PANNAKAILAWLAWAG DAGITI BERSIKULO ITI BIBLIA
Numeros 6:24-26—“Bendisionannakayo Koma ti APO ket Aywanannakayo”
“Bendisionannakayo koma ni Jehova ken aywanannakayo. Pagsilnagen koma ni Jehova ti rupana kadakayo, ken maragsakan koma kadakayo. Kumita koma ni Jehova kadakayo tapno kaasiannakayo ken ipaayannakayo iti talna.”—Numeros 6:24-26, Baro a Lubong a Patarus.
“Bendisionannakayo koma ti APO ket aywanannakayo; kaasiannakayo koma ti APO ket paraburannakayo; kitaennakayo koma a siaayat ti APO ket ikkannakayo iti talna.”—Dagiti Numero 6:24-26, Ti Baro a Naimbag a Damag Biblia.
Kaipapanan ti Numeros 6:24-26
Pagaammo dagita a sasao kas pamendision dagiti papadi wenno ni Aaron, a naipanagan kenkuana gapu ta isu ti kaunaan a nangato a padi. (Exodo 28:1) Ngem ti Dios ti Naggapuan dayta a pamendision. (Numeros 6:22, 23) Kinunana ken Moises: “Ibagam ken Aaron ken kadagiti annakna, ‘Kastoy ti ibagayo no bendisionanyo dagiti umili ti Israel,’” kalpasanna imbaga ti Dios dagiti sasao a masarakan iti Numeros 6:24-26. Nagtulnog dagiti matalek a papadi iti dayta a bilin ti Dios. Pinadayawanda met ti nagan ti Dios a Jehova.a Mabasatayo iti bersikulo 27: “Ket usarenda [dagiti papadi] ti naganko a mangbendision kadagiti annak ni Israel, tapno mabendisionak ida.”
“Bendisionannakayo koma ni Jehova ken aywanannakayo.” Bembendision ni Jehova dagiti agdaydayaw kenkuana babaen ti panangprotektar, panangiwanwan, ken panamagballigina kadakuada. (Proverbio 10:22) Iti Numeros 6:24-26, dagiti pronoun a “kayo” ket singular iti orihinal a Hebreo a lengguahe. Ipakita daytoy ti tarigagay ti Dios a mangbendision iti tunggal Israelita, saan laeng nga iti intero a nasion.
“Pagsilnagen koma ni Jehova ti rupana kadakayo, ken maragsakan koma kadakayo.” Ti panangdawat iti Dios ‘a pagsilnagenna ti rupana’ iti maysa a tao ket kiddaw iti Dios a paboran ken anamonganna dayta a tao.b Mabalin met a maipatarus dagita a sasao kas: “Ni Jehova, paraniagenna coma ti rupana kenca.” (Numeros 6:25, Ti Biblia) Pabpaboran ni Jehova ti ilina babaen ti panangipakitana kadakuada iti kinaimbag ken asi.—Isaias 30:18.
“Kumita koma ni Jehovac kadakayo tapno kaasiannakayo ken ipaayannakayo iti talna.” ‘Kumita ni Jehova’ kadagiti agdaydayaw kenkuana babaen ti panangiturongna iti naayat nga atensionna kadakuada ken panangipaayna iti talna kadakuada. Sigun iti maysa a reperensia, “ti Hebreo a sao para iti talna (shalom) ket saan la a tumukoy iti kinaawan ti riribuk, no di ket tumukoy pay iti kinasalun-at ken kinanaan-anay iti pisikal ken naespirituan.”
Tapno mabenepisiaran dagiti Israelita iti pamendision nga ibagbaga dagitoy a bersikulo, masapul nga agtulnogda ken Jehova. (Levitico 26:3-6, 9) Idi nagtulnogda ken Jehova, tinungpalna ti karina. Kasta ti napasamak bayat ti panagturay ti dadduma kadagiti arida, kas kada Solomon ken Ezekias.—1 Ar-ari 4:20, 25; 2 Cronicas 31:9, 10.
Saan a maikalikagum kadagiti Kristiano nga ulitenda dayta a pamendision, ngem mayebkasda dayta no ikararaganda ti dadduma iti Dios wenno paregtaenda dagiti padada a Kristiano. (1 Tesalonica 5:11, 25) Saan a nagbalbaliw ni Jehova. Kanayon a kayatna a bendisionan ken protektaran dagiti matalek nga agdaydayaw kenkuana. Natalna ngarud ti panunot dagiti pudno a Kristiano ta ammoda a pagsilnagen ni Jehova ti “rupana” kadakuada babaen ti pananganamongna kadakuada.
Konteksto ti Numeros 6:24-26
Ti umuna a sangapulo a kapitulo ti libro a Numeros ket maipapan kadagiti instruksion ti Dios kadagiti Israelita bayat ti panagkampoda iti asideg ti Bantay Sinai iti panagturongda iti Naikari a Daga. Bayat dayta a panagkampoda, a nagpaut iti agarup maysa a tawen, inorganisar ni Jehova ida kas maysa a nasion ken inikkanna ida kadagiti linteg a pagaammo kas Linteg ti tulag.
Imbaga met ni Jehova ken Moises no kasano a ni Aaron ken dagiti annakna—dagiti napili a papadi—bendisionanda dagiti Israelita. (Numeros 6:22, 23) Sipud idin, us-usarenen ni Aaron ken dagiti kaputotanna dagiti sasao iti Numeros 6:24-26 a mangbendision iti nasion. Idi agangay, nagbalinen a tradision nga ibaga ti maysa a padi dayta a pamendision no agpatingga dagiti inaldaw a panagdaton iti templo.
Buyaem daytoy ababa a video tapno makitam ti pakabuklan ti libro a Numeros.
a Jehova ti gagangay nga Iloko a patarus ti personal a nagan ti Dios iti Hebreo a lengguahe. Tapno maammuam no apay nga adu a patarus ti Biblia ti agus-usar iti titulo nga Apo imbes a ti personal a nagan ti Dios, kitaem ti artikulo nga “Asino ni Jehova?”
b Iti sabali a bangir, ibaga ti Biblia nga inlinged ni Jehova ti rupana kadagiti Israelita idi saanna nga inanamongan dagiti dakes nga aramidda.—Isaias 59:2; Mikias 3:4.
c Sigun iti NIV Study Bible, ti pannakaulit-ulit ti nagan ti Dios kadagitoy a bersikulo “ket panangipaganetget ken panangitampok kadagiti sasao iti [bersikulo 27].” Ngem adda dagiti mangibaga a ti tallo a panagparang ti nagan ti Dios kadagita a bersikulo, suportaranna ti ideya a ti Dios ket Trinidad. Saan a pudno dayta. Admitiren ti maysa a komentario ti Biblia a mangsupsuporta iti Trinidad a ti namitlo a pannakausar ti nagan ti Dios “dina pulos iparipirip ti kasta nga ideya iti padi a mangibagbaga iti pamendision wenno kadagiti tattao a dumdumngeg iti dayta. Para kadakuada, dayta a tallo a pannakausar ket pangnayon laeng iti pintas ken kinanaan-anay iti pamendision.” (The Pulpit Commentary, Volume 2, panid 52) Para iti ad-adu pay nga impormasion, kitaem ti artikulo a “Ti Dios Kadi ket Trinidad?”