“Ti Ayatko ken Jehova ti Nangpabileg Kaniak”

Ngem kasano a ti dati a komunista a kas kaniak ket inawatna ti pammati ti maysa a relihion nga ibilbilang ti gobierno kas kabusor? Ken kasano a nakatulong kaniak ti ayat ken panangsanay ni Jehova tapno mapasayaatko ti personalidadko bayat dagiti tawen a pannakaipanko iti labor camp?

Panagbirok iti Hustisia ken Talna ti Panunot

Nayanakak idi 1930, idiay Tabani, a maysa a napanglaw a lugar iti makin-amianan a Moldova. Nakagaggaget dagiti nagannakko nga agtrabtrabaho iti pagtaraknan dagiti animal tapno mabiagdakami nga innem nga annakda. Marigrigatkami laeng. Ni nanangko ket miembro ti Russian Orthodox Church, ken Katoliko met ni tatangko. Masansan a pagririanda ti nakababain nga aramid dagiti papadi.

Idi naggraduarak iti eskuelaan idi 18 ti tawenko, nakimiembroak iti Komsomol, a maysa nga organisasion dagiti agtutubo a mangikamkampania kadagiti sursuro ti Komunista. Panggep dayta nga isagana dagiti masanguanan a miembro dagiti Communist Party. Idi agangay, napiliak kas sekretario dayta a grupo. Nagustuak dagiti sursuroda nga agkakabsat ti amin a tattao, patas, ken masapul a maipakitaan iti hustisia. Ngem idi nakitak ti kinaawan hustisia ken korapsion, nadismayaak.

Kas aktibo a miembro ti Komsomol, awan maaramidak no di ti mangsuporta kadagiti bilin ti gobierno ti Soviet Uniona a mangpaserra kadagiti simbaan ken mangikkat kadagiti relihion. Adda sumagmamano a Saksi ni Jehova iti lugarmi. Uray no makitkitak a napudno ken mannakikappiada, imbilangko ida a panatiko. Diak ekspektaren a maysa kadakuada ti mangsungbat iti adu a saludsodko maipapan iti biag.

Saksi ni Jehova ti angkelko a ni Dimitriy, nga aggigian iti lugarmi. Iti maysa nga aldaw iti spring ti 1952, dinamagnak, “Georgiy, ania ti aramidem iti biagmo?” Isuna laeng ti nangisaludsod kaniak iti dayta ta pampanunotenna ti pagsayaatak. Ti agpayso adu ti saludsodko a saan pay a nasungbatan. Kas pagarigan, isalsaludsodko iti bagik, ‘No adda Dios, apay nga ipalpalubosna ti nakaro a panagrigrigat?’ Iti simmaruno a walo nga aldaw, sinungbatan ni Angkel Dimitriy dagiti saludsodko babaen ti Biblia. Adda dagiti gundaway a nagsaritaanmi ti maipapan iti Dios agingga iti alas tres ti parbangon!

Kalpasan dagita a panagsarita, nagdesisionak a serioso nga adalek ti Biblia. Nabigbigko nga adda nailangitan nga Amak a talaga a mangay-ayat kaniak. (Salmo 27:10) Uray no nakabasbassit ti ammok iti Biblia, nakabilbileg ti ayatko ken Jehova isu nga inaramidko ti masapul nga aramidek. Nagikkatak iti Communist Party uray no butbutngennak ti chairman-mi. Uppat a bulan laeng kalpasan a nangrugiak nga agadal iti Biblia, indedikarko ti bagik ken Jehova ket nabautisaranak idi Septiembre 1952.

Nasubok ti Ayatko ken Jehova

Maiparparit idi ti trabaho dagiti Saksi ni Jehova. Ngem kayatko nga ipakita iti aramidko ti ayatko ken Jehova, isu a nagboluntarioak a mangideliber kadagiti literatura ti Biblia kadagiti padak a Saksi nga aggigian kadagiti babassit a lugar. Delikado daytoy ta dagiti managsuspetsa a lumugar nalakada la nga ireport kadagiti autoridad ti maysa a dida am-ammo. Kinapudnona, nagsuspetsa met kaniak uray ti sumagmamano a Saksi ni Jehova. Pinanunotda a maysaak kadagiti secret police agent a nakastrek iti kongregasion. Ngem napaneknekan idi agangay a saanak nga espia. Dua a bulan laeng kalpasan ti panagbautisarko, naarestoak ken nasentensiaanak gapu iti panangideliberko kadagiti maiparit a literatura.

Dandani makatawen a naibaludak iti pretrial detention. Namin-adu a naimbestigaranak ket pinilitdak dagiti opisial a mangtallikud iti pammatik. Ngem nabileg idin ti ayatko ken Jehova a Dios. Idi agangay, nabistaak iti korte iti siudad ti Odessa, Ukraine. Napaayaban iti korte dagiti nagannak ken kakabsatko, a saanda pay a Saksi iti daydi a tiempo.

