Apay a Saan a Selselebraran Dagiti Saksi ni Jehova ti Dadduma nga Okasion?

• Kasano a maikeddeng dagiti Saksi ni Jehova no mabalin a selebraran ti maysa nga okasion?

• Gapu ta saan a selselebraran dagiti Saksi ni Jehova ti dadduma nga okasion, kayatna kadi a sawen a saandan nga ay-ayaten ti pamiliada?

• Parparitan kadi dagiti Saksi ni Jehova ti dadduma a mangselebrar iti dadduma nga okasion?

Kasano a maikeddeng dagiti Saksi ni Jehova no mabalin a selebraran ti maysa nga okasion?

Sakbay nga agdesision dagiti Saksi ni Jehova no selebraranda ti maysa nga okasion, sukimatenda nga umuna ti Biblia. Ti dadduma nga okasion ken selebrasion ket nalawag a maikontra kadagiti prinsipio ti Biblia. No kasta, saan a makiraman dagiti Saksi ni Jehova. No maipapan kadagiti dadduma nga okasion, agdesision ti tunggal Saksi, nga ‘ikagkagumaanna a pagtalinaeden a nadalus ti konsiensiana iti sanguanan ti Dios ken kadagiti tattao.’—Aramid 24:16.

Dagiti sumaganad ket dadduma laeng kadagiti saludsod a pampanunoten dagiti Saksi ni Jehova sakbay nga agdesisionda no selebraranda ti maysa nga okasion.a

• Naibatay kadi ti okasion iti saan a nainkasuratan a sursuro?

  Prinsipio ti Biblia: “‘Rummuarkayo iti tengngada, ket suminakayo ken isardengyo a sagiden ti narugit a banag,’ kuna ni Jehova.”​—2 Corinto 6:15-17.

  Tapno maisina dagiti Saksi ni Jehova ti bagbagida kadagiti sursuro a narugit iti naespirituan wenno maikontra iti ibagbaga ti Biblia, saanda a selselebraran dagiti okasion a nalaokan kadagiti sumaganad.

  Dagiti okasion a naibatay iti panamati wenno panagdaydayaw kadagiti didiosen. Imbaga ni Jesus: “Ni laeng Jehova a Diosmo ti masapul a pagdayawam, ket isu laeng ti masapul a pangipaayam iti sagrado a panagserbi.” (Mateo 4:10) Gapu ta sursuroten dagiti Saksi ni Jehova dayta a balakad, saanda a selselebraran ti Krismas, Easter, wenno May Day ta naibatay dagitoy iti panagdayaw kadagiti didiosen imbes a ken Jehova. Kanayonanna, saanda a selselebraran dagiti okasion a kas iti sumaganad.

  • Kwanzaa. Ti nagan a Kwanzaa ket “naggapu iti Swahili a sasao a matunda ya kwanza, a kayatna a sawen ‘umuna a bungbunga’ ken ipakita [daytoy] a naibatay ti okasion iti selebrasion ti umuna a bungbunga a nairekord iti pakasaritaan ti Africa.” (Encyclopedia of Black Studies) Uray no ibilang ti dadduma a saan a narelihiosuan nga okasion ti Kwanzaa, iyarig dayta ti Encyclopedia of African Religion iti maysa a piesta ti Africa a dagiti umuna a bungbunga ket “maidaton kadagiti didiosen ken inapo kas panagyaman kadakuada,” ken innayonna: “Kapada dayta ti panagyaman ken panangapresiar kadagiti bendision iti biag nga inted dagiti inapo a nangirugrugi iti Kwanzaa nga okasion dagiti African American.”

    

  • Mid-Autumn Festival. Daytoy ket “piesta a mangpadayaw iti didiosen ti bulan.” (Holidays, Festivals, and Celebrations of the World Dictionary) Addaan daytoy iti ritual a “pakairamanan dagiti babbai iti balay nga agrukruknoy iti didiosen. Pagaammo met daytoy a kowtow iti Chinese.”​—Religions of the World​—A Comprehensive Encyclopedia of Beliefs and Practices.

