Inlawlawag a mismo ti Dios ti kaipapanan ti naganna iti matalek nga adipenna a ni Moises. Idi sinaludsod ni Moises ti nagan ti Dios, insungbat ni Jehova: “Agbalinakto no anianto ti pagbalinak.” (Exodo 3:14) Kastoy ti panangipatarus ni Rotherham: “Agbalinakto iti aniaman a kayatko a pagbalinan.” No kasta, mapagbalin ni Jehova ti bagina iti aniaman a nasken a pagbalinanna tapno matungpal dagiti panggepna.

Ipapantayon a mapagbalinmo ti bagim iti aniaman a kayatmo a pagbalinan. Ania ti aramidem maipaay kadagiti gagayyemmo? No nakaro ti sakit ti maysa kadakuada, mapagbalinmo ti bagim a nalaing a doktor ket paimbagem. No nalugi iti negosio ti sabali pay, mapagbalinmo ti bagim a nabaknang a pilantropo ket tulongam a mangrisut iti parikutna. Ngem iti kinapudnona, dimo mapagbalin ti bagim iti aniaman a kayatmo a pagbalinan. Kastatayo amin. Iti panagadalmo iti Biblia, masdaawkanto a makatakuat no kasano nga agbalin ni Jehova iti aniaman a nasken a pagbalinanna tapno matungpal dagiti karina. Ket pagragsakanna nga usaren ti pannakabalinna a maipaay kadagidiay mangay-ayat kenkuana. (2 Cronicas 16:9) Dagidiay di makaammo iti nagan ni Jehova saanda nga ammo dagitoy a makaay-ayo a paset ti personalidadna.

Nalawag ngarud a rumbeng nga usaren ti nagan a Jehova iti Biblia. Ti panangammo iti kaipapananna ken ti nawaya a panangusar iti dayta iti panagdayawtayo ket makatulong unay tapno ad-adda a sumingedtayo iti nailangitan nga Amatayo, ni Jehova.a

NAGBIAG ni propeta Daniel nasurok a 500 a tawen sakbay ti pannakayanak ni Jesus. Nupay kasta, ni Jehova adda impalgakna ken ni Daniel a tumulong a mangipakita no kaano a napulotan wenno nadutokan ni Jesus kas Mesias, wenno Kristo. Naikuna ken ni Daniel: “Rebbeng nga ammuem ken maaddaanka iti pannakatarus a manipud iruruar ti sao a mangisubli ken mangbangon manen iti Jerusalem agingga iti Mesias a Panguluen, addanto pito a lawas, kasta met innem a pulo ket dua a lawas.”​—Daniel 9:25.

Tapno maammuam no kaano a nagparang ti Mesias, masapul nga ammuentayo nga umuna no kaano a mangrugi ti panawen a palabsen agingga iti panagparang ti Mesias. Sigun iti padto, mangrugi dayta “manipud iruruar ti sao a mangisubli ken mangbangon manen iti Jerusalem.” Kaano a ‘nairuar ti sao’? Sigun iti mannurat iti Biblia a ni Nehemias, naibilin ti pannakabangon manen dagiti bakud ti Jerusalem “iti maikaduapulo a tawen ni Artaxerxes nga ari.” (Nehemias 2:1, 5-8) Pasingkedan dagiti historiador a ti umuna a tawen ti panagturay ni Artaxerxes ket idi 474 K.K.P. No kasta, ti maika-20 a tawen ti panagturayna ket idi 455 K.K.P. Idi ngarud 455 K.K.P. a nangrugi a matungpal ti padto ni Daniel maipapan iti Mesias.

Ipakita ti libro a Daniel ti kapaut ti panawen a palabsen agingga iti panagparang ti “Mesias a Panguluen.” Dinakamat ti padto ti “pito a lawas, kasta met innem a pulo ket dua a lawas”​—agdagup iti 69 a lawas. Kasano ti kapaut daytoy a panawen? Kuna ti adu a patarus ti Biblia a dagitoy ket saan a lawas a buklen ti sagpipito nga aldaw, no di ket lawas ti tawtawen. Kayatna a sawen, pito a tawen ti kaibatogan ti tunggal lawas. Gagangay kadagiti nagkauna a Judio ti maipapan iti lawas ti tawtawen, wenno sagpipito a tawen. Kas pagarigan, ngilinenda idi ti Sabbath iti kada maikapito a tawen. (Exodo 23:10, 11) Gapuna, ti naipadto a 69 a lawas ket mamin-69 a pito a tawen, wenno agdagup iti 483 a tawen.

