DAGITI TAMPOK ITI NAPALABAS A TAWEN

Legal Report

Indagadag ni apostol Pablo kadagiti Kristiano: ‘Sipapanunotkayo kadagidiay adda iti pagbaludan a kasla naibaludkayo a kaduada.’ (Heb. 13:3) Kas ad-adipen ni Jehova, kanayon a laglagipentayo dagiti matalek a kakabsattayo ken ikararagantayo dagidiay adda iti autoridad, wenno “amin nga adda iti nangato a saad; tapno maitultuloytayo ti agbiag a natalinaay ken naulimek buyogen ti naan-anay a nadiosan a debosion ken kinaserioso.”—1 Tim. 2:1, 2; Efe. 6:18.

Dagitoy ti sumagmamano a kaso a nakaipasanguan dagiti Saksi ni Jehova iti napalabas a tawen:

Dagiti kakabsattayo idiay Russia awan sardayna nga ‘isursuro ken idekdeklarada ti naimbag a damag’ iti laksid ti agtultuloy a panangpasardeng ti Russian Orthodox Church ken ti sumagmamano nga opisial ti gobierno iti trabahotayo. (Ara. 5:42) Ak-akusaran latta dagiti autoridad ti Russia dagiti publikasiontayo ken dagiti kakabsattayo sigun iti di nalawag a linteg ti extremism nga inaramidda idi a pangkontra iti terorismo. Kas resultana, agarup 70 a publikasiontayo ti indeklara dagiti korte ti Russia a naglaon kano kadagiti extremist a sasao. Innayon dagiti opisial ti gobierno dagitoy a publikasion iti listaan dagiti literatura a maiparit iti pagilianda. Gapu iti daytoy nga ibilbilangda a peggad, serserken ti dadduma nga autoridad dagiti Kingdom Hall ken balbalay dagiti kakabsat tapno agbirokda kadagiti publikasion. Tiniliw, rinetrato, ken inalaan dagiti polis iti fingerprint ti adu a Saksi a mangaskasaba ken masansan a butbutngenda ida no addada iti presinto.

Sipud idi Mayo 2013, nabista ti 16 a kakabsat iti siudad ti Taganrog gapu iti panangasabada ken panangorganisar, itatabuno, ken pannakipasetda kadagiti gimong. Daytoy ti damo a pannakaidarum dagiti Saksi gapu iti pammatida sipud idi nagpatingga ti Soviet Union. Dagiti autoridad iti nadumaduma a paset ti Russia sugsugsoganda dagiti korte nga ideklarada nga “extremist” dagiti literaturatayo ken sentensiaanda dagiti kakabsat kas kriminal gapu ta kagurada kano ti relihion.

Saan a nagbaliw ti kasasaad dagiti kakabsattayo iti Eritrea. Idi Hulio 2013, agdagupen iti 52 a kakabsat ti nakabalud a pakairamanan ti innem a babbai ken walo a lallaki nga agtawen iti nasurok a 70. Sipud pay Septiembre 24, 1994, nakabalud ti tallo a kakabsat a da Paulos Eyassu, Isaac Mogos, ken Negede Teklemariam gapu ta dida kayat ti agsoldado.

Nasurok a kagudua kadagiti nakabalud a kakabsat ti adda iti pagbaludan ti Meiter a masarakan iti desierto nga amianan ti kabesera nga Asmara. Manipud Oktubre 2011 agingga iti Agosto 2012, dinusa ti autoridad ti 25 a kakabsat babaen ti panangikabilda kadakuada iti metal a pasdek a naikali iti daga ti kaguduana. Bayat ti kalgaw, palubosan dagiti guardia a rummuar dagiti balud tapno maliklikanda ti nakaro a pudot iti uneg ti pasdek. Ngem kurang ti makan ken danum isu nga apektado ti salun-at dagiti kakabsat. Nakalkaldaang ta gapu iti daytoy a pannakamaltrato, natay ti 68 anyos a ni Brother Yohannes Haile idi Agosto 2012, ken ni Brother Misghina Gebretinsae idi 2011.

Panagkedked iti Saan a Neutral a Serbisio Gapu iti Konsiensia

Naibatay iti Isaias 2:4 ken Juan 18:36.

