Ti Masapul a Maammuam Maipapan iti Day Care

Dadduma nga agtrabtrabaho a nagannak ti mangiserrek kadagiti babassit pay nga annakda iti day-care center—maysa a pasilidad a kasla eskuelaan. Pagsayaatan ngata dayta ti anakmo?

• Dagiti masapul nga isaludsodmo

• Ti mabalinmo nga aramiden

Dagiti masapul nga isaludsodmo

Adda ngata madi nga epekto ti day care iti relasion ti nagannak iti anakna? Posible. Bayat ti umuna a tawtawen ti biag ti ubing, nagpartak ti panagdebelop ti utekna a mangapektar iti relasionna iti sabsabali. Ikagumaam a kanayon a kaduam ti anakmo iti daytoy nagpateg a tiempo ta addanto epekto dayta iti intero a panagbiagna.—Deuteronomio 6:6, 7.

• Dagiti nagannak a mangpampanunot a mangiserrek iti anakda iti day care masapul a panunotenda no kasano a mapagtalinaedda a nadekket ti relasionda iti anakda.

Pakapuyen ngata ti day care ti impluensiam iti anakmo? Posible. “No ad-adu a tiempo a kadua dagiti ubbing ti padada nga ubbing, ad-adda a maimpluensiaanda ti maysa ken maysa,” kuna ti libro a Hold On to Your Kids.

• Dagiti nagannak a mangpampanunot a mangiserrek iti anakda iti day care masapul a panunotenda no isudanto latta ti kangrunaan nga impluensia iti anakda.

Nalalaingto ngata ti anakmo inton ageskuela no nag-day care nga umuna? Wen kuna ti dadduma. Adda met dagiti mangibaga a bassit wenno awan pay ketdi epekto ti day care iti abilidad ti anakmo nga agsursuro. Kuna ti child psychologist a ni Penelope Leach: “Dimo koma patien a ti ‘edukasion’ iti eskuelaan ti kangrunaan a makatulongto iti biag ti anakmo, ken dimo koma patien a nasaysayaat no nasapsapa nga ageskuela. Ta no kasta, tagtagibassitem ti ‘edukasion’ nga it-itedmo iti anakmo sipud pannakayanakna.”

• Dagiti nagannak a mangpampanunot a mangiserrek iti anakda iti day care masapul a panunotenda no makatulong dayta wenno no kasapulan.

Posible kadi a maysa kadakayo nga agassawa ti saanen nga agtrabaho tapno agbati iti balayyo a kadua ti anakyo? Adda dagiti agassawa nga agpada nga agtrabtrabaho tapno ad-adu ti kuartada. Napatpateg kadi dayta ngem iti maisaksakripisioda?

• Dagiti nagannak a mangpampanunot a mangiserrek iti anakda iti day care masapul a panunotenda no mabalin a pasimplienda ti biagda tapno maysa kadakuada ti mabalin nga agbati iti balayda.

Sakbay nga agdesisionkayo, masapul a panunotenyo a naimbag dagiti pagsayaatan ken pagdaksan ti panangiserrek iti anakyo iti day-care center. No ngay nakitayo a pagsayaatan dayta ti pamiliayo?

Ti mabalinmo nga aramiden

Kuna ti Biblia a “panunoten ti masirib ti tunggal addangna.” (Proverbio 14:15) Bayat a silalagipka iti dayta, agpanunotka a naimbag sakbay nga agpilika iti aniaman a kita ti day care.

Ammuem dagiti pagpiliam

• Adda dagiti nagannak a mangipan kadagiti annakda iti sabali a balay nga addaan iti maysa wenno nalabit sumagmamano a paraaywan ken bassit a grupo dagiti ubbing.

• Dadduma a nagannak ti mangala iti kabagian, kadua iti balay, wenno paraaywan a mangasikaso iti anakda.

Amin dagiti pagpilian ket adda pagsayaatan ken pagdaksanna. Mabalinmo ti makisarita kadagiti nagannak a nakapadasen iti dadduma a kita ti day care. Kuna ti Biblia: “Masirib dagidiay agpabalakad.”—Proverbio 13:10.

No ngay kaykayatyo ti day-care center? No kasta . . .

Ammuem ti maipapan iti day-care center

• Adda kadi lisensiana wenno sumursurot kadi kadagiti paglintegan ti gobierno? Komusta ti reputasionna? Mabigbigbig kadi wenno rekomendado?

• Nadalus wenno natalged kadi ti pasilidad?

• Ania dagiti aktibidad dagiti ubbing sadiay?a

Ammuem ti maipapan kadagiti paraaywan

• Nasanayda kadi? Karaman iti dayta ti pannakasanay iti panangisuro kadagiti babassit nga ubbing, first aid, ken CPR.

• Mabalinmo kadi nga i-background check dagiti paraaywan tapno masiguradom nga awan ti naaramidanda a krimen iti napalabas?

• Agkarabaliw kadi dagiti empleadoda? No kanayon nga agbaliw dagiti empleado, kaipapananna a kanayon met nga ag-adjust ti annakmo kadagiti paraaywan.

• Mano nga ubbing ti aywanan ti maysa a paraaywan? No ad-adu nga ubbing ti asikasuen ti maysa a paraaywan, kaipapananna a basbassit nga atension ti maipaay iti anakmo. Siempre, ti kaadu ti atension a kasapulan ti anakmo ket nakadepende iti edad ken kabaelanna.

• Kayat kadi dagiti paraaywan a pagsasaritaanyo dagiti pakaseknam—wenno dagiti pakaseknanda?