Dua a Baro a Miembro ti Bagi a Manarawidwid

IDI Oktubre 5, 2024, adda espesial a naipakaammo iti tinawen a miting: Da Brother Jody Jedele ken Jacob Rumph ket naapointaran kas miembro ti Bagi a Manarawidwid dagiti Saksi ni Jehova. Adun a tawen a simamatalekda nga agserserbi ken Jehova.

Nayanak ni Brother Jedele iti Missouri, U.S.A. Dimmakkel isuna iti kinapudno. Aggigian ti pamiliada iti lugar a manmano a maasak isu a nagadu a kakabsat ti naam-ammona manipud iti agduduma a lugar a tumultulong iti trabaho a panangasaba. Nagdakkel ti epekto kenkuana ti nakitana nga ayat ken panagkaykaysada. Isu nga idi Oktubre 15, 1983, nagpabautisar uray no tin-edyerna pay la idi. Kaykayatna ti mangasaba isu nga idi Septiembre 1989, nangrugi nga agregular payunir kalpasan a naggraduar iti haiskul.

Adda ading a babai ni Brother Jedele, ket idi ubbingda pay, ipaspasiar ida dagiti nagannakda iti Bethel. Gapu iti dayta, nagbalin a kalatda ti ag-Bethelite ket napasamak dayta. Nangrugi a nagserbi ni Brother Jedele iti Wallkill Bethel idi Septiembre 1990 iti Cleaning Department sa kalpasanna, iti Medical Services.

Bayat dagita a tiempo, adda dagiti Spanish a kongregasion iti asideg nga agkasapulan iti tulong dagiti brother. Isu a napan nagboluntario ni Brother Jedele iti maysa kadagita a kongregasion ken nagsursuro iti Spanish. Di nagbayag, naam-ammona ti kasirkituanna a payunir a ni Damaris. Kalpasan ti kasarda, nagkaduada a nagserbi iti Bethel.

Idi 2005, rimmuarda iti Bethel tapno aywananda dagiti matalek a nagannakda. Kadagita a tiempo, nagserbida kas regular pioneer. Nagisuro ni Brother Jedele iti Pioneer Service School. Nagbalin met a miembro ti Hospital Liaison Committee iti lugarda ken iti Regional Building Committee.

Idi 2013, naawis manen da Brother ken Sister Jedele iti Bethel tapno tumulong iti trabaho a panagibangon iti Warwick. Sipud idin, nakapagserbida metten iti Patterson ken Wallkill. Nagserbi met ni Brother Jedele iti Local Design/Construction Department ken iti Hospital Information Services. Idi Marso 2023, naapointaran kas katulongan ti Service Committee. No pampanunotenna dagiti nagbalin nga asaynmentna, imbagana: “Talaga a madanaganka no makaawatka kadagiti baro nga asaynment. Ngem kadagita a tiempo a masapul nga ad-adda pay nga agtalekka ken Jehova ta kabaelannaka a pagbalinen iti aniaman a kayatna tapno matungpal ti panggepna.”

Nayanak ni Brother Rumph iti California, U.S.A. Idi ubing pay, di aktibo ni nanangna. Ngem insurona latta kenkuana ti maipapan iti kinapudno. Kada tawen met a paspasiaren ni Brother Rumph ni lolana a maysa a matalek a Saksi. Ni lolana ti timmulong kenkuana a mangipateg iti kinapudno. Isu nga idi 13 ti tawenna, nagpayadal iti Biblia. Idi Septiembre 27, 1992, nagpabautisar ni Brother Rumph uray no tin-edyer pay laeng. Makaparagsak ta nagbalin manen nga aktibo ni nanangna sa nagpayadal ken nagpabautisar metten dagiti kakabsatna ken ni tatangna.

Idi agtutubo ni Brother Rumph, nakitana a nakaragragsak dagiti payunir. Isu nga idi Septiembre 1995, kalpasan a naggraduar iti haiskul, nangrugi metten nga agpayunir. Idi 2000, immakar idiay Ecuador tapno agserbi iti lugar a dakdakkel ti panagkasapulanna. Sadiay a naam-ammona ti maysa a payunir a taga-Canada a ni Inga. Kalpasan ti kasarda, nagserbida iti maysa nga ili iti Ecuador iti maysa a grupo nga addaan iti sumagmamano nga agibumbunannag. Ita, addan narang-ay a kongregasion sadiay.

Idi agangay, naapointaran da Brother ken Sister Rumph kas special pioneer. Nagserbida met iti sirkito. Idi 2011, naawisda nga ageskuela iti maika-132 a klase ti Gilead. Kalpasanna, nagserbida iti nagduduma a pagilian iti intero a lubong kas Bethelite, misionero, ken manangaywan iti sirkito. Naaddaan met ni Brother Rumph iti pribilehio nga agisuro iti School for Kingdom Evangelizers.

Gapu iti COVID-19 pandemic, nagsubli da Brother ken Sister Rumph iti United States. Naawisda nga agserbi iti Wallkill Bethel. Nakaawat ni Brother Rumph iti pannakasanay iti Service Department. Di nagbayag, naibaonda manen nga agserbi iti sangay ti Ecuador a sadiay a nagserbi ni Brother Rumph kas miembro ti Komite ti Sangay. Idi 2023, naibaonda idiay Warwick. Idi Enero 2024, naapointaran ni Brother Rumph nga agserbi kas katulongan ti Service Committee. No lagipenna dagiti asaynment a naited kenkuana, imbagana: “Iti tunggal asaynment a papanam, ti espesial ket saan a ti lugar, no di ket dagiti tattao a makaduam.”

Talaga nga ap-apresiarentayo ti panagbannog dagitoy a kakabsat. Isu a sapay koma ta ‘itultuloytayo nga ipateg dagiti kasta a kita ti tattao.’—Fil. 2:29.