dagiti tattao maibatay kadagiti aramidda bayat ti Aldaw ti Panangukom.

Iti Aldaw ti Panangukom, dagiti binilion a tattao maipaayandanto iti damo a gundaway nga agsursuro maipapan iti pagayatan ti Dios ken agbiag a mayannurot iti dayta. Kayat a sawen daytoy nga addanto maaramid a nasaknap a trabaho a panangisuro. Kinapudnona, “ti kinalinteg isu ti sigurado a masursuronto dagiti agnanaed iti nabunga a daga.” (Isaias 26:9) Nupay kasta, saan nga amin ket situtulok nga agbiag a mayannurot iti pagayatan ti Dios. Kuna ti Isaias 26:10: “Uray no daydiay nadangkes maipakitaan koma iti pabor, saannanto latta a masursuro ti kinalinteg. Iti daga ti kinaumiso isu agtignayto a di nainkalintegan ket saannanto a makita ti kinatan-ok ni Jehova.” Bayat ti Aldaw ti Panangukom, mapapatay ken saanton a pulos mapagungar dagitoy a nadangkes a tattao.​—Isaias 65:20.

Iti ngudo ti Aldaw ti Panangukom, ‘nagbiagton’ a naan-anay dagiti nakalasat kas perpekto a tattao. (Apocalipsis 20:5) No kasta, maisublinto ti orihinal a perpekto a kasasaad ti sangatauan bayat ti Aldaw ti Panangukom. (1 Corinto 15:24-28) Kalpasanna, addanto maudi a pannubok. Maruk-atanto ni Satanas iti nakaipupokanna ket mapalubosan a mangpadas a mangyaw-awan iti sangatauan iti maudi a gundaway. (Apocalipsis 20:3, 7-10) Dagidiay saan nga agpaallilaw kenkuana ti mangtagiragsakto iti naan-anay a kaitungpalan ti kari ti Biblia a: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Wen, pakabendisionanto ti intero a matalek a sangatauan ti Aldaw ti Panangukom!

PINULLO a tawen sakbay ti 1914, inwaragawag dagiti estudiante ti Biblia nga adda dagiti mapasamak a napateg a panagbalbaliw iti dayta a tawen. Ania dagitoy a panagbalbaliw, ken ania ti pammaneknek a napateg a tawen ti 1914?

Kas nailanad iti Lucas 21:24, kinuna ni Jesus: “Ti Jerusalem ibaddebaddekto dagiti nasion, agingga a matungpal ti naituding a pampanawen dagiti nasion [“panawen dagiti Gentil,” King James Version].” Ti Jerusalem ti kabesera a siudad ti nasion dagiti Judio a nagturayan dagiti ari a nagtaud iti kapuonan ni Ari David. (Salmo 48:1, 2) Nupay kasta, naiduma dagitoy nga ari kadagiti panguluen dagiti nasion. Nagtugawda iti “trono ni Jehova” kas pannakabagi ti Dios a mismo. (1 Cronicas 29:23) No kasta, ti Jerusalem ket simbolo ti turay ni Jehova.

Ngem kasano ken kaano a nangrugi nga ‘imbaddebaddek dagiti nasion’ ti turay ti Dios? Napasamak daytoy idi 607 K.K.P. idi sinakup dagiti taga-Babilonia ti Jerusalem. Nabakantean ti “trono ni Jehova,” ket awan pay laeng ti nagturay nga ari a nagtaud iti kapuonan ni David. (2 Ar-ari 25:1-26) Agnanayon kadi daytoy a ‘pannakaibaddebaddek’? Saan, ta kuna ti padto ni Ezequiel maipapan iti maudi nga ari ti Jerusalem a ni Zedekias: “Ikkatem ti turbante, ket uksotem ti korona. . . . Sigurado nga awanto ti agtagikua iti dayta agingga nga umay daydiay addaan iti legal a kalintegan, ket itedkonto dayta kenkuana.” (Ezequiel 21:26, 27) Ni Jesu-Kristo ti addaan iti “legal a kalintegan” iti korona ni David. (Lucas 1:32, 33) Agpatingga ngarud ti ‘pannakaibaddebaddek’ no nagbalinen nga Ari ni Jesus.

Kaano a naaramid dayta a nagpateg a pasamak? Impakita ni Jesus nga agturay dagiti Gentil iti las-ud ti naituding a panawen. Naglaon ti salaysay ti Daniel kapitulo 4 iti pamalatpatan no kasano ti kapaut dayta a panawen. Maipapan dayta iti naimpadtuan a tagtagainep ni Nabucodonosor nga ari ti Babilonia. Nakita ni Nabucodonosor a napukan ti maysa a nagdakkel a kayo. Saan a makapagsaringit ti puonna agsipud ta nabedbedan iti landok ken gambang. Kinuna ti anghel: “Aglabas koma iti dayta ti pito a panawen.”​—Daniel 4:10-16.