Agbilang laengen ti aramidentayo. No agbilangtayo manipud 455 K.K.P., agpatingga ti 483 a tawen iti 29 K.P. Dayta ti eksakto a tawen a pannakabautisar ken panagbalin ni Jesus a Mesias!a (Lucas 3:1, 2, 21, 22) Saan aya a nakaskasdaaw dayta a kaitungpalan ti padto ti Biblia?

TAPNO maammuantayo no asino ti Mesias, adu a propeta a nagsurat iti Biblia ti pinaltiingan ni Jehova a Dios a mangipalgak kadagiti detalye maipapan iti pannakayanak, ministerio, ken ipapatay daytoy a naikari a Mangisalakan. Natungpal amin dagitoy a padto ti Biblia ken ni Jesu-Kristo. Nakaskasdaaw ti kinaumiso ken ti pannakatungpal ti amin a detalye dagita a padto. Kas pagarigan, usigentayo ti sumagmamano a padto a nangipakpakauna kadagiti pasamak a mainaig iti pannakayanak ken panagubing ti Mesias.

Impadto ni propeta Isaias a ti Mesias ket agtaud iti kapuonan ni Ari David. (Isaias 9:7) Ket pudno a nayanak ni Jesus iti kapuonan ni David.​—Mateo 1:1, 6-17.

Impadto ni Mikias, maysa pay a propeta ti Dios, nga agturayto daytoy nga ubing ken mayanak idiay “Betlehem Efrata.” (Mikias 5:2) Idi panawen a nayanak ni Jesus, dua nga ili iti Israel ti napanaganan iti Betlehem. Ti maysa, adda iti asideg ti Nazaret iti makin-amianan a deppaar ti pagilian, ket ti sabali, adda iti asideg ti Jerusalem idiay Juda. Efrata ti dati a nagan ti Betlehem nga asideg iti Jerusalem. Iti dayta a mismo nga ili a nayanak ni Jesus, kas naipadto!​—Mateo 2:1.

Impakauna ti sabali pay a padto ti Biblia a maayaban “manipud idiay Egipto” ti Anak ti Dios. Idi ubing pay ni Jesus, naipan idiay Egipto, ket naipanaw sadiay kalpasan ti ipapatay ni Herodes, iti kasta natungpal ti padto.​—Oseas 11:1; Mateo 2:15.

Iti tsart a napauluan iti “Dagiti Padto Maipapan iti Mesias,” naglaon dagiti teksto a nailista iti babaen ti paulo a “Padto” kadagiti detalye maipapan iti Mesias. Idiligmo dagitoy kadagiti teksto a nailista iti babaen ti paulo a “Kaitungpalan.” No aramidem dayta, bumileg ti pammatim iti kinapudno ti Sao ti Dios.

Bayat a suksukimatem dagitoy a teksto, laglagipem a naisurat dagiti padto ginasut a tawen sakbay pay a nayanak ni Jesus. Kinuna ni Jesus: “Ti amin a bambanag a naisurat maipapan kaniak iti linteg ni Moises ken kadagiti Mammadto ken kadagiti Salmo masapul a matungpal.” (Lucas 24:44) Kas silalawag nga ipakita a mismo ti Bibliam, natungpal ti amin ken uray ti kabassitan a detalye dagitoy a padto!

KUNA dagiti tattao a mamati iti Trinidad nga adda tallo a persona a mangbukel iti Dios​—ti Ama, ti Anak, ken ti Nasantuan nga Espiritu. Mannakabalin-amin, awan nangrugianna, ken agpapada kano dagitoy a tallo a persona. No kasta, sigun iti doktrina a Trinidad, ti Ama ket Dios, ti Anak ket Dios, ken ti Nasantuan nga Espiritu ket Dios, ngem kaskasdi a maymaysa ti Dios.