Naikeddeng Kadin ti Ipapataytayo?

Sungbat ti Biblia

Saan, ta ibaga ti Biblia a ti ipapatay ket masansan a gapu kadagiti “di mapakpakadaan a pasamak,” saan ket a gapu iti gasat.​—Eclesiastes 9:​11.

Saan kadi nga ibaga ti Biblia nga adda “tiempo ti ipapatay”?

Pudno, dakamaten ti Eclesiastes 3:2 nga adda “tiempo ti pannakayanak ken tiempo ti pannakatay; tiempo ti panagmula ken tiempo ti panagparut iti naimula.” (Ti Baro a Naimbag a Damag Biblia) Ngem ipakita ti konteksto daytoy a bersikulo a salsalaysayen ti Biblia ti agtultuloy a pasamak a gagangay iti biag. (Eclesiastes 3:​1-8) Saan nga ikeddeng ti Dios ti tiempo ti ipapataytayo no kasano a dina piliten ti mannalon nga agmula iti partikular a tiempo. Imbes ketdi, masapul a liklikantayo ti okupado unay kadagiti gagangay nga ar-aramid nga uray la malipatantayon ti Namarsua kadatayo.​—Eclesiastes 3:​11; 12:​1, 13.

Mabalin ti agbiag iti napaut

Nupay ditay masigurado ti masanguanan, masansan a napapaut ti biagtayo no nainsiriban dagiti desisiontayo. Kuna ti Biblia: “Ti linteg daydiay masirib ubbog ti biag, tapno ti maysa iyadayo kadagiti silo ni patay.” (Proverbio 13:14) Kasta met, imbaga ni Moises kadagiti Israelita a ‘napaut ti biagda’ no tungpalenda dagiti bilin ti Dios. (Deuteronomio 6:2, Naimbag a Damag Biblia) Iti kasupadina, umababa ti biagtayo no agaramidtayo iti dakes.​—Eclesiastes 7:​17.

Kasanotay man kaannad, ditay latta maliklikan ti ipapatay. (Roma 5:​12) Ngem agbaliwto daytoy a kasasaad, ta ikarkari ti Biblia nga “awanton ni patay.”​—Apocalipsis 21:4.