Gulo iti Politika—Kaitungpalan ti Padto iti Biblia

Nabingaybingay dagiti tattao ita gapu iti politika. Saanda nga agtutunos kadagiti linteg a mangapektar iti inaldaw a biagda ken pagdedebateanda dagiti agduduma nga opinionda. Iti gobierno, masansan nga agkokontra ti opinion dagiti agpampanday iti linteg ken ti dadduma pay nga opisial, ket awan ti mayat nga agpaabak. Gapu iti dayta, nagulo ti politika ken saan a nasayaat ti panagandar ti gobierno.

Ngem nakapatpateg a maammuan ti maipapan iti tension iti politika iti United States ken Britain (maaw-awagan met iti United Kingdom). Apay? Gapu ta impadto ti Biblia a mapasamak daytoy a gulo kadagitoy dua a nasion. Iti daytoy met laeng a tiempo, naan-anay a balbaliwan ti gobierno ti Dios idiay langit ti situasion ditoy daga.

Gulo iti politika “iti maudi a paset dagiti aldaw”

Naglaon ti Biblia iti makapainteres a padto a mabasa iti libro a Daniel. Iti dayta a padto, impakaammo ti Dios “ti mapasamak iti maudi a paset dagiti aldaw.” Idi insurat dayta ni Daniel, tuktukoyenna dagiti napateg a panagbalbaliw a mapasamak iti masanguanan a mangapektar kadagiti tattao.—Daniel 2:28.

Daytoy a padto ti Biblia ket impatagtagainep ti Dios iti ari ti Babilonia. Iti dayta a tagtagainep, nakakita ti ari iti nakadakdakkel nga imahen a naaramid iti nagduduma a metal. Idi kuan, inlawlawag ni propeta Daniel a ti ulo agingga iti saka ti imahen irepresentarna dagiti agsasaruno a kabilgan a turay iti lubong iti pakasaritaan ti tao.a Inton agangay, addanto bato a naan-anay a mangrumek iti imahen. Dayta a bato irepresentarna ti Pagarian, wenno gobierno, nga ipasdek ti Dios.—Daniel 2:36-45.

Sigun iti padto, suktanto ti Pagarian ti Dios ti amin a gobierno ti tao. Daytoy met laeng a Pagarian ti insuro ni Jesus nga ikararag dagiti pasurotna idi imbagana: “Umay koma ti Pagariam.”—Mateo 6:10.

Ngem ania a paset daytoy a padto ti Biblia ti nangipakpakauna iti gulo iti politika? No nadlawmo, ti saka ti imahen ket naaramid iti “naglaok a landok ken pila.” (Daniel 2:33) Dayta a naglaok a material ket saan a kas iti dadduma a paset ti imahen a naaramid iti metal. Ipakita dayta nga adda maysa a nakabilbileg a turay iti lubong a naiduma. Kasano? Kastoy ti panangilawlawag ti padto ni Daniel:

Sigun iti padto, addanto gulo iti politika daytoy nabileg a turay iti lubong nga irepresentar ti saka ti imahen. Kumapuy ti bilegna gapu iti ar-aramiden dagiti umilina.

Padto ni Daniel—ti kaitungpalanna ita

Ti saka ti dakkel nga imahen irepresentarna dagiti kabilgan a turay iti lubong ita, ti aliansa ti United States ken Britain. Kasano a paneknekan dagiti paspasamak ita nga agpaypayso daytoy?

Naaramid ti saka ti imahen iti “naglaok a landok ken pila” isu a nakapuy dayta. (Daniel 2:42) Ad-adda pay a kimmapuy ita ti bileg ti United States ken Britain gapu ta nabingaybingay dagiti umilida. Kas pagarigan, kadagita a pagilian, adda dagiti agkikinnontra a partido. Ipilit met dagiti agprotprotesta nga ilaban dagiti kalinteganda uray madangranda. Masansan a saan nga agtutunos dagiti binutosanda nga opisial maipapan iti agduduma nga isyu. Gapu ta agkokontra dagiti umilida, marigatan no dadduma ti gobierno ti United States ken Britain a mangipatungpal kadagiti paglinteganda.

Ammuentayo ti kaipapanan ti dadduma pay a detalye iti padto ni Daniel ken no kasano a matungtungpal dagita ita:

Padto: “Ti pagarian ket mabingbingayto. Ngem addanto iti dayta ti dadduma a kinatangken ti landok.”—Daniel 2:41.

Kaipapananna: Uray no saan nga agtutunos dagiti opisial ti gobierno ti United States ken Britain iti agduduma nga isyu iti politika, agpada a nabileg ti armadada. Gapu iti dayta, maipatungpalda dagiti desisionda a mangapektar iti intero a lubong, isu a nabilegda a kas iti landok.

Kaitungpalanna

Idi 2023, ti nagtipon a gastos ti United States ken United Kingdom para iti militar ket dakdakkel no ikompara iti nagtitipon a gastos ti sumaruno a 12 a pagilian a dakkel ti gastosna.—Stockholm International Peace Research Institute.

