Ni Jehova ti Gubuayan ti “Kasta Unay a Kinaragsaktayo”

1-2. (a) Ania ti marikrikna ti adu a tattao ita? (b) Ania ti pagsasaritaantayo iti daytoy nga artikulo?

AR-ARAMIDEN ti adu a tattao ita ti amin a kabaelanda tapno agbalinda a naragsak. Ngem uray no ania ti ar-aramidenda, kaaduanna a nalidayda latta ken panagriknada a kasla adda latta kurang iti biagda. Posible kadi a mariknatayo met dayta uray no agserserbitayo ken Jehova? Wen. Ammotayo ngamin a makapasartayo kadagiti narigat a situasion gapu ta agbibiagtayon iti “maudi nga al-aldaw.”—2 Tim. 3:1.

² Iti daytoy nga artikulo, pagsasaritaantayo dagiti posible a mangpukaw iti rag-otayo ken dagiti mabalintayo nga aramiden tapno mapasublitayo dayta. Ngem sakbayna, ammuentayo nga umuna no asino ti Gubuayan ti pudpudno a kinaragsak.

TI GUBUAYAN TI PUDPUDNO A KINARAGSAK

3. Ania ti isuro kadatayo dagiti parsua ni Jehova maipapan kenkuana? (Kitaen met dagiti ladawan.)

³ Kanayon a naragsak ni Jehova. Ken kayatna nga agbalintayo met a naragsak. Isu a nangparsua iti adu a banag tapno agbalintayo a naragsak. Kas pagarigan, maragragsakantayo no kitkitaentayo ti nagpintas a planetatayo ken dagiti nagpipintas a kolor. Maragragsakantayo met no buybuyaentayo dagiti agaayam nga animal. Maen-enjoy-tayo met ti mangan kadagiti paboritotayo a makan. Talaga nga ay-ayatennatayo ni Jehova ken kayatna nga agbalintayo a naragsak!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Kasano nga agtaltalinaed a naragsak ni Jehova uray no makitkitana ti panagrigrigat dagiti tattao? (b) Ania ti inregalo kadatayo ni Jehova? (Salmo 16:11)

⁴ Agpayso a ni Jehova “ti naragsak a Dios.” Ngem kayatna kadi a sawen a saanna a makitkita ti panagrigrigattayo? Saan. (1 Tim. 1:11) Saanna la ngamin nga ipalpalubos a mapukaw ti kinaragsakna gapu iti dayta. Kinapudnona, inkeddengnan ti tiempo no kaanona nga ikkaten ti amin a panagrigrigattayo. Ngem bayat nga ur-urayenna dayta, siaanus nga agib-ibtur. Maaw-awatanna ti panagrigrigattayo ken kayatnatayo a tulongan. Kasano? Ik-ikkannatayo iti regalo—ti kinaragsak. (Basaen ti Salmo 16:11.) Intedna met dayta a regalo iti Anakna a ni Jesus. Kasano? Kitaentayo.

5-6. Apay a naragsak ni Jesus?

⁵ Kadagiti amin a pinarsua ni Jehova, ni Jesus ti kararagsakan. Apay? Kitaentayo ti dua a rason. (1) “Isu ti ladawan ti di makita a Dios,” isu a naragsak isuna a kas iti Amana. (Col. 1:15; kitaen ti study note a “happy” iti 1 Timoteo 6:15.) (2) Nakabaybayag a panawen a nagkadkaduada iti Amana, ti Gubuayan ti pudpudno a kinaragsak.

⁶ Naragsak met ni Jesus gapu ta kanayon nga ar-aramidenna ti pagayatan ni Amana. (Prov. 8:​30, 31; Juan 8:29) Dayta ti makagapu a dungdungnguen isuna ni Jehova ken maragragsakan kenkuana.—Mat. 3:17.

