Kapitulo 31

No Kasano a Pinili ken Indalan ti Dios

“NAINKALINTEGAN nga adda laeng maymaysa a pudno a relihion. Maitunos daytoy iti kinapudno a ti pudno a Dios ket Dios, ‘saan a ti riri, no di ti talna.’ (1 Corinto 14:33) Kuna ti Biblia nga adda laeng ‘maymaysa a pammati.’ (Efeso 4:5) Asinoda, ngarud, dagidiay mangbukel ti bagi dagiti pudno a managdaydayaw itatta? Dikam agalikaka a mangikuna nga isuda dagiti Saksi ni Jehova,” ipakaammo ti libro a Mabalinyo ti Agbiag nga Agnanayon iti Paraiso a Daga.a

‘Kasanoyo a masigurado a pudno ti relihionyo?’ nalabit adda mangimtuod. ‘Awanankay met iti supernatural nga ebidensia​—kas kadagiti milagro a sagut. Sa iti panaglabas dagiti tawen saanyo kadi a binaliwbaliwan dagiti panangmatmat ken sursuroyo? Kasano, ngarud, a makapagtalekkayo nga idaldalannakay ti Dios?’

Tapno masungbatan dagita, makatulong no usigentay nga umuna no kasano a pinili ken indalan ni Jehova ti ilina idi ugma.

Ti Panangpili ti Dios idi Tiempo ti Biblia

Idi maika-16 a siglo K.K.P., inummong ni Jehova dagiti Israelita idiay Bantay Sinai ket inawisna ida nga agbalin a napili nga ilina. Umuna, nupay kasta, impakaammo ni Jehova kadakuada nga adda dagiti espesipiko a maipaannurot kadakuada. Kinunana: “No umannugotkayo a napaypayso iti saok . . . , iti kasta sigurado nga agbalinkayto a naisangsangayan a sanikuak.” (Ex. 19:5) Baeten ken Moises, imbatad ni Jehova dagiti annuroten, a kalpasanna simmungbat dagiti tattao: “Amin a sasao nga imbalikas ni Jehova situtulokkami a mangaramid.” Iti kasta ni Jehova nakitulag iti Israel ket intedna kadakuada ti Lintegna.​—Ex. 24:3-8, 12.

Pinili ti Dios​—anian a karkarna a pribilehio! Ngem dayta a pribilehio impabaklayna iti Israel ti responsabilidad a panagtulnogda a siiinget iti Linteg ti Dios. No dida aramiden ti kasta agbanagto iti pannakailaksidda kas maysa a nasion. Tapno maipapusoda ti nadalus a panagbuteng tapno agtulnogda kenkuana, nangted ni Jehova kadagiti datdatlag a supernatural a pagilasinan​— “dagiti gurruod ken kimat nangrugida a napasamak,” ket “ti intero a bantay napalalo ti panagkintayegna.” (Ex. 19:9, 16-18; 20:18, 20) Iti agarup simmuno a 1,500 a tawen, karkarna ti saad dagiti Israelita​—isuda ti ili a pinili ti Dios.

Idi immuna a siglo K.P., nupay kasta, nagbaliw nga interamente ti situasion. Napukaw ti Israel ti pribilehiona, ket inwaksi ni Jehova ida gapu ta inlaksidda ti Anakna. (Mat. 21:43; 23:37, 38; Ara. 4:24-28) Impasngay ngarud ni Jehova ti immuna a kongregasion Kristiano, a nabangon ken Kristo. Idi Pentecostes 33 K.P., imparukpok ni Jehova ti nasantuan nga espirituna kadagiti pasurot ni Jesus sadi Jerusalem, ket pinagbalinna ida a “napili a rasa, . . . nasantuan a nasion, ili a naisangsangayan a sanikua.” (1 Ped. 2:9; Ara. 2:1-4; Efe. 2:19, 20) Nagbalinda a “dagidiay pinili ti Dios.”​—Col. 3:12.

