Galacia 6:9—“Ditay Ngarud Mabannog iti Panagaramid iti Naimbag”

“Ditay koma sumuko nga agaramid iti nasayaat, ta iti naikeddeng a tiempo, agapittayto no ditay mabannog.”—Galacia 6:9, Baro a Lubong a Patarus.

“Ditay ngarud mabannog iti panagaramid iti naimbag; ta inton tiempona agapittayto, no ditay maupay.”—Galacia 6:9, Ti Biblia.

Kaipapanan ti Galacia 6:9

Iparparegta ni apostol Pablo kadagiti Kristiano nga itultuloyda nga aramiden ti ibilang ti Dios a nasayaat, wenno naimbag. Iti kasta, masiguradoda a gunggonaan ida ti Dios.

“Ditay koma sumuko.” Dagitoy a sasao ket mabalin a maipatarus kas “ditay koma mabannog.” Daytoy a termino iti orihinal a lengguahe mabalin met a kaipapananna ti saan a maupay wenno saan a mapukaw ti kinagagar. Ti panangiraman ni Pablo iti bagina kadagita a sasao ipakitana a bigbigenna nga adda met dagiti tiempo nga isu ket naupay.—Roma 7:21-24.

Ti “nasayaat,” wenno naimbag, ramanenna ti amin a masapul nga aramiden ti maysa a Kristiano iti panagserbina iti Dios. Ramanenna met ti ar-aramidenna tapno matulonganna dagiti kapammatianna ken ti dadduma.—Galacia 6:10.

“Iti naikeddeng a tiempo, agapittayto no ditay mabannog.” Ipalpalagip ni Pablo kadagiti agbasbasa a no kasano nga agkasapulan iti tiempo ti panagdakkel dagiti mula ti mannalon, mabalin nga agkasapulan met iti tiempo sakbay a makita dagiti pagsayaatan ti panagaramid iti naimbag. Babaen ti panangtukoy ni Pablo iti panagapit, inkonektarna daytoy a bersikulo iti nagpateg a kinapudno a mabasa iti bersikulo 7: “Aniaman nga imulmula ti maysa a tao, daytanto met ti apitenna.” Kaipapananna a no ar-aramiden ti maysa a Kristiano ti ibilang ti Dios a nasayaat, agapitto iti dakkel a gunggona, a pakairamanan ti biag nga agnanayon.—Roma 2:6, 7; Galacia 6:8.

Konteksto ti Galacia 6:9

Inaramid ni apostol Pablo daytoy a surat para kadagiti Kristiano nga aggigian idiay Galacia idi agarup 50-52 C.E. Kayatna a protektaran dagiti Kristiano iti impluensia dagiti indibidual nga agkunkuna a Kristianoda ngem tirtiritirenda met ti kinapudno maipapan ken Jesus. (Galacia 1:6, 7) Ipappapilit dagitoy nga ulbod a mannursuro a masapul a suroten dagiti Kristiano ti Linteg nga inted ti Dios iti nagkauna a nasion ti Israel babaen ken Moises. (Galacia 2:15, 16) Inlawlawag ni Pablo a nalpasen ti nakairantaan dayta a Linteg ken saanen a masapul a suroten dayta dagiti agdaydayaw iti Dios.—Roma 10:4; Galacia 3:23-25.

Idi imparegta ni Pablo kadagiti padana a Kristiano nga itultuloyda ti “agaramid iti nasayaat,” saanna a tuktukoyen ti panagtulnog iti Mosaiko a Linteg. Imbes ketdi, parparegtaenna ida nga ‘itungpalda ti linteg ti Kristo,” a pakairamanan ti amin nga insuro ni Jesus maipapan iti panagaramid iti naimbag iti dadduma.—Galacia 6:2; Mateo 7:12; Juan 13:34.

Buyaem daytoy ababa a video tapno makitam ti pakabuklan ti libro a Galacia.