Ti Naandur nga Ukis ti Sua

Ti sua ket dakkel ken nasam-it a sitrus a bunga ti kayo. Uray matnag ti sua iti nasurok a 10 a metro (30 ft), saan a malulo. Apay?

Panunotem: Nadiskobre dagiti researcher a ti makin-uneg a puraw nga ukis ti sua ket kasla espongha a buklen dagiti nagkakamang a selula nga adda espasio iti nagbabaetanda. Lumawlawa dagitoy nga espasio, a napno iti angin wenno likido, bayat nga umas-asideg iti lasag ti sua. No matnag ti sua, agserbi ti likido kas pannakakutsonna isu a saan a mabtak. Imbes ketdi, masedsed ken sumikkil laeng ti ukisna.

Tinulad dagiti sientista ti disenio ti ukis ti sua iti panangaramidda iti naandur a metal foam. Mamatida a mabalinda nga usaren ti kasta met la a disenio iti panangaramidda kadagiti helmet, proteksion para kadagiti lugan, ken proteksion kadagiti space station kadagiti dumungpar a meteor.

Panagkunam? Ti kadi naandur nga ukis ti sua ket resulta ti ebolusion? Wenno adda nangdisenio iti dayta?