Ti Panagapit ti Pudno a Managebanghelio

IMMUNA a napan ni William R. Brown idiay Africa idi 1923. Kaduana ni baketna ken ti anakna, ‘inaramidna ti trabaho ti managebanghelio’ idiay Gambia, Ghana, Liberia, Nigeria, ken Sierra Leone. (2 Timoteo 4:5) Nakaskasdaaw ti resulta ti trabahona.

Daytoy a tubo ti West Indies ket saan a miembro ti maysa kadagiti simbaan ti Kakristianuan ken sigurado a di nakinamin iti politika. Imbes ketdi, tinuladna ni Jesus ken dagiti apostol babaen ti panangiwaragawag ti nagan ken kinasoberano ni Jehova, nga impagpaganetgetna ti kinapateg ti subbot, ken inkaskasabana ti naimbag a damag ti Pagarian. (Mateo 9:35; 20:28; Juan 17:4-6) Kanayon a ti Biblia ti inusar ni William R. Brown, a daytat’ intudona kas ti di masupiat nga autoridad no iti doktrina ken pammati. (2 Timoteo 3:16) Isut’ napinget unay iti daytoy isu a naawagan iti Bible Brown.

Babaen pammendision ni Jehova, dagiti bukel nga immula ni Bible Brown ket nagtubo ken dimmakkel. Ita, kadagiti daga a sadiay isut’ nanglukat ti dalan, agarup 200,000 nga Africano ti nangidedikar ti biagda iti Namarsuada ket, ikaskasabada metten ti naimbag a damag ti Pagarian kadagiti sabsabali. (Mateo 24:14; 1 Corinto 3:6-9) Agdinamag dagitoy nga aktibo a Kristiano gapu iti kinamapagtalkan ken kinamapangnamnamaanda. Maipagpannakkelda ti panagbalinda a Saksi ni Jehova ken iturayan ni Kristo, ti agturturayen nga Ari.

Ti kasta a panagapit ket resulta ti pudno a Nakristianuan a panagebanghelio. Maar-aramid ti umasping a panagapit iti intero a lubong iti amin a mapagnaedan a kontinente. Iti nasurok a 200 a dagdaga, nasuroken nga uppat a milion a naemmat’-panagpuspusona a lallaki ken babbai ti “naapit” ket ul-ulitenda kadagiti dadduma ti sasao ti managebanghelio nga anghel: “Agbutengkay iti Dios ket itedyo kenkuana ti dayag, agsipud ta dimtengen ti oras a panangukomna.” (Apocalipsis 14:7) Kinapudnona, ti laeng pakabirukan ti namnama iti nariribuk a panawentayo isu ti panagbaw-ing iti Dios ken panagpasakop iti turay ti Pagarianna.

Awatenyo Kadi ti Maysa nga Isasarungkar?

Uray iti daytoy nariribuk a lubong, magun-odanyo ti kinaragsak manipud umiso a pannakaammo iti Biblia maipapan iti Dios, iti Pagarianna, ken iti nakaskasdaaw a panggepna maipaay iti sangatauan. No awatenyo ti ad-adu pay nga impormasion wenno no kayatyo nga adda maysa a sumarungkar kadakayo tapno idauluannakayo iti libre a panagadal ti Biblia iti pagtaenganyo, pangaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista idiay panid 2.