Ti pannakimiembro iti dayta napili a nasion ket adda kondisionna. Nangisaad ni Jehova kadagiti estrikto nga annuroten iti moral ken naespirituan nga alagadenda. (Gal. 5:19-24) Dagidiay nakikumporme kadagiti annuroten isudat’ nakalinea a pilienna. Apaman a napilin ida ti Dios, nupay kasta, nasken nga agtalinaedda a natulnog kadagiti lintegna. Dagidiay laeng “agtulnog kenkuana kas agturay” isudanto ti agtultuloy nga umawat iti nasantuan nga espirituna. (Ara. 5:32) Dagidiay madi nga agtulnog kenkuana ket agpeggadda iti pannakapaksiat iti kongregasion ket maikapisda iti tawidda iti Pagarian ti Dios.​—1 Cor. 5:11-13; 6:9, 10.

Ngem kasano a masigurado dagiti dadduma a ti Dios pinilina daydi immuna a kongregasion Kristiano a nangsandi iti Israel kas “ti kongregasion ti Dios”? (Ara. 20:28) Ti pinili ti Dios nalawag. Kalpasan daydi ipapatay ni Jesus, inyawatna dagiti namilagruan a sagut kadagiti miembro ti immuna a kongregasion Kristiano tapno mangipakita nga isuda ket dagiti pinili ti Dios.​—Heb. 2:3, 4.

Dagiti kadi supernatural a pagilasinan, wenno milagro, ti kankanayon a nasken a pakailasinan no asino dagiti pinili ken indalan ti Dios idi tiempo ti Biblia? Saan, saan a pulos. Dagiti aramid a datdatlag saanda a kadawyan a napasamak iti intero a historia ti Biblia. Kaaduan a tao a nagbiag idi tiempo ti Biblia dida pulos a nakakita ti milagro. Ti kaaduan a milagro a nairekord iti Biblia naangay idi kaaldawan da Moises ken Josue (maika-16 ken -15 a siglo K.K.P.), da Elias ken Eliseo (maika-10 ken -9 a siglo K.K.P.), ken ni Jesus agraman dagiti apostolna (immuna a siglo K.P.). Dagiti dadduma a matalek a tattao a pinili ti Dios para kadagiti espesipiko a panggep, kas kada Abraham ken David, napaliiw wenno napasaranda ti pannakaiparang ti pannakabalin ti Dios, ngem awan ebidensia a nagaramidda a mismo kadagiti milagro. (Gen. 18:14; 19:27-29; 21:1-3; idiligyo ti 2 Samuel 6:21; Nehemias 9:7.) No maipapan kadagiti namilagruan a sagut idi immuna a siglo, impadto ti Biblia a dagitoy “manungpaldanto.” (1 Cor. 13:8) Ket napasamak daytoy idi natayen ti naudi kadagiti 12 nga apostol ken dagidiay immawat kadagiti namilagruan a sagut baeten kadakuada.​—Idiligyo ti Aramid 8:14-20.

Ti Ngay Panangpili ti Dios Itatta?

Kalpasan daydi immuna a siglo, timmanoren a di nalapdan ti apostasia. (Ara. 20:29, 30; 2 Tes. 2:7-12) Iti unos ti adu a siglo kimmudrep unay ti silaw ti pudno a Kinakristiano. (Idiligyo ti Mateo 5:14-16.) Kaskasdi, sigun iti ilustrasion ni Jesus impasimudaagna nga inton ‘panagngudo ti sistema ti bambanag,’ addanto ti nabatad a nagdumaan “dagiti trigo” (dagiti pudno a Kristiano), ken “dagiti sisania” (dagiti imitasion a Kristiano). Dagiti trigo, wenno “dagidiay napili,” maurnongdanto iti uneg ti maysa a pudno a kongregasion Kristiano, kas idi immuna a siglo. (Mat. 13:24-30, 36-43; 24:31) Dineskribir met ni Jesus dagiti napulotan a miembro dayta a kongregasion kas “ti matalek ken naannad nga adipen” ket impasimudaagna nga inton tiempo ti panungpalan, iburaydanto ti naespirituan a taraon. (Mat. 24:3, 45-47) Dayta a matalek nga adipen kaduaento ti “dakkel a bunggoy” dagiti pudno nga agdaydayaw manipud kadagiti amin a nasion.​—Apoc. 7:9, 10; idiligyo ti Mikias 4:1-4.

