Mr. Pagwanawanan

IDI 1997, bayat nga aglalaban dagiti rebelde ken soldado ti gobierno iti Freetown, nagboluntarioak nga agitulod kadagiti surat manipud Freetown a maipan iti temporario a sanga nga opisina iti Conakry, Guinea.

Iti estasion ti bus iti siudad, adda grupo dagiti lallaki a nakaluganak. Nakangngegkami iti kanalbuong ti paltog iti saan unay nga adayo isu a nagdanagkami. Iti ilalasatmi kadagiti kalsada ti siudad, agsasaruno ti kanalbuong ti paltog iti aglawlawmi. Imbuelta ti drayber ti bus a naglugananmi ket nagbaliwkami iti ruta. Di nagbayag, pinasardengdakami ti grupo dagiti armado a rebelde sa pinadissaagdakami. Nagsalsaludsodda ket kalpasanna, pinalubosandakamin. Idi kuan, sabali pay a grupo dagiti rebelde ti nangpasardeng kadakami. Gapu ta am-ammo ti maysa a pasahero ti komanderda, pinalubosandakami manen. Iti beddeng ti ili, pinasardengdakami ti maikatlo a grupo dagiti rebelde. Sinaludsodandakami ngem pinalubosandakami met laeng. Bayat a nagpaamianankami, adu pay a barikada ti nalabsanmi agingga a nakadanon ti natapok a luganmi iti Conakry iti agsipnget.

Kadagiti simmaganad a biahek, nagkargaak iti kinarton a literatura, alikamen iti opisina, dagiti rekord ti sanga nga opisina, ken relief goods. Van ken minibus ti kaaduanna a pagluganak. Ngem ipabagkatko met kadagiti kargador dagiti literatura no lumasatak kadagiti kabakiran. No dadduma, iluganko dagitoy iti bilog a bumallasiw kadagiti karayan.

Naminsan, bayat nga inluganko ti maysa nga alikamen manipud Freetown a mapan iti Conakry, pinasardeng dagiti rebelde ti minibus a nagluganak iti beddeng ti pagilian. Maysa kadakuada ti nakakita ken nagsuspetsa iti bagahek ket sinalsaludsodannak. Apagisu met a nailasinko ti dati a kaeskuelaak kadagiti rebelde. Aw-awaganda iti Maton gapu ta isu ti kauuyongan ti langana kadakuada amin. Imbagak iti mangsalsaludsod kaniak nga umayko kitaen ni Maton sa pinukkawak. Dagus a nailasinnak ni Maton sa nagtaray nga immasideg. Naginnarakup ken nagkinnatawakami. Idi kuan, nagserioso.

“Ania ti problema?” dinamagna.

“Mapanak koma idiay Guinea,” insungbatko.

Dagus nga imbilinna kadagiti rebelde a palubosandan ti minibus a naglugananmi a saandan a rekrekisaen.

Manipud idin, no lumabasak iti dayta a checkpoint, bilinen ni Maton dagiti kakaduana a palasatendak. Ik-ikkak dagiti rebelde kadagiti magasintayo a pagyamyamananda unay. Di nagbayag, aw-awagandakon iti Mr. Pagwanawanan.