‘Gapu iti panagtinnulong ti United Kingdom ken United States a mangprotektar ken mangidepensa iti pagilianda, ken iti panagusarda iti kabaruan a teknolohia, nagbalinda a kalagdaan pay laeng nga aliansa. Agtintinnulongkami, agsinsinnuportakami, agkadkaduakami iti laban.’—Strategic Command, U.K. Ministry of Defence, Abril 2024.

Padto: “No kasano a dagiti ramay ti saka ket naglaok a landok ken pila, addanto met paset ti pagarian a napigsa ken addanto pasetna a narasi.”—Daniel 2:42.

Kaipapananna: Uray no nabileg ti militar ti United States ken Britain, limitado ti maaramidanda gapu ta demokratiko ti gobiernoda. No saan a kayat ti kaaduan nga umili dagiti programada, marigatanda a mangipatungpal kadagita.

Kaitungpalanna

“Ibagbaga ti dadduma nga eksperto iti politika a gapu ta saan nga agkaykaysa ti gobierno ti United States, marigrigatan a mangaramid iti ipagpampannakkelna iti intero a lubong a kayana nga aramiden, kas kadagiti banag a konektado iti seguridad wenno negosio.”—“The Wall Street Journal.”

“Nagadu ti timmaud a baro a problema iti politika iti Britain, isu a saan a makapagtrabaho a naimbag dagiti opisial. Kas resultana, saan a maipatungpal dagiti empleado ti gobierno dagiti panagbalbaliw a kasapulan dagiti umili.”—Institute for Government.

Padto: “Mailaokdanto [ti pagarian] kadagiti ordinario a tattao; ngem saandanto nga agdinnekket.”—Daniel 2:43, footnote.

Kaipapananna: Mabalin nga adda boses dagiti ordinario a tattao iti gobiernoda, ngem dismayado latta dagiti politiko wenno botante iti maar-aramidan ti gobierno.

Kaitungpalanna

“Ita, saan a nasayaat ti maibagbaga ti kaaduan nga umili ti Amerika maipapan iti politika ken kadagiti nangabak nga opisial.”—Pew Research Center.

“No idilig iti napalabas a 50 a tawen, saan unayen nga agtalek ita dagiti umili ti Britain kadagiti politiko ken iti gobiernoda.”—“National Centre for Social Research.”

Padto ni Daniel—ti kaitungpalanna iti masanguanan

Sigun iti padto ni Daniel, ti aliansa ti United States ken Britain dagiti madamanto a kabilgan a turay iti lubong inton suktan ti Pagarian ti Dios ti amin a gobierno ti tao.—Daniel 2:44.

Adda pay maammuantayo iti padto iti libro nga Apocalipsis. Kapada dayta a padto ti tiempo ti pannakatungpal ti padto ni Daniel. Ipakita dayta a libro ti Biblia nga aguurnongto ‘dagiti ari iti intero a daga’ tapno makilabanda ken Jehovab a Dios iti gubat ti Armagedon, ti “gubat ti naindaklan nga aldaw ti Dios a Mannakabalin-amin.” (Apocalipsis 16:14, 16; 19:19-21) Iti daytoy a gubat, dadaelento ni Jehova ti amin a gobierno ti tao. Kalpasan a maaramidna dayta, mapukawton ti amin a pakakitaan kadagiti kabilgan a turay iti lubong nga irepresentar ti dakkel nga imahen iti padto ni Daniel.

Tapno maammuam ti ad-adu pay, kitaem ti artikulo nga “Ania ti Gubat ti Armagedon?”

Dagiti magunggonam no maawatam ti padto ni Daniel maipapan iti gulo iti politika

Husto ti impakpakauna ti Biblia maipapan iti mapaspasamak a gulo iti politika iti United States ken Britain. No ammotayo dayta, agbaliw ti panangmatmattayo kadagiti mapaspasamak ita.

• Maawatamto no apay a kayat ni Jesus a dagiti pasurotna ket agtalinaed a neutral iti politika. (Juan 17:16) Kas Ari a pinili ti Dios nga agturay iti Pagarian, maawatamto met no apay nga imbaga ni Jesus a ‘ti Pagarianna ket saan a paset daytoy a lubong.’—Juan 18:36.

• Maragsakankanto a makaammo nga asidegen nga agtignay ti Pagarian ti Dios ken iyegnanto dagiti nagsasayaat a bendision nga inkari ti Dios kadagiti tattao.—Apocalipsis 21:3, 4.

• Saankanto a mabuteng iti mapasamak iti masanguanan, ken saankanto a madanagan a baka madadael ti daga gapu iti panaggugubat dagiti nasion.—Salmo 37:11, 29.

Ipakita ti padto ni Daniel a ti aliansa ti United States ken Britain, nga irepresentar ti saka ti dakkel nga imahen, ti maudin a kabilgan a gobierno nga agturay iti lubong. Suktanto dayta ti perpekto a gobierno nga agturay manipud langit—ti Pagarian ti Dios!

Tapno maammuam ti ad-adu pay maipapan iti aramidento ti Pagarian ti Dios para kadagiti tattao, buyaem ti video nga Ania ti Pagarian ti Dios?