  • Nauruz (Nowruz). “Nagtaud iti Zoroastrianism ti dadduma kadagiti nagkauna a nagtaudan daytoy a piesta ken daytoy ti maysa kadagiti kasagraduan nga aldaw iti kalendario dagiti nagkauna a Zoroastrian. . . . Kangrunaanna, ti Espiritu ti Tengnga ti Aldaw, a pagaammo kas [Rapithwin], a maibilang nga inlemmeng ti Espiritu ti Lam-ek bayat ti nalamiis a bulbulan, ket maabrasa manen babaen ti selebrasion iti tengnga ti aldaw iti aldaw ti Nowruz sigun iti tradision dagiti Zoroastrian.”​—United Nations Educational, Scientific and Cultural Organization.

  • Shab-e Yalda. Daytoy nga okasion ti winter solstice ket “sigurado a nainaig iti panagdaydayaw ken Mithra,” ti dios ti lawag, sigun iti libro a Sufism in the Secret History of Persia. Naibaga met a daytoy nga okasion ket mabalin nga adda pakainaiganna iti panagdaydayaw kadagiti Romano ken Griego a didiosen ti init.b

  • Thanksgiving. Kas iti Kwanzaa, naibatay daytoy nga okasion iti nagkauna a selebrasion iti panagaapit a mangpadayaw iti nagduduma a didiosen. Iti panaglabas ti tawen, “dagitoy a nagkauna a tradision ket selselebraran metten dagiti Kristiano a relihion.”—A Great and Godly Adventure—The Pilgrims and the Myth of the First Thanksgiving.

  Dagiti okasion a naibatay iti patpatien wenno iti panamati iti suerte. Ibaga ti Biblia a dagidiay “nangisagana iti lamisaan para iti dios ti Suerte” ket ‘karaman kadagidiay nangtallikud ken Jehova.’ (Isaias 65:11) Gapuna, saan a selselebraran dagiti Saksi ni Jehova dagiti sumaganad nga okasion:

  • Ivan Kupala. “Sigun iti pagaammo a pammati, bayat ti [Ivan Kupala], mangiruar ti aglawlaw kadagiti puersa ti mahika a mabalin a magun-odan babaen ti kinatured ken suerte,” kuna ti libro a The A to Z of Belarus. Kinapudnona, daytoy ket maysa a pagano nga okasion a mangselselebrar iti summer solstice. Ngem kuna ti Encyclopedia of Contemporary Russian Culture, “naitipon dayta iti okasion ti Simbaan [iti “aldaw ti santo” a ni Juan Bautista] kalpasan nga inawatda ti Kristianidad.”

  • Lunar New Year (Chinese New Year wenno Korean New Year). “Iti daytoy a tiempo iti tawen, ti kangrunaan a pakaseknan ti pamilia, gagayyem, ken kakabagian ket ti pananggun-odda iti suerte, panagdaydayaw kadagiti didiosen ken espiritu, ken panagdawat iti suerte iti umay a tawen.” (Mooncakes and Hungry Ghosts—Festivals of China) Iti isu met laeng a pamay-an, ti Korean New Year ket “buklen ti panagdaydayaw iti inapo, ritual a mangpapanaw kadagiti dakes nga espiritu ken tapno magun-odan ti suerte para iti Baro a Tawen, ken panagpadles tapno maammuan no ania ti iyeg ti Baro a Tawen.”—Encyclopedia of New Year’s Holidays Worldwide.

    

  Dagiti okasion a naibatay iti sursuro nga immortal ti kararua. Nalawag nga ibagbaga ti Biblia a matay ti kararua. (Ezekiel 18:4) Gapuna, saan a selselebraran dagiti Saksi ni Jehova dagiti okasion a nailista iti baba a mangipakpakita iti pammati nga immortal ti kararua:

  • All Souls’ Day (Aldaw ti Natay). Daytoy ti aldaw a “pananglaglagip kadagiti natay,” sigun iti New Catholic Encyclopedia. “Idi agarup 500 C.E. agingga iti agarup 1500 C.E., nasaknap ti panamati a dagiti kararua iti purgatorio ket agparang iti daytoy nga aldaw—kas umasul nga al-alia (will-o’-the-wisps), mangkukulam, karag, ken dadduma pay—kadagiti tattao a nangtrato kadakuada iti saan a nasayaat idi sibibiagda pay.”