Naakusaranak kas maysa a naallilaw a nakimiembro iti maysa a delikado a sekta. Pinaruar dagiti autoridad nga agbagtitak tapno mamati dagiti nagannak ken kakabsatko. Nagbuteng dagiti nagannakko. Nagsangsangitda ket imbagada nga umikkatakon a Saksi. Ngem kalmadoak laeng ket imbagak ken nanangko: “Dikayo agdanag. Saanak a naallilaw. Nabirokakon ti nabayag a birbirokek iti biagko, ket saanko a tallikudan dayta.” (Proverbio 23:23) Bassit laeng idi ti ammok maipapan iti Biblia, ngem umanayen ti ammok maipapan ken Jehova tapno saanko a panawan isuna. Agarup innem a tawen kalpasanna, nabigbig dagiti nagannakko a pudno ti pammatik, ket nagbalinda met a Saksi ni Jehova.

Nasentensiaanak iti 15 a tawen iti labor camp ket naipanak idiay Kolyma babaen ti tren. Adda dayta iti tengnga ti nakaad-adu a labor camp idiay Siberia. Tapno naan-anay a makontrol dagiti balud, kabilen ken bisinendakami dagiti guardia ken opisial. Idi damo, diak ammo no malasatak dayta.

Inaywanan ken Sinanaynak ti Dios

Nadanonak ti 34 a Saksi a naibaluden iti dayta a kampo. Siaannad a dinamag ti dadduma kadakuada: “Adda kadi Jonadab iti grupo?” Nailasinko a dagus a kapammatiak ida. Isuda laeng ti agus-usar iti kasta a termino ti Biblia! Saan laeng nga insuro kaniak dagitoy aduan kapadasan a kakabsat no kasano nga iyaplikarko dagiti prinsipio ti Biblia kadagiti narigat a situasion, tinulongandak met a maaddaan kadagiti naespirituan a kualidad kas iti pannakaawat.

Nagtrabahoak kas operator ti makina iti kampo. Maysa nga aldaw, impangas ti katrabahuak nga agnagan Matphey a kabesadona ti nagan ti 50 a santo. Idi linaisko dagiti aw-awaganda iti santo, inlayat ni Matphey ti imana tapno danogennak, ngem nagtarayak. Idi kuan, nakitak a katkatawaandak dagiti kakabsat isu a nagrurodak. Imbagak: “Apay nga agkatkatawakayo? Pinadasko laeng ti mangasaba!” Siaasi nga impalagipda kaniak a ti panggeptayo ket mangipakaammo iti naimbag a damag, saan a mangpabain kadagiti tattao. (1 Pedro 3:15) Kontra ni Matphey iti gobierno, ngem bilib iti respeto dagiti Saksi kadagiti guardia ken autoridad. Naginteres met laeng iti mensahe ti Biblia idi agangay. Diak pulos malipatan ti rabii a sekreto a pannakabautisarna iti sangadram a nakalamlamiis a danum.

Di nagbayag, kalpasan a nakasangpetkami iti kampo, siak ken ti dua nga agtutubo a kabsat ket naawis iti maysa a klase a mangisuro iti politika. Idi damo, dimi kayat ti mapan kadagita a klase. Impagarupmi a ti pannakiraman kadagita ket kontra iti Nakristianuan a neutralidadtayo. (Juan 17:16) Kas resultana, naibartolinakami iti dua a lawas. Idi nakaruarkamin iti bartolina, inlawlawag dagiti naayat a kakabsat a saan a kayat a sawen nga ikompromisomin ti neutralidadmi no mapankami iti kasta a klase. Imbes ketdi, gundawaymi dayta a mangasaba. Tinulongandakami dagitoy a naayat a kakabsat tapno agbalinkami a mas masirib ken saan a panatiko.

Ti naanus a panangsanayda ket nalawag nga ebidensia nga ipatpategnak ni Jehova. Kas pagarigan, maysa a balud a padi ti naapointaran kas chief accountant. Kada agkitakami iti panganan, ikablaawna kaniak, “Hello, anak ti Diablo!” Insuro kaniak ti sabali a balud a kastoy ti isungbatko, “Hello Dad!” Makapaladingit ta inaramidko ti imbagana, ket kas resultana, nakaro ti pannakakabkabilko. Idi naammuan dagiti kakabsat ti napasamak kaniak, tinulongandak tapno makitak a saan nga umiso ti inaramidko. (Proverbio 29:11) Idi agangay, nagpadispensarak iti padi.

Sakbay a naipanak iti labor camp, sekreto a makigimgimongak iti rabii wenno iti parbangon. Ngem iti kampo, awan ti paglemmengan. Isu nga inaldaw nga agtakderkami nga agsisinnango, a makitkita dagiti guardia, tapno pagsasaritaanmi ti dadduma a teksto nga insuratmi iti bassit a papel. Panggepmi nga ikabesa ti adu a teksto ken kanayon nga isaomi dagita. No adda mangkuestion iti panaguummongmi, dagus a tilmonenmi dagiti insuratmi.

