Ti Kinapudno Mabalbaliwanna ti Biagmo
MABALIN a nangngegmon wenno naisuro kenka ti maysa kadagiti kinaulbod maipapan iti Dios a naibutaktak kadagiti agsasaruno nga artikulo. Ngem mabalin a dimo latta kayat a baliwan ti pammatim, nangnangruna no nabayagen a patpatiem dagita.
Mabalin a dimo kayat a baliwan ti pammatim ta iparit ti relihionmo nga idiligmo ti sursuroda iti kunaen ti Biblia. Ikalintegan met ti dadduma dagitoy a kinaulbod nga ibagada a komplikado ti Biblia, a manmano laeng kano ti makatarus iti dayta. Ngem kaaduan nga adalan ni Jesus ket ordinario a tattao, nga awan nangato a nagadalanda, ngem nalaka a natarusanda ti insurona.—Aramid 4:13.
Mabalin met a dimo kayat a sukimaten dagiti patpatiem ta ipapanmo a kasla ipakpakitam a kurang ti pammatim. Ngem agpayso ngata a di maay-ayo ti Dios no sukimatem ti Biblia, ti mensahena iti sangatauan, tapno maammuam ti kidkiddawenna kenka? Saan. Imbes ketdi, iparegta ti Saona nga ammuem ti “naimbag ken makaay-ayo ken naan-anay a pagayatan ti Dios.”—Roma 12:2.
Ti pannakaammo iti kinapudno saanna laeng a nayonan ti ammom no di ket pasayaatenna pay ti biagmo. (Juan 8:32) Ni Deanne, a nadakamat iti damo nga artikulo, naaddaan iti natibker a pammati iti Sao ti Dios. Kunana: “Nabigbigko a nakalawlawag ti linaon ti Biblia idi rinugiak nga adalen dayta. Am-ammokon ni Jehova, saan a kas Dios a di maseknan, no di ket kas naayat a nailangitan nga Amatayo. Nasarakakon ti pudpudno a panggep ti biag.”
Mabalin nga inadalmo idin ti Biblia ngem nariknam a kasla awan ti naitulongna kenka. Dika koma maupay. No kayatmo a tarusan ti Biblia ngem palso met dagiti naisuro kenka maipapan iti Dios, arigna bukbuklem ti maysa a puzzle ngem sabali met ti pagibasbasaram a ladawan. Mabalin nga umiso ti nangikabilam iti sumagmamano a piesa ngem insardengmo idi makitam a sabali a ladawan ti nabukelmo. Ngem no umiso a ladawan ti naited kenka, maikabilmonto ti amin a piesa ti puzzle iti umiso a lugarda.
Kayatmo kadi a maammuan ti kinapudno maipapan iti Dios? Mabalin a makisaritaka kadagiti Saksi ni Jehova iti lugaryo wenno agsuratka iti adres iti panid 4 daytoy a magasin tapno agkiddawka iti libre a panagadal ti Biblia.
[Blurb iti panid 9]
Ammuem ti “naimbag ken makaay-ayo ken naan-anay a pagayatan ti Dios.”—ROMA 12:2