  • Qingming Festival (Ch’ing Ming) ken Hungry Ghost Festival. Maar-aramid dagitoy a piesta kas pammadayaw kadagiti inapo. Bayat ti Ch’ing Ming, kuna ti libro a Celebrating Life Customs Around the World—From Baby Showers to Funerals, “mapuoran dagiti makan, inumen, ken papel a kuarta tapno masigurado a saan a mabisinan wenno mawaw wenno saan a maibusan iti kuarta dagiti natay.” Ibaga pay ti libro a “bayat ti Bulan ti Hungry Ghost, kangrunaan iti rabii a kabus ti bulan, [patien dagiti agselselebrar] nga adda dakkel a koneksion dagiti natay iti sibibiag no iyarig iti dadduma a rabii, isu a napateg ti agannad tapno saan a mapagura dagiti natay ken tapno mapadayawan dagiti inapo.”

  • Chuseok. Kuna ti The Korean Tradition of Religion, Society, and Ethics a karaman iti daytoy a piesta ti panagatang iti makan ken arak iti kararua ti natay.” Ipakita ti panagatang ti “pammati nga agtultuloy nga agbiag ti kararua kalpasan a matay ti bagi.”

  Dagiti okasion a naibatay iti okulto. Ibaga ti Biblia: Asinoman a “mammuyon, salamangkero, agbirbirok iti partaan, mangkukulam, agor-orasion, makiuman iti espiritista wenno mammadles, wenno makisarita iti natay . . . kagura ni Jehova.” (Deuteronomio 18:10-12) Tapno mayadayo dagiti Saksi ni Jehova iti aniaman nga okultismo​—agraman ti astrolohia (maysa a porma ti panagpadles)​—saanda a selselebraran ti Halloween wenno dagiti sumaganad nga okasion:

  • Sinhala ken Tamil New Year. “Ti nagkauna a ritual iti daytoy nga okasion . . . ramanenna ti panangaramid kadagiti aktibidad kadagiti tiempo nga inkeddeng dagiti astrologo a mangipaay iti suerte.”​—Encyclopedia of Sri Lanka.

  • Songkran. Ti nagan daytoy a piesta ti Asia ket “naggapu iti Sanskrit a sao . . . a kayatna a sawen ‘panagkuti’ wenno ‘panagbalbaliw,’ ken [ti piesta] ipasimudaagna ti panangrugi ti panagkuti ti init iti konstelasion ti zodiac nga Aries.”​—Food, Feasts, and Faith​—An Encyclopedia of Food Culture in World Religions.

  Dagiti kaugalian a manaig iti panagdaydayaw iti sidong ti Mosaiko a Linteg a nagpatingga gapu iti sakripisio ni Jesus. Ibaga ti Biblia: “Ni Kristo ti pagpatinggaan ti Linteg.” (Roma 10:4) Mabembenepisiaran latta dagiti Kristiano kadagiti prinsipio iti Mosaiko a Linteg a naited iti nagkauna nga Israel. Ngem saanda a selselebraran dagiti piesta, nangruna dagiti piesta a naiturong iti Mesias, a patien dagiti Kristiano nga immayen. Kuna ti Biblia: “Dagita a bambanag ket anniniwan ti bambanag nga umay ngem ti agpaypayso ket ti Kristo.” (Colosas 2:17) Gapu ta naitungpalen dagitoy a piesta ti panggepda ken nairaman kadagita ti sumagmamano a kostumbre a saan a maitunos iti Biblia, dagiti piesta a nailista iti baba ket karaman kadagiti okasion a saan a selselebraran dagiti Saksi ni Jehova:

  • Hanukkah. Daytoy a piesta ket ti pananglaglagip iti pannakaidedikar manen ti templo dagiti Judio iti Jerusalem. Ngem ibaga ti Biblia a nagbalin ni Jesus a Nangato a Padi iti “napatpateg ken mas perpekto a tolda a saan nga inaramid dagiti ima, kayatna a sawen, saan a ditoy daga.” (Hebreo 9:11) Para kadagiti Kristiano, dayta a naespirituan a templo ti nangsukat iti pisikal a templo iti Jerusalem.

