“Ti Panguluenyo ket Maymaysa, ni Kristo”

“Dikay . . . maawagan iti ‘papanguluen,’ ta ti Panguluenyo ket maymaysa, ni Kristo.”​—MAT. 23:9, 10.

1. Asino ti bigbigen dagiti Saksi ni Jehova kas Liderda, ken apay?

ADDA natauan a lider dagiti relihion ti Kakristianuan, kas iti papa ti Roma, obispo dagiti relihion ti Eastern Orthodox, ken panguluen ti dadduma a relihion. Ngem dagiti Saksi ni Jehova awan ti bigbigenda a natauan a liderda. Saan ida nga adalan wenno pasurot ti asinoman a tao. Maitunos dayta iti impadto ni Jehova maipapan iti Anakna: “Adtoy! Kas maysa a saksi kadagiti nasional a bunggoy isu intedko, kas maysa a panguluen ken komandante kadagiti nasional a bunggoy.” (Isa. 55:4) Ti internasional a kongregasion dagiti napulotan a Kristiano ken ti kakaduada a “sabsabali a karnero” dida bigbigen ti asinoman a lider malaksid iti daydiay dinutokan ni Jehova nga agbalin a liderda. (Juan 10:16) Umanamongda iti kinuna ni Jesus: “Ti Panguluenyo [wenno, Lideryo] ket maymaysa, ni Kristo.”​—Mat. 23:10.

Naespirituan a Prinsipe ti Israel

2, 3. Kasano a ti Anak ti Dios ket aktibo a nakiraman kadagiti aktibidad ti Israel?

² Sinigsiglo sakbay ti pannakaipasdek ti kongregasion Kristiano, adda anghel a dinutokan ni Jehova tapno mangidaulo kadagiti Israelita. Kalpasan nga inruarna ida manipud Egipto, kinuna kadakuada ni Jehova: “Adtoy ibaonko ti maysa nga anghel iti masanguanam tapno aywanannaka iti dalan ken tapno ipannaka iti disso nga insaganak. Aluadam ta bagim gapu kenkuana ket agtulnogka iti timekna. Dika agtignay a sirerebelioso kenkuana, ta saannanto a pakawanen ti salungasingyo; agsipud ta ti naganko adda kenkuana.” (Ex. 23:20, 21) Awan duadua a dayta nga anghel, a ‘ti nagan ni Jehova adda kenkuana,’ ket ti inauna nga Anak ti Dios.

³ Sakbay ti pannakaipasngayna kas tao, agparang a ti nagan ti Anak ti Dios ket Miguel. Iti libro ti Daniel, naawagan ni Miguel kas ‘ti prinsipe’ ti Israel. (Dan. 10:21) Impamatmat ni adalan a Judas a nabayagen a makiramraman ni Miguel kadagiti aktibidad ti Israel sakbay pay ti kaaldawan ni Daniel. Idi natay ni Moises, agparang a kayat nga usaren ni Satanas ti bangkay ni Moises tapno ituggodna ti Israel nga agbasol iti idolatria. Ngem linapdan dayta ni Miguel. Kuna ni Judas: “Idi a ni Miguel nga arkanghel naaddaan ti pannakisusik iti Diablo ket nakisupsupiat maipapan iti bagi ni Moises, saanna a naitured ti mangyeg iti panangukom maibusor kenkuana iti nabassawang a sasao, no di ket kinunana: ‘Babalawennaka koma ni Jehova.’” (Jud. 9) Di nagbayag, sakbay ti pannakalakub ti Jerico, awan duadua a ti nagparang ken Josue ket ni Miguel, ti “prinsipe ti buyot ni Jehova,” tapno ipanamnamana kenkuana ti tulong ti Dios. (Basaen ti Josue 5:13-15.) Idi a ti maysa a nabileg a demonio pinadasna a lappedan ti anghel a mangidanon iti napateg a mensahe ken propeta Daniel, ti arkanghel a ni Miguel tinulonganna dayta nga anghel.​—Dan. 10:5-7, 12-14.

Dimteng ti Naipadto a Lider

4. Ania ti naipadto maipapan iti idadateng ti Mesias?

⁴ Sakbay dayta a pasamak, imbaon ni Jehova ti anghelna a ni Gabriel tapno ibagana ken propeta Daniel ti padto maipapan iti idadateng ti “Mesias a Panguluen.” (Dan. 9:21-25)a Iti eksakto a tiempo, idi otonio 29 K.P., nabautisaran ni Jesus babaen ken Juan. Naiparukpok ken Jesus ti nasantuan nga espiritu, a namagbalin kenkuana kas Daydiay Napulotan​—ti Kristo ken Mesias. (Mat. 3:13-17; Juan 1:29-34; Gal. 4:4) Kas Mesias, awan ti umartap kenkuana kas Lider.

