Maseknan Kadi Kaniak ti Dios?
Dagiti gagangay a sungbat:
▪ “Natan-ok unay ti Dios tapno maseknan kadagiti parikutko.”
▪ “Diak mamati nga isu ket maseknan kaniak.”
Ania ti insuro ni Jesus?
▪ “Saan kadi a ti lima a billit-tuleng mailako iti dua a sinsilio a bassit ti pategna? Kaskasdi awan uray maysa kadakuada ti malipatan iti sanguanan ti Dios. Ngem uray dagiti buok ti ul-uloyo nabilang aminen. Dikay agbuteng; napatpategkayo ngem iti adu a billit-tuleng.” (Lucas 12:6, 7) Awan duadua nga insuro ni Jesus a maseknan kadatayo ti Dios.
▪ “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo.” (Mateo 6:31, 32) Patien ni Jesus nga ammo ti Dios dagiti personal a kasapulantayo.
NALAWAG ti kuna ti Biblia a maseknan kadatayo ti Dios. (Salmo 55:22; 1 Pedro 5:7) No kasta, apay ngarud a nakaro ti panagsagabatayo ita? No naayat ken mannakabalin-amin ti Dios, apay ngarud a dina pagpatinggaen ti panagsagaba?
Ti sungbat ket mainaig iti maysa a kinapudno a saan a pagaammo ti adu a tattao—a ni Satanas a Diablo ti agturturay iti daytoy dakes a lubong. Idi sinulisogna ni Jesus, intukon ni Satanas ti amin a pagarian ditoy lubong, a kunkunana: “Itedkonto kenka amin daytoy nga autoridad ken ti dayagda, agsipud ta nayawat kaniak, ket iti asinoman a kayatko itedko dayta.”—Lucas 4:5-7.
Asino ti namagbalin ken Satanas kas ti agturay iti lubong? Idi a ti immuna a nagannaktayo a da Adan ken Eva nagtulnogda ken Satanas ken nagsukirda iti Dios, arigna a ni Satanas ti pinilida kas mangituray kadakuada. Sipud daydi nga iyaalsa, ni Jehova a Dios siaanus nga impalubosna ti nawatiwat a tiempo tapno mapaneknekan a naan-anay a napaay ti panangituray ni Satanas. Saan a piliten ni Jehova nga agserbi kenkuana dagiti tattao, ngem nangted iti gundaway tapno makasublitayo kenkuana.—Roma 5:10.
Gapu ta maseknan kadatayo ti Dios, inyurnosna ti panangispal kadatayo ni Jesus manipud iti turay ni Satanas. Iti mabiiten, ‘pukawento ni Jesus daydiay addaan iti pannakabalin a mangyeg iti ipapatay, awan sabali, ti Diablo.’ (Hebreo 2:14) Iti kasta, “dadaelenna dagiti aramid ti Diablo.”—1 Juan 3:8.
Agbalinto manen a paraiso ti daga. Iti dayta a tiempo, ti Dios ‘punasennanto ti amin a lua kadagiti mata dagiti tattao, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.’—Apocalipsis 21:4, 5.a
[Footnote]
a Para iti kanayonan nga impormasion no apay nga ipalpalubos ti Dios ti panagsagaba, kitaenyo ti kapitulo 11 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.
[Blurb iti panid 8]
Agbalinto manen a paraiso ti daga