ARMENIA

Idi Nobiembre 27, 2012, nangipaulog ti European Court of Human Rights (ECHR) iti paborable a desision iti kaso a Khachatryan and Others v. Armenia. Indarum ti gobierno iti kaso kriminal ti 17 a Saksi gapu ta dida kayat ti makiraman iti alternatibo a serbisio para kadagiti sibilian nga imatmatonan ti militar. Gapu iti panangsalungasing ti Armenia iti linteg, nagbayad iti danios kadagiti biktima ken insublina amin a nagastosda iti kaso.

Iti laksid ti paborable a desision iti kaso a Khachatryan ken iti immun-unan a panangabak ti kaso a Bayatyan v. Armenia, ken ti dadduma pay a simmaruno a desision ti ECHR, intultuloy latta ti gobierno ti Armenia a bistaen ken sentensiaan dagiti agtutubo a Saksi a nagkedked gapu iti konsiensiada. Ngem idi Hunio 8, 2013, nangipasa ti gobierno kadagiti amienda iti Alternative Service Law a mangikkat iti kontrol ken panangimaton ti militar iti alternatibo a serbisio. Idi Nobiembre 12, 2013, nawayawayaan amin a naibalud a Saksi a nagkedked gapu iti konsiensiada. Napatgan met ti apela dagiti agtutubo a Saksi para iti alternatibo a serbisio.

SOUTH KOREA

Idi Oktubre 31, 2013, adda pay laeng 602 a nakabalud a kakabsat. Sipud 1950, addan 17,605 a Saksi ni Jehova a sinentensiaan dagiti autoridad ti South Korea. Agdagupen iti 34,184 a tawen ti pannakaibaludda gapu iti panagkedkedda a makiraman iti serbisio militar.

Adu a naibalud a Saksi ti naitipon kadagiti selda dagiti kriminal ken dagiti nadagsen ti nagbasolanda. Ngem itay nabiit, adda grupo dagiti kakabsat a nakisarita iti opisial ti Korea Correctional Service tapno kiddawenda iti administrasion ti pagbaludan nga isinada ti pagyanan dagiti kakabsat. Dagus a nagtignay ti administrasion ti pagbaludan ket inikkatda ti kaaduan a kakabsattayo iti selda dagiti kriminal. Idi Abril 2013, agarup 75 a porsiento kadagiti balud a kakabsat ti agkakaduan iti selda a buklen ti uppat wenno lima a kakabsat. Ania ti epekto daytoy a panagbalbaliw kadagiti kakabsat?

“Nayadayokami kadagiti dakes nga impluensia kas iti immoralidad ken naalas a sasao,” kuna ti maysa a kabsat. Kuna met ti sabali, “Makapagpipinnaregtakamin ken maangaymin ti lima a gimong iti kada lawas.”

Kabayatanna, 56 a napasardeng a soldado ti nagbalin a reserve force. Idi agangay, nagbalinda a Saksi ket namin-adu a nabista, namulta, ken naibaludda gapu ta agkedkedda a masanay no maawaganda iti militar. Gapu ta mamin-adu a maawaganda iti kada tawen iti uneg ti walo a tawen, narigat ti pakaipaspasanguanda a kinaawan hustisia.

SINGAPORE

Iti laksid ti maulit-ulit a kiddaw ti 12 a kakabsat a makiramanda laengen iti alternatibo a serbisio para kadagiti sibilian, naibaludda latta iti 39 a bulan iti Armed Forces Detention Barracks. Adda pay kabsat a naibalud iti makatawen gapu iti panagkedkedna nga agbalin a reserve force.

TURKMENISTAN

Siam a kakabsat a nagkedked nga agsoldado gapu iti konsiensiada ti nasentensiaan iti 18 a bulan agingga iti dua a tawen a pannakaibalud. Masansan a malmaluen met ida dagiti soldado ken guardia ti pagbaludan. No mawayawayaan dagitoy a Saksi, masansan nga idarum manen ida dagiti autoridad kas “nagsalungasing manen iti linteg” ket maipisokda iti nais-istrikto a pagbaludan. Dagidiay tumultulong kadagiti 10 a Saksi a nagkedked nga agsoldado ket nangipasa iti reklamo iti United Nations Human Rights Committee.