7. Kasanotayo nga agbalin a pudpudno a naragsak?

⁷ Agbalintayo met a pudpudno a naragsak no nasingedtayo ken Jehova, ti Gubuayan ti kinaragsak. No ad-adu ti tiempotayo nga agsursuro maipapan iti panagpampanunot ken rikrikna ni Jehova, ad-adda a matuladtayo isuna. Dayta ti mangparagsak kadatayo. Kasta met, agbalintayo a naragsak no aramidentayo ti pagayatanna ken no ammotayo a maparparagsaktayo isuna.a (Sal. 33:12) Agpayso a no dadduma, makariknatayo iti liday a baka agpaut iti sumagmamano nga aldaw wenno nabaybayag pay ketdi. No mariknam ti kasta, kayatna kadi a sawen a saanen a maragragsakan ti Dios kenka? Saan met. Imperpektotayo ngamin. Ken no dadduma, masaktan, malidayan, wenno madeprestayo. Maawatan dayta ni Jehova. (Sal. 103:14) Pagsasaritaantayo itan dagiti posible a mangpukaw iti rag-otayo ken no kasanotayo a mapasubli dayta.

DIMO IPALUBOS A MAPUKAW TI RAG-OM

8. Ania ti posible a mariknatayo no adda problematayo?

⁸ 1: Nalidaytayo no adda problematayo. Mapaspasaram kadi dagiti problema a kas iti pannakaidadanes, natural a didigra, kinarigat ti biag, panagsakit, panaglakay wenno panagbaket? Nalaka laeng a mapukaw ti rag-otayo kadagiti kasta a problema, lalo iti situasion a bassit laeng ti maaramidantayo wenno saantayo a makontrol. Ibagbaga ti Biblia a “makapaupay ti naladingit a puso.” (Prov. 15:13) Kasta idi ti narikna ti maysa a panglakayen a ni Babis. Iti uneg laeng ti uppat a tawen, natay ti kakaisuna a kabsatna ken dagiti nagannakna. Imbagana: “Panagriknak ket agmaymaysaak ken nakakaasiak. No dadduma, permi a malidlidayak, lalo no malagipko a diak man la a naipapas ti iliwko kadakuada a tallo sakbay a natayda.” Posible met a mapasamak dayta kadatayo ita. No adda problematayo, mabalin a kumapuy ti pakinakemtayo ket mariknatayo a maib-ibusen ti pigsatayo.

9. Ania ti aramidentayo tapno mapasublitayo ti rag-otayo? (Jeremias 29:​4-7, 10)

⁹ Ti aramidentayo tapno mapasublitayo ti rag-otayo. Mapasublitayo ti rag-otayo no isardengtayo a pagdanagan dagiti bambanag a saantayon a mabaliwan ken no agbalintayo a managyaman kadagiti adda kadatayo. Ibagbaga dagiti tattao ita nga agbalintayo laeng a naragsak no awan ti problematayo. Ngem saan nga agpayso dayta. Kas pagarigan, imbaga ni Jehova kadagiti Judio a naipan idiay Babilonia nga akseptarenda ti kasasaadda ken aramidenda ti amin a kabaelanda tapno agbalinda latta a naragsak sadiay. (Basaen ti Jeremias 29:​4-7, 10.) Ania ti masursurotayo? Ikagumaantayo a kitaen dagiti positibo a bambanag iti biagtayo ken apresiarentayo dagita. Laglagipentayo a dinatayto pulos baybay-an ni Jehova ken tulongannatayo. (Sal. 63:7; 146:5) Kastoy ti imbaga ti maysa a sister a ni Effie a naparalisado kalpasan a naaksidente: “Talaga a tinulongannak ni Jehova, ti pamiliak, ken dagiti kakongregasionko. Kayatko nga ipakita kadakuada nga agyamyamanak iti ar-aramidenda para kaniak. Isu nga ikagkagumaak ti agtalinaed latta a naragsak.”

10. Apay a posible latta nga agbalintayo a naragsak uray adda dagiti problematayo?

¹⁰ Posible latta nga agbalintayo a naragsak uray no maipasangotayo iti problema, wenno no adda dagiti saan a nasayaat a mapasamak kadatayo, wenno iti kapamiliatayo.b (Sal. 126:5) Apay? Ngamin, saan a nakadepende ti rag-otayo iti kasasaadtayo. Imbaga ti maysa a payunir a ni Maria: “No ikagkagumaantayo ti agbalin a naragsak uray no adda problematayo, dina kayat a sawen a saantayon nga ikabkabilangan ti marikriknatayo. Ipakpakita laeng dayta a saantayo a maliplipatan dagiti kari ni Jehova. Tulongannatayo ti Amatayo tapno agtalinaedtayo a naragsak.” Laglagipem, aniaman a narigat a situasion wenno problema ti mapaspasaram ita, temporario laeng dagita a kas man la kadagiti tugot ti sakam no magmagnaka iti igid ti baybay. Madalapus laeng ti dalluyon, awanen—saanmon a makita.

