Kas impadto ni Jesus, ti ‘kaaddana’ kas nailangitan nga Ari ket mailasin babaen kadagiti nakadkadlaw a pasamak iti lubong kas iti gubat, bisin, ginggined, ken angol. (Mateo 24:3-8; Lucas 21:11) Nalawag a paneknekan dagita a pasamak nga idi 1914 a naipasngay ti nailangitan a Pagarian ti Dios ken nangrugi dagiti “maudi nga aldaw” daytoy agdama a dakes a sistema ti bambanag.​—2 Timoteo 3:1-5.

MANMANO a nadakamat iti Biblia ti espiritu a parsua nga agnagan Miguel. Nupay kasta, tunggal madakamat, adda ar-aramidenna. Iti libro a Daniel, makirangranget ni Miguel kadagiti dakes nga anghel; iti surat ni Judas, makisupsupiat ken ni Satanas; ket iti Apocalipsis, makigubgubat iti Diablo ken kadagiti demoniona. Babaen ti panangidepensana iti turay ni Jehova ken pannakidangadangna kadagiti kabusor ti Dios, pampaneknekan ni Miguel ti kaipapanan ti naganna​—“Siasino ti Umasping iti Dios?” Ngem siasino ni Miguel?

Adda dagiti tattao a no dadduma, saan laeng a maymaysa ti pagaammo a naganda. Kas pagarigan, maawagan met ni patriarka a Jacob iti Israel, ket ni apostol Pedro napanaganan met iti Simon. (Genesis 49:1, 2; Mateo 10:2) Umasping iti dayta, ipakita ti Biblia a ti Miguel ket sabali pay a nagan ni Jesu-Kristo, sakbay ken kalpasan ti panagbiagna ditoy daga. Usigentayo dagiti Nainkasuratan a pangibatayan iti dayta a konklusion.

Arkanghel. Iti Sao ti Dios, maawagan ni Miguel kas “arkanghel.” (Judas 9) “Pangulo nga anghel” ti kaipapanan daytoy a sao. Nausar laeng iti Biblia ti sao nga “arkanghel” iti anag a maymaysa ken pulos a di nausar ti sasao a “dagiti arkanghel,” a kas man la aduda. Ipasimudaag daytoy a maymaysa laeng ti kasta nga anghel. Maysa pay, nainaig ken ni Jesus ti saad nga arkanghel. Maipapan ken ni napagungar nga Apo Jesu-Kristo, kuna ti 1 Tesalonica 4:16: “Ti Apo a mismo bumabanto manipud langit buyogen ti agbilbilin nga awag, buyogen ti timek ti maysa nga arkanghel.” No kasta, nailadawan ti timek ni Jesus kas timek ti arkanghel. Ipasimudaag ngarud daytoy a teksto a ni met laeng Jesus ni Miguel nga arkanghel.

Pangulo ti Buyot. Kuna ti Biblia a ‘ni Miguel ken dagiti anghelna nakibakalda iti dragon ken kadagiti anghelna.’ (Apocalipsis 12:7) No kasta, ni Miguel ti Pangulo ti buyot dagiti matalek nga anghel. Iti Apocalipsis, nailadawan met ni Jesus kas Pangulo ti buyot dagiti matalek nga anghel. (Apocalipsis 19:14-16) Maysa pay, espesipiko a dinakamat ni apostol Pablo “ni Apo Jesus” ken “dagiti mannakabalin nga anghelna.” (2 Tesalonica 1:7) Agpada ngarud a dinakamat ti Biblia ni Miguel ken “dagiti anghelna” ken ni Jesus ken “dagiti anghelna.” (Mateo 13:41; 16:27; 24:31; 1 Pedro 3:22) Yantangay awan a pulos ti ibagbaga ti Biblia maipapan iti dua a buyot a buklen dagiti matalek nga anghel idiay langit​—nga idauluan ni Miguel ti maysa ket idauluan met ni Jesus ti sabali​—nalawag ngarud a ni Miguel ket awan sabali no di ni Jesu-Kristo iti nailangitan a saadna.a

NAGLAON ti libro nga Apocalipsis kadagiti sasao a saan a literal ti kaipapananda. (Apocalipsis 1:1) Kas pagarigan, dakamatenna ti maysa a babai nga iti mugingna naisurat ti nagan a “Babilonia a Dakkel.” Naikuna a nakatugaw daytoy kadagiti ‘bunggoy ken nasion.’ (Apocalipsis 17:1, 5, 15) Yantangay awan ti literal a babai a makaaramid iti kastoy, simboliko ngarud ti Babilonia a Dakkel. Ania ti iladladawan daytoy a simboliko a balangkantis?

Iti Apocalipsis 17:18, nailadawan ti isu met laeng a piguratibo a babai kas “ti dakkel a siudad nga addaan pagarian iti ar-ari ti daga.” Ti termino a “siudad” ipasimudaagna ti organisado a grupo dagiti tattao. Yantangay iturayan daytoy “dakkel a siudad” dagiti “ar-ari ti daga,” ti babai a maawagan Babilonia