Saludsod Dagiti Agbasbasa
Nangalaan ni Cain iti Asawana?
▪ “No da Cain ken Abel laeng ti annak da Adan ken Eva, nangalaan ngarud ni Cain iti asawana?” Dagiti managduadua iti Biblia ti masansan a mangisaludsod iti dayta tapno mangriroda. Nupay kasta, mangipaay ti Biblia iti makapnek a sungbat.
Ipaay ti Genesis kapitulo 3 ken 4 dagitoy nga impormasion: (1) Ni Eva ti “ina ti isuamin a sibibiag.” (2) Adu a panawen ti naglabas sipud nayanak ni Cain agingga idi nangidatag iti daton a linaksid ti Dios. (3) Kalpasan ti pannakapapanaw ni Cain kas “managallaalla ken pugante,” nagdanag nga amangan ta papatayen ti ‘asinoman a makasarak kenkuana.’ (4) Nangted ti Dios iti pagilasinan a salaknibannanto ni Cain, a mangipasimudaag a posible a papatayen dagiti kakabsatna wenno dadduma a kabagianna. (5) “Kalpasanna,” nakidenna ni Cain ken asawana iti “daga ti Kinapugante.”—Genesis 3:20; 4:3, 12, 14-17.
Sigun iti dayta nga impormasion, siuumiso a maibagatayo a kaputotan ni Eva ti asawa ni Cain nupay ditay ammo ti petsa ti pannakayanakna. Kuna ti Genesis 5:4 a bayat ti 930 a tawen a panagbiag ni Adan, “nagbalin nga ama ti annak a lallaki ken babbai.” Siempre, saan nga espesipiko nga ibaga ti Biblia nga anak ni Eva ti asawa ni Cain. Ngem yantangay nadakamat laeng ti maipapan iti asawana kalpasan a napagtalaw ni Cain, ipamatmat ngarud dayta nga adun a panawen ti limmabas ket mabalin pay ketdi nga apoko da Adan ken Eva ti nagbalin nga asawa ni Cain. Gapuna, deskribiren ti The Amplified Old Testament a ti asawa ni Cain ket “maysa kadagiti kaputotan ni Adan.”
Ti maika-19 a siglo a komentarista iti Biblia a ni Adam Clarke pagarupenna a ti pagilasinan kas resulta ti panagamak ni Cain ket impasdek ti Dios gapu ta addan sumagmamano a henerasion dagiti kaputotan ni Adan—nga umdasen ti kaaduda “tapno makaibangonda iti sumagmamano a purok.”
Nalabit matmatan ti dadduma a kagimongan ita a di maiparbeng ti panangasawa ni Cain iti kabsatna wenno iti kabagianna a nagtaud met laeng iti siasinoman kadagiti annak ni Adan. Maikaniwas ngamin dayta iti gagangay a kaugalian ti kagimongan wenno kaamakda dayta gapu iti posible a depekto nga ibungana kadagiti maipasngay nga annak. Nupay kasta, nagkomento ni F. LaGard Smith iti libro a The Narrated Bible in Chronological Order: “Posible a talaga a nagiinnasawa dagitoy immuna nga agkakabsat, nupay adda dakes nga epekto dayta no maaramid kadagiti sumaganad a henerasion.” Kasta met, sa la naiparit ti panagdenna dagiti asideg nga agkabagian idi nga inawat ni Moises ti linteg ti Dios para iti nasion ti Israel idi 1513 K.K.P.—Levitico 18:9, 17, 24.
Rinibribu a tawenen ti napalabas sipud idi perpekto pay dagiti immuna a nagannak kadatayo. Saan a kas kadatayo ita, mabalin a saan a nagminar kadakuada idi ti epekto ti matawid a kinaimperpekto. Kasta met, ipakita dagiti nabiit pay a panagadal, kas iti naipablaak iti Journal of Genetic Counseling, a basbassit ngem iti pagaammo ti kaaduan ti posibilidad a maaddaan iti abnormal nga annak dagiti agassawa nga agkasinsin. Rasonable ngarud a panunoten a dayta a banag ket saan unay a pakaseknan dagiti tattao idi panawen ni Adan wenno uray pay sakbay ti kaaldawan ni Noe. No kasta, maibagatayo a ti asawa ni Cain ket maysa kadagiti kabagianna.