Kinabulsek—Ti Pannakausarna Kadagiti Kasuratan
TI PANAGAR-ARIKAP ti bulsek ket mamin-adu nga agserbi kas ilustrasion ti kinaawan gaway. (Deuteronomio 28:29; Un-unnoy 4:14; Isaias 59:10; Sofonias 1:17; Lucas 6:39) Agtalek unay idi dagiti Jebuseo a saan a marbek ti sarikedkedda isu nga inumsida ni David. Nupay nakapuy dagiti nakakaasi a bulsek a kailianda, ibagbagada a kabaelan dagitoy a salakniban ti sarikedked ti Sion a maibusor iti Israel.—2 Samuel 5:6, 8.
Isimsimbolo idi ti kinabulsek ti di umiso a pannakaipaannurot ti hustisia babaen ti kinarinuker ti pangukoman. Gapuna, adu ti pammagbaga iti Linteg a maibusor iti pasuksok, regalo, wenno panangidumduma, tangay mabalin a mangbulsek dagita a banag iti maysa nga ukom ken manglapped iti awan panangidumdumana a pannakaipaalagad ti hustisia. “Ti pasuksok bulsekenna dagiti nalawag-panagkitana a tattao.” (Exodo 23:8, NW) “Ti pasuksok bulsekenna ti matmata dagidiay masirib.” (Deuteronomio 16:19, NW) Kasano man ti kinalinteg ken kinasaririt ti maysa nga ukom, mabalin nga ammona wenno dina madmadlaw nga isut’ naimpluensiaan iti sagut dagidiay nainaig iti kaso. Saan laeng a ti makabulsek nga epekto ti regalo ti nainkalintegan a tingitingen ti linteg ti Dios no di ket uray ti sentimiento, ta sagudayenna: “Dika tratuen ti nanumo buyogen ti panangidumduma, ket dika paboran ti persona daydiay naindaklan.” (Levitico 19:15, NW) Isu a gapu iti sentimiento wenno tapno agbalin a popular iti bunggoy, saan koma nga ipataw ti ukom ti desisionna maibusor kadagiti nabaknang agsipud ta nabaknangda.—Exodo 23:2, 3.
Naespirituan a Kinabulsek
Ipatpateg nga amang ti Biblia ti naespirituan a panagkita ngem ti pisikal a panagkita. Inusar ni Jesus ti gundaway a panangpaimbagna iti bulsek a lalaki nanipud pannakaipasngayna tapno ipaganetget ti pakababalawan dagiti Fariseo. Ngamin, agpampamarangda nga addaan iti naespirituan a panagkita ngem sipapakinakem a dida kayat a panawan ti bulsek a kasasaadda. Kaaspingda dagidiay pagay-ayatda ti kinasipnget imbes a ti lawag. (Juan 9:39-41; 3:19, 20) Nadakamat ni apostol Pablo iti kongregasion sadi Efeso ti nalawaganen a matmata ti pusoda. (Efeso 1:16, 18) Ipatuldo ni Jesus a bulsek ken lamolamo dagidiay agkunkuna a Kristiano ngem saanda a silalagip kadagiti naespirituan a kasapulanda, a dida maawatan ti nakakaasi, agar-arikap a kasasaadda. (Apocalipsis 3:17) No kasano a ti nabayag a kaadda iti kinasipnget ti mangbulsek kadagiti natural a mata, ipatuldo ni apostol Juan a ti maysa a Kristiano a manggura iti kabsatna ket magmagna iti makabulsek a kinasipnget a dina ammo ti papananna. (1 Juan 2:11); ket mamakdaar ni Pedro a ti tao a saan a mangsukay iti Nakristianuan a bunga, nga ayat ti kangrunaan, ket “bulsek, ikidkidemna dagiti matana iti lawag.” (2 Pedro 1:5-9) Kinaagpaysuanna, ni Satanas a Diablo ti gubuayan ti kasta a kinasipnget ken naespirituan a kinabulsek. Pagbalbalinenna ti bagina kas anghel ti lawag. Isu ti “dios daytoy a sistema ti bambanag” ken ti dios ti kinasipnget a nangbulsek iti panunot dagiti di manamati tapno dida maawatan ti naimbag a damag maipapan ken Kristo.—Lucas 22:53; 2 Corinto 4:4; 11:14, 15.