Biblia a Naaramid a Nalagda ken Agpaut

ITI amin a publikasion, ti Biblia ti kapatgan kadatayo a Saksi ni Jehova. Regular nga ad-adalen ken us-usarentayo dayta a mangisuro iti naimbag a damag maipapan iti Pagarian ti Dios. (Mat. 24:14) Dayta ti gapuna nga inaramid dagiti kakabsattayo ti amin a kabaelanda tapno masigurado a napintas ken nalagda dagiti material a nausar iti 2013 a rebision ti New World Translation of the Holy Scriptures.

Dagiti kakabsat nga agtrabtrabaho iti pagimprentaantayo iti Wallkill, New York, U.S.A., imbagada ti planoda a disenio ti baro a Biblia iti presidente ti maysa a kompania nga agar-aramid iti libro. Kinuna ti presidente, “Imposible a maaramid ti Biblia a kas iti kayatyo.” Kinunana pay, “Makapaupay ngem agpayso a kaaduan a Biblia ket naaramid laeng a maidispley iti lamisaan wenno estante—imbes a nakalaglagda koma.”

Saan unay a nagpaut ti dadduma nga immun-una nga edision ti New World Translation. Gapuna, dagiti kakabsat nga agtrabtrabaho iti pagimprentaan iti Wallkill sinukimatda a naimbag ti material a nausar para iti akkub, pigket, ken pamay-an a panangdait tapno makaaramidda iti Biblia a nalagda latta uray kanayon a mausar iti nagduduma a klima. Maitunos iti nasukimatda, nangaramidda kadagiti sampol a Biblia sa impausarda dagita kadagiti Saksi iti nagduduma a pagilian nga addaan iti nakapudpudot wenno nakalamlamiis a klima.

Kalpasan ti innem a bulan, naisubli dagiti Biblia ket nangaramid dagiti kakabsat iti panagbalbaliw tapno mapasayaat, sa nagipatulodda manen kadagiti sabali a kopia ti Biblia. Nasurok a 1,690 amin ti naaramid a sampol a Biblia. Maysa kadagita ti di inggagara a napadalanan ti lugan, adda ti agpatnag a natuduan, ken adda met nayuper iti layus gapu iti bagyo.

Idi 2011, bayat a maipapausar dagiti sampol, gimmatangtayo iti high-speed bindery para kadagiti pagimprentaantayo iti Wallkill ken iti Ebina, Japan, tapno adda umdas a mayimprenta a Biblia para iti umuna a pannakairuarna ken tapno agpapada ti itsura dagiti maaramid a Biblia kadagita a pagimprentaan.

Aglukot nga Akkub

Idi rugrugi ti 2012, nagusar ti dua a pagimprentaan para iti 1984 nga edision ti New World Translation iti sumagmamano a baro a material para iti akkub. Ngem nagusar dagiti baro a makina iti pigket ken material para iti liner (pangpatibker iti akkub) a saan pay a napadas isu a naglukot dagiti akkub. Naisardeng ngarud ti panagimprenta.

Dagiti agar-aramid iti maysa kadagiti material, inaminna a ti panaglukot ket gagangayen a problema dagiti kompania nga agar-aramid iti libro ken saan a maliklikan. Ngem imbes nga agusar dagiti kakabsat iti natangken nga akkub, kayatda latta ti mangaramid iti akkub ti Biblia a nalap-it, nalagda, ken napintas. Kalpasan ti dandani uppat a bulan a panangpadas iti adu a kombinasion ti pigket ken liner, nakakitada met laengen iti umiso a kombinasion, isu a naituloyen ti panagimprenta iti Biblia a nalap-it ti akkubna ken saanen nga aglukot.

Nayeskediul a mairuar ti rebision ti New World Translation idi Oktubre 5, 2013 iti tinawen a miting ti Watch Tower Bible and Tract Society of Pennsylvania. Idi Biernes, Agosto 9, 2013, naawat dagiti pagimprentaan ti kompleto a Biblia babaen ti kompiuter ket nangrugi ti panagimprenta kabigatanna. Nayimprenta ti kaunaan a kompleto a Biblia idi Agosto 15. Iti simmaganad a pito a lawas, agpatnag ken agmalem a nagimprenta dagiti makina iti Wallkill ken Ebina. Nasurok a 1,600,000 a Biblia ti naaramid ken naipatulod. Umdas daytan para iti amin a timmabuno iti tinawen a miting.

Nupay napintas ken nalagda daytoy a Biblia, napatpateg nga amang ti makaited-biag a mensahena. Maysa nga aldaw kalpasan a naawat ti maysa a kabsat a babai a taga-United States ti baro a Bibliana, insuratna: “Gapu iti baro nga edision, ad-adda a maawatakon ti Biblia.”