Situtulok nga Agsaksakripisioda—Iti Guyana

“Diak mailadawan ti ragsakko iti panagserbik iti lugar a dakkel ti panagkasapulanna!” Kasta ti rikna ni Joshua a taga-Amerika a nagboluntario idi idiay Guyana. Kasta met laeng ti rikna ti adu a Saksi a nagboluntario iti daytoy nabunga a pagilian iti South America.a Ania dagiti masursurotayo kadagitoy a kakabsat nga agserserbi iti lugar a dakkel ti panagkasapulanna? Kasano a makatulong kadakayo dagitoy a leksion nga agsagana no planoyo ti agserbi iti sabali a lugar?

Ania ti Nangtignay Kadakuada?

Sakbay nga immakar iti Guyana ti maysa a brother a taga-Amerika a ni Linel, nakiraman a nangasaba iti manmano a maasak a teritoria iti pagilianda. Kunana: “Karamanak iti 20 a naibaon iti nasulinek a paset ti West Virginia. Nagbalbaliw ti biagko gapu iti dayta a dua a lawas a panangasaba ken ti pannakilangenko kadagiti kakabsat! Ad-adda a determinadoak itan a mangaramid iti amin a kabaelak nga agserbi ken Jehova.”

Pinampanunot a naimbag ti agassawa a da Garth ken Erica ti agserbi iti sabali a pagilian, ket napilida ti Guyana. Apay? Kuna ni Erica: “Adda am-ammomi ken lakayko nga agassawa nga immakar sadiay. Nakaregregta ken magusgustuanda ti ar-aramidenda isu a natignaykami met nga umakar sadiay.” Tallo a tawen a siraragsak a nagserbi da Garth ken Erica iti imbilangda a “nakapatpateg nga asaynment.” Kuna ni Garth: “Nagserbikami iti sabali a pagilian ket nakitami a nagsayaat dayta.” Idi agangay, nageskuelada nga agassawa iti Gilead School ket agserserbida ita idiay Bolivia.

Kasanoda a Nagsagana?

Parparegtaennatayo dagiti prinsipio ti Biblia a mangpasimple iti biagtayo. (Hebreo 13:5) Sursuruannatayo ti Biblia nga agpanunot a naimbag no agaramidtayo kadagiti napapateg a desision. (Lucas 14:26-33) Karaman kadagita a desision ti iyaakar iti sabali a lugar! Insurat ni Garth: “Sakbay nga immakarkami ken Erica idiay Guyana, pinasimplemi ti biagmi. Inlakomi ti negosiomi, ti balaymi, ken ti amin a bambanag nga adda iti balaymi a saanmi a maus-usar. Inaramidmi dayta iti sumagmamano a tawen. Kabayatanna, sipapanunotkami latta iti kalatmi nga agserbi idiay Guyana ket tinawen a napankami sadiay.”

Napateg met nga ikabilangan ti pagsapulan. Mabalin nga agtrabaho dagiti boluntario iti sabali a pagilian no ipalubos ti linteg. Dadduma ti mangitultuloy iti dati a trabahoda online. Dadduma met ti agawid iti sumagmamano a tiempo iti pagilianda tapno agtrabahoda. Tinawen nga agsubli idiay Ireland da Paul ken Sinead tapno agtrabaho. Gapu iti dayta, nakapagserbida idiay Guyana iti 18 a nabunga a tawtawen, agraman ti pito a tawen kalpasan a naipasngay ti anakda.

Kuna ti Salmo 37:5: “Agpaidalanka ken Jehova; agpannurayka kenkuana, ket tulongannakanto.” Kanayon nga ikarkararag da Christopher ken Lorissa a taga-Amerika ti kalatda nga agserbi iti sabali a lugar. Kasta met, iramramanda iti panagdaydayaw ti pamiliada dagiti banag a masapul nga aramidenda tapno naballigi ti iyaakarda, nga ilistada dagiti bentaha ken disbentahana. Gapu ta kayatda ti umakar iti lugar a saanda a masapul a sursuruen ti sabali a lengguahe, napanda iti Guyana nga Ingles ti opisial a lengguahe.

