Teksto iti Tawen 2015

Adu ti panggapuan dagiti Israelita nga agyaman ken Jehova kalpasan ti pannakaispalda manipud ken Faraon ken ti buyotna iti Nalabaga a Baybay. Maragsakantayo met ita nga agyaman ken Jehova. Pudno a nalakatayo laeng a maupay no agpasartayo kadagiti pakasuotan. Kadagiti kasta a tiempo, maliwliwa ken mapabilegtayo no utobentayo dagiti bendision a sagsagrapentayo.

Ti maysa kadagiti ipatpategtayo unay a bendision ket ti agpaypayso a namnama a pannakailasat manipud iti amin a pakaigapuan ti ut-ot ken pakariribukan. Aniaman dagiti mapasarantayo a pakarigatan, ammotayo a saannatayo a baybay-an ni Jehova. Ipapaay ti naayat a Pastortayo ti amin a kasapulantayo tapno simamatalek a makapagserbitayo kenkuana. Kanayon nga Isu ti “kamang ken pigsa . . . maysa a saranay a sisasagana a masarakan bayat dagiti riribuk.” (Sal. 46:1) Ti kanayon a panangpampanunottayo kadagita a bendision tulongannatayo nga agibtur uray kadagiti kakaruan a pakasuotan. Iti intero a makatawen, sapay koma ta sirarag-o nga utobentayo dagiti bendisiontayo ken matignaytayo nga ‘agyaman ken Jehova, ta isu naimbag; ta ti naayat a kinamanangngaasina ket agingga iti tiempo a di nakedngan.’​—Sal. 106:1.