Adda Kadi iti Pusom ti Pagarian ti Dios?
Sungbat ti Biblia
Awan. Ti Pagarian ti Dios ket saan laeng a kasasaad iti puso dagiti Kristiano.a Ibaga ti Biblia no sadino ti ayanna babaen iti panangawagna iti dayta a “pagarian ti langit.” (Mateo 4:17, Ti Biblia) Usigem no kasano nga ipakita ti Biblia a maysa dayta a pudpudno a gobierno nga agturturay idiay langit.
Ti Pagarian ti Dios ket addaan agturay, iturayan, linteg, ken bilin tapno matungpal ti pagayatan ti Dios idiay ken ditoy daga.—Mateo 6:10; Apocalipsis 5:10.
Ti gobierno wenno Pagarian ti Dios iturayanna ti amin nga “ili, nasional a bungbunggoy ken pagsasao” ditoy daga. (Daniel 7:13, 14) Ti autoridad a mangituray agtaud iti Dios, saan a kadagiti iturayanna.—Salmo 2:4-6; Isaias 9:7.
Imbaga ni Jesus kadagiti matalek nga apostolna a makikaduada kenkuana iti Pagarian idiay langit ket “agtugawdanto kadagiti trono.”—Lucas 22:28, 30.
Adda met dagiti kabusor a dadaelento ti Pagarian.—Salmo 2:1, 2, 8, 9; 110:1, 2; 1 Corinto 15:25, 26.
Saan nga isursuro ti Biblia a ti Pagarian ti langit ket adda iti pusom gapu ta puso ti mangiturturay iti maysa a tao. Ngem ipakita ti Biblia a ti “sao ti pagarian” wenno ti “naimbag a damag ti pagarian” impluensiaanna ti puso. (Mateo 13:19; 24:14)
Ania ti kaipapanan ti sasao a “ti pagarian ti Dios adda iti tengngayo”?
Mariro ti dadduma no ayan ti Pagarian gapu iti patarus ti dadduma a Biblia iti Lucas 17:21. Kas pagarigan, kuna ti bersion a Ti Biblia, “ti pagarian ti Dios adda iti unegyo.” Masapul nga ikabilangantayo ti konteksto tapno umiso ti pannakaawattayo iti daytoy a teksto.
Ti Pagarian ti Dios ket awan iti puso dagiti nasukir ken mammapatay a kabusor ni Jesus
Makisasao ni Jesus kadagiti Fariseo, grupo dagiti lider ti relihion a mangbusbusor ken nangiplano iti pannakapapatayna. (Mateo 12:14; Lucas 17:20) Nainkalintegan kadi a panunoten a ti Pagarian ket kasasaad ti nasukir a pusoda? Kuna ni Jesus kadakuada: “Iti uneg napnokayo iti panaginsisingpet ken kinakillo.”—Mateo 23:27, 28.
Ilawlawag ti dadduma a patarus ti kinuna ni Jesus iti Lucas 17:21: “Adda kadakayo ti Pagarian ti Dios.” (Dakami ti nangitaliko; Ti Baro a Naimbag a Damag Biblia) “Ti pagarian ti Dios adda iti tengngayo.” (Baro a Lubong a Patarus ti Nasantuan a Kasuratan) Ti Pagarian ti langit ket “adda” wenno adda iti “tengnga” dagiti Fariseo, kayatna a sawen, ni Jesus daydiay dinutokan ti Dios nga agturay kas Ari ket agtaktakder iti tengngada.—Lucas 1:32, 33.
a Adu kadagiti relihion nga agkunkuna a Kristiano ti mangisursuro nga adda iti puso ti tao ti Pagarian ti Dios. Kas pagarigan, idiay United States, kuna ti Southern Baptist Convention a ti Pagarian ti Dios ket paset “ti panagturay ti Dios iti puso ken biag ti maysa a tao.” Kasta met, kuna ni Pope Benedict XVI iti librona a Jesus of Nazareth, “dumteng ti Pagarian ti Dios no umimdeng ti puso.”