Kasanonto a mailasin dagiti pudno nga agdaydayaw nga agbibiag inton panawen ti panungpalan? Kankanayonda kadi a husto, saan kadi nga agerrado ti pangngeddengda? Dagidi apostol ni Jesus kasapulanda pay met ti pannakakorehir. (Luc. 22:24-27; Gal. 2:11-14) Kas kadagidi apostol, dagiti pudno a pasurot ni Kristo iti kaaldawantayo masapul a napakumbabada, a situtulokda nga umawat iti disiplina ken, no kasapulan, agbalbaliwda, tapno ad-adda pay a maitunos a sisisinged iti Dios ti panagpampanunotda.​—1 Ped. 5:5, 6.

Idi simrek toy lubong iti maudi nga al-aldaw idi 1914, ania a grupo ti napaneknekan kas maymaysa a pudno a Nakristianuan nga organisasion? Ti Kakristianuan napunno kadagiti iglesia a kunaenda nga ireprepresentarda ni Kristo. Ngem ti saludsod ket: Ania, no adda man, kadakuada ti mangtungtungpal kadagiti Nainkasuratan a pagannurotan?

Dayta maymaysa a pudno a kongregasion Kristiano masapul nga organisasion a patienna a ti Biblia isut’ kangrunaan nga autoridad, saan ket a daytay agadaw kadagiti nawarawara a bersikulo ngem laksidenna met dagiti dadduma no di maikumporme iti agdama a teolohiana. (Juan 17:17; 2 Tim. 3:16, 17) Masapul nga organisasion dayta a dagiti miembrona​—saan a sumagmamano laeng no di ket amin​—talaga a saanda a paset ti lubong, kas panangtuladda ken Kristo. Gapuna kasanoda a makinamin iti politika, a kas naulit-ulit nga inaramid dagiti iglesia ti Kakristianuan? (Juan 15:19; 17:16) Ti pudno a Nakristianuan nga organisasion masapul a saksianna ti nadibinuan a nagan, a Jehova, ket aramidenna ti imbilin ni Jesus​—ti panangikasaba iti naimbag a damag ti Pagarian ti Dios. Kas iti kongregasion idi immuna a siglo, saan la a sumagmamano no di ket isuamin a miembrona ebanghelisadorda iti amin a kararua. (Isa. 43:10-12; Mat. 24:14; 28:19, 20; Col. 3:23) Dagiti pudno nga agdaydayaw masapul nga agdinamagda met gapu iti managsakripiso a panagayatda iti maysa ken maysa, ayat a salputenna dagiti bangen ti rasa ken nasion ket pagkaykaysaenna ida iti sangalubongan a panagkakabsat. Ti kasta nga ayat maiparangarang koma saan a basta kadagiti naiputputong a kaso no di ket iti wagas a talaga a mangisalumina kadakuada kas maysa nga organisasion.​—Juan 13:34, 35.

Nalawag, nga idi nangrugi ti panawen ti panungpalan idi 1914, awan kadagiti iglesia ti Kakristianuan ti nakaragpat kadagitoy nga estandarte ti Biblia kas maymaysa a pudno a kongregasion Kristiano. Ania, ngay, no maipapan kadagiti Estudiante ti Biblia, a pangawagda idi kadagiti Saksi ni Jehova?

Nabunga a Panagsirarak iti Kinapudno

Kas agtutubo, ni C. T. Russell inkeddengna a ti Biblia imbabain unay ti Kakristianuan. Namati pay a tiemponan tapno matarusan ti Sao ti Dios ket dagidiay sipapasnek a mangadal iti Biblia ken mangiyaplikar iti dayta iti bibiagda makagun-oddat’ pannakatarus.

Ti biograpia ni Russell, a naipablaak di nagbayag kalpasan ti ipapatayna inlawlawagna: “Isu saan a nangbuangay iti baro a relihion, ket dina pulos inako a kasta. Riniingna dagiti naindaklan a kinapudno nga insuro ni Jesus ken dagiti Apostol, sana inturong ti lawag ti maikaduapulo a siglo kadagitoy. Dina inako nga adda naisangsangayan a palgaakna manipud iti Dios, no di ket namati a dimtengen ti tiempo ti Dios tapno ti Biblia matarusan; ket gapu ta, naan-anay a konsagrado iti Apo ken iti serbisiona, isut’ napalubosan a nangtarus iti dayta. Gapu ta isut’ naipamaysa iti panangpatanor kadagiti bunga ken asi ti Nasantuan nga Espiritu, ti kari ti Apo natungpal kenkuana: ‘Ta no dagitoy a banag addada kadakayo ken nawadwadda, aramidendakayo a saan a lupes wenno di nabunga iti pannakaammo iti Apotayo a Jesu-Kristo.’​—2 Pedro 1:5-8.”​—The Watch Tower, Disiembre 1, 1916, p. 356.

