Sangalubongan a Talna—Apay a Naatap?
Sungbat ti Biblia
Saan a nagballigi ken agtultuloy a saan nga agballigi dagiti panangikagumaan ti tao a mangyeg iti sangalubongan a talna maigapu iti sumagmamano a rason:
“Saan a kukua ti tao a magmagna uray ti panangiturong iti addangna.” (Jeremias 10:23) Saan a naparsua dagiti tattao nga addaan iti abilidad wenno kalintegan a mangituray iti bagbagida, isu a saanda a kabaelan ti mangyeg iti manayon a talna.
“Dika agtalek kadagiti agtuturay awan ti tao a makaisalakan kenka. No matayda, agsublidan iti tapok a naggapuanda; iti dayta nga aldaw, aggibusen dagiti planoda.” (Salmo 146:3, 4, Ti Baro a Naimbag a Damag Biblia) Dagiti lider iti gobierno, uray dagidiay nasayaat ti motibona, ket saan a makapataud iti manayon a solusion dagiti kangrunaan a makagapu iti gubat.
“Kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao . . . narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel.” (2 Timoteo 3:1–4) Agbibiagtayon “kadagiti maudi nga aldaw” ti agdama a nadangkes a lubong, ti tiempo a naatap ti talna gapu iti panagsaknap dagiti kasta a kababalin.
“Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” (Apocalipsis 12:12) Ti Diablo, a kabusor ti Dios, ket naitapuaken ditoy daga ken im-impluensiaanna dagiti tattao a mangtulad iti dakes a kababalinna. Pulos a saantayo nga agbiag a sitatalna agingga nga isu “ti agturay iti daytoy a lubong.”—Juan 12:31.
“[Ti Pagarian ti Dios] rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” (Daniel 2:44) Ti Pagarian ti Dios, saan a ti aniaman a gobierno ti tao, ti mangpennekto iti tarigagaytayo a maadda ti sangalubongan a talna iti agnanayon.—Salmo 145:16.