5. Kasano a nagtignay ni Kristo kas Lider bayat ti ministeriona ditoy daga?

⁵ Manipud rugi ti ministerio ni Jesus, pinaneknekanna nga isu ti “Mesias a Panguluen.” Kalpasan ti sumagmamano laeng nga aldaw, rinugianna nga inurnong dagiti adalanna, ken inaramidna ti umuna a milagrona. (Juan 1:35–2:11) Simmurot kenkuana dagiti adalanna bayat a winanasna ti nadumaduma a lugar, nga inkasabana ti naimbag a damag ti Pagarian. (Luc. 8:1) Sinanayna ida a mangasaba ken indauluanna ti panangasaba ken panangisuro a trabaho, a nangipasdek iti nasayaat nga ulidan. (Luc. 9:1-6) Nasayaat met a tuladen dagiti Kristiano a panglakayen dayta nga ulidanna.

6. Iti ania a pamay-an a pinaneknekan ni Kristo nga isu ket maysa a Pastor ken Lider?

⁶ Intampok ni Jesus ti sabali pay nga aspeto ti panangidaulona babaen ti panangidiligna iti bagina iti maysa a naayat a pastor. Dagiti pastor iti Daya literal nga idauluanda dagiti arbanda. Iti librona a The Land and the Book, insurat ni W. M. Thomson: “Umun-una ti pastor, saan laeng a tapno isurona ti dalan, no di ket tapno siguraduenna a nasayaat ken natalged dayta. . . . Babaen ti sarukodna, idauluan ken iturongna ti arban iti naraber a pagaraban, ken salaknibanna ida manipud kadagiti kabusor.” Tapno ipakitana nga isu ket pudno a Pastor ken Lider, kinuna ni Jesus: “Siak ti nasayaat a pastor; ti nasayaat a pastor isukona ti kararuana maigapu kadagiti karnero. Imdengan dagiti karnerok ti timekko, ket am-ammok ida, ket surotendak.” (Juan 10:11, 27) Maitunos iti sinaona, natay ni Jesus kas daton agpaay kadagiti karnerona, ngem ni Jehova ‘intan-okna kas Pangulo ken Mangisalakan.’​—Ara. 5:31, Ti Baro a Naimbag a Damag Biblia; Heb. 13:20.

Mangimatmaton iti Kongregasion Kristiano

7. Babaen iti ania nga imatmatonan ni Jesus ti kongregasion Kristiano?

⁷ Sakbay unay a nagpalangit, ti napagungar a ni Jesus kinunana kadagiti adalanna: “Isuamin nga autoridad naiteden kaniak idiay langit ken ditoy daga.” (Mat. 28:18) Ni Jehova inikkanna ni Jesus iti autoridad a mangipaay iti nasantuan nga espiritu tapno mapabilegna dagiti adalanna iti Nakristianuan a kinapudno. (Juan 15:26) Imparukpok ni Jesus dayta nga espiritu kadagiti nagkauna a Kristiano idi Pentecostes 33 K.P. (Ara. 2:33) Dayta a pannakaiparukpok ti nasantuan nga espiritu ti nangrugian ti pannakaipasdek ti kongregasion Kristiano. Ni Jehova dinutokanna ti Anakna idiay langit kas Lider ti amin a kongregasion ditoy daga. (Basaen ti Efeso 1:22; Colosas 1:13, 18.) Iwanwanwan ni Jesus ti kongregasion Kristiano babaen ti nasantuan nga espiritu ni Jehova, ken tumultulong kenkuana dagiti anghel a ‘naipasakup kenkuana.’​—1 Ped. 3:22.

8. Ania ti inusar ni Kristo ditoy daga tapno idauluanna dagiti adalanna idi umuna a siglo, ken siasino ti us-usarenna ita?

⁸ Babaen pay iti nasantuan nga espiritu, nangipaay ni Kristo iti “sagut a tattao,” a dadduma ket “papastor ken mannursuro” iti kongregasion. (Efe. 4:8, 11) Indagadag ni apostol Pablo kadagiti manangaywan a Kristiano: “Asikasuenyo ti bagbagiyo ken ti isuamin nga arban, a kadakuada dinutokannakayo ti nasantuan nga espiritu kas manangaywan, tapno ipastoranyo ti kongregasion ti Dios.” (Ara. 20:28) Idi nangrugi ti kongregasion Kristiano, amin a nagserbi a manangaywan ket napulotan iti espiritu. Dagiti apostol ken panglakayen iti kongregasion ti Jerusalem ti nagserbi kas bagi a manarawidwid. Isuda ti inusar ni Kristo a mangidaulo iti intero a grupo dagiti napulotan a ‘kakabsatna’ ditoy daga. (Heb. 2:11; Ara. 16:4, 5) Iti daytoy tiempo ti panungpalan, intalek ni Kristo ti “amin a sanikuana”​—amin nga interes ti Pagarian ditoy daga​—iti “matalek ken masirib nga adipen” ken iti representantena a Bagi a Manarawidwid, maysa a grupo dagiti napulotan a Kristiano. (Mat. 24:45-47) Dagiti napulotan ken ti kakaduada a sabsabali a karnero bigbigenda a ti panagpaidalanda iti moderno-aldaw a Bagi a Manarawidwid ket kinapudnona panagpaidalan iti Liderda, ni Kristo.

