagpatingga ti panagrigrigat, minilion pay a tattao ti posible a makaasideg kenkuana ken makaammo iti aramidenna tapno agpatingga ti panagrigrigat. (2 Ped. 3:​9, 15) Gapu ta naammuam ti rason nga ipalpalubos ti Dios ti panagrigrigat, naliwliwa ken simmingedka kenkuana.

9. Kaano a mas kasapulantayo a panunoten dagiti rason no apay nga ipalpalubos ni Jehova ti panagrigrigat?

⁹ Bayat nga ur-urayentayo a pagpatinggaen ni Jehova ti panagrigrigat, masapul nga agan-anustayo. Ngem no matayantayo wenno maipasangotayo ken dagiti ay-ayatentayo iti nadagsen a problema wenno kinaawan hustisia, baka mapanunottayo: “Apay a nagbayag nga agtignay ni Jehova?” (Hab. 1:​2, 3) No mariknatayo ti kasta, makatulong kadatayo no lagipentayo dagiti rason no apay nga ipalpalubos ni Jehova ti panagrigrigat.a (Sal. 34:19) Mabalintayo met nga utoben ti panggepna a mangikkat nga interamente iti amin a panagrigrigattayo.

10. Kasano a nailiwliwag ni Anne ti ipapatay ni nanangna?

¹⁰ Makatulong kadatayo nga agibtur no ammotayo no apay nga agrigrigattayo. Napaneknekan dayta ni Anne nga agnanaed iti isla ti Mayotte, iti Indian Ocean. Imbagana: “No malagipko ni Nanang, uray tawtawenen ti napalabas sipud idi natay, malidayanak latta unay. Ngem kanayon nga ipalagipko iti bagik a saan a ni Jehova ti rason nga agrigrigattayo. Ti agpayso, kayatna ketdi nga ikkaten ti amin a pakarigatan ken pagungaren dagiti natayen nga ay-ayatentayo. Dagita ti pampanunotek isu nga agkalma no kua ti riknak ken rumagsakak manen.”

11. Gapu ta ammotayo dagiti rason nga ipalpalubos ni Jehova ti panagrigrigat, ania ti maitulong dayta kadatayo nga agtultuloy a mangasaba?

¹¹ Gapu ta ammotayo ti rason nga ipalpalubos ti Dios ti panagrigrigat, maparegtatayo nga agtultuloy a mangasaba. Inlawlawag ni apostol Pedro ti maysa a rason no apay a saan pay a pinagpatingga ni Jehova ti panagrigrigat. Kayatna ngamin nga agbalbaliw dagiti tattao ket maisalakanda. Inlawlawag met ni Pedro ti masapul nga aramidentayo: “Panunotenyo no ania a kita ti tao ti rumbeng a pagbalinanyo. Nasantuan koma dagiti kababalinyo ken ipakitayo kadagiti aramidyo ti debosionyo iti Dios.” (2 Ped. 3:11) Maysa kadagiti ‘aramid ti debosiontayo iti Dios’ ket ti panangasabatayo. Kas iti Amatayo, ay-ayatentayo dagiti tattao. Kayattayo met nga agbiagda iti baro a lubong. An-anusan ni Jehova dagiti tattao iti teritoriayo ken ik-ikkanna ida iti gundaway nga agserbi kenkuana. Nagsayaat a pribilehiom ti agbalin a katrabahuan ti Dios ken tumulong iti adu a tattao a mangam-ammo kenkuana sakbay ti panungpalan!—1 Cor. 3:9.

AGBIBIAGTAYON ITI “MAUDI NGA AL-ALDAW”

12. Ania ti naitulongna kadatayo idi naammuantayo nga agbibiagtayon iti “maudi nga al-aldaw”?

¹² Naipadto iti Biblia dagiti ugali dagiti tattao bayat ti “maudi nga al-aldaw.” (2 Tim. 3:​1-5) No paliiwem ti aglawlawtayo, talaga a maibagatayo a matungtungpalen dayta a padto. Ket bayat a dumakdakes ti kababalin dagiti tattao, lallalo met a kombinsidotayo a mapagtalkan ti Biblia.—2 Tim. 3:​13-15.

13. Maitunos iti ilustrasion ni Jesus iti Lucas 12:​15-21, ania dagiti mabalin nga isaludsodtayo iti bagitayo?

¹³ Gapu ta ammotayo nga agbibiagtayon iti maudi nga al-aldaw, masapul nga ammotayo no ania ti kasayaatan a pangusarantayo iti tiempotayo. Adda masursurotayo iti ilustrasion ni Jesus iti Lucas 12:​15-21. (Basaen.) Apay nga inawagan ni Jesus ti nabaknang a tao iti “maag”? Saan a gapu ta nabaknang, no di ket saan nga umiso dagiti prioridadna. ‘Nagurnong iti sanikua para iti bagina, ngem saan a nabaknang iti imatang ti Dios.’ Sinayangna ti tiempona. Apay? Dandani ngamin idin matay. Imbaga ti Dios kenkuana: “Ita a rabii, alaendanto ti biagmo.” Ania ti masursurotayo? Dandanin ti panungpalan, isu nga isaludsodtayo iti bagitayo: ‘Ipakita kadi dagiti kalatko nga us-usarek iti kasayaatan ti tiempok? Ania dagiti kalat nga iparparegtak kadagiti annakko? Us-usarek kadi ti pigsak, tiempok, ken ti sanikuak nga agurnong iti kinabaknang idiay langit, saan ketdi a para iti bagik?’