  • Rosh Hashanah. Daytoy ti umuna nga aldaw iti tawen dagiti Judio. Idi un-unana, itampok daytoy a piesta dagiti napapateg a daton para iti Dios. (Numeros 29:1-6) Ngem ni Jesu-Kristo, kas Mesias, ‘pinasardengna ti panagdaton ken panangted iti sagut,’ isu a saan nga anamongan dagita ti Dios.​—Daniel 9:26, 27.

• Ti kadi okasion iparparegtana ti interfaith?

  Prinsipio ti Biblia: “Ania ti pagpadaan ti manamati ken ti di manamati? Ken ania ti pakainaigan ti templo ti Dios kadagiti idolo?”​—2 Corinto 6:15-17.

  Bayat nga ikagkagumaan dagiti Saksi ni Jehova ti makilangen a sitatalna kadagiti kaarrubada ken raemen ti kalintegan ti tunggal maysa a mangpili iti patienna, likliklikanda dagiti selebrasion a mangiparparegta iti interfaith iti sumaganad a pamay-an.

  Dagiti selebrasion para iti maysa a narelihiosuan a persona wenno pasken a mangiparegta iti nagkaykaysa a panagdaydayaw dagiti tattao iti nagduduma a relihion. Idi indalan ti Dios ti nagkauna nga ilina iti baro a daga nga addaan kadagiti agnanaed a sabali ti relihionna, imbagana: “Dikay makitulag kadakuada wenno kadagiti diosda. . . . No agserbikayo kadagiti diosda, sigurado nga agbalin a silo dayta kadakayo.” (Exodo 23:32, 33) Gapuna, saan a selselebraran dagiti Saksi ni Jehova dagiti okasion a kas iti sumaganad.

  • Loy Krathong. Iti daytoy a piesta dagiti Thai, “mangaramid dagiti tattao kadagiti malukong a naaramid iti bulong sa ikkanda iti kandela wenno insienso, ken iyanudda dagita a malukong iti danum. Ibagbagada nga awiten ken iyadayo dagita a malukong ti malas. Kinapudnona, bayat dayta a piesta, malaglagip ti nasantuan a tugot ti dapan ti Buddha.”​—Encyclopedia of Buddhism.

  • National Repentance Day. Dagiti makipartisipar iti daytoy nga okasion ket “umanamong kadagiti kangrunaan a patpatien dagiti Kristiano,” sigun iti maysa nga opisial ti gobierno a nakotar iti The National, maysa a diario iti Papua New Guinea. Imbagana nga iti dayta nga aldaw “maitandudo dagiti Nakristianuan a prinsipio iti pagilian.”

  • Vesak. “Daytoy ti kasasantuan kadagiti nasantuan nga aldaw dagiti Budista, a mangselebrar iti pannakayanak ti Buddha, pannakalawlawag, ken ipapatay wenno pananggun-od iti Nirvana.”​—Holidays, Festivals, and Celebrations of the World Dictionary.

    

  Dagiti kaugalian a naibatay iti narelihiosuan a tradision a saan nga isursuro ti Biblia. Imbaga ni Jesus kadagiti lider ti relihion: “Pagbalbalinenyo nga awan serserbi ti sao ti Dios gapu iti tradisionyo.” Imbagana pay nga awan serserbi ti panagdaydayawda “ta dagiti isursuroda ket bilin laeng ti tao.” (Mateo 15:6, 9) Gapu ta ipappapuso dagiti Saksi ni Jehova daytoy a balakad, adu a narelihiosuan nga okasion ti saanda a selselebraran.

  • Epiphany (Three Kings’ Day, Timkat, wenno Los Reyes Magos). Laglagipen dagiti mangselselebrar iti daytoy ti ibibisita dagiti astrologo ken Jesus wenno ti panagbautisar ni Jesus. Iti daytoy a piesta, “inlaokda iti Kristianidad dagiti pagano a piesta iti primavera, a mangpadayaw kadagiti dios ti danum, karayan, ken waig.” (The Christmas Encyclopedia) Ti nainaig a piesta a Timkat ket “nauneg ti pannakairamutna iti tradision.”​—Encyclopedia of Society and Culture in the Ancient World.