Inyussuat ni Kristo ti Trabaho a Panangasaba

9, 10. Kasano nga inturong ni Kristo dagiti bambanag mainaig iti pannakaisaknap ti naimbag a damag ti Pagarian?

⁹ Personal nga iwanwanwan ni Jesus ti sangalubongan a panangasaba ken panangisuro sipud pay idi nangrugi dagitoy nga aktibidad. Impasdekna ti urnos no kasano a maipakaammo ti naimbag a damag ti Pagarian kadagiti tattao ditoy daga. Bayat ti ministeriona, binilinna dagiti apostolna: “Dikay mapan iti dalan dagiti nasion, ket dikay sumrek iti maysa a siudad dagiti Samaritano; ngem, imbes ketdi, mapankayo nga agtultuloy kadagiti napukaw a karnero iti balay ti Israel. Bayat a mapankayo, mangasabakayo, a kunkunayo, ‘Ti pagarian ti langlangit asidegen.’” (Mat. 10:5-7) Sireregta a kinasabaanda dagiti Judio ken proselita, nangruna kalpasan ti Pentecostes 33 K.P.​—Ara. 2:4, 5, 10, 11; 5:42; 6:7.

¹⁰ Idi agangay, babaen ti nasantuan nga espiritu, linuktan ni Jesus ti pannakaikasaba ti Pagarian kadagiti Samaritano ken kalpasanna kadagiti saan a Judio. (Ara. 8:5, 6, 14-17; 10:19-22, 44, 45) Tapno maikasaba ti naimbag a damag kadagiti nasion, ni Jesus a mismo ti nangtignay ken Saulo a taga-Tarso tapno agbalin a Kristiano. Binilinna ti adalanna a ni Ananias: “Tumakderka, mapanka iti kalsada a maawagan Nalinteg, ket iti balay ni Judas sapulem ti maysa a tao a managan Saulo, a taga Tarso. . . . Inka, agsipud ta daytoy a tao ket napili a basehas maipaay kaniak tapno ipanna ti naganko kadagiti nasion kasta met iti ar-ari ken iti annak ti Israel.” (Ara. 9:3-6, 10, 11, 15) “Daytoy a tao” ti nagbalin nga apostol Pablo.​—1 Tim. 2:7.

11. Babaen ti nasantuan nga espiritu, kasano nga inturong ni Kristo ti pannakaisaknap ti trabaho a panangasaba?

¹¹ Idi dimteng ti tiempo a maisaknap ti mensahe ti Pagarian kadagiti saan a Judio a nasion, ti nasantuan nga espiritu inturongna ni Pablo nga agmisionero idiay Asia Menor ken idiay Europa. Kuna ti salaysay ni Lucas a mabasa iti Aramid: “Bayat a [dagiti Kristiano a mammadto ken mannursuro iti kongregasion ti Antioquia idiay Siria] publiko nga agserserbida ken Jehova ken agay-ayunarda, kinuna ti nasantuan nga espiritu: ‘Kadagiti amin a tattao ilasinyo a maipaay kaniak da Bernabe ken Saulo maipaay iti aramid a nangayabak kadakuada.’ Idin nagayunarda ket nagkararagda ket impatayda kadakuada dagiti imada ket pinalubosanda ida.” (Ara. 13:2, 3) Ni Jesus a mismo ti nangawis ken Saulo iti Tarso nga agbalin a ‘napili a basehasna’ tapno ipakaammona ti nagan ni Jesus kadagiti nasion. Gapuna, daytoy a baro a pammaregta iti trabaho a panangasaba ket naggapu ken Kristo, ti Lider ti kongregasion. Ti panangusar ni Jesus iti nasantuan nga espiritu a mangiturong iti trabaho ket ad-adda a nagminar bayat ti maikadua a panagmisionero ni Pablo. Kuna ti salaysay a ti “espiritu ni Jesus,” kayatna a sawen a ni Jesus babaen ti nasantuan nga espiritu inwanwanna ni Pablo ken dagiti kakaduana no sadino ti papananda ken kaano ti panagdaliasatda. Ti sirmata inturongna ida a mapan idiay Europa.​—Basaen ti Aramid 16:6-10.

Panangidaulo ni Jesus iti Kongregasionna

12, 13. Kasano nga ipakita ti libro nga Apocalipsis nga ammo ni Kristo ti amin a mapaspasamak iti tunggal kongregasion?

