Naglaon Kadi ti Biblia iti Umiso a Rekord Maipapan iti Biag ni Jesus?

Sungbat ti Biblia

Kastoy ti kuna ni Lucas a mannurat iti Biblia iti salaysayna mainaig iti biag ni Jesus: “Natuntonkon ti amin a bambanag manipud iti pangrugian buyogen ti kinaumiso.”—Lucas 1:3.

Adda dagiti agkuna a dagiti salaysay maipapan iti biag ni Jesus a nailanad kadagiti Ebanghelio—dagiti sinurat da Mateo, Marcos, Lucas, ken Juan a kapanawenanna—ket nabaliwan idi 300’s C.E.

Nupay kasta, idi rugrugi ti 1900s, nasarakan idiay Egipto ti maysa a napateg a pirsay ti Ebanghelio ni Juan a maawagan ita iti Papyrus Ryland ken naitalimeng iti John Rylands Library, Manchester, England. Linaon dayta ti Juan 18:31-33, 37, 38 iti Biblia iti kaaldawantayo.

Dayta ti kadaanan a pirsay ti manuskrito ti Kristiano a Griego a Kasuratan. Patien ti adu nga eskolar a naisurat dayta idi agarup 125 C.E., dandani 25 a tawen laeng wenno napapaut pay kalpasan ti pannakaisurat ti orihinal a kopia. Dagiti nailanad iti pirsay ket dandani kapadpada dagiti nailanad iti naud-udi a manuskrito.