Nabunga ti panagsirarak da C. T. Russell ken dagiti kakaduana iti Nainkasuratan a pannakatarus. Kas managayat iti kinapudno, namatida a ti Biblia isut’ naipaltiing a Sao ti Dios. (2 Tim. 3:16, 17) Inlaksidda ti ebolusion nga ideya ni Darwin ken dagidi makadadael-pammati a kapanunotan dagiti masirib a mammabalaw iti Biblia. Gapu ta inakseptarda ti Kasuratan kas kangatuan nga autoridad, inlaksidda met kas di nainkasuratan ti sursuro a Trinidad, imortalidad ti kararua, ken agnanayon a tuok​—dokdoktrina a nairamut kadagiti pagano a relihion. Naibilang kadagiti “naindaklan a kinapudno” nga inakseptarda a ta ni Jehova isut’ Namarsua iti isuamin a banag, a ni Jesu-Kristo isut’ Anak ti Dios, nga intedna ti biagna a subbot kadagiti sabsabali, a ti isusubli ni Jesus ket di makita a kaadda kas naespirituan a parsua. (Mat. 20:28; Juan 3:16; 14:19; Apoc. 4:11) Natarusanda pay a sibabatad a ti tao ket mortal a kararua.​—Gen. 2:7; Ezeq. 18:20.

Saan a gapu ta dagiti Estudiante ti Biblia a kakadua ni Russell ket nalukasanda amin dagitoy a kinapudno; adun ti natarusan dagidi immun-una a napasnek a tattao nga agkunkuna a Kristianoda, a dadduma kadakuada ti nagtakder a sititibker nupay saan a naawat idi dagita a sursuro. Ngem nakitunos kadi dagita a tao kadagiti amin a Nainkasuratan nga annuroten ti pudno a panagdaydayaw? Kas pangarigan, talaga kadi a saanda idi a paset ti lubong, a kas kinuna ni Jesus a pagbalinan dagiti pudno a pasurotna?

Kas mainayon iti panangmatmatda iti Biblia, aniada pay dagiti sabali a pamay-an a nalawag a nakaidumaan dagidi immuna nga Estudiante ti Biblia a kakadua ni Russell? Dayta ket iti regta nga impakitada iti inda panangiburay iti pammatida kadagiti sabsabali, nga addaan naipangpangruna a panangipaganetget iti panangiwaragawag iti nagan ken Pagarian ti Dios. Nupay bassitda idi, napartak a naidanonda ti naimbag a damag kadagiti pinulpullo a daga. Pudno met aya a saanda a paset ti lubong, kas pasurot ni Kristo? Kadagiti dadduma a banag, wen. Ngem ti pannakaammoda iti responsabilidad a nairaman iti daytoy ket simmayaat manipud idi Gubat Sangalubongan I, agingga ita nagbalin a naisangsangayan a pakabigbigan dagiti Saksi ni Jehova. Saan koma a malipatan a no dagiti dadduma a relihiuso a grupo ket itantan-okda ti Liga de Naciones ken idi agangay, ti Naciones Unidas, inwaragawag dagiti Saksi ni Jehova ti Pagarian ti Dios​—saan ket a ti organisasion nga inaramid ti tao​—kas kakaisuna a namnama ti sangatauan.

Ngem saan kadi a dadduma a sursuro dagiti Saksi ni Jehova nabaliwbaliwan kadagiti naglabas a tawtawen? No talaga a pinili ken indalan ti Dios ida ken no dagiti sursuroda ket sinuportaran ti Nainkasuratan nga autoridad, apay a kasapulan ti kakasta a panagbaliwbaliw?