¹² Naan-anay nga ammo ni Jesus ti naespirituan a kasasaad ken no ania ti mapaspasamak iti tunggal kongregasion dagiti napulotan a pasurotna idi umuna a siglo K.P. Nabatad dayta iti Apocalipsis kapitulo 2 ken 3. Innagananna dagiti pito a kongregasion, a masarakan amin idiay Asia Menor. (Apoc. 1:11) Adu ti rason a pamatiantayo nga ammona ti naespirituan a kasasaad dagiti dadduma pay a kongregasion dagiti pasurotna ditoy daga kadagidi a tiempo.​—Basaen ti Apocalipsis 2:23.

¹³ Kinomendaran ni Jesus ti dadduma kadagita a kongregasion gapu iti panagibturda, kinamatalekda iti sidong ti pakasuotan, kinasungdoda iti saona, ken panangilaksidda kadagiti apostata. (Apoc. 2:2, 9, 13, 19; 3:8) Ngem siiinget met a binalakadanna ti dadduma a kongregasion gapu ta bimmaaw ti panagayatda kenkuana ken pinanuynoyanda ti idolatria, pannakiabig, ken sektarianismo. (Apoc. 2:4, 14, 15, 20; 3:15, 16) Kas naayat a naespirituan a manangimaton iti kongregasion​—uray kadagidiay siiinget a binalakadanna​—kinuna ni Jesus: “Amin dagidiay dungdungnguek tubngarek ken disiplinaek. Gapuna agregta ken agbabawika.” (Apoc. 3:19) Uray adda ni Jesus idiay langit, idadauluanna ti kongregasion dagiti adalanna ditoy daga babaen ti nasantuan nga espiritu. Iti ngudo dagiti mensahena kadagidi a kongregasion, indeklarana: “Daydiay addaan lapayag denggenna koma ti kunaen ti espiritu kadagiti kongregasion.”​—Apoc. 3:22.

14-16. (a) Kasano a pinaneknekan ni Jesus nga isu ket natured a Lider ti ili ni Jehova ditoy daga? (b) Ania ti mangipakita nga ‘adda’ ni Jesus kadagiti adalanna “iti amin nga al-aldaw agingga iti panungpalan ti sistema ti bambanag”? (c) Ania ti usigentayo iti sumaganad nga artikulo?

¹⁴ Kas nakitatayon, ni Miguel (ni Jesus) ket maysa nga anghel ken maingel a Lider ti Israel. Idi agangay, isu ket nagtultuloy a nagserbi kas natured a Lider ken naayat a Pastor kadagiti nagkauna nga adalanna. Bayat ti ministeriona ditoy daga, indauluanna ti trabaho a panangasaba. Ken kalpasan ti panagungarna, immatonanna a mismo ti pannakaisaknap ti naimbag a damag ti Pagarian.

¹⁵ Babaen ti nasantuan nga espiritu, inmatonan ni Jesus ti pannakaisaknap ti trabaho a panangasaba agingga kadagiti ungto ti daga. Sakbay a nagpalangit ni Jesus, kinunana kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Ara. 1:8; basaen ti 1 Pedro 1:12.) Iti panangiwanwan ni Kristo, naipaay ti dakkel a panangsaksi idi umuna a siglo.​—Col. 1:23.

¹⁶ Ngem impamatmat a mismo ni Jesus nga agtultuloy daytoy a trabaho agingga iti tiempo ti panungpalan. Kalpasan a binilinna dagiti pasurotna a mangasaba ken mangaramidda kadagiti adalan iti amin a nasion, inkari ni Jesus kadakuada: “Addaak kadakayo iti amin nga al-aldaw agingga iti panungpalan ti sistema ti bambanag.” (Mat. 28:19, 20) Sipud idi naisaad kas ari idi 1914, nangnangruna nga ‘adda’ ni Kristo kadagiti adalanna ken ad-adda pay nga aktibo kas Liderda. Mausig iti sumaganad nga artikulo no kasano nga aktibo nga agtigtignay ni Jesus sipud idi 1914.

[Footnote]

Kas Repaso

• Kasano a pinaneknekan ti Anak ti Dios nga isu ket aktibo a Lider ti Israel?

• Babaen iti ania nga idadauluan ni Kristo ti kongregasion ditoy daga?

• Kasano nga inmatonan ni Kristo ti pannakaisaknap ti naimbag a damag?

• Ania ti mangipakita a naan-anay nga ammo ni Kristo ti naespirituan a kasasaad ti tunggal kongregasion?

[Ladawan iti panid 21]

“Ibaonko ti maysa nga anghel iti masanguanam”

[Ladawan iti panid 23]

Kas idi umuna a siglo, us-usaren ni Kristo dagiti “sagut a tattao” a mangipastor iti arbanna