100 a Tawenen ti Napalabas​—1913

ITI Enero 1, 1913 a The Watchtower dinakamatna ti kapanunotan ti kaaduan idi kinotarna ti sasao ti Amerikano a reporter a ni Herbert Kaufman: “Lausen ti sao nga ‘imposible’. . . Dandani amin nga inar-arapaaptayo laeng idi ket mapaspasamak itan.” Idi rugrugi ti 1913, positibo ti panangmatmat dagiti tattao iti masanguanan.

Ti maysa a makagapu iti kasta a kinapositibo ket ti rumangrang-ay a teknolohia. Kas pagarigan, iti United States, nanglukat ti Ford Motor Company iti baro a paktoria iti Highland Park, Michigan. Nagalisto a limmaka ti presio ti lugan isu a minilion ti nakagatang. Apay a limmaka? Nangaramid ngamin ti baro a paktoria iti assembly line wenno agsasaruno a makinaria nga agasembol iti lugan agingga a malpas. Gapu iti daytoy nga adelantado a proseso, al-alisto a nakapataud ti kompania a Ford iti nalatak a Model T a lugan isu a basbassit ti gastos.

Positibo met ti ili ni Jehova ngem kadagiti sabali a rason. Nabayagen nga ipakpakaammo dagiti Estudiante ti Biblia a naisangsangayan a tawen ti 1914 iti pakasaritaan ti tao ket dakkel ti pammatida iti dayta. Ti kinaregtada nga agserbi ket pammaneknek a saanda a gumingginad bayat nga umas-asideg dayta a tawen.

Idi Hunio 1913, naangay ti serye dagiti kombension a nangrugi iti maysa nga aldaw iti Kansas City, Missouri, U.S.A. Iti simmaganad nga uppat a lawas, maysa a naabangan a tren ti nangibiahe iti nasurok a 200 a kakabsat iti makinlaud a paset ti United States ken Canada. Iti tunggal kombension, naikkan dagiti damoda ti tumabuno iti gundaway nga agkiddaw iti ad-adu pay nga impormasion. Rinibu ti nagkiddaw ket idi agangay, sinarungkaran dagiti Estudiante ti Biblia dagiti interesado.

Bayat ti 1913, okupado ti Brooklyn hedkuarter a mangar-aramid iti “Photo-Drama of Creation.” Walo nga oras daytoy a programa dagiti nairekord a palawag a naibatay iti Biblia ken musika a kagiddan dagiti dekolor a glass slide ken motion pictures. Ninamnama dagiti Estudiante ti Biblia a mabuya ti minilion nga interesado ti “Photo-Drama.” Nupay agarup 5,100 laeng idi ti aktibo a mangikaskasaba iti naimbag a damag, panggepda a “mabuya daytoy iti intero a lubong agingga’t mabalin.”

Ania ti mapasamakto iti 1914? Ania ti reaksion dagiti tattao iti “Photo-Drama”? Ania ti mapasamakto iti otonio, iti panagpatingga ti Panawen Gentil? Magagaran dagiti Estudiante ti Biblia a makaammo iti sungbat dagita a saludsod a mangnamnamada iti tulong ni Jehova.

Malpay ti namnama dagiti tattao gapu iti mapaspasungad a Dakkel a Gubat, a naawagan idi agangay kas Gubat Sangalubongan I. Saan a masolbar ti rumangrang-ay a teknolohia dagiti problema a pakaipaspasanguanda. Dakkel a panagbalbaliw ti sumaganad a tawen para kadagiti Estudiante ti Biblia​—ken iti intero a lubong.