No Kasano nga Idalan ni Jehova ti Ilina

Dagidiay mangbukel iti maymaysa a pudno a Nakristianuan nga organisasion itatta awananda kadagiti angheliko a palgaak wenno nadibinuan a paltiing. Ngem addaanda iti naipaltiing a Nasantuan a Kasuratan, a naglaon kadagiti palgaak ti panunot ken pagayatan ti Dios. Kas organisasion ken kas indibidual, masapul nga akseptarenda ti Biblia kas nadibinuan a kinapudno, adalenda a siaannad, ket bay-anda a mangimpluensia dayta kadakuada. (1 Tes. 2:13) Ngem kasanoda a makagteng iti umiso a pannakatarus iti Sao ti Dios?

Kunaen a mismo ti Biblia: “Saan kadi a kukua ti Dios ti panangipatarus?” (Gen. 40:8) No bayat nga ad-adalenda dagiti Kasuratan ket adda teksto a narigatda a matarusan, masapul nga agsukimatda tapno masarakanda dagiti dadduma a naipaltiing a teksto a mamaglawag iti dayta a tema. Iti kasta bay-anda a ti Biblia ti mangipatarus iti bukodna, ket manipud iti daytoy ikagumaanda a tarusan “ti padron” ti kinapudno a nailanad iti Sao ti Dios. (2 Tim. 1:13) Ni Jehova idalanna wenno iwanwanna ida iti kasta a pannakatarus babaen iti nasantuan nga espirituna. Ngem tapno iwanwan ti espiritu ida, masapul a parang-ayenda dagiti bungana, a saanda a pagluksawen wenno agtignayda a maikontra iti dayta, ket makitunosda kadagiti panangtinggarna. (Gal. 5:22, 23, 25; Efe. 4:30) Maysa pay, no sireregta nga iyaplikarda dagiti naadalda, pabpabilgenda met ti pammatida, kas pakaibatayan ti inda pananggun-od iti nabatbatad manen a pannakatarus no kasano nga aramidenda ti pagayatan ti Dios iti lubong a saan[na ida] a paset.​—Luc. 17:5; Fil. 1:9, 10.

Ni Jehova naynay nga indaldalanna ti ilina kadagiti nabatbatad a pannakatarus iti pagayatanna. (Sal. 43:3) Kastoy ti pannakailadawan ti panangigiyana kadakuada: No adda tao a nabayag unayen iti nasipnget a siled, saan kadi a kasayaatan no isut’ agin-inut a mairuar idiay lawag? Ni Jehova inturongna ti ilina iti lawag ti kinapudno iti kasta met la a wagas; progresibo ti pananglawagna kadakuada. (Idiligyo ti Juan 16:12, 13.) Naaramid kas kinuna ti proverbio: “Ti dana dagidiay nalinteg kasla iti naraniag a lawag nga ad-adda a rumanraniag agingga iti napaypayso nga aldaw.”​—Prov. 4:18.

Dagiti pannakilangen ni Jehova kadagiti pinilina nga adipen idi tiempo ti Biblia pasingkedanna a ti nabatad a pannakatarus iti pagayatan ken pangpanggepna masansan nga agin-inut a dimteng. Gapuna, ni Abraham dina naan-anay a natarusan no kasano nga agbanagto ti panggep ni Jehova mainaig iti “bin-i.” (Gen. 12:1-3, 7; 15:2-4; idiligyo ti Hebreo 11:8.) Ni Daniel dina naawatan ti ultimo a pagbanagan dagiti padto nga inrekordna. (Dan. 12:8, 9) Ni Jesus, idi adda ditoy daga, binigbigna a dina ammo ti aldaw ken oras a panagngudonto ti agdama a sistema ti bambanag. (Mat. 24:36) Dagidi apostol dida natarusan idi damo a ti Pagarian ni Jesus ket nailangitan, a saan a maipasdek dayta idi immuna a siglo, ket uray dagiti Gentil makipagtawiddanto.​—Luc. 19:11; Ara. 1:6, 7; 10:9-16, 34, 35; 2 Tim. 4:18; Apoc. 5:9, 10.