Nayadayoak Ngem Nadanonnak ti Ayat ti Dios

Idi nakaruarakon iti kampo idi 1959, naideportaak iti Karaganda idiay Kazakhstan. Nupay addaak pay laeng idi iti probation (masipsiputan ti garawna), nagkiddawak kadagiti autoridad iti 20 nga aldaw a kaawan tapno agkasarak. Napanak iti rehion ti Tomsk idiay Russia, a nakaam-ammuak iti matalek ken napintas a kabsat nga agnagan Maria. Kas ar-aramidek idi, direkta nga imbagak ti panggepko. Imbagak kenkuana: “Maria, awan ti tiempok nga agarem, agkasartan!” Immanamong ket naangay ti simple a kasarmi. Ap-apresiaren ni Maria ti panagibturko iti adu a pakasuotan, ket kayatnak a tulongan nga agtultuloy nga agserbi ken Jehova.—Proverbio 19:14.

Idi 1960’s, saankami a nawaya a makapagbalaybalay, ngem gundawayanmi ti aniaman nga oportunidad a mangipakaammo iti pammatimi iti impormal a pamay-an. No maimbitarankami wenno agbakbakasionkami, kanayon nga ipakaammomi ti namnamatayo nga agbiag nga agnanayon ditoy daga. Inkagumaanmi met a kasarita ti sabsabali. Kas pagarigan, bisitaenmi dagiti mailaklako a balay ket inkagumaanmi a kasarita dagiti makimbalay maipapan kadagiti naespirituan a topiko. Iti kastoy a pamay-an, nakairugikami ken Maria iti panangyadal iti Biblia ket innem kadakuada ti nagbalin a Saksi ni Jehova.

No dadduma makapangasabakami no panawen ti eleksion. Naminsan, adda dagiti secret police agent nga immay iti paktoria a pagtrabtrabahuak ken ti dadduma a kakabsat a lallaki. Iti sango ti agarup 1,000 a katrabahuanmi, dinamagda kadakami no apay a saan a makiramraman dagiti Saksi ni Jehova iti politika. Indepensadakami ti chief engineer ken ti dadduma pay a trabahador. Imbagada kadagiti polis a responsable ken nagagetkami a trabahador. Ti komentoda ti nangpatured kadakami a mangilawlawag iti takdermi, ket imbagami dagiti teksto a kabesadomi. Kas resulta ti natured a panangasabami, naginteres iti kinapudno ti Biblia ti uppat a katrabahuanmi ket awan pay makatawen, nabautisarandan.

Idi rugrugi ti 1970’s, adu a napudno ti panagpuspusona a tattao ti nagbalin a Saksi ni Jehova idiay Kazakhstan, isu a nariknami a masapul a maorganisar ti umuna nga asambleami. Ngem kasano a maaramidmi dayta a saan nga agsuspetsa dagiti autoridad? Nagdesisionkami a mangangay iti maysa nga aldaw nga asamblea a maigiddan iti maysa a kasar iti maysa a lugar nga asideg iti siudad ti Almaty. Nakaatenderkami iti aktual a kasar ken iti asamblea, nga adda nasurok a 300 a bisita a nakikadua iti nobio ken nobia! Inkarigatan ni baketko ken ti dadduma a kakabsat a babbai ti agdekorar ken mangisagana iti naimas a taraon. Ngem ad-adda a naapresiar dagiti bisita dagiti nagsayaat a palawag a naibatay iti Biblia nga imparang ti agarup sangapulo ket dua nga ispiker. Dayta ti damok a panagpalawag iti sango ti adu a tattao.

Pinabilegnakami ti Ayat ti Dios a Mangsango Kadagiti Pakasuotan

Nagtalinaed a matalek a katulongak ti patpatgek nga asawa a ni Maria iti intero a biagna. Naalumamay ken managpasakup ken kanayon nga iyun-unana dagiti interes ti Pagarian. Nupay napigsa a babai, bigla a naaddaan iti nakaro a klase ti osteoporosis isu a nabaldado iti dandani 16 a tawen. Iti tulong ti naasi a balasangmi a ni Lyudmila, inaywananmi ni baketko agingga iti ipapatayna idi 2014.

Kasla awan ti pigsak idi agrigrigat ti dungdungnguek a ni Maria. Ngem kanayon nga agbasbasakami a dua iti Biblia ken kadagiti makaparegta nga artikulo agingga iti maudi nga aldawna. Kanayon a pagsaritaanmi ti maipapan iti baro a lubong. No dadduma, urayak la makasangit iti abayna ngem diak ipadpadlaw. Ngem kada mabasami ti maipapan kadagiti nagsasayaat a kari ni Jehova, agkalmakami ket adda manen bilegmi nga agibtur.—Salmo 37:18; 41:3.

Nanipud idi damok a narikna ti ayat ni Jehova, kanayonen a supsuportaran ken ay-aywanannak. (Salmo 34:19) Idi agtutuboak ken awan pay kapadasak, nariknak ti ayatna babaen kadagidiay siaanus a nangtulong kaniak a mangpasayaat iti personalidadko. Iti amin a rigatko idi naipanak iti labor camp, nariknak ti suporta ni Jehova babaen ti Saona. Inikkannak iti pigsa a mangaywan iti patpatgek nga asawa a ni Maria agingga iti ipapatayna. Ita, talaga a maibagak a ti ayatko ken Jehova ti nangpabpabileg kaniak iti intero a biagko.