Nasken Kadi a Miembroka ti Maysa nga Organisado a Relihion?

Sungbat ti Biblia

Wen, ta kayat ti Dios nga agtataripnong dagiti tattao tapno agdaydayaw. Kuna ti Biblia: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa.”—Hebreo 10:24, 25.

Imparipirip idi ni Jesus nga agbalinto nga organisado a grupo dagiti pasurotna idi kinunana: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Kas kangrunaan a panangipakita iti daytoy nga ayat, makikadua dagiti adalan ni Kristo kadagiti kapammatianda. Maorganisarda nga agbalin a kongregasion a regular nga agtataripnong nga agdaydayaw. (1 Corinto 16:19) Buklenda ti sangalubongan a panagkakabsat no mapagtitiponda amin.—1 Pedro 2:​17.

Saan nga umdas ti basta panagbalin a miembro ti maysa a relihion

Nupay kuna ti Biblia a rumbeng nga agtataripnong dagiti tattao tapno agdaydayaw iti Dios, dina kayat a sawen a no miembroka ti maysa a relihion, maay-ayomon ti Dios. Tapno anamongan ti Dios, masapul nga adda epekto ti relihion iti inaldaw a panagbiagtayo. Kas pagarigan kuna ti Biblia: “Ti porma ti panagdaydayaw [relihion] a nadalus ken di natulawan iti panangmatmat ti Dios ken Amatayo isu daytoy: panangtaripato kadagiti ulila ken iti balo a babbai kadagiti rigatda, ken panamagtalinaed ti maysa iti bagina nga awanan mulit manipud iti lubong.”—Santiago 1:​27.