Saantay koma a masdaaw nga uray itoy moderno a panawen kasta met, a masansan nga indalan ni Jehova ti ilina kas progresibo nga organisasion, nga agin-inut a lawaganna ida kadagiti kinapudno ti Biblia. Saan a dagiti kinapudno a mismo ti agbalbaliw. Ti kinapudno agtalinaed a kinapudno. Ti pagayatan ken panggep ni Jehova, kas naibalabala iti Biblia, agtalinaed a nalagda. (Isa. 46:10) Ngem daydiay pannakatarusda kadagitoy a kinapudno progresibo a lumawag “iti maitutop a tiempo,” ti maikanatad a tiempo ni Jehova. (Mat. 24:45; idiligyo ti Daniel 12:4, 9.) No dadduma, gapu iti panagerrado ti tao wenno sobra a kinaregta, masapul a mabaliwan ti panangmatmatda.

Kas pangarigan, iti nagduduma a tiempo iti moderno a historia dagiti Saksi ni Jehova, ti regta ken gagarda iti pannakaalangon ti kinasoberano ni Jehova nagturong iti nasapa a panangseggada no kaano a manungpal ti dakes a sistema ti bambanag ni Satanas. (Ezeq. 38:21-23) Ngem ni Jehova dina impalgak a nasapsapa ti eksakto a tiempo. (Ara. 1:7) Iti kasta, kapilitan a binaliwan ti ili ni Jehova ti panangmatmatda iti daytoy a banag.

Dagita a pannakabalbaliw ti panangmatmat dina kaipapanan a nagbaliw ti panggep ti Dios. Ket dida met nga isingasing a ti panungpalan daytoy a sistema ket masapul a mabayag pay. Maisungani ketdi, ti kaitungpalan dagiti padto ti Biblia maipapan iti “panagngudo ti sistema ti bambanag” pasingkedanda ti kinaasideg ti panungpalan. (Mat. 24:3) Bueno, gapu kadi ta dagiti Saksi ni Jehova naaddaanda ti nasapa a panangsegga kaipapanannan a saan ida nga idaldalan ti Dios? Uray ti saludsod idi dagiti adalan maipapan iti iyaasideg ti Pagarian idi tiempoda dina kaipapanan a saan a pinili ken indalan ti Dios ida!​—Ara. 1:6; idiligyo ti Aramid 2:47; 6:7.

Apay a sigurado unay dagiti Saksi ni Jehova a pudno ti relihionda? Ngamin ta patien ken akseptarenda ti kunaen ti Biblia no maipapan kadagiti tanda a pakailasinan dagiti pudno nga agdaydayaw. Ti moderno nga aldaw a historiada, kas naisalaysay kadagiti immuna a kapitulo daytoy a publikasion, ipakitana a, maalagadda dagita nga annuroten, saan la a kas indibidual no di kas maysa nga organisasion: Sisusungdo nga itandudoda ti Biblia kas sagrado a Sao ti kinapudno ti Dios (Juan 17:17); dida pulos makinamin kadagiti nailubongan a ganuat (Sant. 1:27; 4:4); saksianda ti nadibinuan a nagan, a Jehova, ket iwaragawagda ti Pagarian ti Dios kas kakaisuna a namnama ti sangatauan (Mat. 6:9; 24:14; Juan 17:26); ken pudpudno nga ay-ayatenda ti maysa ken maysa.​—Juan 13:34, 35.

Apay a ti ayat isut’ nagpaiduma a pakailasinan dagiti agdaydayaw iti pudno a Dios? Ania a klase nga ayat ti pakailasinan dagiti pudno a Kristiano?

[Dagiti Footnote]

[Blurb iti panid 705]

Apaman a napilin ida ti Dios, nasken nga agtalinaedda a natulnog kadagiti lintegna

[Blurb iti panid 706]

Kasanonto a mailasin dagiti pudno nga agdaydayaw nga agbibiag inton panawen ti panungpalan?

[Blurb iti panid 707]

“Dina inako nga adda naisangsangayan a palgaakna manipud iti Dios”

[Blurb iti panid 708]

Bay-anda a ti Biblia ti mangipatarus iti bukodna

[Blurb iti panid 709]

Indalan ni Jehova ti ilina kas progresibo nga organisasion, nga agin-inut a lawaganna ida kadagiti kinapudno ti Biblia