Ti Uni ti Japanese Tree Frog

Pagaammo dagiti lallaki a Japanese tree frog gapu iti maulit-ulit ken kasla saan a naurnos a panagunida. Ngem mailasin ti uni ti tunggal lalaki uray aduda a tumagari. Nadiskobre dagiti agad-adal iti tukak idiay Japan a mailasin ti uni dagiti lallaki a tukak iti maysa a lugar gapu iti naurnos a panagunida nga agayab kadagiti babbai a tukak.

Panunotem: Aguni dagiti lallaki a Japanese tree frog tapno agpapansinda kadagiti babbai a tukak. Aggapu ti uni iti vocal cord-da ket pumigsa dayta no makadanon iti vocal sac, ti kasla napuyotan a lobo iti karabukobda.

Kasano a mailasin ti uni ti tunggal lalaki a tukak? Naammuan dagiti nangadal kadagiti tukak nga imbes nga agunida lattan no kaykayatda, dagiti agiinnassideg a Japanese tree frog ket agsisinnublat nga aguni. Nakaur-urnos ti panagunida isu a saanda nga aggigiddan ken nalawag a mailasin ti uni ti tunggal maysa kadakuada ken saanda a mabannog. Gapu iti naurnos ken organisado a panagunida, makapaginanada iti nagbabaetan ti panagunida.

Dayta a naammuan maipapan kadagiti Japanese tree frog ti tultuladen dagiti mangad-adal iti wireless communication tapno mapapardas ti pannakaipatulod dagiti impormasion. Agus-usarda iti mathematical formula tapno saan nga aggigiddan no di ket naurnos nga agsasaruno ti pannakaipatulod dagiti impormasion, isu a maliklikan ti panagpalia ken makainut pay iti koriente.

Panagkunam? Ti kadi naurnos ken organisado a panaguni dagiti Japanese tree frog ket resulta ti ebolusion? Wenno adda nangdisenio iti dayta?