Ti Sonar ti Dolphin

Mangpatpataud dagiti dolphin iti agduduma nga uni ken sagawisiw sada denggen dagiti aweng tapno maammuanda no ania ti adda iti aglawlawda. Kayat a tuladen dagiti sientista ti natural a sonar ti bottlenose dolphin (Tursiops truncatus) iti panagaramidda kadagiti alikamen a mangdetek kadagiti adda iti uneg ti danum babaen ti uni (underwater acoustic system). Usarenda dagita a mangsolbar kadagiti problema a saan a kabaelan a solbaren ti agdama a teknolohia.

Panunotem: Babaen ti sonar ti dolphin, mabirokanna dagiti ikan nga aglemlemmeng iti lansad ti baybay ken mapagdumana ti ikan ken bato. Sigun ken Keith Brown, maysa nga associate professor iti Heriot-Watt University, Edinburgh, Scotland, “mailasin [ti dolphin] no ti nagyan ti pagkargaan ket danum-tamnay, danum ti baybay, syrup, wenno langis uray no sangapulo a metro [ti kaadayo dayta].” Kayat dagiti sientista ti makaimbento kadagiti alikamen a makaaramid iti kasta.

Inadal ken pinadas a tuladen dagiti researcher ti panaguni ken panagdengngeg dagiti dolphin. Isu a nakaaramidda iti alikamen a naglaon iti komplikado nga electronics a naikarga iti tubo a maysa a metro ti kaatiddogna. Nadisenio daytoy a mangsukimat iti lansad ti baybay, agbirok kadagiti nagaburan a kable wenno tubo, ken mangadal kadagita uray saanna a masagid. Maikabit dayta iti lugan a robot a mausar iti uneg ti danum a kasla bomba (torpedo) ti langana. Pampanunoten dagiti nagaramid a mausarto dayta iti industria ti langis ken gas. Manamnama a babaen iti dayta nga alikamen, ad-adu ken nasaysayaatton nga impormasion ti maala dagiti agdama a sonar device. Iti kasta, matulongan dagiti teknisian a mangammo iti kasayaatan a lokasion a pangikabilanda kadagiti alikamen iti uneg ti danum, mabirokanda dagiti perdi kadagita​—kas iti babassit a birri kadagiti adigi ti patakder a pagala iti langis​—ken uray dagiti nakasullat kadagiti tubo.

Ania ti makunam? Resulta kadi ti ebolusion ti sonar ti bottlenose dolphin? Wenno adda nangdisenio iti dayta?