11. Kasano a mapabilegnaka ti ulidan ni apostol Pablo?

¹¹ No adda dagiti problematayo, baka mapanunottayo a saantayon a maparparagsak ni Jehova. Ania ti mabalintayo nga aramiden? Mabalintayo a panunoten dagiti matalek nga adipen ni Jehova a naipasango idi kadagiti nakarigrigat a situasion. Maysa kadakuada ni apostol Pablo. Pinili ni Jesus a mangipakaammo iti kinapudno “kadagiti nasion ken kadagiti ari ken iti annak ni Israel.” (Ara. 9:15) Anian a nagsayaat a pribilehio! Ngem saan a naipuera ni Pablo iti adu a pakarigatan. (2 Cor. 11:​23-27) Kayatna kadi a sawen a saanen a maragragsakan ni Jehova ken Pablo gapu ta naipasango iti agsasaruno a problema? Siempre saan! Ti agpayso, nakapagibtur laeng ni Pablo gapu iti tulong ni Jehova. (Roma 5:​3-5) Panunotem ita ti situasionmo. Kitaem, matalekka latta nga agserserbi ken Jehova uray no nagadu ti problemam. Ebidensia dayta a tultulongannaka ni Jehova ken maparparagsakmo isuna.

12. Ania ti mapasamak no saan a matungpal dagiti namnamaentayo?

¹² 2: Nalidaytayo no di matungpal dagiti namnamaentayo. (Prov. 13:12) Gapu ta ay-ayatentayo ni Jehova ken agyamyamantayo kenkuana, matignaytayo a mangaramid kadagiti kalat iti panagserbitayo kenkuana. Nupay kasta, no saan a realistiko dagiti kalattayo iti agdama a kasasaadtayo, mabalin a maupaytayo. (Prov. 17:22) Kinuna ti maysa a payunir a ni Holly: “Kayatko ti agadal iti School for Kingdom Evangelizers, mangasaba iti sabali a pagilian, wenno tumulong iti konstruksion idiay Ramapo. Ngem nagbaliw ti kasasaadko. Saankon a maragpat dagita a kalat. Nalidayanak unay. Adu koma pay ti kayatko nga aramiden, ngem saankon a kabaelan, isu a maup-upayak unay.” Kasta met ti marikrikna ti adu a kakabsat.

13. Ania dagiti mabalintayo nga aramiden aniaman ti kasasaadtayo?

¹³ Ti aramidentayo tapno mapasublitayo ti rag-otayo. Laglagipentayo a saan a kidkiddawen ni Jehova nga aramidentayo dagiti saantayo a kabaelan. Saanna met a rukoden ti pategtayo sigun kadagiti maar-aramidantayo. Imbes ketdi, kayat ni Jehova nga agbalintayo a naemma ken matalek. (Mik. 6:8; 1 Cor. 4:2) Napatpateg kenkuana dagiti pampanunoten, tartarigagayan, ken kualidadtayo uray no saantayo a kabaelan nga aramiden dagiti kayattayo koma nga aramiden iti panagserbitayo kenkuana. Ditay ngarud koma ekspektaren nga ad-adu ti maaramidtayo ngem iti kabaelantayo.c Isu a no saanmo a maaramid dagiti kayatmo koma nga aramiden para ken Jehova, panunotem dagiti kabaelam nga aramiden. Kas pagarigan, baka kayatmo a sanayen dagiti ub-ubing kenka ken paregtaen dagiti nataenganen. Baka kayatmo met a sarungkaran, tawagan, wenno i-text ti maysa a kabsat tapno paregtaem. Nagsayaat ken realistiko dagita a kalat. Sigurado a bendisionannaka ni Jehova ken naragsakkanto bayat nga ar-aramidem dagita! Laglagipentayo met a nakaas-asidegen ti baro a lubong nga inkari ni Jehova. Nagadunto ti gundawaytayo a makapagserbi kenkuana kadagiti nagsayaat a pamay-an a ditay pay matukod a panunoten ita! Imbaga ti nadakamaten a ni Holly: “No nalidayak, panunotek no kua, ‘Uray ta agbiagakto met iti agnanayon iti baro a lubong.’ Iti tulong ni Jehova, maragpatkonto met laengen ti dadduma a kalatko.”

