“Magusgustuanmi Unay ti JW Broadcasting!”

IDI Oktubre 6, 2014, adda naaramid a pannakatesting ti maysa nga Ingles nga Internet television station a maawagan iti JW Broadcasting.a Sipud idi Agosto 2015, maipatpatarusen dagiti makaparegta a programa iti nasurok a 70 a lengguahe tapno ad-adu pay a kakabsat ti mabenepisiaran. Adu a kakabsat iti intero a lubong ti nangyebkas iti apresasionda iti daytoy a nagmayat a baro a probision. Ngem kasano a naaramid ti JW Broadcasting?

Kasapulan a mangbirok dagiti kakabsat iti nasayaat a lugar para iti studio ket napilida ti maysa a lokasion iti 30 Columbia Heights building iti sangalubongan a hedkuarter dagiti Saksi ni Jehova idiay Brooklyn, New York. Iti laeng makalawas, nabakantean dayta a lokasion, ket rinugian ti Maintenance Department nga isagana tapno maaramid nga studio. Adda met grupo a nangaramid iti desente ngem moderno a disenio ti studio. Adu a kakabsat a naggapu iti nadumaduma a paset ti United States ti nagtrabaho iti adu nga oras a nangdisenio iti studio ken nangplano iti napartak a pannakaaramidna. Dagiti panag-research a kaaduanna nga umabut iti bulbulan ket naaramid laeng iti sumagmamano nga aldaw. Kalpasanna, dagus a nagorder ti Purchasing Department iti adu a kasapulan a materiales.

Kinilkilometro a kable ti inkabit dagiti kakabsat ken siniguradoda a nasayaat ti panagandar dagiti equipment. Bayat a maar-aramid dagita, irekrekord met ti orchestra kadagiti audio/video studio idiay Patterson ti kangrunaan a musika a mausar. Timmulong iti dayta dagiti kakabsat manipud iti nagduduma a pagilian a napan sadiay para iti regular nga eskediul ti rekording. Naisurat dagiti iskrip, nayeskediul dagiti reenactment, ken nagtitinnulong dagiti audio/video team idiay Brooklyn, Patterson, ken Wallkill ken dagiti kakabsat iti nadumaduma a pagilian a nangisagana a naimbag kadagiti maipabuya a video. Idi nalpasen ti studio ken naiplastaren dagiti equipment, nairugin ti pannakaisagana dagiti maiparang a paset iti umuna a bulbulan ti broadcasting.

Insaludsodmi iti maysa nga eksperto iti daytoy a trabaho no kasano kabayag a maaramid ti kastoy kadakkel nga studio ken proyekto ket imbagana a kaaduanna nga umabut iti maysa ket kagudua a tawen. Ngem dua a bulan laeng nga inleppas dayta dagiti nagagaget a kakabsattayo!

Talaga a makaparagsak dagiti resultana! Kada bulan, nasurok a dua a milion a daras a mabuybuya ti binulan a programa, a gagangay a mairuar iti umuna a Lunes ti bulan. No mairaman ti dadduma pay a video, nasurok a 10 a milion a daras a mabuybuya dagiti video iti broadcasting iti kada bulan.

Ania ti marikrikna dagiti adipen ni Jehova iti daytoy a baro a naespirituan a probision? Dagitoy ti dadduma kadagiti nakaad-adu nga ebkas ti panangapresiarda:

• “Daytoy ti maysa kadagiti kararagsakan a rabii iti biagko! Itay binuyami ken baketko ti Mayo 2015 a programa iti JW Broadcasting, diak mailadawan ti ragsakko. Daytoy ti maysa kadagiti kapapatgan a regalo ni Apo Jehova kaniak. Agyamankami iti Bagi a Manarawidwid ken kadagiti kakabsat a nagsaksakripisio tapno maaramid daytoy nakasaysayaat a probision.”​—Indonesia.

• “Idi, adu a kakabsat ti saan pay a pulos nakangngeg iti palawag dagiti miembro ti Bagi a Manarawidwid. Ngem ita, saanmi laengen ida a mangngeg, makitkitami payen ida. Ita pay laeng a nariknami a talaga a naikaykaysakami iti Bagi a Manarawidwid ken kadagiti kakabsattayo iti intero a lubong.”​—Kenya.

• “Gapu ta di manamati ni lakayko, narigat ti ag-family worship a kadua ti dua a tin-edyer nga annakko. Isu a nakapatpateg ti broadcasting para kaniak. Gapu iti dayta, mariknak a pasetak ti organisasion, ken maparparegtakami unay nga agiina. Talaga a bendision dayta manipud ken Apo Jehova.”​—Britain.

• “Magusgustuanmi unay ti JW Broadcasting! Ken nasungbatan dagiti kararagmi idi naipatarus dayta iti dadduma pay a lengguahe. Maparparegtakami unay no makitkitami kadagiti panagpalawagyo a naragsakkayo nga agserserbi ken Apo Jehova. Sipud idi nairugi ti JW Broadcasting, ad-addan a mariknami a pasetnakami ti nagsayaat ken nakaskasdaaw nga organisasion ni Apo Jehova.”​—Czech Republic.

• “No agdengdengngegak iti palawag dagiti miembro ti Bagi a Manarawidwid iti bukodko a lengguahe, mariknak a sumingsingedak ken Apo Jehova.”​—Brazil.

• “Sangapulo ket innem a tawenen nga agserserbiak ken Jehova, ngem ita pay laeng a mariknak manen ti ragsak a nariknak idi nagbautisarak. Pagyamanan, kakabsat, iti JW Broadcasting.”​—Brazil.

Masiguradomi a babaen iti tulong ni Jehova, agtultuloy a mangipaay ti JW Broadcasting iti adu a naespirituan a bendision iti sangalubongan a panagkakabsattayo ken ad-adda pay a mangidayaw ken Jehova.