  • Feast of the Assumption of the Virgin Mary. Maselebraran iti daytoy a piesta ti pammati a nagpalangit ti ina ni Jesus nga addaan iti pisikal a bagi. “Daytoy a pammati ket saan nga ammo dagiti nagkauna a Kristiano ken awan ti nakaibatayanna iti Kasuratan,” kuna ti Religion and Society​—Encyclopedia of Fundamentalism.

  • Piesta ti Immaculada Concepcion. “Saan nga isursuro ti Kasuratan ti maipapan iti Immaculada Concepcion [ni Maria] . . . [Daytoy] ket pannursuro ti Simbaan.”​—New Catholic Encyclopedia.

  • Kuaresma. Daytoy a tiempo ti panagpenitensia ken panagayunar ket nabuangay idi “maikapat a siglo,” nasurok a 200 a tawen kalpasan a nakompleto ti Biblia. No maipapan iti umuna nga aldaw ti Kuaresma, kuna ti ensiklopedia: “Ti kaugalian a panangawat iti dapo no Mierkoles Gulingguling (Ash Wednesday) ket maar-aramiden iti intero a lubong kalpasan ti Synod of Benevento idi 1091.”

  • Meskel (wenno, Maskal). Daytoy a piesta dagiti Ethiopian selebraranna ti “pannakasarak ti Pudno a Krus (ti krus a nakailansaan ni Kristo), babaen ti panagtemtem (bonfire) ken panagsala iti aglikmutna,” kuna ti Encyclopedia of Society and Culture in the Medieval World; innayonda ti nakaparentesis. Ngem saan nga us-usaren dagiti Saksi ni Jehova ti krus iti panagdaydayawda.

• Ti kadi okasion idaydayawna ti maysa a tao, organisasion, wenno simbolo ti nasion?

  Prinsipio ti Biblia: “Daytoy ti kuna ni Jehova: ‘Mailunod ti tao nga agtalek kadagiti tattao laeng, nga agpannuray iti pannakabalin ti tao, ken mangyadayo iti pusona ken Jehova.’”​—Jeremias 17:5.

  Uray no ipakita dagiti Saksi ni Jehova ti panagyamanda kadagiti padada a tao ken ikararaganda pay ida, saanda a makiramraman kadagiti okasion wenno selebrasion a kas iti sumaganad:

  Dagiti okasion a mangpadayaw iti agturay wenno sabali pay a napateg a tao. “Para iti pagimbaganyo, dikayon agtalek iti tao, nga anges laeng ti adda iti agongna. Ania koma ti magunggonayo kenkuana?” (Isaias 2:22) Gapuna, saan a makiramraman dagiti Saksi ni Jehova kadagiti okasion a kas iti pannakayanak dagiti agtuturay.

  Panangselebrar iti bandera ti nasion. Saan a selselebraran dagiti Saksi ni Jehova ti Flag Day. Apay? Ibaga ngamin ti Biblia: “Adaywanyo dagiti idolo.” (1 Juan 5:21) Saan nga ibilang ti dadduma nga idolo ti bandera​—maysa a banag a pagdayawan​—ngem insurat ti historiador a ni Carlton J. H. Hayes: “Ti bandera ti kangrunaan a simbolo ti pammati iti nasionalismo ken ti banag a nakaisentruan ti panagdayaw.”

  Dagiti okasion wenno selebrasion a mangpadayaw iti santo. Ania ti napasamak idi nagruknoy ken apostol Pedro ti maysa a tao a managbuteng iti Dios? Ibaga ti Biblia: “Pinatakder ni Pedro, ket kinunana: ‘Tumakderka; maysaak laeng a tao.’” (Aramid 10:25, 26) Gapu ta saan nga inawat ni Pedro wenno ti dadduma nga apostol ti pammadayaw wenno pannakaitan-ok, saan a makiramraman dagiti Saksi ni Jehova kadagiti okasion a mangpadayaw kadagiti naibilang kas santo, ken kadagiti selebrasion a kas iti sumaganad:

  • Todos los Santos. “Piesta a mangpadayaw iti amin a santo . . . Saan nga ammo no sadino ti nagtaudan daytoy a piesta.”​—New Catholic Encyclopedia.