14. Ania pay ti mabalin a mangpukaw iti rag-otayo?

¹⁴ 3: Nalidaytayo no nakapokustayo laeng iti panangparagsak iti bagitayo. Iti social media, makitatayo ti adu a kasla nakaragragsak gapu kadagiti adda kadakuada wenno kadagiti ar-aramidenda. Gapu iti dayta, baka panunotentayo a naragsaktayo laeng no maaramidtayo dagiti kayattayo, magatangtayo dagiti magusgustuantayo, ken makapasiartayo iti sadinoman a kayattayo. Saan met ketdi a dakes dagita. Ngamin, pinarsuanatayo ni Jehova a mangapresiar kadagiti nagsasayaat a bambanag. Ngem napaneknekan ti adu a no nakapokusda laeng iti panangparagsak iti bagida, saanda a pudpudno a naragsak. Imbaga ti payunir a ni Eva: “No ti la panangparagsak iti bagim ti sangkapanunotmo, saankanto a pulos makontento.” No nakapokustayo laeng iti panangparagsak iti bagitayo, sigurado a naliday ken mariknatayto latta nga adda kurang iti biagtayo.

15. Ania ti masursurotayo ken Ari Solomon?

¹⁵ Nagadu ti inaramid ni Ari Solomon tapno mapennekna ti amin a tarigagayna. Kas pagarigan, nangan iti naiimas, dimngeg iti napipintas a musika, ken ginatangna ti amin a kayatna. Ngem ania ti nariknana? Nariknana nga adda latta kurang iti biagna. Imbagana: “Saan a kontento a kumita ti mata; ken saan a mapnek a dumngeg ti lapayag.” (Ecl. 1:8; 2:​1-11) Pampanunoten ti dadduma a naragsakda kano no adu ti kuartada ken no maaramidda ti kaykayatda. Ngem agpayso kadi dayta? Saan! Kasla la dayta iti peke a kuarta. Agparang nga adda balorna ngem saan met gayam a maigatang ken awan serserbina.

16. Apay a naragsaktayo no tumulongtayo iti sabsabali? (Kitaen met dagiti ladawan.)

¹⁶ Ti aramidentayo tapno mapasublitayo ti rag-otayo. Insuro ni Jesus a “naragragsak ti mangted ngem ti umawat.” (Ara. 20:35) Imbaga ti maysa a panglakayen a ni Alekos: “Ikagkagumaak a tulongan ti dadduma uray iti simple laeng a pamay-an. No ngamin aramidek dayta, saanakon unay a nakapokus iti bagik, isu a naragragsakak no kua.” Ania ti maaramidam para iti dadduma? No madlawmo nga adda problema ti maysa, paregtaem. Mabalin a saanmo a masolbar ti problemana, ngem maliwliwam. Kasano? Dumngegka a naimbag, ikagumaam a tarusan ti marikriknana, ken ipalagipmo nga ipalladawna ken Jehova ti dadagsenna. (Sal. 55:22; 68:19) Ipasiguradom met a saan isuna a baybay-an ni Jehova. (Sal. 37:28; Isa. 59:1) Mabalinmo pay a tulongan iti praktikal a pamay-an. Kas pagarigan, baka mabalinmo nga ilutuan, wenno awisem nga agpagnapagna wenno agpasiar. Mabalinmo met nga awisen a mangasaba. Sigurado a mangparagsak dayta kenkuana. Agpausarka koma ken Jehova kas instrumentona a mangparegta iti dadduma. No ad-adda nga agpokuska iti sabsabali imbes nga iti bagim, agbalinka a pudpudno a naragsak!—Prov. 11:25.

17. Ania ti aramidentayo tapno agbalintayo a pudpudno a naragsak? (Salmo 43:4)

¹⁷ Agbalintayo a pudpudno a naragsak no itultuloytayo ti agbalin a nasinged iti nailangitan nga Amatayo. Ipaspasigurado ti Biblia a ni Jehova ti “gubuayan ti kasta unay a kinaragsak[tayo].” (Basaen ti Salmo 43:4.) Isu nga uray no adda problematayo ita, ditay madanagan. Itultuloytayo ti agpokus ken Jehova, ti agnanayon a Gubuayan ti rag-otayo!—Sal. 144:15.