Iti Biblia, mausar no dadduma dagiti kayo a mangiladawan iti turay. (Ezequiel 17:22-24; 31:2-5) Ti ngarud pannakapukan ti simboliko a kayo iladladawanna ti panagpatingga ti turay dagiti ari iti Jerusalem a nangirepresentar iti turay ti Dios. Nupay kasta, impakita ti sirmata a temporario daytoy a ‘pannakaibaddebaddek ti Jerusalem’​—iti las-ud ti “pito a panawen.” Kasano ti kapaut dayta a panawen?

Ipakita ti Apocalipsis 12:6, 14 a “sangaribu dua gasut ket innem a pulo nga aldaw” ti katupag ti tallo ket kagudua a panawen. No madoble dayta a panawen, katupagna ngarud ti “pito a panawen,” wenno 2,520 nga aldaw. Ngem saan a nagpatingga dagiti Gentil a nasion a ‘nangibaddebaddek’ iti turay ti Dios iti las-ud laeng ti 2,520 nga aldaw kalpasan ti pannakatnag ti Jerusalem. Nalawag ngarud nga at-atiddog nga amang ti panawen a saklawen daytoy a padto. Maibatay iti Numeros 14:34 ken Ezequiel 4:6, a nangdakamat iti “maysa nga aldaw maipaay iti maysa a tawen,” 2,520 a tawen ti saklawen ti “pito a panawen.”

Nangrugi ti 2,520 a tawen idi Oktubre 607 K.K.P. idi sinakup dagiti taga-Babilonia ti Jerusalem ket napatapuak iti tronona ti ari a nagtaud iti kapuonan ni David. Nagpatingga dayta a panawen idi Oktubre 1914. Iti daydi a tawen, nagpatingga “ti naituding a tiempo dagiti nasion,” ket ti Dios insaadna ni Jesu-Kristo kas Ari idiay langit.a​—Salmo 2:1-6; Daniel 7:13, 14.

Kas impadto ni Jesus, ti ‘kaaddana’ kas nailangitan nga Ari ket mailasin babaen kadagiti nakadkadlaw a pasamak iti lubong kas iti gubat, bisin, ginggined, ken angol. (Mateo 24:3-8; Lucas 21:11) Nalawag a paneknekan dagita a pasamak nga idi 1914 a naipasngay ti nailangitan a Pagarian ti Dios ken nangrugi dagiti “maudi nga aldaw” daytoy agdama a dakes a sistema ti bambanag.​—2 Timoteo 3:1-5.

MANMANO a nadakamat iti Biblia ti espiritu a parsua nga agnagan Miguel. Nupay kasta, tunggal madakamat, adda ar-aramidenna. Iti libro a Daniel, makirangranget ni Miguel kadagiti dakes nga anghel; iti surat ni Judas, makisupsupiat ken ni Satanas; ket iti Apocalipsis, makigubgubat iti Diablo ken kadagiti demoniona. Babaen ti panangidepensana iti turay ni Jehova ken pannakidangadangna kadagiti kabusor ti Dios, pampaneknekan ni Miguel ti kaipapanan ti naganna​—“Siasino ti Umasping iti Dios?” Ngem siasino ni Miguel?

Adda dagiti tattao a no dadduma, saan laeng a maymaysa ti pagaammo a naganda. Kas pagarigan, maawagan met ni patriarka a Jacob iti Israel, ket ni apostol Pedro napanaganan met iti Simon. (Genesis 49:1, 2; Mateo 10:2) Umasping iti dayta, ipakita ti Biblia a ti Miguel ket sabali pay a nagan ni Jesu-Kristo, sakbay ken kalpasan ti panagbiagna ditoy daga. Usigentayo dagiti Nainkasuratan a pangibatayan iti dayta a konklusion.

Arkanghel. Iti Sao ti Dios, maawagan ni Miguel kas “arkanghel.” (Judas 9) “Pangulo nga anghel” ti kaipapanan daytoy a sao. Nausar laeng iti Biblia ti sao nga “arkanghel” iti anag a maymaysa ken pulos a di nausar ti sasao a “dagiti arkanghel,” a kas man la aduda. Ipasimudaag daytoy a maymaysa laeng ti kasta nga anghel. Maysa pay, nainaig ken ni Jesus ti saad nga arkanghel. Maipapan ken ni napagungar nga Apo Jesu-Kristo, kuna ti 1 Tesalonica 4:16: “Ti Apo a mismo bumabanto manipud langit buyogen ti agbilbilin nga awag, buyogen ti timek ti maysa nga arkanghel.” No kasta, nailadawan ti timek ni Jesus