  • Fiesta of Our Lady of Guadalupe. Padayawan daytoy a piesta ti “patron a santa ti Mexico,” a patien ti dadduma nga isu ni Maria, ti ina ni Jesus. Imbagada a milagro a nagparang iti maysa a pobre idi 1531.​—The Greenwood Encyclopedia of Latino Literature.

    

  • Name Day. “Ti name day ket piesta para iti santo a nakaipanaganan ti ubing bayat ti pannakabuniagna wenno iti pannakimiembrona,” kuna ti libro a Celebrating Life Customs Around the World​—From Baby Showers to Funerals. Innayonna pay nga adda ar-aramiden dagiti tattao a mainaig iti relihion.

  Panangselebrar kadagiti kampania iti politika wenno iti komunidad. Ibaga ti Biblia: “Nasaysayaat ti agkamang ken Jehova ngem ti agtalek kadagiti tattao.” (Salmo 118:8, 9) Tapno saan nga agparang nga agtaltalek dagiti Saksi ni Jehova kadagiti tattao a mangsolbar kadagiti problema ti lubong imbes nga iti Dios, saanda a makiramraman iti Youth Day wenno Women’s Day a mangsuporta iti kampania ti politika wenno iti komunidad. Iti isu met laeng a rason, saanda a makiramraman iti Emancipation Day (selebrasion iti pannakawayawaya dagiti adipen) wenno kadagiti umasping a selebrasion. Imbes ketdi, ur-urayenda ti Pagarian ti Dios a mangsolbar kadagiti problema iti panangidumduma ken kinaawan hustisia.​—Roma 2:11; 8:21.

• Ti kadi okasion pagbalinenna a napatpateg ti maysa a nasion wenno tribu ngem iti dadduma?

  Prinsipio ti Biblia: “Saan a mangidumduma ti Dios, no di ket awatenna ti tao iti tunggal nasion nga agbuteng kenkuana ken agaramid iti umiso.”​—Aramid 10:34, 35.

  Uray no adu kadagiti Saksi ni Jehova ti mangay-ayat iti lugar a nakayanakanda, likliklikanda dagiti selebrasion a mamagbalin a napatpateg ti maysa a nasion wenno tribu iti pamay-an a nadeskribir iti sumaganad.

  Okasion a mangpadayaw kadagiti soldado. Imbes nga ikampaniana ti gubat, imbaga ni Jesus kadagiti pasurotna: “Itultuloyyo nga ayaten dagiti kabusoryo ken ikararagan dagidiay mangidaddadanes kadakayo.” (Mateo 5:44) Saan ngarud a selselebraran dagiti Saksi ni Jehova dagiti selebrasion a mangpadayaw kadagiti soldado, karaman dagiti okasion a kas iti sumaganad:

  • Anzac Day. “Ti kayat a sawen ti Anzac ket Australian and New Zealand Army Corps,” ken “ti Anzac Day ket in-inut a nagbalin nga aldaw ti pananglaglagip kadagiti napapatay iti gubat.”​—Historical Dictionary of Australia.

  • Veterans Day (Remembrance Day, Remembrance Sunday, wenno Memorial Day). Dagitoy nga okasion padayawanna “dagiti beterano a soldado ken dagidiay napapatay kadagiti gubat a nakiramanan ti pagilian.”—Encyclopædia Britannica.

  Panangselebrar iti pakasaritaan wenno pannakawayawaya ti maysa a nasion. No maipapan kadagiti pasurotna, imbaga ni Jesus: “Saanda a paset ti lubong, a kas kaniak a saan a paset ti lubong.” (Juan 17:16) Uray no maragsakanda a mangammo iti pakasaritaan ti nasion, saan a makiramraman dagiti Saksi ni Jehova kadagiti okasion a kas iti sumaganad:

  • Australia Day. Sigun iti Worldmark Encyclopedia of Cultures and Daily Life, laglagipen daytoy nga okasion ti “aldaw idi 1788 idi a dagiti soldado ti England inngatoda ti bandera ken indeklarada ti Australia a maysa a baro a kolonia.”

