Roma 6:23—“Ta Patay ti Supapak ti Basol. Ngem Biag nga Agnanayon ti Isagut ti Dios”

“Ta ti bayad ti basol ket ipapatay, ngem ti sagut ti Dios ket biag nga agnanayon babaen ken Kristo Jesus nga Apotayo.”—Roma 6:23, Baro a Lubong a Patarus.

“Ta patay ti supapak ti basol. Ngem biag nga agnanayon ti isagut ti Dios gapu iti pannakikaykaysatayo ken ni Cristo Jesus nga Apotayo.”—Roma 6:23, Ti Baro a Naimbag a Damag Biblia.

Kaipapanan ti Roma 6:23

Kadagitoy a sasao ni apostol Pablo, inlawlawagna a matay dagiti tattao gapu ta managbasolda. Ngem mangted ti Dios kadagiti matalek nga agdaydayaw kenkuana iti nagsayaat a namnama—ti sagut a biag nga agnanayon.

“Ti bayad ti basol ket ipapatay.” Amin a tattao ket nayanak nga imperpekto isu nga adda tendensiada nga agbasol.a (Salmo 51:5; Eclesiastes 7:20) Gapu ta nayanak dagiti tattao a managbasol, saanda a maliklikan ti lumakay wenno bumaket sa matay.—Roma 5:12.

Tapno mayilustrar daytoy a punto, inkompara ni Pablo ti basol iti amo a mangmangted iti sueldo. Namnamaen ti maysa a trabahador nga agsueldo gapu iti panagtrabahona, kasta met, namnamaen dagiti tattao a matayda gapu ta imperpektoda.

Ngem inlawlawag met ni Pablo a ti “natayen a tao ket naabsuelton iti basolna.” (Roma 6:7) No natayen ti maysa a tao, nawayawayaanen, wenno napakawanen kadagiti naaramidna a basol. Isu nga awan ti rason a panunotentayo nga agtultuloy a madusdusa dagiti natay gapu kadagiti napalabas a basolda. Ti agpayso, nalawag nga ibaga ti Biblia nga awanen ti aniaman a mapanunot, maaramidan, wenno marikna dagiti natay.—Eclesiastes 9:5.

“Ngem ti sagut ti Dios ket biag nga agnanayon babaen ken Kristo Jesus.” Saan a kas iti ipapatay a “bayad” ti basol, ipaay ti Dios ti sagut a biag nga agnanayon. Ti orihinal a sao para iti “sagut” ket mabalin met a maipatarus kas “di kaikarian a sagut” wenno “naparabur a sagut.” Tumukoy dayta iti banag a maited iti maysa uray saanna a nagbannogan wenno dina pakaikarian. Awan ti managbasol a tao a makaisalakan iti bagina wenno maaddaan iti biag nga agnanayon a bukbukodna. (Salmo 49:7, 8) Ngem libre nga ipaay ti Dios ti nagpateg a sagut a biag nga agnanayon kadagidiay mangipakita iti pammati ken Jesus.—Juan 3:16; Roma 5:15, 18.

Konteksto ti Roma 6:23

Inaramid ni Pablo ti suratna kadagiti Kristiano idiay Roma idi agarup 56 C.E. Agparang a kamali ti kapanunotan ti dadduma kadagidiay a Kristiano maipapan iti asi ti Dios. Gapu iti impluensia ti pilosopia dagiti Griego, mabalin nga inrasonda a no ad-adu ti basolda, ad-adda met a mabenepisiaranda iti pammakawan ti Dios. (Roma 6:1) Mabalin nga inkalintegan met ti dadduma a saandan a manungsungbat kadagiti basolda gapu ta saanen nga agaplikar kadakuada ti Mosaiko a Linteg. (Roma 6:15) Iti surat ni Pablo, impaganetgetna a saan a mabenepisiaran dagiti Kristiano iti asi ti Dios no ipalubosda nga iturayan ida ti basol.—Roma 6:12-14, 16.

Ipasigurado ti sasao ni Pablo kadagiti agdaydayaw iti Dios ita a nupay nayanakda a managbasol, adda latta namnamada. No surotenda dagiti moral nga estandarte ti Dios ken labananda dagiti dakes a tarigagayda, ikarkari ti Dios nga ikkanna ida iti biag nga agnanayon.—Roma 6:22.

Buyaem daytoy ababa a video tapno makitam ti pakabuklan ti libro a Roma.