Kalpasanna, inyaplikarda ti prinsipio iti Proverbio 15:22: “Mapaay dagiti plano no awan ti panagsasarita, ngem adda maitungpal no adu ti mamalbalakad.” Nagsuratda iti sangay a mangimatmaton iti trabaho idiay Guyana,b ket imbagada nga ipalubos ti kasasaadda ti agboluntario. Dinamagda met ti maipapan iti medikal a serbisio, klima, ken dagiti kaugalian sadiay. Sinungbatan ti sangay dagiti saludsodda ken tinulonganda ida a mangkontak iti bagi dagiti panglakayen iti lugar a pagakaranda.

Ni Linel, a nadakamat itay, ket agserserbi itan kas manangaywan iti sirkito iti Guyana. Sakbay nga immakar sadiay, inyaplikarna met ti prinsipio iti Proverbio 15:22. Kunana: “Saanak la a nagurnong iti kuarta para iti ipapanko sadiay, nakisaritaak pay kadagiti nakapadas a nagserbi iti sabali a lugar. Imbagak met dayta iti pamiliak, kadagiti panglakayen iti kongregasionmi, ken iti manangaywan iti sirkitomi. Binasak met dagiti publikasion maipapan kadagiti nagserbi iti lugar a dakdakkel ti panagkasapulanna.”

Adu a kakabsat a mayat nga agserbi iti sabali a pagilian ti agpasiar nga umuna iti lugar a kayatda a pagakaran. Kuna ti agassawa a da Joseph ken Christina: “Idi damomi ti mapan iti Guyana, nagyankami sadiay iti tallo a bulan. Umdas daytan tapno makitami ti kasasaad sadiay. Kalpasanna, nagawidkami ket inasikasomi dagiti bambanag sa immakarkamin.”

Kasanoda a Nakibagay?

Tapno sibaballigi a makapagserbi iti Dios dagiti immakar iti lugar a dakdakkel ti panagkasapulanna, masapul a managsakripisioda ken sidadaanda a makibagay iti kasasaad ken kaugalian iti dayta a lugar. Kas pagarigan, dagiti naggapu iti nalamiis a lugar nga umakar iti napudot a lugar, masansan a makakitada iti nagduduma nga insekto iti pagtaenganda. Kuna ni Joshua, a nadakamat itay: “Saanak a naruam a makakita iti nagadu nga insekto. Ket kasla nagdadakkelda idiay Guyana. Ngem nairuamak met laeng idi agangay. Nakitak met a manmano ti insekto no nadalus ti balaymo. Masapul a mainnawan dagiti lunglongan, maibelleng dagiti basura, ken kanayon a madalusan ti balay.”

No umakarka iti sabali a lugar, masapul met a sursuruem a kanen ken isagana dagiti taraonda. Kuna ni Joshua: “Siak ken ti brother a partnerko ket nagpatulong kadagiti kakabsat sadiay no kasano a lutuen dagiti kankanenda. Idi nasursuromin no kasano ti agluto, agawiskami kadagiti kakabsat iti kongregasion. Nagsayaat dayta a gundaway tapno maam-ammomi dagiti kakabsat ken magayyemmi ida.”

Kuna da Paul ken Kathleen maipapan iti kaugalian iti immakaranda: “Masapul a sursuruenmi no ania ti ibilangda a nadayaw a kababalin ken ti estilo ti panagbadbado iti napudot a lugar. Baro kadakami dayta, isu a masapul a napakumbaba ken makibagaykami, a saanmi nga ikompromiso dagiti prinsipio ti Biblia. Idi inaramidmi dagita, simmingedkami iti kongregasion ken nagsayaat ti resultana iti ministeriomi.”

Kasano a Nagunggonaanda?

Narikna met da Joseph ken Christina ti kas iti narikna ti adu idi imbagada: “Ad-adu nga amang ti bendision ngem kadagiti karit ken pakarigatan. Ti panangaramid iti baro ken saanmi a nakairuaman ti nangbalbaliw kadagiti prioridadmi. Saanmi unayen nga ibilang a napateg dagiti dati nga ibilangmi a napateg. Dagiti kapadasanmi ti ad-adda a nangtignay kadakami nga agtultuloy a mangaramid iti kabaelanmi para ken Jehova. Talaga a kontento ken makapnek ti biagmi.”

Kuna ni Erica, a nadakamat itay: “Ti panagserbimi nga agassawa iti lugar a dakkel ti panagkasapulanna ket nakatulong tapno ad-adda nga agtalekkami ken Jehova. Nariknami ti tulongna iti pamay-an a saanmi pay a napadasan idi. Dagita a baro a kapadasan ti ad-adda a nangpasinged kadakami nga agassawa.”