Ap-apektaran Kadi ti Social Media ti Anakmo?—No Kasano a Makatulong ti Biblia Kadagiti Nagannak

“Makapaalarma ti panagkaro ti problema iti mental a salun-at dagiti agtutubo, ket agparang a ti social media ti maysa a kangrunaan a makagapu.”—Dr. Vivek Murthy, U.S. surgeon general, New York Times, Hunio 17, 2024.

Kasano a maprotektaran dagiti nagannak dagiti annakda kadagiti pagdaksan ti social media? Mangted ti Biblia kadagiti makatulong a balakad.

Ti mabalin nga aramiden dagiti nagannak

Kitaem dagitoy a prinsipio ti Biblia.

“Panunoten ti masirib ti tunggal addangna.”—Proverbio 14:15.

Gapu ta mabalin nga adda dakes nga epekto ti social media iti anakmo, saanmo koma a marikna a masapul a palubosam lattan nga agusar iti social media. Sakbay a palubosam nga agusar, siguraduem a manakemen ken kayana a suroten dagiti nagsaritaanyo maipapan iti no kasano kabayag ti panagusarna, itultuloyna nga ipateg dagiti nasayaat a gagayyemna, ken liklikanna dagiti saan a nasayaat a makita ken mabuya iti social media.

Tapno maammuam ti ad-adu pay, basaem dagiti artikulo nga “Okey Laeng Kadi nga Agusar ti Anakko iti Social Media?” ken “Isuroyo ti Tin-edyeryo iti Naannad a Panagusar iti Social Media.”

“Usarenyo ti tiempoyo iti kasayaatan a pamay-an.”—Efeso 5:16.

No ipalubosmo nga agusar iti social media ti anakmo, mangaramidka kadagiti pagannurotan iti panagusarna ken ilawlawagmo no kasano a makatulong dagita tapno maprotektaran isuna. Alertoka koma no adda makitam a panagbalbaliw iti kababalinna a mangipakita a baka masapul a limitaranna ti panagusarna iti social media.

Usarem ti whiteboard animation nga Agannadka no Agusarka iti Social Network tapno maipaawatmo iti anakmo no apay a masapul nga adda limitasion ti panagusarna iti social media.

Ammuem ti ad-adu pay

Ibaga ti Biblia nga agbibiagtayon iti “delikado ken narigat a tiempo.” (2 Timoteo 3:1-5) Ngem mangipapaay ti Biblia kadagiti praktikal a balakad a makatulong kadatayo. Iti artikulo maipapan iti mental a salun-at dagiti tin-edyer, makitayo ti nasurok a 20 a naibatay iti Biblia a reperensia a makatulong kadagiti nagannak ken kadagiti annakda.