Panagkedked Kadagiti Seremonia ti Pagilian Gapu iti Konsiensia

Naibatay iti Daniel 3:16-18.

Tanzania: Kalpasan a naabsuelto dagitoy nga agtutubo a Saksi, naitultuloyda manen ti panageskuelada

TANZANIA

Ti Court of Appeal iti Dar es Salaam, ti kangatuan a korte ti Tanzania, nagkaykaysada iti desision a saan a maiparbeng ti inaramid ti administrasion ti eskuelaan a panangikkat iti lima nga estudiante ken panangsuspende iti 122 a dadduma pay gapu iti panagkedkedda a mangkanta iti national anthem. Iti desision nga impaulog daytoy a korte idi Hulio 12, 2013, binigbigna ti kinapasnek ti pammati dagiti Saksi nga estudiante ken ti wayawayada mainaig iti konsiensia ken relihion a salsalakniban ti konstitusion. Kas resulta ti determinasion dagiti agtutubo nga agtalinaed a nasungdo iti Dios, nagballigida ken naitandudo ti nagan ni Jehova ken ti wayawayatayo nga agdaydayaw iti Tanzania.

Wayawaya nga Agsao

Naibatay iti Aramid 4:19, 20.

KAZAKHSTAN

Gapu iti “panagadal dagiti eksperto” nga inaramid ti Regional Department of Religious Affairs, indeklarada nga “extremist” ti dadduma a publikasiontayo gapu ta iparparegtana kano ti panagsisina iti kagimongan ken relihion. Idi Abril 6, 2013, dagiti polis iti siudad ti Karabalyk sinerrekda nga awan ti pammalubos ti balay a madama a paggigimongan dagiti Saksi ket kinompiskarda dagiti literatura. Idi Hulio 3, 2013, pinatalgedan ti Astana Economic Court ti desision a mangiparit iti 10 a publikasiontayo, isu nga agtultuloy a naeksamen ken nalapdan ti panagsangpet dagiti literaturatayo. Idi Disiembre 2012, inrugi met dagiti opisial ti pagilian ti agsasaruno a pannakaaresto ken pannakaibalud dagiti kakabsattayo gapu iti aw-awaganda nga illegal a panagmisionero. Idi Marso 28, 2013, ti Agency for Religious Affairs imbilinna iti Regional Religious Center of Jehovah’s Witnesses nga ibagada iti amin a Saksi ni Jehova iti Kazakhstan nga illegal ti mangasaba iti ruar ti nairehistro a paggigimonganda. Idi Hulio 2013, nangipila dagiti autoridad kadagiti kaso kontra iti 21 a kakabsattayo.

Wayawaya nga Agasamblea ken Agtataripnong

Naibatay iti Hebreo 10:24, 25.

AZERBAIJAN

Idi Enero 2010, saan nga inaprobaran ti State Committee for Work with Religious Associations ti pannakairehistro manen ti Religious Community of Jehovah’s Witnesses gapu kadagiti maipagarup a kamali iti aplikasion. Namin-adu a pinadas dagiti Saksi ni Jehova nga aturen dagiti ibagbagada a kamali ngem saan latta a naaprobaran ti pannakairehistrona manen. Idi Hulio 31, 2012, insubmitir dagiti kakabsat daytoy a kaso iti ECHR. Inlanadda a linabsing ti gobierno ti wayawayatayo iti relihion gapu ta dina inaprobaran ti pannakairehistro manen ti asosasiontayo, nupay awan ti legal a nakaibatayan dayta. No saan a mairehistro, saan a matagiragsak dagiti kakabsat ti wayawayada nga agdayaw.

Wayawaya ken Kinatalged ti Tao ken Sanikua

Naibatay iti Filipos 1:7.

UKRAINE

Nupay nawaya nga agdaydayaw dagiti Saksi iti Ukraine, agpaspasarda iti pannakakabkabil, pannakauram, ken bandalismo kadagiti Kingdom Hall. Saan nga im-imbestigaran a naimbag dagitoy dagiti mangipatpatungpal iti linteg ken saan a mabisbista dagiti bumusbusor isu a naturedda latta a mangaramid kadagita. Gapuna, immadu ti krimen a napasaran dagiti kakabsat idi 2012 ken 2013. Idi 2010, adda 5 nga insidente ti bandalismo ken pannakauram ti Kingdom Hall, 15 idi 2011, sa 50 idi 2012. Iti umuna a lima a bulan ti 2013, addan 23 nga insidente. Inyuli ti sanga nga opisina dagitoy a kaso iti United Nations Human Rights Committee.