14. Kas ipakita ti kapadasan ni Miki, apay a napateg nga utobentayo dagiti ebidensia iti Biblia nga agbibiagtayon iti maudi nga al-aldaw?

¹⁴ No panunotentayo dagiti ebidensia nga agbibiagtayon iti maudi nga al-aldaw, matulongannatayo dayta nga agdesision no ania ti kasayaatan a pangusarantayo iti biagtayo. Kasta ti napasamak iti sister a ni Miki. Inyestoriana: “Idi naggraduarak iti hayskul, talaga a kayatko ti mangala iti kurso a zoology wenno panagadal kadagiti animal. Ngem kayatko met laeng ti ag-regular pioneer ken agserbi iti lugar a dakdakkel ti panagkasapulanna. Pinaregtadak dagiti kakabsat a pagpanunotak a naimbag no mapaggiddankonto ti ageskuela ken agpayunir. Pinalagipandak a dandanin ti panungpalan. Ken inton Paraiso, saanakton a maawanan iti tiempo a mangadal kadagiti animal. Isu a nangalaak lattan iti ababa laeng a kurso. Nakatulong dayta tapno maaddaanak iti trabaho a pangsuportak iti panagpayunirko ken iti iyaakarko idi agangay idiay Ecuador a dakdakkel ti panagkasapulanna.” Agserserbi itan ni Miki ken ni lakayna iti trabaho iti sirkito iti dayta a pagilian.

15. Apay a ditay koma mauma a mangasaba kadagiti tattao a saan pay laeng nga interesado iti naimbag a damag? Mangted iti pagarigan. (Kitaen met dagiti ladawan.)

¹⁵ Ditay koma maupay no adda dagiti tattao a saan a dagus nga umawat iti naimbag a damag. Laglagipentayo nga agbalbaliw dagiti tattao. Kitaentayo ti napasamak ken Santiago a kabsat ni Jesus iti ina. Nakitana a dimmakkel ni Jesus, nagbalin a Mesias, ken ti kinalaingna a mangisuro. Ngem saan a dagus a nagbalin a manamati ni Santiago. Kalpasan laeng a napagungar ni Jesus a nagbalin a nakaregregta nga adalan.b (Juan 7:5; Gal. 2:9) Ditay koma ngarud mauma a mangasaba wenno mangsarungkar kadagiti saan pay laeng nga interesado a kabagiantayo wenno kadagiti tattao a nakasaritatayo idin. Ammotayo nga agbibiagtayon iti maudi nga al-aldaw isu nga iyapuratayo koma ti mangasaba. Ditay ammo, dagiti ikaskasabatayo ita ket posible a malagipdanto kalpasan a mangrugi ti dakkel a rigat.c

AGYAMANKA A KANAYON KADAGITI PAMMALAGIP NI JEHOVA

16. Kasanoka a nagunggonaan kadagiti pammalagip ni Jehova? (Kitaen met ti kahon nga “Usaren Dagiti Pannursuro ti Biblia a Tumulong iti Dadduma.”)

¹⁶ Ti dadduma a naespirituan a taraon a maaw-awattayo ket nairanta a para kadagiti tattao a bassit pay ti pannakaammoda maipapan kadagiti kangrunaan a pannursuro ti Biblia. Kas pagarigan, dagiti palawag publiko a linawas a mangmangngegtayo, ti dadduma nga artikulo ken video iti jw.org, ken dagiti publiko nga edision ti magasintayo, ket nangnangruna a nairanta para kadagiti saan pay nga agserserbi ken Jehova. Ngem magunggonaantayo latta kadagita a palagip. Paunegenda ti ayattayo ken Jehova, pabilgenda ti pammatitayo iti Biblia, ken matulongandatayo nga agbalin a mas epektibo a mangisuro kadagiti kangrunaan a pannursuro ti Biblia.—Sal. 19:7.

17. Kadagiti ania a situasion a mabalintayo nga utoben dagiti kangrunaan a pannursuro ti Biblia?

¹⁷ Kas Saksi ni Jehova, maragragsakantayo no malawlawagan ti pannakaawattayo iti maysa a pannursuro ti Biblia. Ngem agyamyamantayo met unay kadagiti kangrunaan a pannursuro ti Biblia nga immuna a nasursurotayo ken timmulong kadatayo a suminged ken Jehova. Kas naammuantayon, makatulong latta kadatayo ita dagita a kinapudno. Kas pagarigan, no makaawattayo kadagiti instruksion manipud iti organisasion ngem ti panagriknatayo ket nasaysayaat ti opiniontayo, ania ti aramidentayo? Laglagipentayo koma no asino ti mangiturturong iti organisasion—ni Jehova, ti kasisiriban ken mannakabalin-amin a Namarsua. No maipasangotayo wenno dagiti ay-ayatentayo iti pakasuotan, agan-anustayo ken utobentayo no apay nga ipalpalubos ni Jehova ti panagrigrigat. No met agdesisiontayo no ania ti kasayaatan a pangusarantayo iti tiempo ken iti amin nga adda kadatayo, laglagipentayo a dandanin ti panungpalan. Sapay koma ta dagiti pannursuro ti Biblia ti agtultuloy a mangtulong kadatayo nga agbalin a masirib ken matalek ken Jehova.