Ni Jesus Kadi ti Mannakabalin-amin a Dios?

Sungbat ti Biblia

Dagiti bumusbusor inakusaranda ni Jesus a pagbalbalinenna ti bagina a kapada ti Dios. (Juan 5:18; 10:30-33) Nupay kasta, saan a pulos nga imbaga ni Jesus a kapadana ti Mannakabalin-amin a Dios. Kinunana: “Ti Ama dakdakkel ngem siak.”—Juan 14:28.

Dagiti nagkauna a pasurot ni Jesus saanda nga imbilang ni Jesus a kapada ti Mannakabalin-amin a Dios. Kas pagarigan, insurat ni apostol Pablo a kalpasan ti panagungar ni Jesus, ti Dios ‘intan-okna ni Jesus iti nangatngato a saad.’ Nalawag a saan a mamati ni Pablo a ni Jesus ti Mannakabalin-amin a Dios, ta no isu koma ti Dios, kasanona a maitan-ok ni Jesus iti nangatngato a saad?—Filipos 2:9.