Pannakaaramid Dagiti Video Para iti Programa ti 2020 “Kanayon nga Agragsakkayo”! a Rehional a Kombension

Dagiti video kadagiti rehional a kombensiontayo danonenna ti pusotayo ken paunegenna ti pannakaawattayo kadagiti pannursuro ti Biblia. Ti 2020 “Kanayon nga Agragsakkayo”! a Rehional a Kombension ket addaan iti 114 a video, karaman ti 43 a palawag dagiti miembro ti Bagi a Manarawidwid ken dagiti katulonganda. Napampanunotyo kadi no kasano kadakkel a trabaho ken ti nagastos iti pannakaaramid dagitoy a video?

Dandani 900 a kakabsat manipud iti nagduduma a nasion ti nangusar iti tiempo ken paglainganda tapno maaramid ti programa. Dandani 100,000 nga oras ti nausarda iti daytoy a proyekto a naaramid iti nasurok a dua a tawen. Karaman iti dayta ti 70,000 nga oras a nausar iti pannakaaramid ti 76 a minuto a naibatay-Biblia a drama a Nehemias: “Ti Rag-o nga Ipaay ni Jehova ti Natalged a Pagkamanganyo.”

Mabalin a pampanunotenyo a dakkel ti nagastos iti panangipaay kadagiti kasapulan dagiti managsakripisio a boluntario, kadagiti equipment, pasilidad, ken kadagiti teknikal a kasapulan tapno malpas ti proyekto.

“Kayat ti Teaching Committee ti Bagi a Manarawidwid nga agduduma a kultura ken lugar ti maipabuya kadagiti video. Makatulong dayta tapno maipakita a sangalubongan ti panagkakabsattayo,” kuna ni Jared Gossman, nga agtrabtrabaho iti Audio/Video Services. “Tapno maaramid dayta, 24 a team iti 11 a pagilian ti nagtitinnulong iti daytoy a proyekto. Gapu ta agduduma ti ayan dagiti boluntario, dakkel ti nagastos ken adu a tiempo ti nausar para iti panagplano ken koordinasion.”

Tapno maaramid ti adu kadagiti video, kasapulan ti espesipiko nga equipment ken set para iti nagduduma nga eksena. Kas pagarigan, naibangon iti uneg ti Mt. Ebo studio nga asideg iti Patterson, New York, U.S.A. dagiti set para iti Nehemias: “Ti Rag-o nga Ipaay ni Jehova ti Natalged a Pagkamanganyo.” Tapno makainut iti pondo iti panangaramid kadagiti set a kapada ti itsura idi un-unana kas kadagiti pader ti nagkauna a Jerusalem, nagusar dagiti kakabsat kadagiti lightweight a materiales. Innem a metro ti katayag (20 ft) ti tunggal patakder ken naaramid iti kayo a nabalkut iti foam sa napinturaan tapno kasla bato ti itsurana. Tapno saan unay nga adu ti maaramid a set, mabalin nga iyakar dagitoy a “pader” para iti nagduduma nga eksena. Ngem dandani $100,000 (U.S.) latta ti nagastos para laeng iti pannakaaramid dagiti set iti daytoy a drama.a

Ita ta ammotayon dagitoy a detalye, mas maapresiartayon ti programa ti rehional a kombension ita a tawen. Masiguradotayo a dagiti sakripisio ken panagbannog iti pannakaaramid daytoy a programa ket pakaidayawan ni Jehova iti intero a lubong. Pagyamanan iti nabuslon a donasionyo para iti sangalubongan a trabaho babaen ti donate.jw.org ken iti dadduma pay a pamay-an.