  • Guy Fawkes Day. Daytoy ket “aldaw a panangselebrar ken pananglaglagip ti nasion [iti] napaay a panggep ni Guy Fawkes ken ti dadduma a miembro ti Katoliko a mangpapatay ken ni King James I ken iti Parliamento [ti England] idi 1605.”​—A Dictionary of English Folklore.

  • Independence Day. Iti dadduma a lugar, daytoy ket “aldaw a nailatang para iti panangselebrar ti publiko iti anibersario a nainaig iti panangrugi ti pannakawayawaya ti pagilian.”​—Merriam-Webster’s Unabridged Dictionary.

• Ti kadi okasion ket maibilang a nalaokan iti kinagulo ken immoralidad?

  Prinsipio ti Biblia: “Ti tiempo a naglabas ket umanayen a panagaramidyo iti pagayatan dagiti tattao iti lubong, kas kadagiti nakaal-alas a kababalin, di makontrol nga immoral a tarigagay, panagbarbartek, nalabes a panagragragsak, nalabes a panaginum iti arak, ken makarimon nga idolatria.”​—1 Pedro 4:3.

  Maitunos iti dayta a prinsipio, likliklikan dagiti Saksi ni Jehova dagiti selebrasion a mangiparparegta iti panagbarbartek ken nalabes a panagragragsak. Tagtagiragsaken dagiti Saksi ni Jehova ti makilangen kadagiti gagayyemda, ken mabalinda met ti uminum iti kalkalainganna a kaadu ti arak, no kayatda. Ikagkagumaanda a suroten ti balakad ti Biblia: “Mangmangan wenno umin-inum wenno aniaman ti ar-aramidenyo, aramidenyo ti amin a banag a pakaidayawan ti Dios.”​—1 Corinto 10:31.

  Gapuna, saan a makiparpartisipar dagiti Saksi ni Jehova kadagiti karnabal wenno umasping a piesta a mangitantandudo iti narugit a kondukta a kondenaren ti Biblia. Karaman iti daytoy ti piesta dagiti Judio a Purim. Gapu iti Purim, nabayagen a malaglagip ti pannakaisalakan dagiti Judio iti maikalima a siglo B.C.E. ngem mabalin a “maibilang [itan] kas selebrasion dagiti Judio a kapada ti Mardi Gras wenno Carnival,” kuna ti libro nga Essential Judaism. Para iti adu a makiparpartisipar, “ramanen dayta ti panangisuot iti kostium (masansan nga agbado dagiti lallaki iti bado ti babai), nagulo a kababalin, panagbarbartek, ken panagariwawa.”

Gapu ta saan a selselebraran dagiti Saksi ni Jehova ti dadduma nga okasion, kayatna kadi a sawen a saandan nga ay-ayaten ti pamiliada?

Saan. Isursuro ti Biblia nga ayaten ken raemen dagiti tattao dagiti kapamiliada aniaman ti relihionda. (1 Pedro 3:1, 2, 7) Siempre, no saanen a makiraman ti maysa a Saksi ni Jehova iti dadduma a selebrasion, mabalin a malidayan, masaktan, wenno marikna pay ketdi ti dadduma a kabagianna a natraidorda. Gapuna, adu a Saksi ni Jehova ti agtignay a mangpatalged kadagiti kabagianda nga ay-ayatenda ida, sitataktika nga ilawlawagda dagiti rason ti desisionda, ken sarungkaranda dagiti kabagianda iti sabali nga okasion.

Parparitan kadi dagiti Saksi ni Jehova ti dadduma a mangselebrar iti dadduma nga okasion?

Saan. Mamatida a masapul nga agdesision ti tunggal maysa. (Josue 24:15) Dagiti Saksi ni Jehova ‘raraemenda amin a kita ti tattao,’ aniaman ti narelihiosuan a patpatienda.​—1 Pedro 2:17.