Ukraine: Isagsagana dagiti kakabsat nga ibangon manen daytoy nadadael ken napuoran a Kingdom Hall

Kalintegan ti Maysa nga Agdesision Para iti Bagina

Naibatay iti Aramid 5:29 ken Aramid 15:28, 29.

ARGENTINA

Idi primavera ti 2012, adda napasamak a gandat a panagtakaw ket nairaman a napaltopaltogan ti inosente a ni Pablo Albarracini ken naitaray iti ospital nga awan puotna. Sakbay dayta, napirmaanna ti durable power of attorney (DPA) a mangibagbaga a dina akseptaren ti panangagas a mausar ti dara. Nupay kayat a raemen ti ospital ti nabatad a desisionna, pinadas ti saan a Saksi a kapamiliana ti mangala iti pammalubos ti korte a mayalisonan iti dara ni Brother Albarracini gapu ta kasapulan kano dayta tapno masalbar ti biagna. Ngem ti Korte Suprema ti Argentina pinaboranna ni Brother Albarracini ken rinaemna ti kalinteganna a mangikeddeng iti kayatna a pannakaagas bayat nga awan puotna. Saan a nayalisonan iti dara ken immimbag, isu nga agyamyaman ken Jehova ta tinulonganna a mangsalimetmet iti kinatarnawna iti daytoy nagpateg nga isyu.

Biktima ti Panangidumduma Gapu iti Relihion

Naibatay iti Lucas 21:12-17.

KYRGYZSTAN

Idi Abril 16, 2013, pinaboran ti maysa a korte dagiti kakabsattayo iti Toktogul, a namindua a dinadael dagiti lumugar ti Kingdom Hall-da. Pinatawan ti korte iti dusa dagiti nakabasol ken pinagbayadna ida iti danios. Mabisbistan dagidiay makin-utek iti umuna a pannakadadael, ket mangnamnama dagiti kakabsat nga agpatingganto dagiti kastoy a problema iti lugarda. Kabayatanna, agibangbangon manen dagiti kongregasion iti Kingdom Hall.

Kyrgyzstan: Daytoy a Kingdom Hall ket namindua a dinadael dagiti lumugar

Dagiti Naisangsangayan a Panangabak iti Kaso

Kaso: Masapul kadi a mangala iti permiso ti maysa a relihion tapno makaangay kadagiti kombension ken gimong?

Desision: Idi Disiembre 5, 2012, pinatalgedan ti Constitutional Court of the Russian Federation a ti Russian Constitution garantisaranna ti wayawaya ti relihion. Inkeddengna a mabalin nga agtataripnong dagiti kakabsattayo uray no dida ipakada nga umuna wenno saanda a mangala iti permiso kadagiti autoridad.
Kaso: Adda kadi karbengan dagiti umili a mamagbalin a pribado dagiti medikal a rekordda? Situasion: Idi 2007, imbilin ti maysa a deputy city prosecutor iti St. Petersburg, Russia, iti amin a medikal nga institusion iti siudad nga ipasada iti opisina ti prosecutor ti amin a rekord dagiti Saksi ni Jehova a nagkedked nga agpayalison iti dara—a saanda nga ipakada iti pasiente. Gapu ta saan a nasalakniban dagiti korte ti Russia ti kalintegan dagiti pasiente mainaig iti kinapribado, nangipasa dagiti kakabsat iti darum iti European Court of Human Rights (ECHR).

Desision: Idi Hunio 6, 2013, inkeddeng ti ECHR a ti bilin ti prosecutor ket pananglabsing kadagiti kangrunaan a kalintegan mainaig iti kinapribado ken pinatalgedanna nga awan ti “napateg wenno umdas a rason” tapno ibutaktak dagiti pribado nga impormasion kadagiti opisial ti gobierno. Nagbalin a pinal ti desision idi Oktubre 7 idi imbasura ti Grand Chamber ti ECHR ti apelar ti Russia.—Avilkina and Others v. Russia.